ভাৰতীয় পথ কংগ্ৰেছৰ দ্বাৰা পথ প্ৰযুক্তিৰ উদ্ভাৱনৰ ক্ষেত্ৰত ২০২৫ চনৰ সন্মানীয় ইউ পি পদকৰ বাবে নিৰ্বাচিত হৈছে গ্ৰামোন্নয়ন মন্ত্ৰালয়ৰ ৰাষ্ট্ৰীয় গ্ৰাম্য আন্তঃগাঁথনি উন্নয়ন সংস্থা (NRIDA)

ভাৰত চৰকাৰৰ গ্ৰামোন্নয়ন মন্ত্ৰালয়ৰ অধীনস্থ ৰাষ্ট্ৰীয় গ্ৰাম্য আন্তঃগাঁথনি উন্নয়ন সংস্থা (NRIDA)-ই বহনক্ষম গ্ৰাম্য আন্তঃগাঁথনিৰ ক্ষেত্ৰত  উল্লেখযোগ্য স্বীকৃতি অৰ্জন কৰিছে। ২০২৫ বৰ্ষৰ বাবে পথ নিৰ্মাণত উদ্ভাৱনী প্ৰযুক্তিৰ বাবে প্ৰদান কৰা সন্মানীয় ইউ পি পদকৰ বাবে সংস্থাটো নিৰ্বাচিত হৈছে। প্ৰধানমন্ত্ৰী গ্ৰাম চড়ক যোজনা (PMGSY)-ৰ অধীনত গ্ৰাম্য পথ নিৰ্মাণৰ ক্ষেত্ৰত ষ্টীল স্লেগৰ উদ্ভাৱনীমূলক ব্যৱহাৰক উৎসাহিত কৰাৰ বাবে NRIDA-ই গ্ৰহণ কৰা পদক্ষেপৰ স্বীকৃতি স্বৰূপে এই বঁটা প্ৰদান কৰা হৈছে।


২০২৬ চনৰ ১৯ নৱেম্বৰত তেলেংগানাৰ হায়দৰাবাদত অনুষ্ঠিত হ’বলগীয়া ভাৰতীয় পথ কংগ্ৰেছৰ ৮৫ সংখ্যক বাৰ্ষিক অধিৱেশনৰ বাৰ্ষিক অনুষ্ঠানত এই বঁটা প্ৰদান কৰা হ’ব।

এই সন্মানীয় স্বীকৃতিৰ বাবে গ্ৰামোন্নয়ন মন্ত্ৰালয় আৰু NRIDA-ই  মনোনয়ন দাখিল কৰিছিল। এই মনোনয়নত ২০২২-২৩ বৰ্ষত অনুমোদিত ঝাৰখণ্ড ৰাজ্যৰ প্ৰধানমন্ত্ৰী গ্ৰাম চড়ক যোজনা-III (PMGSY-III)-ৰ অধীনৰ পথ নিৰ্মাণকাৰ্যত ষ্টীল স্লেগৰ উদ্ভাৱনীমূলক ব্যৱহাৰৰ ওপৰত আলোকপাত কৰা হৈছিল।

এই প্ৰকল্পৰ অধীনত মুঠ ৩৮১.৫৭ কিলোমিটাৰ দৈৰ্ঘ্যৰ পথ সামৰি লোৱা হৈছে, যিয়ে গ্ৰাম্য পথ আন্তঃগাঁথনি নিৰ্মাণত বিকল্প নিৰ্মাণ সামগ্ৰী হিচাপে ষ্টীল স্লেগৰ ব্যৱহাৰৰ সফল প্ৰয়োগৰ নিদৰ্শন দাঙি ধৰিছে। এই পদক্ষেপৰ ফলত সামগ্ৰিক নিৰ্মাণ ব্যয় ২৬ শতাংশ হ্ৰাস কৰিবলৈ সক্ষম হৈছে। ইয়াৰ উপৰি, ঔদ্যোগিক ষ্টীল কাৰখানাসমূহৰ নিকটৱৰ্তী অৱস্থানেও পৰিবহণ ব্যয় অনুকূল কৰি তোলাত সহায় কৰিছে।

এই পদক্ষেপে ঔদ্যোগিক আৱৰ্জনা হিচাপে উৎপন্ন হোৱা ষ্টীল স্লেগক গ্ৰাম্য পথ নিৰ্মাণৰ বাবে বিকল্প সম্পদ হিচাপে ফলপ্ৰসূভাৱে ব্যৱহাৰ কৰাৰ নিদৰ্শন দাঙি ধৰিছে। ইয়াৰ ফলত সম্পদৰ দক্ষ ব্যৱহাৰ আৰু বহনক্ষম আন্তঃগাঁথনিৰ বিকাশক উৎসাহিত কৰা হৈছে।

বহনক্ষম গ্ৰাম্য আন্তঃগাঁথনিৰ প্ৰতি গ্ৰামোন্নয়ন মন্ত্ৰালয় আৰু NRIDA-ৰ দায়বদ্ধতা

গ্ৰামোন্নয়ন মন্ত্ৰালয় আৰু NRIDA-ই এতিয়ালৈকে বহনক্ষম প্ৰযুক্তি ব্যৱহাৰ কৰি মুঠ ১,৮১,৯২৩ কিলোমিটাৰ পথ নিৰ্মাণৰ কামত অনুমোদন জনাইছে, ইয়াৰে ১,৩৯,৯০১ কিলোমিটাৰ পথ নিৰ্মাণৰ কাম সম্পূৰ্ণ হৈছে।

এই স্বীকৃতিয়ে পথ নিৰ্মাণৰ ক্ষেত্ৰত স্থানীয়ভাৱে উপলব্ধ, নিম্নমানৰ আৰু আৱৰ্জনা সামগ্ৰীৰ ব্যৱহাৰক উৎসাহিত কৰাৰ প্ৰতি NRIDA-ৰ নিৰন্তৰ দায়বদ্ধতাক প্ৰতিফলিত কৰিছে। ইয়াৰ লগতে PMGSY-ৰ অধীনত উদ্ভাৱনীমূলক আৰু পৰিৱেশ অনুকূল প্ৰযুক্তিৰ প্ৰয়োগ সহজ কৰি তোলাৰ ক্ষেত্ৰত গ্ৰামোন্নয়ন মন্ত্ৰালয় আৰু NRIDA-ই গ্ৰহণ কৰা প্ৰচেষ্টাসমূহৰো স্বীকৃতি প্ৰদান কৰিছে।

এই পদক্ষেপে সমগ্ৰ দেশতে বহনক্ষম, স্থিতিস্থাপক আৰু পৰিৱেশৰ প্ৰতি দায়বদ্ধ গ্ৰাম্য পথ আন্তঃগাঁথনিৰ বিকাশ সাধনৰ ক্ষেত্ৰত চৰকাৰৰ দৃষ্টিভংগীক অধিক শক্তিশালী কৰি তুলিছে।

PU/SD