ঐগী নুংশিরবা ভারত মচাশিং,

মমাং চহিগী নুমিৎ অসিদা ভারতকী গনতন্ত্রগী পুৱারীদা সনাগী তাঙ্কক অমা হৌখি। চহি কয়াগী মতুংদা লৈবাক অসিগী মীয়ামনা মপুং ফাবা মেজোরিতী অমগা লোয়ননা তার্ম শুরবা সরকার অমা অমুক হন্না খল্লকখি।

অমুক হন্না, ভারত মচা করোর ১৩০ অমসুং ঐখোয়গী লৈবাক্কী গনতন্ত্রগী কাংলোনশিংদা অমুক হন্না ঐনা কোক নোঞ্জরি। অতৈ মতমশিংদা, ঐ অদোমগী মরক্তা পুনগদবনি। অদুবু হৌজিক ওইরিবা ফিবম অসিনা মদু ওইথোক্ত্রে। মরম অদুনা, ঐনা মসিগী চিথী অসিগী খুৎথাংদা ঐনা অদোমগী বর নীজরি।

অদোমগী মীনুংশিং, অফবা পাউজেল অমসুং ফজনা মতেং পাংবা অসিনা অনৌবা থৌনা অমসুং ইথিল পীরি। অদোমনা উৎলিবা গনতন্ত্রগী অপুনবা পাঙ্গল অদুনা মালেম পুম্নমক্কী লমজিং মৈরা অমা ওইরি।

২০১৪দা অওনবা অমা পুরক্নবা লৈবাক্কী মীয়াম্না ভোৎ পীখি। হৌখিবা চহি মঙাদা, লৈবাক অসিনা কমদৌনা লৈঙাক্কী খুৎলায়শিং হান্নগী ফিবমদগী অমসুং শেঞ্জা-থুমজা অমসুং অরানবা লৈঙাক্তগী মনীংতম্লকপগে হায়বা অদু উখি। ‘অন্ত্যোদয়’গী অচুম্বা ৱাখল্লোন্দা মীওই মিল্লিয়ন কয়াগী পুন্সিদা অওনবা পুরকখি।

২০১৪দগী ২০১৯ ফাওবদা ভারতকী ফিবম শিংথাবা য়ানা ফগৎলকখি। লায়রবশিংগী ফিবম ফগৎলকখি। লৈবাক্কী মীয়াম শেন-থুমগী কান্নবা ফংহনখি, লেম্না গ্যাস অমসুং মৈ ফংহনখি, সেনিতেসন ফংহনখি অমসুং মী খুদিংমক য়ুম লৈনবা থবক পায়খৎলি।

সর্জিকেল স্ত্রাইক অমসুং এয়র স্ত্রাইক চৎথদুনা ভারতকী থৌনা উৎখি। চহি কয়া তক্নদুনা লাকপা ও.আর.ও.পি., লৈবাক অমা তেক্স অমা জি.এস.তি., লৌমীশিংগী হেন্না ফবা এম এস পি থবক ওইনা পাংথোকখি।

ভারত অনৌবা থাক অমদা পুখৎনবা ২০১৯দা ভারতকী মীয়াম্না ভোৎ পীখি। ভারত অসি মালেমগী লুচিংবা অমা ওইনবা মঙলান অমদা ভোৎ পীখি। হৌখিবা চহি ১দা লৌখিবা ৱারেপ অদু মসিগী মঙলান অসি মঙফাওননবনি।

ঙসিদি, ভারত মচা করোর ১৩০ ভারতকী চাউখৎপগী খোঙচৎতা শরুক য়ারি। জন শক্তি অমসুং রাস্ত্র শক্তিগী মঙালনা লৈবাক পুম্নমক মৈ চুরে। সবকা সাথ, সবকা বিকাস, সবকা বিশ্বাসকী লাইৱানা ভারত অসি হিরম খুদিংমক্তা মাংদা চংশিল্লি।

ঐগী নুংশিরবা ভারত মচাশিং,

লৈবাক্কী অপুনবা শক্তমদা আর্তিকল ৩৭০না মতেং পাংখি। ভারতকী সুপ্রিম কোর্তনা ৱায়েন পীদুনা চহি চা কয়া য়েৎনদুনা লাকপা রাম মন্দির শাবগী ৱাফম মরূপ-মপাং ওইনা য়ানবা পুরক্লে। ত্রিপল তালাক্কী তমথিরবা চৎনবী পুৱারীগী লুখাক কোমদা থাদখ্রে। সিতিজনসিপ এমেন্দমেন্ত এক্ত শেমদোক্তুনা ভারতকী মীনুংশিং অমা উৎখি।

লৈবাক্কী চাউখৎপগী খোঙজেলদা ইনোৎ পীবা অতৈ ৱারেপ কয়া লৌখি। মতম অসিদা, ভারতনা মিসন গাগনয়ানগী থৌরাং তৌখি।

লায়রবশিং, লৌমীশিং, নুপীশিং অমসুং নহারোলশিং থৌনা পীবা অসি ঐখোয়গী মরুওইবা থবক্নি। হৌজিক লৌমী খুদিংমক পি.এম. কিশান সম্মান নীধিনা কোনশিল্লে। চহি অমদা লৌমী করোর ৯.৫০ হেনবগী একাউন্তশিংদা লুপা করোর ৭২,০০০ হাপখি।

জল জীবন মিশন্না খুঙ্গংগী য়ুম করোর ১৫ হেনবদা থক্নবা তোতিগী ঈশিং ফংহনগনি। ঐখোয়গী শা-শন করোর ৫০ হেনবা মশা ফনা লৈনবা লেম্না তিকা থাবগী থবক পাংথোক্লে।

লৈবাক অসিদা অহানবা ওইনা, লৌমীশিং, শিন্মীশিং অমসুং অপীকপা দুকান ফম্বা মীওইশিং চহি ৬০গী মতুংদা থাগী লুপা ৩০০০গী পেন্সন চাংনাইনা পীরগনি।

বেঙ্ক লোন ফংহনবগী মথক্তা, ঙামীশিংগী তোখাইবা দিপার্তমেন্ত অমা লিংখৎলে। ঙা ফাবগী থবকশিং ফগৎহন্নবা অতোপ্পা ৱারেপ কয়া লৌরে। মসিনা ব্লু ইকোনোমী ফগৎহনগনি।

ললোনবশিংগী খুদোংচাদবশিং মতম চানা লোইশিন্নবা ব্যাপারী কল্যান বোর্দ অমা শেম্নবা ৱারেপ লৌরে। সেল্ফ হেল্প গ্রুপশিংগী নুপী করোর ৭ হেনবদা অহেনবা শেনফম পীগনি। মমাংদা সেল্ফ হেল্প গ্রুপশিংদা গরেন্তী য়াওদনা লুপা লাখ ১০ ফাওবা লোন পীরম্বা অদু হৌজিক লুপা লাখ ২০দা হেনগৎলে।

ত্রাইবেল অঙাংশিংগী লাইরিক তম্নবা অনৌবা একালব্য মোদেল রেসিদেন্সিয়েল স্কুল ৪০০ শাবা হৌরে।

হৌখিবা চহীদা, মীয়ামগী য়াইফনবা আইন কয়া চৎনবা হৌরে। ঐখোয়গী সংসদ অসি থবক ফজনা পাংথোকপগী চহী কয়া কুইরবা রিকোর্দশিং থুগাইরে। মসিগী মহৈ ওইনা কঞ্জুমর প্রোতেক্সন এক্ত, চিত ফন্দ লো এমেন্দমেন্ত তৌরে, নুপীশিং, অঙাংশিং অমসুং দিব্যাংশিংগী য়াইফনবা লোশিং পাস তৌরে।

সরকারগী থৌশিলশিংগী মহৈ ওইনা খুঙ্গং অমসুং শহরগী খেন্নবা হন্থরক্লে। অহানবা শহরশিংদগী হেন্না ভারতকী খুঙ্গংগী মীওইশিংনা ইন্তরনেৎ শিজিন্নবা চাদা ১০ হেল্লে।

অসিগুম্বা লৈবাক্কী য়াইফনবা পায়খৎখিবা থবকশিং মসিগী চিথী অসিদা পনবদা য়াম্না শাংলগনি। ঐনা হায়রি মদুদি, চহি অসিদা নুমিৎ খুদিং ঐগী সরকারনা থৱায় য়াওনা মসিগী ৱারেপশিং অসি থবক ওইনা পাংথোক্লি।

ঐখোয়গী মীয়ামগী অনীংবশিং থুংহন্নবা য়াম্না য়াংনা থবক পায়খৎলিঙৈদা, কোরোনাভাইরস লাইচৎনা ঐখোয়গী লৈবাক অৱাবা তাহল্লে।

লৈবাক খরনা শেন-থুম য়াম্না ফরি অমসুং অফবা অনা-লায়েংগী খুদোংচাবশিং লৈরি অদুগা ঐখোয়গী লৈবাক্না মী য়াম্বা অমসুং অৱাৎপা কয়া লৈবগী অৱাবা মায়োক্নরি।

ভারত্তা কোরোনা লাকপা মতমদা মালেমগী চৈথেং অমা ওইগনি হায়না অয়াম্বনা কিনখি। অদুবু ভারতকী অপুনবা থৌনা অমসুং ভারত মচাশিংগী তৌবা ঙম্বশিং অদুনা মালেমগী তৌবা ঙমবা অমসুং ইনাক খুল্লবা লৈবাকশিংগী লাম্বা তৌনরে। ভারতকী লান্মীশিংনা কোরোনা লান্মীশিং ইকায়খুম্নবা উৎতুনা খুবাক খুবা অমসুং মৈ থানবা, জনতা কর্ফ্যু নৎত্রগা লোকদাউন মীয়াম্না ইনবা অসিনা শ্রেস্থ ভারতগীদমক অদোম্না এক ভারত অদু উৎপনি।

লাইচৎ অসিনা কনাগুম্বা মীওই অমতা অৱাবা চৈথেং পীদে হায়বা য়ারোই। মসিনা ঐখোয়গী শিন্মীশিং, কোইনা চৎলগা থবক শুরিবা শিন্মীশিং, খুৎহৈবশিং, হোকরশিং অমসুং অপীকপা উদ্যোগশিংদা থবক শুরিবা শিন্মীশিংদা চাউনা চৈথেং পীখি। মসিগী অৱাবশিং অসি কোকহন্নবা ঐখোয়না অমতা ওইনা থবক পায়খৎলি।

ভারতমচা খুদিংমক্না নিয়মশিং ইনবা দরকার ওই। ঐখোয় খাংবা কনগদবনি। মসি ভারতনা অতৈ লৈবাকশিংদগী হেন্না ফবগী মরুওইবা মরম অমনি। মসিগী লানফম অসি য়াম্না কুইগনি অমসুং ঐখোয়গী অপুনবা ৱারেপ অদু ঐখোয়গী মাইপাকপনি।

হৌখিবা নুমিৎ খরনিগী মমাংদা, অকনবা নোংলৈ নুংশিৎ অমনা নোংচুপ বঙ্গাল অমসুং ওরিশাগী মফমশিং অমাং-অতা থোকহনখি। রাজ্যশিং অদুগী মীয়ামগী খাংবা কনবা অদুনা ভারতকী মীয়ামদা ইথিল পীরি।

নুংশিরবা মরূপশিং,

ভারত য়াওনা লৈবাক কয়াগী ইকোনোমী কমদৌনা অমুক ফগৎলক্কনি হায়না মরৈ য়েৎনরি। অদুবু কোরোনাভাইরস থেংননবা লৈবাক অসিনা লৌরিবা ৱারেপ অমসুং অপুনবা অসিনা মালেম অসি অঙকপা পোকহল্লে। ইকোনোমী অমুক হিঙ্গৎলকপদা ঐখোয়না খুদম অমা ওইগনি হায়না চপ চাবা থাজবা অমা লৈরি। শেন-থুমগী ওইনা, ভারতমচা করোর ১৩০না মালেম অসি অঙকপা পোকহনবতা নত্তনা লৈবাক অসিনা ইথিল পীগনি।

তাঞ্জা অসি ঐখোয় ইশা ইরোমদোম লেপচবা ঙমগদবনি। মসি ঙম্নবগী অমতা ঙাইরবা লম্বীদি-আত্মনির্ভর ভারত নৎত্রগা মশা-মরোমদোম লেপচবা ভারতনি। আত্মনির্ভর ভারতকীদমক হন্দক লুপা করোর লাখ ২০গী পেকেজ অমা পীখিবা অদু মাইকৈ অসিগী অচৌবা খোঙথাং অমনি।

মসিগী থবক অসিনা ঐখোয়গী লৌমীশিং, শিন্মীশিং, অপীকপা ওন্ত্রপ্রিনরশিং অমসুং নহারোলশিংদা অনৌবা খুদোংচাবা অমা পীগনি। ভারতকী লৈহাওদা হুমাংগা লোয়ননা থবক কন্না শুদুনা অমসুং ঐখোয়গী শিন্মীশিংগী পোৎথোকশিংনা ভারতনা মপান লৈবাকশিংদগী পুশিল্লকপা হন্থগনি অমসুং মশা-মরোমদোম লেপচবা ঙম্লক্কনি।

নুংশিরবা মরূপশিং,

হৌখিবা চহি ৬ অসিদা, অদোম্না ঐঙোন্দা লেপ্তনা নুংশিবগা লোয়ননা থৌজাল পীরি। অদোমগী বরশিং অদুনা হৌখিবা চহিদা লৈবাক অসিনা পুৱারী ওইরবা ৱারেপ কয়া লৌখি। অদুবু পাংথোক্কদবা থবক কয়া লৈরি হায়বা ঐ খঙই। ঐখোয়গী লৈবাক্না অৱাবা কয়া থেংনরি। ঐনা অহিং-নুংথিল থবক শুরি। ঐগী অশোইবা কয়া লৈরম্বা য়াই অদুবু ঐখোয়গী লৈবাক্কী অৱাৎপা অমত্তা লৈতে। অদোম, অদোমগী পাঙ্গল অমসুং অদোমগী তৌবা ঙম্বদা ঐ ইশা থাজবদগী হেন্না ঐনা থাজবা থম্লি।

অদোম, অদোম্না শৌগৎপা, বর অমসুং নুংশিবনা ঐনা ৱারেপ লৌবা ঙম্বগী থৌনাগী হৌরকফম্নি। মালেমগী লাইচৎ অসিনা অৱাবা তারবসু মসিনা ঐখোয় ভারত মচাশিং অচেৎপা ফিরেপ অমা লৌনবা মতম অমনি। মীওই করোর ১৩০গী হৌজিক অমসুং তুংগী ফিবম অসি করিগুম্বা অৱাবা ফিবম অমত্তনা মাইথিবা পীবা ঙম্লোই হায়বা ঐখোয়না নীংশিংগদবনি।

ঐখোয়না ঐখোয়গী হৌজিক অমসুং তুংগী লাইবক লেপচগনি।

ঐখোয় মাংলোমদা চংশিনগনি অমসুং মাই পাকপা অদু ঐখোয়গী ওইগনি।

করিগুম্বা ঐখোয়গী খুৎ অমদা থবক অমসুং থৌদাং লৈরবদি, অতোপ্পা খুৎ অমদা শোইদনা মাইপাকপা লৈগনি।

ঐখোয়গী লৈবাক মাইপাক্নবা, ঐনা অমুক হন্না অদোম ময়ামদা কোক নোঞ্জরি।

অদোম অমসুং অদোমগী ইমুং-মনুংদা ঐগী য়াইফ-পাউজেল পীজরি।

হকচাং ফনা লৈসি, লেংদনা লৈসি !!!

মিকুপ-নাহুম শিংনা লৈসি, ই-পাউ খঙসি !!!

অদোমগী প্রধান সেবক

***