নতুন ভাৰত, স্মার্ট ইণ্ডিয়াৰ সংকল্প বাস্তৱায়িত কৰিবলৈ আপোনালোকৰ যিসকল লোক ব্রতী হৈছে, সেই তৰুণ বন্ধুসকললৈ অভিনন্দন।

এইবাৰক লৈ তৃতীয়বাৰৰ বাবে মই প্রযুক্তিৰ মাধ্যমেৰে আপোনালোকৰ সৈতে কথা পাতিছো। ২০১৭ চনত যেতিয়া আমি এই অভিযান আৰম্ভ কৰিছিলো, তেতিয়াৰে পৰা ধাৰাবাহিকভাৱে এই কাৰ্য নিৰন্তৰ সম্প্ৰসাৰণ হৈ আহিছে।

বন্ধুসকল, স্মার্ট ইণ্ডিয়া হেকাথন ৰাষ্ট্ৰীয় স্তৰ অনুষ্ঠিত হোৱা বৃহত্তম ‘অ’পেন ইন’ভেশ্যন মডেল’ হিচাপে পৰিগণিত হৈছে। ইয়াত একেখন মঞ্চতেই বহুসংখ্যক শিল্পোদ্যোগ, শিক্ষা প্রতিষ্ঠান, চৰকাৰী বিভাগ, পেছাদাৰী আৰু ছাত্র-ছাত্রীসকলে একত্ৰিত হৈ কাম কৰিছে। ৩০ হাজাৰ ছাত্র-ছাত্রীক লৈ আৰম্ভ হোৱা এই হেকাথনত আজি অংশগ্রহণকাৰীৰ সংখ্যাই ২ লাখৰ সীমা চুইছে। আজি আমি ক’ব পাৰো যে, আমি সঠিক পথেৰেই আগুৱাইছো।

বন্ধুসকল, পূর্বৱর্তী দুটা হেকাথনৰ পৰা যথেষ্ট পৰিমাণৰ উদ্ভাৱণীয় ধাৰণা সৃষ্টি হৈছে, সেয়া আমি দেখিবলৈ পাইছো। ইয়াৰ মাধ্যমেৰে আৰম্ভণিতে কেৱল চৰকাৰী প্রতিষ্ঠান আৰু চৰকাৰে সংশ্লিষ্ট বিভিন্ন সমস্যা সমাধানৰ চেষ্টা কৰিছিল। কিন্তু এইবাৰ ভালেমান শিল্পোদ্যোগেও নিজ নিজ সমস্যা আপোনালোকৰ সমূখত উত্থাপন কৰিছে।

ইয়াৰ মাধ্যমেৰে নিশ্চিতভাৱেই আপোনালোকৰ প্রচেষ্টাৰ সম্প্রসাৰণ ঘটিব আৰু উদ্ভাৱকৰ জগতখনত আপোনালোকৰ পৰিচিতি বৃদ্ধি পাব। বন্ধুসকল, আমাৰ অর্থনীতিয়ে এক নতুন পথেৰে যাত্ৰা আৰম্ভ কৰিছে। আমি সকলোৱে মিলে যি নতুন ভাৰত নির্মাণৰ দায়িত্ব গ্ৰহণ কৰিছো, সেয়া এই উদ্ভাৱন আৰু ষ্টার্ট-আপৰ মাজেৰেই বিশ্বত সাফল্যৰ পোহৰ দেখিছে।

গ্লোবেল ইন’ভেশ্যন ইনডেক্সত আজি আমি ৫৭তম স্থানত উপনীত হ’বলৈ সক্ষম হৈছো। ২০১৪ চনত আমি সেই তালিকাত ৮১ নম্বৰ স্থানত আছিলো। অর্থাৎ আমি চাৰে চাৰি বছৰত ২৪ টা স্থান আগুৱাই আহিবলৈ সক্ষম হৈছো। আমি এতিয়া যি চিন্তাধাৰাৰে কাম কৰি গৈছো, অতি শীঘ্রেই আমি বিশ্বৰ শ্রেষ্ঠ ২৫ খন দেশৰ তালিকাত প্ৰৱেশ কৰিম। ভাৰত আজি বিশ্বৰ তৃতীয় বৃহত্তম ষ্টার্ট আপৰ দেশত পৰিণত হৈছে। বিগত ৩/৪ বছৰৰ ভিতৰত ১৫ হাজাৰতকৈও অধিক ষ্টার্ট আপ প্রতিষ্ঠিত হৈছে। এই ষ্টার্ট আপবোৰ কেৱল ডাঙৰ ডাঙৰ চহৰতেই সীমাবদ্ধ থকা নাই, দেশৰ প্রায় প্রত্যেক জিলাতেই এতিয়া এনে ধৰণৰ ষ্টার্ট আপ প্ৰতিস্থা হৈছে। আটাইতকৈ ডাঙৰ কথাটো হ’ল নতুনকৈ স্থাপিত ষ্টার্ট আপবোৰৰ প্রায় অর্ধেকাংশই সৰু সৰু চহৰত প্রতিষ্ঠা হৈছে।

এনেদৰে দেশৰ প্রায় ১৫০ খন ‘টেকন’লজী বিজনেছ ইনকিউবেটাৰ্ছ’ৰ মাজত ষ্টার্ট আপৰ সংখ্যা তিনি বছৰৰ পূৰ্বে ১৬০০ থকাৰ বিপৰীতে এতিয়া সেই সংখ্যা বৃদ্ধি হৈ ৩০০০ হৈছেগৈ। বন্ধুসকল, উদ্ভাৱন আৰু ষ্টার্ট আপৰ বাবে ইতিবাচক পৰিৱেশ গঢ়ি তুলিবলৈ ভালেমান গুৰুত্বপূর্ণ সিদ্ধান্ত গ্ৰহণ কৰিব লাগিব।

অটল ইনকিউবেশ্যন মিশ্যন সম্পর্কে আপোনালোক ভালদৰেই পৰিচিত। সমগ্ৰ দেশতে ৫ হাজাৰতকৈও অধিক বিদ্যালয়ত ইতিমধ্যেই অটল টিংকাৰিং পৰীক্ষাগাৰ আৰম্ভ কৰা হৈছে। এইসমূহৰ মাধ্যমেৰে ষষ্ঠ শ্রেণীৰ পৰাই ছাত্র-ছাত্রীসকলে ভৱিষ্যৎ প্রযুক্তিৰ সৈতে যথেষ্ট পৰিমাণে পৰিচিত হৈছে।

বন্ধুসকল, প্রশাসন আৰু শিল্পোদ্যোগসমূহৰ যি সমস্যা আপোনালোকৰ সমূখত উত্থাপন কৰা হৈছে, সেইবোৰৰ সমান্তৰালকৈ, মই আপোনালোকক এটি অনুৰোধ জনাবলৈ বিচাৰিছো।

দেশৰ ক্রমবর্ধিত সমস্যাসমূহৰ ভিতৰত অন্যতম হৈছে শিশু আৰু নাৰী নিৰ্যাতন। এক উন্নত সমাজ গঢ়ি তুলিবলৈ আমি এই সমস্যাবোৰৰ পৰা পৰিত্ৰাণ পাব লাগিব। আপোনালোকে এনেধৰণৰ কোনো পূৰ্ণাঙ্গ ব্যৱস্থা উদ্ভাৱন কৰিব পাৰিবনে, যাৰ মাধ্যমেৰে ঘৰৰ পৰা আৰম্ভ কৰি বিদ্যালয় পর্যন্ত শিশুসকলৰ সমস্ত গতিবিধি তদাৰকী কৰিব পৰা যাব! ঘৰ আৰু বিদ্যালয়ৰ ওচৰে পাজৰে স্থানীয় আৰক্ষী থানা আৰু পেট্র’লিং ভানবোৰ যাতে সঠিক সময় সক্রিয় কৰি তুলিব পাৰি, এনেধৰণৰ এক পূৰ্ণাঙ্গ ব্যৱস্থা উদ্ভাৱন কৰিব পাৰিলে আপোনালোকে দেশ আৰু সমাজ উভয়ৰে যথেষ্ট উপকাৰ সাধন হ’ব।

একেই ধৰণেৰে, ৰাজপথৰ কাষত যিসকলে ফল-মূল বা শাকপাচলি বিক্ৰী কৰে, তেওঁলোকৰ বাবে ই-মাৰ্কেট প্লেছৰ দৰে কোনোধৰণৰ প্ৰযুক্তিগত সমাধান, যাৰ মাধ্যমেৰে স্থানীয় স্তৰত ঘৰে ঘৰে ফল-মূল বা শাকপাচলি সৰবৰাহৰ এক সহজ ব্যৱস্থা গঢ়ি উঠে।

বন্ধুসকল, স্মার্ট ইণ্ডিয়া হেকাথনক কেৱল এক বার্ষিক অনুষ্ঠান হিচাপে গ্ৰহণ নকৰি এক ধাৰাবাহিক প্রক্রিয়া হিচাপে আমি চাব লাগিব। যি গোটেই বছৰ ধৰি চলিব, যাতে কোনো শিল্পোদ্যোগ বা চৰকাৰী বিভাগৰ সমস্যাৰ অভিনৱ সমাধানৰ ক্ষেত্রত সমাধানকাৰীক পুৰস্কাৰ প্রদান কৰিব পৰা যায়। আমাৰ দৃঢ় বিশ্বাস যে আপোনালোকৰ দৰে যদি আন তৰুণ-তৰুণীসকলেও ধাৰাবাহিকভাৱে এই কর্মযজ্ঞৰ সৈতে জড়িত হ’বলৈ বিচাৰে তেন্তে এই সমস্যাসমূহৰ সমাধান নিশ্চিতভাৱেই সম্ভৱ হ’ব।

আপোনালোকৰ ওপৰত, আমাৰ দেশৰ তৰুণ বন্ধুসকলৰ ওপৰত আমাৰ সম্পূর্ণ ভৰসা আছে, আস্তা আছে। আপোনালোক সকলোৱেই নতুন ভাৰতৰ নতুন আত্মবিশ্বাসৰ প্রধান ভিত্তি।

***

AKT/VJ/SS/RSB/AK