مرکزی وزیر برائے جل شکتی،جناب سی آر پاٹل نے تروچراپلی میں جل جیون مشن 2.0پر منعقدہ پہلی علاقائی کانفرنس سے خطاب کیا۔

مرکزی وزیر برائے جل شکتی، شری سی آر پاٹل نےجل جیون مشن 2.0پر منعقدہ پہلی علاقائی کانفرنس سے خطاب کیا۔ اس کانفرنس کا اہتمام وزارتِ جل شکتی کے محکمہ پینے کا پانی و صفائی ستھرائی نے حکومتِ تمل ناڈو کے اشتراک سے کیا تھا۔ 12 اور 13 نومبر 2026 کو منعقد ہونے والی اس دو روزہ کانفرنس میں سات جنوبی ریاستوں اور مرکز کے زیر انتظام علاقوں—تمل ناڈو، کرناٹک، کیرالہ، آندھرا پردیش، تلنگانہ، پڈوچیری اور لکشدیپ—کے اعلیٰ عہدیداروں اور نمائندوں نے شرکت کی۔ اس کا مقصد پیش رفت کا جائزہ لینا، درپیش چیلنجوں سے نمٹنا اور دیہی علاقوں میں پینے کے پانی کی پائیدار خدمات کو مستحکم کرنا ہے۔

کانفرنس کے وزارتی اجلاس کی صدارت کرتے ہوئے، مرکزی وزیر برائے جل شکتی نے 2019 میں جل جیون مشن کے آغاز کے پیچھے وزیر اعظم کے اس انقلابی وژن کو یاد کیا، جس کا مقصد ہر دیہی گھرانے تک نل کے پانی کی رسائی کو یقینی بنانا تھا۔ انہوں نے اس مشن کے تحت حاصل ہونے والی نمایاں پیش رفت کا ذکر کرتے ہوئے بتایا کہ تقریباً 16 کروڑ دیہی گھرانوں تک نل کے پانی کے کنکشن پہنچ چکے ہیں، جس سے دیہی برادریوں، بالخصوص خواتین کی زندگیوں میں نمایاں بہتری آئی ہے۔

مرکزی وزیر نے بتایا کہ یہ علاقائی کانفرنس 1 اور 2 ستمبر 2026 کو منعقدہ پانی سے متعلق محکمانہ سربراہی اجلاس کے تسلسل میں منعقد کی گئی ہے، تاکہ اس اجلاس میں ہونے والی بات چیت اور فیصلوں کو ریاست، ضلع اور گاؤں کی سطح پر ٹھوس اقدامات میں تبدیل کیا جا سکے۔ انہوں نے زور دیا کہ باقی ماندہ کاموں کو مشن کی منظور شدہ ڈیڈ لائن یعنی دسمبر 2028 تک مکمل کر لیا جانا چاہیے، اور ریاستوں سے اپیل کی کہ جہاں بھی ممکن ہو، ان کاموں کو دسمبر 2027 تک مکمل کرنے کے لیے مربوط کوششیں کی جائیں۔

مرکزی وزیر نے اس بات پر زور دیا کہ جل جیون مشن 2.0 محض بنیادی ڈھانچہ تعمیر کرنے سے آگے بڑھ کر، پینے کے پانی کی یقینی اور پائیدار فراہمی کی جانب ایک اہم پیش رفت ہے۔ انہوں نے ریاستوں کو تجویز کردہ ڈھانچہ جاتی اصلاحات کو عملی شکل دینے کی ضرورت پر زور دیا، خاص طور پر آپریشن اور دیکھ بھال ، ادارہ جاتی جوابدہی اور دیہی پانی کی فراہمی کے نظام کی طویل مدتی فعالیت سے متعلق۔ انہوں نے مقررہ اصلاحات کی شرائط کو پورا کرنے سے مشروط، اہل کاموں کے لیے مالی مدد فراہم کرنے کے لیے حکومت ہند کے عزم کا اعادہ کیا، اور ریاستوں پر زور دیا کہ وہ دستیاب وسائل کے نفاذ اور موثر استعمال کو تیز کریں۔

پانی کی حفاظت کی اہمیت پر زور دیتے ہوئے مرکزی وزیر نے زمینی پانی کے ریچارج، بارش کے پانی کی ذخیرہ اندوزی اور کمیونٹی کی زیر قیادت پانی کے تحفظ پر زیادہ توجہ دینے پر زور دیا۔ جل سنچے جان بھاگیداری کا حوالہ دیتے ہوئے، انہوں نے پانی کے تحفظ کے وکندریقرت ڈھانچے کی صلاحیت کو اجاگر کیا اور ریاستوں پر زور دیا کہ وہ محکموں کے درمیان ہم آہنگی کو مضبوط کریں اور وسائل کی پائیداری کے اقدامات میں کمیونٹیوں کو فعال طور پر شامل کریں۔ انہوں نے حصہ لینے والی ریاستوں کو کامیاب طریقوں کا تبادلہ کرنے اور نفاذ کے چیلنجوں پر قابو پانے کے لیے عملی حل اپنانے کی بھی حوصلہ افزائی کی۔

تمل ناڈو حکومت میں دیہی ترقی اور پنچایتی راج اور آبی وسائل کے وزیر جناب تھیرو این آنند نے دیہی گھریلو نل کے پانی کے کنکشن کو وسعت دینے اور پانی کی فراہمی کی مشترکہ اسکیموں کے ذریعے پینے کے پانی کے بنیادی ڈھانچے کو مضبوط بنانے اور موجودہ نظاموں کو بہتر بنانے میں ریاست کی پیشرفت پر روشنی ڈالی۔ انہوں نےاو اینڈ ایم، اوور ہیڈ ٹینکوں کی وقتاً فوقتاً صفائی، کمیونٹی پر مبنی پانی کے معیار کی جانچ، پانی کی سروس چارجز کی وصولی اور پینے کے پانی کی خدمات کی ضلعی سطح کی نگرانی سے متعلق اقدامات کا خاکہ پیش کیا۔ انہوں نےجل جیون مشن 2.0 کے تئیں تمل ناڈو کی وابستگی کا اعادہ کیا اور بقیہ کاموں کو مکمل کرنے اور پینے کے پانی کی خدمات کو برقرار رکھنے کے لیے مرکز-ریاست کے مسلسل تعاون پر زور دیا۔

جناب اشوک کے کے مینا، سکریٹری، ڈی ڈی ڈبلیو ایس نے بتایا کہ تروچیراپلی کانفرنس پانچ علاقائی کانفرنسوں کی سیریز میں پہلی کانفرنس تھی جس کا مقصد ستمبر 2026 میں منعقدہ پانی سے متعلق محکمۂ اجلاس کے نتائج کو قابل عمل اقدامات میں ترجمہ کرنا تھا۔ انہوں نے ذرائع کی پائیداری، مؤثراو اینڈایم انتظامات، مالی استحکام، ہنر مند مقامی افرادی قوت اور گرام پنچایت کی زیر قیادت گورننس کو کلیدی ترجیحات کے طور پر مضبوط بنانے پر زور دیا۔ انہوں نے ڈیجیٹل پلیٹ فارمز کی اہمیت پر بھی روشنی ڈالی، بشمول سجلام بھارت، اور پائیدار خدمات کی فراہمی میں معاونت کے لیے بین وزارتی ہم آہنگی پر زوردیا۔

جناب کمل کشور سون، ایڈیشنل سکریٹری اور مشن ڈائریکٹر،این جے جے ایم، نے مختلف پیشکشوں میں اپنی بات چیت کے دوران، اصلاحات کو مؤثر فیلڈ سطح پر عمل آوری میں تبدیل کرنے اور دیہی ترقی، پنچایتی راج اور دیہی پانی کی فراہمی کے محکموں کے درمیان بین محکمانہ تال میل کو مضبوط کرنے کی ضرورت پر زور دیا۔

انہوں نے پینے کے پانی کے ذرائع کا باقاعدہ جائزہ لینے، فینانس کمیشن کی گرانٹس کے موثر استعمال، گرام پنچایت کے اپنے ذریعہ آمدنی کو مضبوط بنانے اور آپریشن اور دیکھ بھال کے لئے پائیدار فنانسنگ کو یقینی بنانے کی ضرورت کو اجاگر کیا۔

وزارتی اجلاس کے دوران ڈی ڈی ڈبلیو ایس کے جوائنٹ سکریٹری جناب ڈی سینتھل پانڈیان نے علاقائی کانفرنس کے مقاصد اور کلیدی بات چیت کے بارے میں عزت مآب مرکزی وزیر کو آگاہ کیا۔ انہوں نے باہمی سیکھنے، بہترین طریقوں کے اشتراک اور ریاستوں/ مرکز کے زیر انتظام علاقوں کے درمیان تال میل کو مضبوط کرنے کے پلیٹ فارم کے طور پر علاقائی کانفرنسوں کی اہمیت کو اجاگر کیا۔ کلنائی ڈیم اور کاویری کے پانی کے انتظام کے نظام کی تاریخی اہمیت کا ذکر کرتے ہوئے، انہوں نے جل جیون مشن 2.0 کے تحت پائیدار دیہی پینے کے پانی کی خدمات کو یقینی بنانے کے لیے کمیونٹی کی ملکیت، موثر آپریشن اور دیکھ بھال، اور بین ڈپارٹمنٹل کنورژن پر زور دیا۔

کانفرنس کا آغازجناب دنیش پونراج اولیور، مشن ڈائریکٹر، جے جے ایم، تمل ناڈو کے استقبالیہ خطاب سے ہوا۔ تمل ناڈو حکومت کے سینئر افسران اور شریک ریاستوں اور مرکز کے زیر انتظام علاقوں کے نمائندوں نے بھی بحث میں شرکت کی۔

ڈی ڈی ڈبلیو ایس کے ڈائریکٹر جناب ہری نارائن مروگن نےجل جیون مشن 2.0 کے تحت وژن اور کلیدی ڈھانچہ جاتی اصلاحات پیش کیں اور مختلف اصلاحاتی پیرامیٹرز پر حصہ لینے والی ریاستوں اور مرکز کے زیر انتظام علاقوں کی پیش رفت کا جائزہ لیا۔ پریزنٹیشن میں ادارہ جاتی مضبوطی، خدمات کی افادیت کے انتظامات، ذرائع کی پائیداری، پانی کے معیار کی حکمرانی، ڈیجیٹل نگرانی، صلاحیت کی تعمیر اور ہنر مند انسانی وسائل پر روشنی ڈالی گئی۔

ہنر مندی کی ترقی اور انٹرپرینیورشپ کی وزارت نے، جس کی نمائندگی ڈاکٹر ایم جے پرکاشن، علاقائی ڈائریکٹر،آر ڈی ایس ڈی ای نے کی، نے دیہی پینے کے پانی کے نظام کے آپریشن اور دیکھ بھال کے لیے ایک ہنر مند مقامی افرادی قوت تیار کرنے کی اہمیت کو اجاگر کیا، جس میں گاؤں کی سطح کے کارکنوں کی تربیت اور سرٹیفیکیشن بھی شامل ہے۔

ڈی ڈی ڈبلیو ایس کے ڈائریکٹر جناب کے وائی سنگھ نے قبائلی اور خاص طور پر کمزور قبائلی گروہوں کی بستیوں میں پینے کے پانی کی ضروریات کو پورا کرنے کے لیےپی ایم جن من ،دھرتی آبا جن جاتیہ گرام اتکرش ابھیان سمیت قبائلی ترقی کے بڑے اقدامات کے ساتھ ہم آہنگی کے مواقع پر روشنی ڈالی۔

دیہی ترقی کی وزارت نے، جس کی نمائندگی محترمہ دیکشا سپیال بشت، اسسٹنٹ کمشنر،وی بی جی گرام اورجناب گوری شنکر، پروجیکٹ آفیسر، ایم او آر ڈی نے کی۔وی بی گرام کے تحت پانی کے تحفظ، زمینی پانی کے ریچارج، ذریعہ کی پائیداری اور قابل دیکھ بھال سے متعلق مداخلتوں کے لیے مواقع پیش کیے۔

پنچایتی راج کی وزارت کے ڈائرکٹر جناب وپل اجول نے دیہی پینے کے پانی کی خدمات کو برقرار رکھنے میں گرام پنچایتوں کے مرکزی کردار پر روشنی ڈالی، خاص طور پراو اینڈایم نانسنگ، گرام پنچایت ترقیاتی منصوبوں میں پینے کے پانی کی ضروریات کے انضمام اور مالیاتی کمیشن کی گرانٹس کے استعمال پر زور دیا۔ بات چیت میں راشٹریہ گرام سوراج ابھیان کے تربیتی فریم ورک کے ساتھ جل جیون مشن 2.0 کے تحت تیار کردہ صلاحیت سازی کے ماڈیولز کے ہم آہنگی پر بھی زور دیا گیا۔

***

(ش ح۔اص)

UR No 7566