প্রধানমন্ত্রীগী লোইশঙ
azadi ka amrit mahotsav

বেঙ্গলুরুদা তোঙান-তোঙানবা চাউখৎ থৌরাংগী প্রোজেকশিং খরনা উরেপ উয়ুং তমখিবা অমসুং খরনা শঙ্গাবদা প্রধান মন্ত্রীনা পীখিবা ৱারোল মৈতৈলোন্দা হন্দোকপা

থাগৎখিবা: 13 NOV 2026 3:58PM by PIB Imphal

বেঙ্গালুরুদা লৈরিবা ঐহাক্কী ইচিল-ইনাওশিং অমসুং ইচে ইচল পুম্নমক্তা য়াইফ-পাউজেল পীজরি! কর্নাতকাগী গবর্নর, সুধা য়াদবজী, মুখ্য মন্ত্রী দি. কে. শিবকুমারজি, রাজ্য সরকারদা মন্ত্রী ওইরিবা শ্রী কৃষ্ণ বাইরে গৌরাজি, অমসুং লোক সভাদা ঐহাক্কী মরূপ ওইরিবা বেঙ্গালুরুদগী হৈ-শিংলবা নহা ওইরিবা লুচিংবা তেজস্বী সুর্য়জি মফম অসিদা লেঙশিনবীরিবা শক্নাইরবা ইকাইখুম্ননিংঙাই ওইরবা মীওই পুম্নমক্কী মফমদা ইকাইখুম্ননা উৎচরি।

ঐখোয়গী গবর্নর সুধা য়াদবজিগা লোইননা ফম্বাক অমত্তদা ফম্মিবগী খুদোংচাবা ফংবসি মসিনা অহানবনি। কর্নাতকাগী মীয়াম্না হৌজিক ফাওগী ওইনদি কয়া কন্না তোৎন-তিন্নবা ওইরমখিরোই। অদুবু ঐহাক্না মহাক্কী পুন্সিগী মতাংদা করিগুম্বা খরদং ময়ামদা লিজনিংই। লৈবাক্কী সেবা হায়বসি করিনো? মসিমক ঐখোয়না সুধাজি অমসুং মহাক্কী ইমুং মনুংদগী ঐখোয়না তমজবা য়াই। কার্গিল লান শোক্নরিঙৈ মনুংদা মহাক্কী মপুরোইবনা লান অসিগী মনুংদা থৱাই থাখি। মসিগী মতুংদসু মহাক্কী মপুরোইবগী নীংশিংবা ওইনা মহাক্না ইমা ভারতকীদমক কত্থোক্নবা লেপ্লদুনা ঙসি ফাওবদা ময়ামগীদমক হোৎনদুনা লাক্লি। পার্লিয়মেন্ততা চহি কয়া সেবা তৌরক্লবা মতুংদা মহাক্না লৈবাক অসিগী তোঙান-তোঙানবা থবক কয়াদা লুচিংদুনা লাক্লি। ঙসিসু কর্নাতকাগী লমদম অসিদগী মহাক্না নুংঙাই য়াইফবা, শান্তি অমসুং তংদু লৈতাবা কর্নাতকাগী মীয়াম ওইহন্নবগীদমক হোৎনরি। ঐহাক্না সুধাজিগী মফমদা য়াইফ পাউজেল পীজরি।

অহানবা মক্তদা ঐহাক্না বেঙ্গালুরুবু ঙাকপী শেনবীরিবী লাইরেম্বী অন্নম্মা তাই অমসুং নাদ প্রবু কেম্পেগৌরাজিবু ঐহাক্না ইকায় খুম্নবা উৎচরি। ঙসিগী নুমিৎ অসিনা বেঙ্গলুরু অমসুং কর্নাতকাগী চাউখৎ-থৌরাংগী খোঙচৎতা অনৌবা থৌনা অমা পীরগনি। কনেক্তিবিতী অমসুং ইনর্জী সিক্যুরিতীগা মরী লৈনবা লুপা কোতি ১৫,০০০ হেনবগী প্রোজেক্তশিং ঙসি মফম অসিদগী হৌদোকখ্রে। মেত্রো অমসুং রেলৱেজগা মরী লৈনবা প্রোজেক্তশিংদগী হৌরগা ইনর্জী সিক্যুরিতীগীদমক পায়খৎলিবা থবকশিং ফাওবদা, হায়রিবা প্রোজেক্ত পুম্নমক অসিনা কর্নাতকাগী ইনফ্রাস্ত্রকচরদা অনৌবা শক্তি পীরগনি।

ইনফ্রাস্ত্রকচরনা লৈবাক অমা হেক্তগী চাউখৎপগী খোঙচৎতা য়াম্না মরু ওইবা থৌদাং লৌরি। লম্বী থোং হেন্না ফবনা চাউখৎপা, থবক পীবা অমসুং ইন্দস্ত্রীগী অনৌবা খুদোংচাবশিং শেম্মি। অমসুং চাউখৎ-থৌরাংগী খুদোংচাবশিং অসিনা খুন্নাইগী কাংলুপ খুদিংমক্তা য়ৌরকপা মতমদা, লায়রবা লান্থেংনবগী থৌওংসু মপাঙ্গল কনখৎলকই। মসিনা মরম ওইদুনা, লৈবাক অসিগী নাগরিক কোতি ৫০ রোমদি হৌখিবা চহিশিংদা কা হেন্না লাইরবদগী কোকপা ঙমখ্রে। ঙসি হৌদোক্লিবা প্রোজেক্তশিং অসিনা মসিগী চাউখৎ-থৌরাংগী খোঙচৎ অসিবু মাংলোমদা পুখৎকনি। মখোয়না বিক্সিত কর্নাতাক্কী চাউখৎপদা অমসুং বিক্সিত কর্নাতাক্কী খুত্থাংদা বিক্সিত ভারত অমা শেমগৎপদা অনৌবা থৌনা অমা পীরগনি। তেক্নোলোজি সিতি অমা ওইনা বেঙ্গলোরগী মশক মওং অসি মখোয়না হেন্না মপাঙ্গল কনখৎহল্লগনি। মসিগী প্রোজেক্তশিং অসিগীদমক ঐহাক্না কর্নাতকাগী মীয়ামদা য়াইফ-পাউজেল পীজরি।

মরুপশিং

মীকুপ খরগী মমাংদা, বেঙ্গালুরু মেত্রোগী অনৌবা পিঙ্ক লাইন অসি বেঙ্গালুরুগী মীয়ামদা খুৎশিন্নখ্রে। অনৌবা মেত্রো লাইন অসিনা আই.আই.এম. বেঙ্গলোর অমসুং এজুকেস্নেল ইন্সতিত্যুসন কয়াগা শনহল্লগনি। মসিগী মথক্তা, বেঙ্গলোরগী মরুওইবা বিজিনেস, তেক্নোলোজী অমসুং কম্মর্সিএল সেন্তরশিং ওইনা খঙনবা মফম কয়াসু মেত্রোগী খুৎথাংদা শম্নরগনি। মসিনা তাক্লে মদুদি বেঙ্গালুরুদা লৈরিবা মীওই লাখ কয়ানা চৎথোক চৎশিন তৌবদা হেন্না খুদোংচাবা ফংহনবতা নত্তনা শেল অমসুং মতমসু কনবা ঙম্লগনি।

মরুপশিং

ঙরাং অসি লৈখিদ্রবা অনন্ত কুমারজিগী কুম্মোন নুমিৎনি। মহাক লমদম অসিগা য়াম্না নক্নবা মরী অমা লৈ। মেত্রো লাইন অসি ঙসি উবা মতমদা মহাক্কী থৱাইনা অদুক্কী মতীক পেঞ্জরমগনি। ঐহাক্না মহাক্কী মফমদা থম্মোইদগী ইকাইখুম্নবা উৎচরি।

মরুপশিং…

বেঙ্গালুরু অসি ভারতকী সিলিকোন ভেল্লিনি। মসিনা লৈবাক অসিগী আই.তি.গী এক্সপোর্তকী শরুক অহুম থোকপগী অমা হেন্না কল্লি। সহর অসি ভারতকী ইনোবেসন অমসুং শেন্মিৎলোনগী চাউখৎপগী মরুওইবা ইঞ্জিন অমনি। মরম অদুনা, বেঙ্গলুরুগী অপুনবা লমদম অসিবু খোঙজেল য়াংনা চাউখৎহনবা অমসুং অনৌবা মতমগী ওইবা পব্লিক ত্রান্সপোর্ত শন্দোকপা অসি কেন্দ্র সরকারগী মরুওইবা থবকশিংনি। মসিগী ৱাখল্লোন অসিগা লোইননা, কেন্দ্র সরকারনা নাম্মা মেত্রো পাকথোক চাউথোকহনবদা মতেং পাংলি। ২০১৪দা, নাম্মা মেত্রো অসি কিলোমিতর তরা তরেৎখক্তমক শাংখি। ঙসিদি, মসিগী অপুনবা নেৎৱার্ক অসি কিলোমিতর ১০০ হেনখ্রে। ঐখোয়না লেপ্পা লৈতনা সেঞ্চুরি য়ৈরি। শিবকুমার জী, ঐহাক্না অদোমগী হায়খিবা নৎত্রা নুমিৎ খরনিগী মমাংদা ভারতনা গ্রান্দমাস্তর্স চেস্তা সেঞ্চুরি অমা য়ৈখ্রে। হৌজিক ভারত্তা চেস গ্রান্দমাস্তর ১০০ লৈরে, অমসুং মখোয়শিং অসি হায়রিবা মতম অসিদা থোরকখিবনি।

মরুপশিং 

দিল্লী-এন.সি.আর. অমসুং মুম্বাই মেত্রোপোলিতান রিজনগী মতুংদা, বেঙ্গালুরু অসি লৈবাক অসিদা কিলোমিতর ১০০ হেন্না শাংবা মেত্রো নেৎৱর্ক লৈবা অহুমশুবা শহর ওইরে। নাম্মা মেত্রোগী মাই পাকপা অসি প্রোজেক্ত অমখক্তদা য়ুম্ফম ওইদে। মসি হিংবদা লাইবা অমসুং চৎথোক-চৎশিনদা লাইবা ওইহন্নবা লৈবাক অসিগী অনৌবা থৌওংশিংগী মহৈনি। মসি মিদল ক্লাসকী ইমুংশিংগী পুন্সি মহিং ফগৎহন্নবা লৈবাক অসিনা হোৎনবরিবা কয়া অসিগী মহৈনি।

মরুপশিং

ঙসিদি, ইন্দিয়ন রেলৱেজনা মীনাই নাইথাং মতমগী অরিবা ৱাখল্লোন অদু লংথোকখ্রে। লৈবাক অসিগী রেলৱেজনা অনৌবা হেরিতেজ, অনৌবা লিগেসি অমা শেমগৎলি। ঐখোয়গী রেলৱে স্তেসনশিং, ঐখোয়গী রেলৱে ইঞ্জিনশিং অমসুং ঐখোয়গী রেলৱে কোচশিং - পুম্নমক অসি হৌজিক্তি ভারতকী মশাগী ওইবা ময়েক অমসুং মশক অমা লৈজরে। ভন্দে ভারত ত্রেনশিং অমসুং অমৃত ভারত স্তেসনশিং অসি বিক্সিত ভারতকী রেলৱেজ সর্বিসশিংগী মশক অমা ওইরে। কর্নাতকাগী রেলৱে স্তেসন ৬০ হেনবদা, চামরাজনগর, চিক্কমগলুরু, সকলেশপুর অমসুং সুব্রহ্মন্য রোদ স্তেসনসু হৌজিক অমৃত ভারত স্তেসনশিং ওইরে। হায়রিবা স্তেসনশিং অসিনা সেন্সিতিবিতী অমসুং মোদর্নিতী অনিমক উৎলি। অতোংবা খুদিংমক্তা সেনিয়র সিতিজনশিং অমসুং দিসএবল ওইরবা মীওইশিংগীদমক অখন্নবা ফেসিলিতীশিং ফংহল্লি। লায়রবা অমসুং মিদল ক্লাসকী ইমুংশিংদা রেলৱে স্তেসনশিংদা হান্নগী এয়রপোর্তশিংদা ফংলম্বা খুদোংচাবশিং অসি ফংহন্নবা হোৎনরি।

মরুপশিং

হৌখিবা চহি ১০-১২ অসিদা, ভারতকী রেলৱেজকী বজেৎ অসি শরুক কয়া থোক্না হেনগৎখ্রে। তেজস্বীজিনা হায়খিবগুম্না হায়রিবা মতম অসিদা কর্নাতকাগী রেলৱেজকী বজেৎসু শরুক নিপান হেনগৎলে। ঙসিদি কর্নাতকাদা অমৃত স্তেসন মরি অমসুং দবলিং অমসুং ইলেক্ত্রিফিকেসনগা মরী লৈনবা প্রোজেক্ত অনি ফংলে। নুমিৎ খরনিগী মমাংদা, কর্নাতকাগী অহানবা বন্দে ভারত স্লিপর ত্রেন ফংখি। অমসুং ঙসি কর্নাতাকাদা গোৱাগা শম্নগদবা বন্দে ভারত ত্রেন ফংলে। মসিগী ত্রেন অসিগী খুত্থাংদা, কর্নাতকাগী মীওইশিং, মঙ্গালুরু অমসুং সমুদ্র খোংবালগী লম্বী পুম্নমক্তা লৈরিবা মীওইশিংনা সেমি-হাই-স্পীদ ত্রেনদা চৎপগী অনৌবা এক্সপরিয়েন্স অমা ফংলগনি।

মরুপশিং

লম্বী থোংগা লোইননা ইনর্জী সেক্যুরিতীনা বিক্সিত ভারত শেমগৎপদা অচৌবা থৌদাং লৌরি। ইরান অমসুং গল্ফকী লৈবাকশিংদা চত্থরিবা লান অসিনা ইনর্জী সেক্যুরিতী অসি কয়া য়াম্না মরু ওইবগে হায়বদু খঙহল্লে। মসি ভারতকী ওইনসু অরুবা মতম অমনি। অদুম ওইনমক, হৌখিবা চহী তরাগী মনুংদা ইনর্জী সেক্যুরিতীগী মায়কৈদা পায়খৎখিবা খোংথাংশিং অসিনা ঐখোয়না মসিগী অৱাবা অসি থেংনবদা মতেং পাংলি। ঐখোয়না পেত্রোল, দিজল অমসুং এল.পি.জি. পুথোকপগী ঐখোয়গী কেপাসিতী হেনগৎহনখ্রে। ঐখোয়না ক্রুদ ওইল স্তোরেজ তৌনবগী থৌরাং শেমগৎলে। সোলর, হায়দ্রো অমসুং ৱিন্দ ইনর্জী পাকথোক চাউথোকহনখ্রে। রেলৱেজ ১০০% ইলেক্ত্রিফিকেসন তৌখ্রে। অমসুং মেত্রোগুম্বা পব্লিক ত্রান্সপোর্ত মপাঙ্গল কনখৎহনখ্রে। কর্নাতকাদা ঙসি উরেপ উয়ুং তমখিবা অমসুং শঙ্গাখিবা প্রোজেক্ত অহুম অসিনা ভারতকী ইনর্জী সেক্যুরিতীদা অনৌবা শক্তি পীরগনি। মেঙ্গলুরুদা লৈরিবা এল.পি.জি. প্রোজেক্ত অসিনা লৈবাক অসিগী এল.পি.জি. স্তোরেজ কেপাসিতী মেত্রিক তন ৮০,০০০ হেনগৎহনগনি। দেবানগুন্দি মার্কেতিং তর্মিনেলনা পেত্রোল, দিজল অমসুং এভিয়েসন ফ্যুলগী সপ্লাইবু হেন্না ওর্গানাইজ তৌরবা অমসুং থাজবা য়াবা ওইহল্লগনি।

মরক অসিদা বেঙ্গলোরুদা লৈবা সিবিজি প্লান্তনা নোংমদা বাইওগ্যাস তন ১৩ পুথোক্কনি। মসিনা ৱেস্ত মেনেজমেন্ত ফগৎহল্লগনি অমসুং নেচরেল গ্যাস পুশিল্লকপদা শেল চৎপসু কনবা ঙমগনি।

মরুপশিং

ইনর্জী সেক্যুরিতীগী মরুওইবা হীর্ম অমা হায়রগদি ইলেক্ত্রিসিতী পুথোকপনি। চিপশিংদগী হৌরগা শিপশিং ফাওবা, অমসুং এ.আই. অমসুং দেতা সেন্তরশিংদগী হৌরগা ক্বান্তম কম্প্যুতিং ফাওবদা ঙসিদি, ভারতনা অনৌবা তেক্নোলোজীশিংদা লুচিংবগী পান্দমগা লোইননা মাংলোমদা চংশিল্লি। লৈবাক অসিদা মসিগীদমক্তা মতিক চাবা মৈ ফংহন্নবা লেপ্পা লৈতনা হোৎনরি। ঙসি, ভারতকী রিন্যুএবল ইনর্জী কেপাসিতী অসি গিগাৱাৎ ৩০০ হেনখ্রে। ক্লিন ইনর্জী ফংনবগীদমক, ভারতনা মসিগী ন্যুক্লিয়র পৱার প্লান্তশিংগী মশিংসু হেনগৎহল্লি।

মরুপশিং

কেন্দ্র সরকারগী স্কিমশিং অসিনা মরম ওইদুনা, ঙসিদি ভারতকী নাগরিকশিং অসি মৈ শীজিন্নবা মীওইশিং ওইবগা লোইননা মৈ পুথোকপা মীওইশিংসু ওইরক্লি। পি.এম. সুর্য ঘর মুফত বিজলী য়োজনাগী মখাদা লৈবাক শীনবা থুংনা ইমুং লাখ ৬০ হেনবনা মখোয়গী য়ুমথকশিংদা সোলর প্লান্তশিং ইনস্তোল তৌখ্রে। মসিগী মনুংদা কর্নাতকাদা লৈবা ইমুং ৪০,০০০ হেন্না য়াওরি। কেন্দ্র সরকারনা ইমুং অমমমদা চাউরাক্না লুপা ৮০,০০০গী তেংবাং পীরি। ইমুং খুদিংদা। অসিগুম্বা মওংদা, পি.এম.-কুসুম স্কিমগী মখাদা কর্নাতকাদা লৌমীশিংগীদমক সোলর পম্প লাখ ৮ হেনবগী খুত্থাংদা ইরিগেসনগী থৌরাং পায়খৎলি। মসিনা তাক্লিবদি কর্নাতকাগী চিঞ্জাক পুথোক্লিবশিং অসি হৌজিক্তি ইনর্জী পুথোক্লিবশিংসু ওইরক্লি হায়বসিনি। স্কীমশিং অসিনা ইলেক্ত্রিসিতীগী শেনফম হন্থহল্লি, অমসুং চাগা তানবা অমসুং থবক ফংবগী অনৌবা খুদোংচাবশিংসু পীরি।

মরুপশিং

লৈবাক অমনা মিসন অমগা লোয়ননা মাংলোমদা চংশিল্লকপা, নাগরিক খুদিংমক চাউখৎপগী শরুক অমা ওইরকপা, অমসুং তেক্সপেয়রশিংনা শেল থাদরিবা রিসোর্সশিং অসি চাউখৎনবগীদমক মতিক চাবা মওংদা শেল থাদরকপা মতমদা, মহৈশিং অসিসু পুক্নিং থৌগৎনিংঙাই অমসুং ৱাহন্থোক লৈবা ওইরকই। ২০১৪ দা ঐখোয়না সবকা সাথ, সবকা বিকাসকী ৱারেপ লৌদুনা থবক পায়খৎপা হৌখি। ঙসিদি, হায়রিবা হোৎনরিবশিং অসিগী মহৈ ওইনা, লৈবাক অসিদা মিদল ক্লাসকী মশিং হেনগৎলক্লি, অমসুং অনৌবা এস্পিরেস্নেল ক্লাস অমা থোরক্লি। মসি মঙলান কয়া থমজরিবা খুন্নাইগী শরুক অমনি। মখোয়না ময়ুমদা ফ্রিজ অমসুং ৱাশিং মেছিন থম্বা পামজৈ। ইমুংগীদমক্তা স্কুতর নত্ত্রগা মোতোরসাইকল অমা লৈনিংই। মসিনা মখোয়গী অঙাংশিংদা হেন্না ফবা এজুকেসন, ন্যুত্রিসন অমসুং হেল্থকেয়র ফেসিলিতীশিং ফংহনবা পাম্মি। মসিনা তুরিজমদা শেল থাদবা অমসুং অনৌবা এক্সপরিয়েন্সশিং ফংবা পাম্মি। অসিগুম্বা হেনগৎলক্লিবা এস্পিরেসনশিং অসিনা লৈবাক অসিদা অনৌবা দিমান্দ অমা শেমগৎলি। ওতোমোবাইলদগী ইলেক্ত্রোনিক্স ফাওবা, অমসুং তুরিজমদগী সর্ভিস সেক্তর ফাওবা, অনৌবা ইন্দস্ত্রীশিং, ফেক্তরীশিং অমসুং থবক্কী খুদোংচাবশিং থোরক্লি। অতোপ্পা ৱাহৈ অমদা হায়রবদা, নিও-মিদল ক্লাস অসি ভারতকী শেন্মিৎলোনগী চাউখৎপগী মরু ওইবা ইঞ্জিন অমা ওইরক্লি। কর্নাতকা অমসুং বেঙ্গালুরুদসু মশিং য়াম্লবা নিও-মিদল ক্লাসকী কান্নবশিং অসি কেন্দ্র সরকারগী প্রাইওরিতিশিংগী মনুংদা অমনি।

মরুপশিং

কেন্দ্র সরকার অসিনা মিদল ক্লাস কাংলুপকী সেবিং হেনগৎহন্নবা অমসুং মখোয়গী খুৎতা শেল হেন্না লৈহন্নবা লেপ্পা লৈতনা থবক তৌরি। চহিগী ওইনা লুপা লাখ ১২ ফাওবগী ইনকম অসি ঐখোয়না ইনকম তেক্সতগী লৌথোক্লে। তি.দি.এস.গী কাংলোনশিং হোংদোক্তুনা, ঐখোয়না অহল ওইরবা নাগরিকশিং অমসুং রেন্তেল ইনকম ফংলিবা মীওইশিংদা মতেং পাংলি। মথংগী জেনরেসনগী জি.এস.তি.গী রিফোর্মশিংগী খুত্থাংদা, ঐখোয়না নুমিৎ খুদিংগী পোৎলমশিং মমল হন্থহল্লে। পর্সনেল হেল্থ অমসুং লাইফ ইন্সুরেন্সতা জি.এস.তি. লৌথোক্তুনা ঐখোয়না ইন্সুরেন্স অসি হেন্না মমল হোংহল্লে।

মরুপশিং

ঐখোয়না হোৎনরিবা অসি মিদ্দল ক্লাসকী সেভিং হেনগৎহনবা, মখোয়গী পর্চেসিং পৱার মপাঙ্গল কনখৎহনবা অমসুং মখোয়গী ইমুং-মনুংগী মঙলানশিং মপুং ফাহন্নবগী খুদোংচাবা পীবা অদুগা লৈবাক অসিগী শেন্মিৎলোনগী খুমাং চাউশিলহনবদা মতেং পাংবা হায়বসিনি। ঙসি কর্নাতকাদা পাংথোক্লিবা থৌরম অসিনা চাউখৎ-থৌরাংগী খোঙচৎ অসিদা অনৌবা থৌনা অমা পীরগনি। অনৌবা প্রোজেক্তশিং অসিগীদমক ঐহাক্না পুম্নমকক্কী মফমদা য়াইফ-পাউজেল পীজরি। পুম্নমকপু অমুক্কা হন্না থাগৎচরি!

খঙহঞ্জবাঃ মসি প্রধান মন্ত্রীগী ৱারোলগী চাউরাক্না হন্দোকপা ৱারোলনি। অশেংবা ৱারোলদি হিন্দিদা পীখি।

***


(রিলিজ আই.দি.: 2336991) ভিজিতর কাউন্তর : 4
রিলিজ অসি মসিদা পাবীয়ু: English , Urdu , हिन्दी , Assamese , Bengali , Punjabi , Gujarati , Odia , Telugu , Kannada