প্ৰধানমন্ত্ৰী ভাৰতীয় জনঔষধি পৰিযোজনাৰ উপভোক্তাৰ সৈতে মতবিনিময় প্ৰধানমন্ত্ৰী মোদীৰ

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ভিডিঅ’ কনফাৰেন্সৰ মাধ্যমেৰে প্ৰধানমন্ত্ৰী ভাৰতীয় জনঔষধি পৰিযোজনাৰ উপভোক্তা আৰু জন ঔষধি কেন্দ্ৰৰ স্বতাধিকাৰীৰ সৈতে মতবিনিময় কৰে৷ কেন্দ্ৰীয় চৰকাৰে জেনেৰিক ঔষধৰ ব্যৱহাৰ সন্দৰ্ভত সজাগতা সৃষ্টিৰ লক্ষ্যৰে ২০১৯ৰ ৭ মাৰ্চ দিনটো ‘জন ঔষধি দিৱস’ হিচাপে উদযাপন কৰাৰ সিদ্ধান্ত লৈছে৷

দেশৰ প্ৰায় ৫০০০ স্থানৰ পৰা উপভোক্তা আৰু ষ্টোৰৰ গৰাকীৰ সৈতে মতবিনিময় কৰি প্ৰধানমন্ত্ৰীয়ে কয় যে উচ্চ মানবিশিষ্ট ঔষধ নিম্ন দৰত উপলব্ধ কৰিবলৈ চৰকাৰে দুটা গুৰুত্বপূৰ্ণ সিদ্ধান্ত লৈছে৷ প্ৰথমটো হ’ল—৮৫০বিধ ঔষধৰ মূল্য নিয়ন্ত্ৰণত ৰখা আৰু হৃদৰোগৰ ষ্টেণ্ট আৰু আঁঠুৰ অস্ত্ৰোপচাৰৰ সা-সজুলিৰ মূল্য হ্ৰাস কৰা হৈছে৷ দ্বিতীয়টো হ’ল—দেশৰ বিভিন্ন প্ৰান্তত এলানি জন ঔষধি কেন্দ্ৰ মুকলি কৰা হৈছে৷ এই পদক্ষেপে দৰিদ্ৰৰ সমান্তৰালকৈ মধ্যবিত্ত শ্ৰেণীকো বৃহৎ পৰিমাণে উপকৃত কৰিব বুলি প্ৰধানমন্ত্ৰীয়ে কয়৷  

প্ৰধানমন্ত্ৰীয়ে কয় যে জন ঔষধি কেন্দ্ৰত সকলো ঔষধ বজাৰ মূল্যৰ তুলনাত ৫০-৯০% কমত দামত উপলব্ধ৷ বিগত পাঁচ বছৰত দেশত প্ৰায় ৫ হাজাৰ জন ঔষধি কেন্দ্ৰ মুকলি কৰা হৈছে৷ এই কেন্দ্ৰসমূহে কেৱল উচ্চ মানদণ্ডৰ ঔষধ প্ৰদান কৰাই নহয়, ই আত্মসংস্থাপন আৰু নতুন সংস্থাপনৰ সুযোগো সৃষ্টি কৰিছে৷

স্বাস্থ্য খণ্ডৰ সামগ্ৰিক পৰিৱৰ্তনৰ বাবে কেন্দ্ৰীয় চৰকাৰে ধাৰ্য কৰা লক্ষ্যৰ কথা উল্লেখ কৰি প্ৰধানমন্ত্ৰী মোদীয়ে কয় যে চৰকাৰৰ প্ৰয়াস হ’ল ‘স্থবিৰতা নাই, মাথো সমাধান’৷ স্বাস্থ্য খণ্ডৰ সৈতে জড়িত সকলো ষ্টেক হ’ল্ডাৰে এই খণ্ডৰ পৰিৱৰ্তনৰ বাবে ঐক্যবদ্ধভাৱে কাম কৰি আছে৷ যোৱা চাৰে চাৰি বছৰত দেশত ১৫ খন নতুন এইমছ হয়তো নিৰ্মাণ হৈছে অথবা নিৰ্মাণ কাৰ্য চলি আছে৷ প্ৰধানমন্ত্ৰীয়ে লগতে কয় যে স্বাস্থ্য খণ্ডত ৩১,০০০ এমবিবিএছ আৰু প’ষ্ট গ্ৰেজুৱেট আসন বৃদ্ধি পাইছে৷

প্ৰধানমন্ত্ৰীৰ সৈতে মতবিনিময়ত উপভোক্তাসকলে সন্তুষ্টি ব্যক্ত কৰে যে তেওঁলোকে জন ঔষধি কেন্দ্ৰৰ পৰা উন্নত মানদণ্ডৰ ঔষধ লাভ কৰি আছে৷ ঔষধৰ মূল্য কম হোৱাৰ বাবে তেওঁলোকে ধন ৰাহি কৰিবলৈ সক্ষম হোৱা বুলিও উপভোক্তাসকলে মত ব্যক্ত কৰে৷

*********

AKT/VJ/SKS/MS