Ka Tnat Kam Pohiing jong ka Sorkar Pdeng
azadi ka amrit mahotsav

KA ASSAM RIFLES KA LA PYNLONG ÏA KA JINGÏAMAREH HALF MARATHON 2026 HA KA SIEN KABA 6 HA SHILLONG.

Haduh kumba 4500 ngut ki nongmareh na ki 30 tylli ki jylla bad ki union territories ki la ïa kynduh lang ha nongbah Shillong ban rakhe ïa ka jingkilan met ban ïoh ïa ka met ba khlaiñ bad ba koit ba khiah, ka mynsiem ïalehkai, bad ka jingïatylli lang kawei.

Ha ka: 22 NOV 2026 3:36PM by PIB Shillong

Ka jingïamareh thong Half Marathon 2026 kaba 6 jong ka Assam Rifles la pynlong da kaba jop ha ka Headquarters jong ka Directorate General Assam Rifles, Laitkor, Shillong, ha ka 22 tarik u Naiwieng 2026. Ia kane ka jingiamareh la ju pynlong man la u snem, kaba la sdang nyngkong ha u snem 2021, kum shi bynta jong ki jingpyrshang ban kyntiew ïa ka “Fit India Movement”. Kane ka jingïamareh ka la long ka rynsan kaba paw bha ban kyntiew ïa ka koit ka khiah ha ka met ka phad, ka jingim kaba koit ba khiah, ka mynsiem ïalehkai bad ka jingïatylli jong ka Ri.

Ha kane ka jingïamareh thong, la sakhi ïa ka jingïashim bynta kaba shitrhem jong ki nongmareh kiba mihkhmat na ki Jylla bapher bapher bad ki Union Territories jong ka ri. Kumba 4,500 ngut ki nongïashim bynta na kylleng ka ri ki la shim bynta ha ki kyrdan rta bapher bapher, kaba pynpaw ïa ka mynsiem jong ka jingïatylli hapdeng ka jingïapher bad kaba pynkhlaiñ ïa ki jingïadei bad ka jingïatylli jong ka Ri.

La pynlong ïa kane ka Half Marathon ha ka sawdong sawkun ba itynnad jong ka East Khasi Hills ha Laitkor, ha kaba ki nongmareh kiba tbit, ki riew sngewtynnad ïa ka jingkilan met, ki shipai, ki samla bad ki nongshong shnong na ki jaitbynriew bapher bapher ki la iawan ban shimbynta. Ha kane ka sngi la don lang ruh ki riew pawkhmat naduh ki bor Sorkar, ki shipai bad ki sengbhalang bapher bapher.

Ïa kane ka jingïakop mareh Half Marathon la pynlong ha ki lai tylli ki kyrdan, kata ka Cloud Chase (21 km), Pine Path (10 km) bad Crystal Stream (5 km). Ïa ka jingïakop mareh ba 21 km la pynher ïa ka lama sdang da u Lt Gen Vikas Lakhera, AVSM, SM, Director General Assam Rifles, ka Vibha Lakhera, President ARWWA, u Nitin Bhatnagar, Executive Director bad State Head, IO AOD, Indian Oil Corporation Limited, bad u Arunabh Sharma, AGM, RBO, Shillong Urban (SBI). Katba ïa ka jingïakop mareh ba 10 km la pynher ïa ka lama sdang da u Maj Gen Jai Singh Bainsla, SM, ADG Assam Rifles, ka Ritu Bainsla, Vice President ARWWA, u Shivesh Shukla, DGM, Circle Head Guwahati (PNB), bad u Abhinav Rai, Brand Manager bad nongmihkhmat na ka ITC. Bad ïa ka jingïakop mareh ba 5 km pat la pynher ïa ka lama sdang da u Brigadier bad ka Mrs Swarn Singh, bad u Brigadier bad ka Mrs Sachinder Tiwari.

Ha kane ka jingiamareh thong la sakhi ïa ka jingïashim bynta jong ki nongmareh na ki 30 tylli ki Jylla bad ki Union Territories jong ka ri. Ki nongshim bynta ki la ioh ia ki takma, ki syrnod bad ki T-shirt ki ba kyrpang kum ka jingithuh ïa ka Ka mynsiem kaba shitrhem bad ka mynsiem ïalehkai jong ki. La buh kyrpang ïa ka khusnam pisa kaba shongdor ₹25 lak na ka bynta ki nongjop ha ki kyrdan bapher bapher, ryngkat bad kiwei kiwei ki khusnam ban ai mynsiem bad pynshlur ïa ki nongshim bynta bad ban kyntiew ïa ka sap jong ki ha ka jingïalehkai.

 

 

Ha ka kyrdan jingïakop mareh ba 21 km jong ki shynrang, u Panchana Bera u la ioh ïa ka kyrdan ba nyngkong da kaba pyndep ïa ka jingïamareh ha ka por kaba 1 kynta 08 minit bad 10 sekhon. Katba ha ka kyrdan jong ki kynthei, ka Munni Devi ka la ioh ïa ka kyrdan ba nyngkong da kaba pyndep ïa ka jingïamareh ha ka por kaba 1 kynta 24 minit bad 34 sekhon. Ha ka kyrdan jingïakop mareh ba10 km jong ki shynrang, u Ravi Chaudhury u la ioh ïa ka kyrdan ba nyngkong da kaba pyndep ïa ka jingïamareh ha ka por kaba 31 minit bad 35 sekhon. Katba ha ka kyrdan jong ki kynthei pat, ka Ruby Kashyap ka la ioh ïa ka kyrdan ba nyngkong da kaba pyndep ïa ka jingïamareh ha ka por kaba 36 minit bad 43 sekhon.

U Air Marshal Mehtab Singh Deswal, AVSM, VM, AOC-in-C, Eastern Air Command, u la wan ban ïa donlang ha kane ka jingiamareh thong kum u Kongsan, U ba la ai ka jingïaroh ïa ka mynsiem ba shitrhem, ka jingkut jingmut bad ka mynsiem ïalehkai kaba la pyni da ki nongshim bynta, bad u la sam ïa ki khusnam sha ki nongjop ha ki kyrdan bapher bapher.

 

Haba kren ha kane ka jingïalang, u Lt Gen Vikas Lakhera, AVSM, SM, Director General Assam Rifles, u la pynpaw ïa ka jingdonkam ban pynneh ïa ka met ka phad kaba koit ba khiah, ban don ka jinglong ryntih bad ban im ïa ka jingim kaba koit ba khiah. U la ong ba ka Assam Rifles Half Marathon ka long ka rynsan kaba pynshlur ïa ki briew ban pynlong ïa ki jingkilan met kum ka bynta jong ka jingim man la ka sngi, ban kyntiew ïa ka jingïashim bynta jong ki paidbah bad ban pynkhlaiñ ïa ka jingïajan bad ka jingïatylli hapdeng ki briew na ki bynta bapher bapher jong ka ri.

Ka Assam Rifles, kaba la tip paidbah kum ki “Sentinels of the North East” lane “(Ki Nongap pahara jong ka Thaiñ Shatei Lam Mihngi),” ka dang ïai bteng ban leh ïa ka bynta kaba khraw ban kyntiew ïa ka shongsuk shongsaiñ bad ka roi ka par ha kane ka thaiñ. Lyngba ki sienjam kum ka Assam Rifles Half Marathon, kane ka kynhun shipai ka dang bteng ban pynshlur ïa ki briew ban pynioh ïa ka met ka phad kaba koit ba khiah, ka jingiadei bad ki samla, ka jingïadei ha ka imlang sahlang bad ka jingïatylli ha ka ri, ha kajuh ka por da kaba pynkhlaiñ ïa ka jingïadei kaba neh bad ki paidbah jong ka Thaiñ Shatei Lam Mihngi.

Ka Assam Rifles ka pynpaw ïa ka jingsngewnguh kaba khraw ïa ka Sorkar Meghalaya, ki nongkyrshan pisa kum ka Indian Oil, Punit Balan Group, State Bank of India (SBI), Punjab National Bank (PNB), Aashirvaad Iodized Salt (ITC), TVS, Kotak Mahindra Bank, IDFC FIRST Bank, Fast & Up, bad ïa ka kynhun kaba pynïaid ïa kane ka jingïamareh thong, ka ISL, na ka bynta ka jingkyrshan bad ka jingïarap kaba kordor jong ki, kaba la noh synñiang ha ka ban pynlong ia kane ka Assam Rifles Half Marathon 2026 kaba jop.

Ka jingjop jong ka Assam Rifles Half Marathon kaba 6, ka la pynskhem biang ïa ka jingaiti lut jong kane ka kynhun shipai ban kyntiew ïa ka koit ka khiah, ka mynsiem ïalehkai ka jingïatylli jong ka Ri bad ka mynsiem jong ka “Fit India”, ha kajuh ka por kaba nang pynkhlaiñ shuh shuh ïa ka jingïadei jong ka bad ki paidbah jong kane ka thaiñ.

 

🏃‍♂️ Nearly 4,500 runners. 30 States & UTs. One spirit of unity! The 6th Edition of the Assam Rifles Half Marathon 2026 was successfully held at Laitkor, Shillong, on 22 November, promoting fitness, sportsmanship and national integration. 🏅 21 km | 10 km | 5 km #AssamRifles #FitIndiaMovement #Shillong @official_dgar @DefenceMinIndia @HMOIndia @FitIndiaOff @YASMinistry

— PIB In Meghalaya (@PIBShillong) November 22, 2026

 

 

*************


(Release ID: 2339984) visitor counter : 13
Pule ia kane ka kyrwoh khubor ha ka: Bengali-TR , English