نئی دہلی،17؍دسمبر:مرکزی وزیر داخلہ جناب امت شاہ نے آج نئی دہلی میں بھارت وندنا پارک کے سنگ بنیاد تقریب کی صدارت کی۔ اس موقع پر دہلی کے لیفٹیننٹ گورنر جناب انل بیجل اور ہاؤسنگ و شہری امور کے وزیر مملکت (آزادانہ چارج)، جناب ہردیپ سنگھ  پوری بھی موجود تھے۔

اس موقع پر حاضری سے خطاب کرتے ہوئے جناب شاہ نے کہا کہ ایک بار بن کر تیار ہوجانے کے بعد مجوزہ پارک ایک اہم سیاحتی مرکز کی شکل اختیار کرلے گا۔انہوں نے مزید کہا کہ یہ پارک 200 ایکڑ میں بنایا جائے اور اس پر 550 کروڑ روپے خرچ کئے جائیں گے۔اندرا گاندھی بین الاقوامی ہوائی اڈہ اور میٹرو اسٹیشن سے قریب ہونے کی وجہ سے اس کی دلکشی بڑھے گی اور یہ ایک سیاحتی مقام کی شکل اختیار کرلے گا۔

شہریت (ترمیمی)قانون کے سلسلے میں جاری مظاہروں کے بارے میں تبصرہ کرتے ہوئے جناب شاہ نے کہا کہ لوگوں کو سیاسی مفادپرستی کے لئے گمراہ کیا جارہا ہے۔ انہوں نے ایک بار پھر اپنے وعدے کو دہراتے ہوئے کہا کہ ہندوستان کے اقلیتی طبقے سے تعلق رکھنے والے کسی بھی شہری کی شہریت ختم  نہیں ہوگی۔جناب شاہ نے کہا کہ سی اے اے کا مقصد ریاست سے محروم پناہ گزینوں کو اہل اور بااختیار بنانا ہے۔ اس کا مقصد کسی بھی ہندوستانی شہری کو شہریت سے محروم کرنا نہیں ہے۔جناب شاہ نے یہ بھی کہا کہ پناہ گزینوں کو شہریت دینا نہرو-لیاقت معاہدے کا ایک جزو تھا، جسے وزیر اعظم جناب نریندر مودی کی قیادت میں 70 سال کے بعد نافذ کیا جارہا ہے۔ انہوں نے زور دے کر  کہا کہ اس ترمیمی قانون کی لوگوں کو جتنی بھی مخالفت کرنی ہے کرلیں، مودی حکومت گزشتہ 70برسوں سے زیادتی کے شکار پناہ گزینوں کو شہریت اور باوقار زندگی دینے کے تئیں پابند عہد ہے۔

غیر قانونی کالونیوں کو منظوری دینے کے بارے میں اظہار خیال کرتےہوئے جناب شاہ نے کہا کہ مودی حکومت کی اس اقدام سے 1731 غیر قانونی کالونیوں میں رہائش پذیر 70 لاکھ لوگوں کو فائدہ ہوگا۔ انہوں نے کہا کہ لوگوں کو مرکزی حکومت کی کوششوں سے بالآخر  انصاف ملے گا۔ جناب شاہ نے کہا کہ وزیر اعظم جناب نریندر مودی کی قیادت میں حکومت فی الحال غیر منظور شدہ کالونیوں میں رہائش پذیر 40لاکھ لوگوں کو ملکیت اور وقار کا احساس یقینی بنانے کے تئیں پابند عہد ہے۔

جناب امت شاہ نے کہا کہ مودی حکومت کے ذریعے جس آیوشمان بھارت اسکیم کا خاکہ تیار کیا گیا ہے اور جسے نافذ کیاجارہا ہے، اس سے 10کروڑ کنبوں سے تعلق رکھنے والے 50کروڑ لوگوں کو فائدہ ہوگا اور یہ 5 لاکھ روپے تک کی طبی لاگت تک کے انشورنس کو یقینی بنائے گی، جس میں دوائیاں، اسپتال میں داخل ہونے کے دوران ہونے والا خرچ اور آپریشن کے بعد دیکھ بھال میں ہونے والا خرچ شامل ہے۔انہوں نے جامع ترقی کے لئے حکومت کے ذریعے اٹھائے گئے متعددا قدامات کا ذکر کیا، جس میں پولس بھرتی میں خواتین کے لئے 33 فیصد ریزرویشن ، امرت(اے ایم آر آئی ٹ) کے تحت 802 کروڑ روپے کی لاگت سے 18 پروجیکٹوں کا نفاذ اور 11ہزار کروڑ روپے کی لاگت سے 2014 کے بعد دہلی میٹرو کی 112کلو میٹر نئی میٹرو لائنوں کی تعمیر شامل ہیں۔ انہوں نے مزید کہا کہ دہلی کو نریندر مودی حکومت کی کوششوں سے اب کھلے میں رفع حاجت سے پاک شہر بنادیا گیا ہے۔ انہوں نے یہ بھی کہا کہ بدر پور تھرمل پاور پاور پلانٹ کو اب کوئلے کی قلت کا سامنا نہیں کرنا پڑے گا۔ انہوں نے 35 ہزار کروڑ روپے کی لاگت سے 6 لائن والے مجوزہ ایلیویٹیڈ کوریڈور کی تعمیر کی بات بھی کہی، جس سے قومی شاہراہ 148اے پر آمدو رفت آسان بنے گی۔ انہوں نے 90 ہزار کروڑ روپے کی لاگت سے بننے والے دہلی-ممبئی ایکسپریس وے اسکیم کا بھی ذکر کیا۔

********

م ن۔م م۔ن ع

U: 5901