ವಿಶ್ವ ಪರಿಸರ ದಿನಾಚರಣೆ ಜಾಗತಿಕ ಕಾರ್ಯಕ್ರಮದಲ್ಲಿ ಪ್ರಧಾನ ಮಂತ್ರಿ ಭಾಷಣ 
 

ಪ್ರಧಾನ ಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ನಾಳೆ ಹೊಸದಿಲ್ಲಿಯಲ್ಲಿ ನಡೆಯಲಿರುವ ವಿಶ್ವ ಪರಿಸರ ದಿನಾಚರಣೆ-2018ರ ಜಾಗತಿಕ ಕಾರ್ಯಕ್ರಮದಲ್ಲಿ ಭಾಷಣ ಮಾಡಲಿದ್ದಾರೆ. ಈ ಸಂಧರ್ಭ ರಾಜಪಥ ಹುಲ್ಲು ಹಾಸಿನ ಮೇಲೆ ಸ್ಥಾಪಿಸಲಾಗಿರುವ ಪ್ರದರ್ಶನಕ್ಕೂ ಅವರು ಭೇಟಿ ನೀಡುವರು.

’ಪ್ಲಾಸ್ಟಿಕ್ ಮಾಲಿನ್ಯವನ್ನು ನಿವಾರಿಸಿ’ ಎಂಬುದು ಈ ವರ್ಷದ ವಿಶ್ವ ಪರಿಸರ ದಿನದ ಶೀರ್ಷಿಕೆಯಾಗಿದ್ದು , ಈ ಕಾರ್ಯಕ್ರಮದ 43 ನೇ ಜಾಗತಿಕ ಆವೃತ್ತಿಗೆ ಭಾರತವು ಅತಿಥೇಯ ರಾಷ್ಟ್ರವಾಗಿದೆ. ವಿಶ್ವ ಸಂಸ್ಥೆಯ ಪ್ರತಿನಿಧಿಗಳು, ಪರಿಸರ ಸಚಿವರು, ಮತ್ತು ವಿವಿಧ ಕೈಗಾರಿಕೋದ್ಯಮ ಸಂಸ್ಥೆಗಳ ಸದಸ್ಯರು ಈ ಕಾರ್ಯಕ್ರಮದಲ್ಲಿ ಗಣ್ಯರಾಗಿ ಪಾಲ್ಗೊಳ್ಳುವವರಲ್ಲಿ ಸೇರಿದ್ದಾರೆ.

ಪ್ರಧಾನ ಮಂತ್ರಿಯವರು ’ಮನ್ ಕೀ ಬಾತ್” ನ 44 ನೇ ಆವೃತ್ತಿಯಲ್ಲಿ ವಿಶ್ವ ಪರಿಸರ ದಿನಾಚರಣೆಯ ಅಧಿಕೃತ ಅತಿಥೇಯ ರಾಷ್ಟ್ರವಾಗಿ ಭಾರತ ಕಾರ್ಯನಿರ್ವಹಿಸಲಿದ್ದು ಇದು ವಾತಾವರಣ ಬದಲಾವಣೆ ವಿಷಯಗಳನ್ನು ನಿಭಾಯಿಸುವಲ್ಲಿ ಭಾರತದ ವಿಸ್ತರಿಸುತ್ತಿರುವ ನಾಯಕತ್ವಕ್ಕೆ ಸಂದ ಮಾನ್ಯತೆ ಎಂದು ಹೇಳಿದ್ದರು.
 

***