نئی دلّی  ،  16  مئی  / حکومتِ ہند  ،  مغربی بنگال سرکار   اور  ایشین انفرا اسٹرکچر  انوسٹمنٹ  بینک  ( اے آئی آئی بی  ) نے  مغربی بنگال میں   آبپاشی کی خدمات کو بہتر بنانے  اور دامودر   وادی  کمان علاقے    ( ڈی وی سی اے ) میں سیلاب کے بندوبست   کے لئے 145 ملین امریکی ڈالر    کے پروجیکٹ   کے لئے  قرض کے ایک معاہدے پر دستخط کئے ہیں ۔      

          مغربی بنگال  کے بڑے آبپاشی  اور سیلاب کے بندوبست  پروجیکٹ  سے     مغربی بنگال کے    5 اضلاع  کے  تقریباً 27 لاکھ کسانوں کو فائدہ پہنچے گا ، جہاں  393964  ہیکٹیئر علاقے میں آبپاشی کی بہتر خدمات  فراہم ہوں گی اور  سالانہ سیلاب سے   بہتر تحفظ حاصل ہو گا  اور  آب و ہوا میں تبدیلی کے اثرات   کو کم  کیا جا سکے گا ۔  

          اس معاہدے پر   حکومتِ ہند کی طرف سے  وزارتِ خزانہ میں  اقتصادی امور کے محکمے  کے ایڈیشنل سکریٹری   جناب سمیر کمار کھرے    نے  ،  مغربی بنگال سرکار کی جانب سے   پرنسپل ریزیڈنٹ  کمشنر   جناب کرشنا گپتا   اور اے آئی آئی  بی کی جانب سے   ( کار گزار )  ڈائریکٹر جنرل جناب رجت مشرا نے دستخط کئے   ۔

          حکومتِ ہند کی وزارت خزانہ   کے اقتصادی  امور کے محکمے  کے ایڈیشنل سکریٹری   جناب سمیر کمار کھرے نے کہا کہ   بھارت   ایک ایسی  اسٹریٹیجک  راہ اپنا رہا ہے  ، جس میں   اُس کے آبی وسائل  کا زیادہ موثر طور پر استعمال  اور بندوبست  ہو سکے ۔  انہوں نے کہا کہ یہ پروجیکٹ  دامودر وادی  کمان  علاقے میں    سطحی اور زیر زمین  پانی کے  استعمال کو   بہتر بناکر   اور  سیلاب کے بندوبست  کو مستحکم کرنے کے ساتھ   آبپاشی اور زراعت   کو بہتر بنانے میں مدد کرے گا ، جس سے  زراعت کی پیداوار   میں اضافہ کرنے   اور دیہی علاقوں میں  آمدنی بڑھانے میں مدد ملے گی ۔

          ڈی وی سی اے 60 سال سے زیادہ پرانا ہے ، جس کو جدید بنانے کی ضرورت ہے ۔  اس کے اہم چیلنجوں میں بنیادی ڈھانچے   کے معیار میں کمی   اور آبپاشی کا  نا کافی  بندوبست  ہے ، جس میں   خدمات کی فراہمی   کا  گرتا ہوا معیار   ، نا کافی آبپاشی  اور نہر کے  نیٹ ورک  کے آخری حصوں اور بیچ کے حصوں میں  پانی    کی ترسیل  نہ ہونا شامل ہے ۔   نہر  کے آخری  حصے  کے   کسانوں کو   زیر زمین پانی    کے استعمال پر مجبور  ہونا پڑتا ہے ، جس سے کھیتی  کی لاگت میں اضافہ ہوتا ہے  اور  اسکیم کی پائیداری    متاثر ہوتی  ہے ۔  2005 ء اور 2017 ء کے درمیان  سیمی کریٹیکل   بلاکوں کی تعداد کو  5 سے بڑھا کر  19 کر دیا گیا ہے ( کل 14 بلاکوں میں ) ۔

          دامودر   طاس  کا نشیبی علاقہ تاریخی طور پر سیلاب    کے خطرے  والا  علاقہ ہے    ۔ یہاں ہر سال  33500 ہیکٹیئر کی فصلیں تباہ ہو جاتی ہیں اور 461000 لوگ متاثر ہوتے ہیں ۔  پروجیکٹ  کے اِس علاقے میں   بنیادی ڈھانچے کی کمی ہے ، جس سے   بار بار سیلاب  آنے کو روکا جا  سکے ۔   پروجیکٹ میں  اس علاقے میں سیلاب  کو  کم کرنے کے اقدامات  کئے جائیں گے ، جس میں  پشتوں کو مستحکم کرنا اور  گاد نکالنا شامل ہے ۔ 

          اے آئی آئی بی کے نائب  صدر جناب ڈی جے  پانڈیان نے  کہا  کہ   سرمایہ کاری   کا مقصد   کسانوں کے روز گار  کو بہتر بنانا اور   علاقے کی معیشت میں تیزی لانا ہے ۔   یہ پروجیکٹ   ہزاروں کسانوں کو   آبپاشی کی بہتر سہولیات   کے ذریعے   مناسب پانی حاصل کرنے   میں مدد کرے گا ۔ 

          ان چیلنجوں سے نمٹنے کے لئے  پروجیکٹ کے تحت   کئی ادارہ جاتی اصلاحات   کی جائیں گی   ۔ ان میں    معلومات  کے   جدید مینجمنٹ  نظام  ( ایم آئی ایس  ) ،  بینچ مارکنگ  اور شواہد پر مبنی فیصلہ سازی   ،  سطحی اور زیر زمین   پانی   کے بہتر استعمال   ،    اثاثوں  کا معقول بندوبست اور شہریوں کی شرکت کے ساتھ   شفافیت میں بہتری لانا شامل ہے ۔   آبپاشی خدمات کو بہتر بنانے کے لئے  کار کردگی کی بنیاد پر  آبپاشی خدمات فراہم  کرنے والوں  کو بھرتی کیا جائے گا  ۔

          اس پروجیکٹ کی  کل  لاگت  413.8 ملین  ڈالر ہے ، جس میں اے آئی آئی بی  145 ملین ڈالر  ،  آئی بی آر ڈی  145 ملین ڈالر  اور  مغربی بنگال سرکار  123.8 ملین ڈالر   کی ساجھیداری کرے گی ۔  اے آئی آئی بی سے ملنے والا 145 ملین ڈالر کا قرضہ    24 سال میں  ادا کرنا  ہوگا ۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

( م ن ۔ و ا ۔ ع ا ) 

U. No.2552