వైరస్‌లను తుదముట్టించే కొత్త ముఖ కవచాన్ని "డిఫెన్స్‌ ఇన్‌స్టిట్యూట్‌ ఆఫ్‌ అడ్వాన్స్‌డ్‌ టెక్నాలజీ" (డైయట్‌) అభివృద్ధి చేసింది. ఆయుర్వేద మూలికల ఆధారంగా దీనిని రూపొందించింది. ఈ మాస్క్‌కు "పవిత్రపతి"గా పేరు పెట్టింది. ఈ మాస్క్‌కు భూమిలో కలిసిపోయే గుణం ఉంది. వేప నూనె, పసుపు, కృష్ణతులసి, వాము, నల్ల మిరియాలు, తుమ్మజిగురు, లవంగాలు, చందనం, కుంకుమపువ్వు సారాలను ఉపయోగించి పవిత్రపతి మాస్కును తయారు చేశారు. అందువల్లే ఇది బాక్టీరియా, వైరస్‌, ఫంగస్‌ నాశినిగా పని చేస్తుంది. మూడు పొరలుగా రూపొందించిన మాస్క్‌ లోపలకు చెమ్మ, తుంపరలు, బాక్టీరియా, వైరస్‌ చేరలేవని రుజువైంది. గాలి ద్వారా వ్యాపించే ఏ విధమైన అంటువ్యాధులనైనా అడ్డుకునేందుకు, బయటకు వెళ్లేటప్పుడు మామూలు మాస్క్‌లా ధరించేందుకు ఇది ఉపయోగపడుతుంది.

    ధరించినవారికి సులభంగా శ్వాస ఆడటంపై 'ఏఎస్‌టీఎమ్‌ డీ-737' ప్రమాణాలను; పర్యావరణహిత, తయారీ అంశాల్లో 'ఏఎస్‌టీఎమ్‌' ప్రమాణాలను ఈ మాస్క్‌ అందుకుంది.

    మాస్క్‌ తయారీలో ఉపయోగించిన పదార్థాల సారం వైరస్‌ను నశింపజేసి, ధరించినవారికి రక్షణ కల్పిస్తుంది. 
వ్యక్తిగత రక్షణ పరికరాల (పీపీఈ) తరహాలో దీనిని భారీస్థాయిలో ఉత్పత్తి చేయనున్నారు. మడతపెట్టి వెంట తీసుకెళ్లగలిగేలా దుస్తులు, గ్లోవ్స్‌, గౌన్‌, ముఖ కవచం, తల ముసుగు రూపాల్లో రూపొందించనున్నారు. ప్రొటీన్‌ అణువులను స్వభావరహితం చేసేందుకు కొన్ని నమూనాలను కూడా పరీక్షించి విజయం సాధించారు. భారీ స్థాయిలో ఉత్పత్తి చేయగల సామర్థ్యమున్న తయారీ సంస్థలకు ఈ రక్షణ కవచాల తయారీ పరిజ్ఞానాన్ని ఉచితంగా అందించాలని డైయట్‌ నిర్ణయించింది. వీటి తయారీకి కొన్ని సంస్థలు ఇప్పటికే ఆసక్తి కనబరిచాయి.
 

***

(రిలీజ్ ఐడి: 1631681) సందర్శకుల సూచీ సంఖ్య : : 238