కేంద్ర ప్రభుత్వ ఉద్యోగులకు అదనపు విడత కరువు భత్యం మరియు  పింఛనుదారులకు కరవు సహాయం విడుదలకు ప్రధానమంత్రి శ్రీ నరేంద్రమోదీ అధ్యక్షతన సమావేశమైన కేంద్ర మంత్రి మండలి ఆమోదం తెలియజేసింది.  ధరల పెరుగుదలకు అనుగుణంగా మూల వేతనం / పింఛను మీద ప్రస్తుతం 5 శాతంగా ఉన్న డి.ఏ. కు అదనంగా మరో 2 శాతం చెల్లించాలని నిర్ణయించారు. ఈ పెంపుదల 2018 జనవరి ఒకటవ తేదీ నుంచి అమలులోకి వస్తుంది. 

ఈ నిర్ణయం ద్వారా 48.41 లక్షల కేంద్ర ప్రభుత్వ ఉద్యోగులతో పాటు 61.17 లక్షల పింఛనుదారులకు ప్రయోజనం చేకూరుతుంది. 

ఈ రెండు - కరువు భత్యం, కరవు సహాయం పెంపుదల వాళ్ళ దీనివల్ల ప్రభుత్వ ఖజానాపై ఏడాదికి రూ|| 6077.72 కోట్లు - అదేవిధంగా ఈ ఆర్ధిక సంవత్సరం 2018-19 (2018 జనవరి నుండి 2019 ఫిబ్రవరి వరకు 14 నెలలకు) రూ|| 7090.68 కోట్ల భారం పడుతుంది. 

 7వ కేంద్ర వేతన సంఘం సిఫార్సుల ఆధారంగా ఆమోదం పొందిన ఫార్ములా కు అనుగుణంగా ఈ పెరుగుదల నిర్ణయించడం జరిగింది. 

***