বেঙ্গালুরুদা লৈবা প্রশান্তি কুতিরামগী গোল্দন জুবিলী থৌরমশিংদা পি.এম.না থমখিবা ৱারোল

এল্লারিগু নন্না নমস্কারগলু!

কর্নাতককী রাজ্যপাল সুধা য়াদব জী, রাস্ত্রীয় স্বয়মসেবক সঙ্ঘগী সরকার্য়ৱাহ, ঐখোয় পুম্নমকপু লমজিং-লমতাকপীরিবা, শ্রী দত্তাত্রেয় হোসবালে জী, এস-ব্যাসাগী প্রসিদেন্ত ঐচ. আর. নাগেন্দ্র জী, ভাইজ-প্রসিদেন্ত দোক্তর আর. নাগরত্ন জী, চাঞ্চেলর ঐচ. আর. দয়ানন্দ স্বামী জী, ভাইজ-চাঞ্চেলর মঞ্জুনাথ এন. কে. জী, এম.পি. সি.এন. মঞ্জুনাথ জী, খা কোরিয়াগী মির্য়াং শহরগী মেয়র, মফম অসিদা তিল্লিবা অতৈ মরুওইবা মীওইশিং, ইবুঙো অমসুং ইবেম্মশিং!

ঙসি বেঙ্গালুরুদা ঐনা য়োগাগী অঙকপা থৌনা অদু ফাওবগী খুদোংচাবা অমা ফংজরে। কর্নাতককী লমদম অসি চহিচা কয়াদগী য়োগাগী মফম অমা ওইরক্লি। য়োগাগা মরী লৈনবা ওজা অমসুং অখঙ-অহৈ কয়া মফম অসিদা পোকখ্রে অমসুং য়োগাগী চৎন-কাংলোনবুসু মপাঙ্গল কনখৎহনখ্রে। ঐখোয় পুম্নমক্না খঙই মদুদি কন্নরা সিনেমাগী মমীং লৈরবা এক্তর দোক্তর রাজকুমার জীগুম্বা য়োগা তৌবা মীওইশিংশু মফম অসিদা পোকখ্রে, মখোয়না কলাগী লমদা খক্তা নত্তনা য়োগাদসু থৌদাং লৌখ্রে।

মরুপশিং,

কর্নাতককী চাউরবা হেরিতেজ অসিগী মনুংদা, প্রশান্তি কুতিরামগী চহি ৫০গী খোঙচৎ অসি থৌদাং অমসুং কত্থোকপগী অঙকপা অমসুং মমাংদা অমুক্তা থোকখিদ্রিবা ৱারী অমনি, মদু ভারতমচা খুদিংমক্না খঙগদবনি। করম্না চম্লবা য়োগা সেন্তর অমা অসিগুম্বা চাউরবা ঈহৌ অমদা ওন্থোকখিবগে হায়বা অসি মশামক্তা ইথিল পীনবা ৱাফম অমনি।

মরুপশিং,

ঙসিগী থৌরম অসিদা মফম অসিদা অনৌবা খুদোংচাবা কয়া অমসু হৌদোকখ্রে। ঐনা এস-ব্যাসাগী ইমুং-মনুংবুসু হোৎনরিবা অসিগীদমক য়াইফ-পাউজেল পীজরি। ঐনা নখোয় পুম্নমকপু অমসুং প্রশান্তি কুতিরামগা মরী লৈনবা য়োগা তৌবা লাখ কয়াবুসু গোল্দন জুবিলীগী য়াইফ-পাউজেল পীজরি।

মরুপশিং,

প্রশান্তি কুতিরামগী গোল্দন জুবিলীগা লোয়ননা, চহি অসিদা ঐখোয়না ইকায়খুম্নজরবা ঐচ. ভি. শেসাদ্রি জীগী মপোক কুমওনসু হরাও-তয়াম্না পাংথোক্লি। ঐনা মহাক্কী মফমদা থম্মোয় শেংনা খুরুমজরি। শেসাদ্রি জীনা মহাক্কী পুন্সি চুপ্পা 'ব্যাক্তি নির্মান্দগী রাস্ত্র নির্মান ফাওবা (মীওই অমা শেমগৎপাদগী লৈবাক শেমগৎপা ফাওবা)' হায়বা মিসন অসি মাংলোমদা পুখৎনবা হোৎনখি। লৈবাক অমা মাইপাকপগী পন্দুপতা পুখৎকদবা ওইরবদি, মসিগীদমক কত্থোকপা লৈবা, মতিক-ময়াই লৈবা অমসুং কাংলোন ঙাক্না চৎপা নাগরিকশিং মথৌ তাই হায়বা মহাক্না খঙলম্মি। অসিগুম্বা মীওইশিং শেম-শানবা শেসাদ্রি জীনা মশামকপু কত্থোকখি। রাস্ত্রীয় স্বয়মসেবক সঙ্ঘদা লৈরিঙৈদা মহাক্না ফংখিবা পান্দমশিং অদু, ঙসিসু স্বয়মসেবক করোর কয়ানা মহাক্কী ইথিল লৌরি।

মরুপশিং,

ঐখোয়না মহাকপু নিংশিংলকপা মতমদা, খ্বাইদগী অহেনবা মহাক্কী চম্লবা শক্তম অদু ঐখোয়গী পুক্নিংদা লাক্কনি। হৌজিক দত্তা জীনসু মহাক্কী চম্লবা মওং-মতৌ অদুবু য়াম্না ফবা ৱাহৈশিংনা তাকখ্রে। অসিগুম্বা চাউরবা মীওই অমা, অসিগুম্বা পাক-চাউরবা এক্সপিরিয়েন্স লৈবা মীওই অমা, অমসুং তশেংনা, থৌওং-থৌওংদা য়াম্না হৈথোই-শিংথোইবা! মশাবুনা তুংদা লৈদুনা অতৈবু মাংলোমদা পুখৎপা, মীওইশিংবু পুনশিনবা, মখোয়বু লৈবাক অসিগীদমক শেম-শাবা, মসি মহাক্কী পুন্সিগী চাউরবা সাধনানি। খন্ন-নৈনবগী মনুংদা, মহাক্না তোইনা খুদম অমা পীরম্মি। মহাক্না হায়রম্মি মদুদি ঐখোয়না মমা অমগী মওং-মতৌদগী তমগদবনি। মমা অমনা অঙাংগীদমক অহিং চুপ্পা ঙাইদুনা করম্না চেকশিন্না য়েংশিনবগে, মহাকপু ঙাক-শেনবগে, মহাক্কীদমক কান্নবা খন্দনা করম্না থবক তৌবগে হায়বা অদুগুম্না, ঐখোয়না ৱাখল্লোন অসি সমাজদা শন্দোক্লবদি, সমাজতা কয়ামুক কান্নবা ফংগনি।

মরুপশিং,

শেসাদ্রি জীনা মমা অমগুম থম্মোয় শেংনা সমাজগী সেবাদা কত্থোকখি। অমসুং ঐনা লেপ্পা লৈতনা মহাক্কী নুংশিবা ফংজবা, মহাক্কী লমজিং-লমতাক ফংজবা অসি ঐগী লাইবক ফবনি। মহাক্কা লোয়ননা লৈমিন্নখিবা মতমগী নিংশিংবশিং, মহাক্কী ৱাহৈশিং অদু ঙসিসু ঐগীদমক য়াম্না মমল য়াম্মী।

মরুপশিং,

শেসাদ্রি জীগী অতৈ ৱাফম অমা ঐনা কৈদৌঙৈদা কাওবা ঙমদে। মহাক্না হায়রম্মি মদুদি ঐখোয়না সমাজদা খুৎ অনীমক্না পীরবদি, সমাজনা ঐখোয়দা খুৎ লাখ কয়ানা হন্দোক্লক্কনি। ঐগী পুন্সিদসু মসি মায়পাক্না থবক ওইনা পাংথোকপা ঐনা উখ্রে। মীয়ামগী সেবা তৌরিঙৈদা মীয়াম্না ঐঙোন্দা মতম পুম্নমক্তা মখোয়গী থৌজাল পীরক্লি অমসুং মসি ঐগী পুন্সিগী য়াম্না চাউরবা লন অমনি।

মরুপশিং,

ঐখোয়না শেসাদ্রি জীগী ইমুং-মনুংদসু অসিগুম্বা সেবগী ৱাখল্লোন অসি উবা ফংই। দোক্তর নাগেন্দ্র জী অমসুং দোক্তর নাগরত্ন জীনা মখোয়গী থবকশিংগী খুত্থাংদা মহাক্কী মিসন অদু মাংলোমদা পুখৎলি। ঐনা মখোয়না হোৎনরিবা খুদিংমকপুসু থাগৎলি, মখোয়বুসু তরাম্না ওকচরি।

মরুপশিং,

লৈবাক অসিনা মীনাই নাইথাংগী য়োৎহিংদা পুন্দুনা লৈবা মতমদা, অমরোমদা নিংতম লান্মী লাখ কয়ানা নিংতম্বগীদমক লান্থেংনরম্মি, অমসুং অমরোমদনা স্বামী বিবেকানন্দগুম্বা লৈবাক্কী রিশি অমনা ভারতকী স্পিরিচুয়েল ওইবা ৱাখল্লোনবু মীৎকপ থোকহনখি, ভারতকী নহাশিংদা য়োগাগী লম্বী তাকখি।

মরুপশিং,

স্বামী বিবেকানন্দ জীগুম্বা রিশিশিংদগী ফংখিবা ইথিলনা প্রশান্তি কুতিরামগুম্বা ইন্সতিত্যুতশিং পোকহনখি। মফম অসিদা য়োগাবু মীওই খুদিংমক্না শম্নহন্নবা কেম্পেন খক্তা নত্তনা, অনৌবা সাইন্সকী য়ুম্ফমদা অনৌবা রিসর্চশিং চত্থখি। মফম অসিদা য়োগা প্রেক্তিসনর্সশিং খক্তা নত্তনা সমাজগীদমক ত্রেনরশিং অমসুং ফিলোসোফরশিংসু শেম-শাখি। ওজাশিং, দোক্তরশিং অমসুং রিসর্চরশিং অসিনা ঙসি লৈবাক-মালেমদা য়োগাগী খুত্থাংদা মীয়ামগী সেবা তৌরি। প্রশান্তি কুতিরামদগী শেমগৎলকপা এস-ব্যাস অসি য়োগা ইজুকেসন, সাইন্তিফিক রিসর্চ অমসুং হেল্থ সর্ভিসেসকী লমদা মরুওইবা ইন্সতিত্যুত অমা ওইরকখ্রে। নখোয়না য়োগাগা লোয়ননা আয়ুর্বেদ, নেচুরোপেথী অমসুং মোদর্ন মেদিকেল সাইন্সকা মরী লৈনবা ফেসিলিতীশিংগী হোলিস্তিক ৱেলনেস ইকোসিস্তেম অমা শেমগৎখ্রে। স্ত্রেসকা মরী লৈনবা চেলেঞ্জশিং, লাইফস্তাইলগা মরী লৈনবা লাইনাশিং, লম অসিদা তৌখিবা রিসর্চ ৱার্কনা মালেম পুম্বদা সেবা পীরি। ঐনা প্রশান্তি কুতিরামবু অসিগুম্বা হোৎনরিবা অসিগীদমক থাগৎলি।

মরুপশিং,

হৌখিবা চহি ১২গী মনুংদা, ভারতনা মহাক্কী কলচর, মহাক্কী মশক অমসুং মহাক্কী লৌশিং-সাইন্সপু মালেম পুম্বগী মমাংদা থাজবগা লোয়ননা, অমসুং মসি ঐনা থৌদাং খঙনা হায়জরি, থাজবা পুম্নমক্কা লোয়ননা থম্লি। মসিগী মহৈ অসি ভারতনা থৌরাং লৌখৎপদা হৌজিক মালেম পুম্নমক্না ইন্তর্নেস্নেল য়োগা দে হরাও-তয়াম্না পাংথোক্লিবা অসিদনি। য়োগা দেগী নুমিৎতা ওস্ত্রেলিয়াদগী হৌনা অফ্রিকা অমসুং অমেরিকা ফাওবা য়োগাগা মরী লৈনবা প্রোগ্রামশিং পাংথোকই। মসিদা মীওই করোর কয়ানা শরুক য়াই। ঙসি মালেমগী লৈবাক কয়াদা ঐখোয়গী য়োগা অসি স্কুলশিং, ইন্সতিত্যুতশিং অমসুং থবক তৌফমশিংদা য়ৌখ্রে। হৌজিক খুদম ওইনা সাউদি অরেবিয়াদা, সাউদি অরেবিয়াদা য়োগাবু স্পোর্তস এক্তিবিতী অমা ওইনা খঙনরক্লে। মফম অদুগী স্পোর্তস মিনিস্ত্রীনা য়োগাবু শৌগৎনবা ভারতকী আয়ুস মিনিস্ত্রীগা এগ্রিমেন্ত অমা, মেমোরেন্দম অমা তৌখ্রে। মীরৈবাক্কী নাগরিকশিংনা য়োগাবু শৌগৎপগী খুদমশিং লেপ্পা লৈতনা লাক্লি। অমসুং ঐগী এক্সপিরিএন্স লৈ, ঐনা মালেমদা অমহেক্তদা চৎপা মতমদা, লঞ্চকী নত্রগা দিন্নরগী মতমদা, মীরৈবাক্কী মীথুংলেনশিং নত্রগা মীরৈবাক অদুগী লুচিংবশিংনা ঐগা লোয়ননা ফমদুনা, য়োগাগী মতাংদা খন্ন-নৈনদবা লঞ্চ নত্রগা দিন্নর অমত্তা লৈরম্লোই হায়না ঐনা খল্লি, অমসুং অহানবদা ঐনা মখোয়দা তাকপীবা-খঙহনবা মথৌ তাই, ঐ য়োগা এক্সপর্ত নত্তে, ঐ প্রেক্তিস্নর অমনি, অমসুং অদুগা ঐনা মখোয়দা অসিগুম্বা কান্নবা ফংই হায়না হায়রম্মি, অমসুং মখোয়না ৱাহং কয়া হংলম্মি। অমসুং ঐনা মালেমগী লুচিংবা কয়া উখ্রে, মখোয়না হায় মদুদি ঐগী নুপীনা চহিগী অমুক্তং ভারত্তা চৎলি, য়োগা তম্বী, মফম অসিদা য়োগা তম্বী। ঐগী মচানুপীনা য়োগা তম্বী, ঐগী ইচানুপীনা য়োগাগীদমক মশামকপু কত্থোকখ্রে। মালেমগী চাউরবা লৈবাকশিংগী লুচিংবশিংগী ইমুংদা কনাগুম্বা অমতংদি লৈগনি, মদুনা য়োগাগা মরী লৈনবা থেংনৈ। হায়বদি য়োগাগী খুত্থাংদা ভারত কদাইদা য়ৌখ্রে হায়বনি। য়োগানা ভারতপু খঙনবা লম্বী অমা ওইরক্লিবা অদু উবা ফংলি। অমসুং ঐনা উখ্রে মদুদি মীরৈবাক্কী নাগরিকশিং, ঐনা কাতারগী রোয়েল ফেমিলী হায়রবসু, নত্রগা অতৈ কনাগুম্বসু, মখোয়না য়োগাদা মপুং ফানা কত্থোক্লে, অমসুং অসিগুম্বা মীওই কয়াবু ভারতনা পদ্ম শ্রী পীবীদুনা ইকায়খুম্নবা উৎখ্রে।

মরুপশিং,

মালেমগী মীয়াম্না য়োগাগী মতাংদা খঙবা হেনগৎলকপগা লোয়ননা ভারতপু খঙনীংবগী অপাম্বসু হেনগৎলক্লি। ঐখোয়গী কলচরগী মতাংদা, ঐখোয়গী চৎন-কাংলোনগী ওইবা লৌশিংগী মতাংদা অনৌবা পুক্নিং চিংশিনবা অমা পোক্লক্লি। মসিনা ভারত অমসুং মালেমগী মরক্তা অনৌবা মরী লৈননবগী লম্বী অমা হাংদোক্লি। অমসুং মসি পুম্নমক ঐখোয় পুম্নমক্কী পুন্না হোৎনমিন্নবনা খক্তনি ফংবা ঙম্লিবসি। করিগুম্বা ঐনা আয়ুর্বেদকী মতাংদা হায়রবদি, মালেমগী তোঙান-তোঙানবা লৈবাকশিংদা আয়ুর্বেদকী ত্রেনিং কোর্স ১৫০দগী হেনবা অয়াবা পীখ্রে। আয়ুর্বেদকী পাকথোক-চাউথোকপদা মতেং পাংনবা মালেমগী লৈবাক ২৮গা এম.ও.য়ু. (MoUs) সাইন তৌখ্রে।

মরুপশিং,

ঐখোয়গী পান্দমদি আয়ুর্বেদ অমসুং য়োগাগী কান্নবা অসি লৈবাক্কী নাগরিক খুদিংমক্তা য়ৌহনবনি। অমসুং ঙসি মালেমদা হোলিস্তিক হেল্থ কিয়র অসি অনৌবা ঈহৌ অমা ওইরক্লি। অমসুং মরম অদুনা আয়ুর্বেদ অমসুং নেচুরোপেথীগী মাইকৈদা মীৎয়েং চঙবা হেনগৎলক্লি।

অমসুং মরুপশিং,

মাইকৈ পুম্নমক্তা অসিগুম্বা মতিক-মগুন অমসুং অপাম্বা লৈবা মতমদা, য়োগা শন্দোকপা অসিগা লোয়ননা ঐখোয়না মথৌ তাবগী মতুং ইন্না কাংলোন কয়াসু হোংদোকখ্রে। ভারত্তা য়োগাসনবু কম্পিতিতিব স্পোর্ত অমা ওইনসু শকখঙখ্রে। খেলো ইন্দিয়া অমসুং নেস্নেল গেমসকুম্বা থৌরমশিংদসু য়োগাসনগীদমক অনৌবা মফম অমা শেমখ্রে। অহোংবা অসি ভারতকীদমক য়াম্না মরুওই। হন্দক ইন্তরনেস্নেল য়োগা কম্পিতিসন অমা অহমেদাবত্তা পাংথোকখি। অমসুং ঐ য়াম্না অঙকপা ফাওখি, ঐনা উজবেকিস্তানদা চৎপা মতমদা মখোয়না মালেম পুম্বদা নম্বর ১ ফংখি, অমসুং ৱিন্নর ওইরিবশিং পুম্নমক, গোল্দ মেদেলিস্তশিং অদু মখোয়না, মফম অদুগী নাগরিকশিংনা পুনশিনখি। হায়বদি ঐনা চৎলিবা মফম খুদিংমক্তা, ঐনা উরিবা, ঐনা থেংনরিবা মফম খুদিংমক্তা য়োগা অসি খন্ন-নৈনবগী মরুওইবা মফম অমা ওইরক্লি। অমসুং মসিনা য়োগাগা মরী লৈনবা মীওইশিংগীদমক কম্পিতিতিব কম্পিতিসনশিংদা শরুক য়ানবগী লম্বীশিংসু হাংদোকখ্রে।

মরুপশিং,

য়োগাগুম্না আয়ুর্বেদপুসু ভারত সরকারনা লেপ্পা লৈতনা য়োকখৎলি। ঐখোয়গী লৈবাক অসিদা মীয়াম্না মীৎয়েং থমদবা কয়া অমা লৈ, খ্বাইদগী ফবা মীওইশিংসু মসিদা মীৎয়েং থমদে, হীরমশিং অসি পামজবা মীওইশিংসু মসিদা মীৎয়েং থমদে। নিংতম্লবা চহি কয়াগী মতুংদা লৈবাক অসিদা অহানবা ওইনা তোঙানবা আয়ুস মিনিস্ত্রী অমা শেমখ্রে। ঐখোয়না আয়ুর্বেদকা মরী লৈনবা রিসর্চ অমসুং আয়ুর্বেদতা য়ুম্ফম ওইবা পেতেন্তশিংবু শৌগৎখ্রে। অমসুং ঙসি মসিগী মহৈ অদু ঐখোয়গী মাংদা লৈরে। ভারত্তগী আয়ুস অমসুং হর্বেল প্রদক্তশিংগী এক্সপোর্ত লেপ্পা লৈতনা হেনগৎলক্লি। আয়ুস সেক্তরগা মরী লৈনবা ইকনোমী অসি লুপা করোর লাখ কয়াদা য়ৌখ্রে। ঐখোয়গী য়াইঙং,

মদু ভারতকী ইমুং-মনুংদা চহিচা কয়াদগী মখোয়গী চীঞ্জাক অমসুং য়ুমগী চৎন-কাংলোনশিংদা শিজিন্নরক্লি, ঙসি মালেমদসু মসিগী পাম্নবা হেনগৎলক্লি। ভারতকী য়াইঙং হৌজিক্তি য়াম্না ঙক্নীংঙাই ওইবা চাংদা এক্সপোর্ত তৌরি। মসিগী এক্সপোর্ত লেপ্পা লৈতনা হেনগৎলক্লি। য়াইঙং পুথোকপা, ক্বালিতী অমসুং এক্সপোর্ত তৌবদা অনৌবা থৌনা পীনবা ঐখোয়না নেস্নেল তর্মরিক বোর্দ অমা শেমখ্রে।

মরুপশিং,

ঐখোয়গী অরিবা সাইন্স অমসুং অনৌবা রিসর্চশিংগী কান্নবা অসি মীওইবা জাতিদসু ফংহনগদবনি অমসুং নহাশিংগীদমক মসিগা মরী লৈনবা খুদোংচাবশিংসু ফংহনগদবনি। মসিগীদমক সরকারনা ই-আয়ুস ভিজাগী (e-AYUSH visa) ফেসিলিতী হৌদোকখ্রে। মসিনা মীরৈবাক্তগী ভারত্তা লায়েংনবা লাকপা মীওইশিংদা লায়হনখ্রে। বিশ্ব স্বাস্থ্য সঙ্গথন (W.H.O.)গী গ্লোবেল ত্রেদিস্নেল মেদিসিন সেন্তর জামনগরদা লিংখৎখ্রে। মসিগী খুত্থাংদা, ত্রেদিস্নেল মেদিসিনদা রিসর্চ অমসুং ইন্তর্নেস্নেল কোওপরেসন প্রমোৎ তৌরি।

মরুপশিং,

ঙসি লৈবাক অসিগী নাগরিক করোর ১৪০না অমত্তা ওইবা পান্দম অমা থমদুনা লেপ্পা লৈতনা হোৎনরি। অমসুং, চাউখৎপা ভারত শেমগৎপা! অমসুং ৱার্ল্দ বেঙ্ককী অনৌবা রিপোর্তনা কেম্পেন অসিদা অনৌবা থৌনা অমা পীরে। ৱার্ল্দ বেঙ্ককী রিপোর্ততা হায়রি মদুদি হৌখিবা চহি ১২-১৩গী মনুংদা ভারতমচা করোর ৫০ রোম, মশিং অসি য়াম্না চাউই, ভারতমচা করোর ৫০ রোম লায়রবগী পুন্সিদগী নান্থোরকখ্রে। হৌজিক ইমুং করোর কয়া অসিগী মাংদা হেন্না ফবা পুন্সিগী অনৌবা খুদোংচাবশিং লৈরে। হকশেল ফবা পুন্সি মহিং শিজিন্ননবা, অমসুং মখোয়গী ইমুং-মনুংগী হকশেলদা মীৎয়েং থমনবা খুদোংচাবশিং হেনগৎলে। ঐখোয়গী পান্দমদি হকশেল ফবা পুন্সি মহিং অসি ইমুং খুদিংমক্কী অহানবা ওইহনবনি। অমসুং য়োগানা মসিদা য়াম্না চাউবা থৌদাং লৌবা ঙম্মী, অমসুং ঐনা মতম পুম্নমক্তা হায়, য়োগানা লাইনাদগী ঙাকথোকই অমসুং য়োগানা অপাম্বা থিংবসু ঙমহল্লি। অমসুং মসি খক্তা নত্তনা মসি জিরো কোস্ত বজেত (Zero cost budget) লৈবা হেল্থকী খ্বাইদগী চাউবা লাইয়েংনি। প্রশান্তি কুতিরাম অসি স্কিম অসিগী কেম্পেনগী শরুক অমনি, মখোয়গী মাইকৈদগী অনৌবা প্রোজেক্ত কয়া হৌদোক্লি, মখোয়গী মতেংসু লৈ। অমসুং মখোয়গী মতেং অসি থবক্তা য়াম্না কান্নবা পীরি, মরম অদুনা ঐনা পাম্মী মদুদি নখোয়না হৌজিক্তগী অনৌবা পান্দমশিংগীদমক রোদমেপ শেম্মু। হৌজিক্তি ঐ লাক্লে, মরম অদুনা ঐনা নাগেন্দ্র জীদা থবক খরা পীদুনা চৎকনি। দোক্তর নাগেন্দ্র জী মশামক্না ঐঙোন্দা হন্দক ইরকপা মহাক্কী চিথীদা হায়রকখি, মদুদি মহাক মমাংদগী হেন্না নহা ওইরে হায়না ফাওই। অমসুং মরম অদুনা, মহাক্কী নহা ওইবগী থৌনা অদু প্রশান্তি কুতিরামদসু কান্নবা ফংগনি, অমসুং লৈবাক অসিদসু ফংগনি। অদুবু প্রশান্তি কুতিরাম অসি চহি ৭৫ শুরকপা অমসুং মতম অদুদা লৈবাক অসি চাউখৎপা ভারত অমা ওইহনবা পাম্মী। অসুম্না, চাউখৎলবা ভারত অসিবু ৱাখলদা থম্লদুনা, অদোম্না মথংগী চহি ২৫ করম্না ওইগদগে হায়বগী থৌরাং অমা শেমগদবনি, অমসুং মদুদা অদোম্না ইথিল পীনগদবনি, মদুনা অদোম্না খল্লবা লম্বী অদুনা লৈবাক অসিবু মপাঙ্গল কনখৎহনগনি অমসুং চাউখৎলবা ভারত্তা অদোমগী চহি ৭৫গী খোঙচৎ, মথংগী চহি ২৫গী খোঙচৎ অসিনা মতেং ওইরগনি। মাইকৈ অদুদা নখোয়না খল্লু। থাজবা অসিগা লোয়ননা ঐনা অমুক হন্না নখোয় পুম্নমকপু গোল্দন জুবিলী থৌরমগী য়াইফ-পাউজেল পীজরি। ঐনা ইকায়খুম্নজরবা শেসাদ্রি জীগী মফমদসু অমুক হন্না খুরুমজরি। নখোয় পুম্নমকপু য়াম্না থাগৎচরি!

***