કેન્દ્રીય વાણિજ્ય મંત્રી શ્રી પીયૂષ ગોયલે આંધ્રપ્રદેશના મુખ્યમંત્રી શ્રી એન. ચંદ્રબાબુ નાયડુ સાથે વિશાખાપટ્ટનમ ખાતે 31મી CII પાર્ટનરશિપ સમિટનું ઉદ્ઘાટન કર્યું

આજે આંધ્રપ્રદેશના વિશાખાપટ્ટનમ ખાતે 31મી કોન્ફેડરેશન ઓફ ઇન્ડિયન ઇન્ડસ્ટ્રી (CII) પાર્ટનરશિપ સમિટ 2026ના ઉદ્ઘાટન સત્રને સંબોધતા, કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલે જણાવ્યું હતું કે વિશ્વ જ્યારે અસ્થિરતા, સંઘર્ષો અને અનિશ્ચિતતાનો સામનો કરી રહ્યું છે ત્યારે પણ ભારત વૈશ્વિક રોકાણકારો માટે એક અનુમાનિત, વિશ્વસનીય અને ઉચ્ચ-ક્ષમતા ધરાવતું ગંતવ્ય સ્થાન બની રહ્યું છે.

મંત્રીએ પવિત્ર કાર્તિક માસને દીપ દાનમ એટલે કે પ્રજ્વલિત દીપના નિઃસ્વાર્થ અર્પણની પરંપરા સાથે સાંકળ્યો હતો. તેમણે કહ્યું કે “એક દીવો બીજા દીવાને પ્રગટાવવાથી કંઈ જ ગુમાવતો નથી” અને તે ભાગીદારીની વ્યાખ્યાને શ્રેષ્ઠ રીતે દર્શાવે છે. તેમણે આ સમિટને “જીવનને પ્રકાશિત કરવા અને વેપાર તથા વ્યવસાયની તકોને ઉજાગર કરવા” ના વધુ એક અવસર તરીકે વર્ણવી હતી.

વિશાખાપટ્ટનમની સ્થિતિસ્થાપકતા (રિઝિલિયન્સ) નું પ્રદર્શન

વિશાખાપટ્ટનમ અને આંધ્રપ્રદેશની હિંમત અને દ્રઢ નિશ્ચયની પ્રશંસા કરતા, શ્રી ગોયલે નોંધ્યું હતું કે વિશાખાપટ્ટનમે ટૂંકા ગાળામાં બે વાવાઝોડાઓનો (28 ઓક્ટોબર અને 3 નવેમ્બરના રોજ) સામનો કર્યો હોવા છતાં તે આંતરરાષ્ટ્રીય પ્રતિનિધિઓ, મંત્રીઓ અને રોકાણકારોનું સ્વાગત કરવા માટે સંપૂર્ણપણે સજ્જ હતું. તેમણે મજબૂત આપત્તિ સ્થિતિસ્થાપકતા બનાવવાનો શ્રેય પ્રધાનમંત્રી નરેન્દ્ર મોદી અને મુખ્યમંત્રી એન. ચંદ્રબાબુ નાયડુના નેતૃત્વને આપ્યો હતો.

આંધ્રપ્રદેશનું નેતૃત્વ: વિઝનથી ડિલિવરી સુધી

મંત્રીએ મુખ્યમંત્રી ચંદ્રબાબુ નાયડુની લાંબા ગાળાની દીર્ઘદ્રષ્ટિની પ્રશંસા કરી, જેમાં IT ક્રાંતિની વહેલી કલ્પના કરવાથી લઈને સમય કરતાં ઘણા આગળ રહીને અમરાવતીમાં AI, ક્વોન્ટમ એન્જિનિયરિંગ, ડેટા સેન્ટર્સ અને ક્વોન્ટમ વેલીનું આયોજન કરવાનો સમાવેશ થાય છે. તેમણે જણાવ્યું હતું કે જ્યારે વિશ્વ હજુ પણ “ઈઝ ઓફ ડુઈંગ બિઝનેસ”ની વાત કરે છે, ત્યારે આંધ્રપ્રદેશે આ ચર્ચાને “સ્પીડ ઓફ ડુઈંગ બિઝનેસ” તરફ આગળ વધારી છે.

તેમણે રોકાણકારોને સમયસર પ્રોત્સાહનોની ચૂકવણી માટે રાજ્યની એસ્ક્રો એકાઉન્ટ વ્યવસ્થાની ખાસ પ્રશંસા કરી હતી. તેમણે કહ્યું કે ટીમ ઇન્ડિયા સાથે મળીને કામ કરે છે: કેન્દ્ર વેપાર કરારો દ્વારા વૈશ્વિક બજારો ખોલે છે, જ્યારે આંધ્રપ્રદેશ તે તકોને કારખાનાઓ, ડેટા સેન્ટર્સ અને રોજગારીમાં પરિવર્તિત કરે છે.

વૈશ્વિક રોકાણકારોને ત્રણ ખાતરીઓ

શ્રી ગોયલે પ્રકાશ પાડ્યો હતો કે, અશાંત વિશ્વમાં ભારત દરેક રોકાણકાર માટે તેના ચાર્ટરનું નવીનીકરણ કરે છે અને ત્રણ સ્પષ્ટ ખાતરીઓ પૂરી પાડે છે:

1. ખુલ્લું બજાર (Open Market) - મંત્રીએ જણાવ્યું હતું કે છેલ્લા સાડા ચાર વર્ષમાં, ભારતે 38 દેશોને આવરી લેતા નવ મુક્ત વેપાર કરારો અથવા પ્રેફરેન્શિયલ ટ્રેડ એગ્રીમેન્ટ્સને અંતિમ સ્વરૂપ આપ્યું છે, જે વૈશ્વિક GDPના $60 ટ્રિલિયનનું પ્રતિનિધિત્વ કરે છે. તેમણે કહ્યું કે ચાલી રહેલી વાટાઘાટો સાથે આ કુલ આંકડો વધીને $85 ટ્રિલિયન થવાની સંભાવના છે, જે $115 ટ્રિલિયનના વૈશ્વિક GDP ના લગભગ ત્રણ-ચતુર્થાંશ (3/4) જેટલો છે. આ ભારતીય વ્યવસાયો, ઉત્પાદનો, સેવાઓ, પ્રતિભા અને દેશના 2.5 લાખ સ્ટાર્ટઅપ્સ માટે વિશાળ તકો ખોલે છે.
2. ક્ષમતા (Capability) - વિશાખાપટ્ટનમમાં સ્ટીલથી સિલિકોન સુધી, ઓરવાકલ ખાતે ડ્રોન સિટી, તિરુપતિ ખાતે સ્પેસ સિટી અને પુડીમડકા ખાતે ભારતના પ્રથમ ગ્રીન હાઇડ્રોજન હબ સુધી, રાજ્ય અને દેશ ભવિષ્ય માટે તૈયાર ક્ષમતાઓનું નિર્માણ કરી રહ્યા છે. કેન્દ્રીય R&D સહાય વૈશ્વિક સંશોધકોને બૌદ્ધિક સંપદા અધિકારો (ઇન્ટેલેક્ચ્યુઅલ પ્રોપર્ટી રાઇટ્સ) ના સંપૂર્ણ સન્માન સાથે પશ્ચિમી દેશોની સરખામણીમાં નજીવા ખર્ચે ભારતમાં ડિઝાઇન અને નિર્માણ કરવાની મંજૂરી આપે છે. મંત્રીએ ભારપૂર્વક જણાવ્યું હતું કે “ભારત ટેકનોલોજીના હસ્તાંતરણની માંગ કરતું નથી અને કોઈની પણ ટેકનોલોજીની ચોરી કરતું નથી”.
3. વિશ્વસનીયતા
   • આજે વિશ્વમાં વિશ્વાસ એ સૌથી દુર્લભ ચીજ છે. બાહુબલી ગાથાનો ઉલ્લેખ કરતા, તેમણે કહ્યું કે ભારત એક એવો ભાગીદાર પૂરો પાડે છે “જે તમારી પીઠમાં ખંજર નહીં ભોંકે.” તેમણે વિશ્વસનીયતાના પુરાવા તરીકે COVID-19 દરમિયાન 100 થી વધુ દેશોને રસી, દવાઓ અને અનાજની ભારતની સહાયને યાદ કરી હતી. મંત્રીએ ઉમેર્યું હતું કે “જો 20મી સદી ખર્ચના તફાવત (કોસ્ટ આર્બિટ્રેજ) દ્વારા સંચાલિત હતી, તો 21મી સદી વિશ્વાસના તફાવત (ટ્રસ્ટ આર્બિટ્રેજ) દ્વારા વ્યાખ્યાયિત થશે અને હવે પ્રશ્ન એ નથી કે કોણ સૌથી સસ્તું બનાવી શકે છે, પરંતુ કોણ સુશાસન, પારદર્શક શાસન, ઝડપ અને વ્યાપ (સ્કેલ) આપી શકે છે.”

કાર્યવાહી માટે આહ્વાન

કાર્તિકના પવિત્ર મહિનામાં, શ્રી ગોયલે ત્રણ અપીલ કરી હતી:

• રોકાણકારોને: તમારા આગામી પ્લાન્ટ, R&D સેન્ટર, ગ્લોબલ કેપેબિલિટી સેન્ટર અથવા ડિઝાઇન સેન્ટર માટે ભારતને સરનામું બનાવો.
• ઉદ્યોગોને: ટકાઉપણું, કૌશલ્ય વિકાસ અને વૈશ્વિક ગુણવત્તાના ધોરણોમાં આગળ રહો.
• ભાગીદાર રાષ્ટ્રોને: ભારત અને આંધ્રપ્રદેશમાં કારખાનાઓ, હોટેલ્સ અને ડેટા સેન્ટર્સમાં રોકાણ કરો, જે અશાંત વિશ્વમાં એક સુરક્ષિત આશ્રયસ્થાન છે.

તેમણે સમાપન કરતા જણાવ્યું હતું કે ભગવાન વેંકટેશ્વરના આશીર્વાદથી, વિશાખાપટ્ટનમમાં રચાયેલી ભાગીદારી તેલુગુ ભાષા જેવી જ મધુર હશે અને ચિરસ્થાયી સમૃદ્ધિ લાવશે.

“નવી વિશ્વ વ્યવસ્થાનું સંચાલન: વેપાર, ટેકનોલોજી, વિશ્વાસ અને વૈચારિક નેતૃત્વ” થીમ પર આધારિત આ બે દિવસીય સમિટનું આયોજન વાણિજ્ય અને ઉદ્યોગ મંત્રાલય, આંધ્રપ્રદેશ સરકાર અને CII દ્વારા સંયુક્ત રીતે કરવામાં આવ્યું છે. તેમાં લગભગ 60 દેશોના નીતિ નિર્માતાઓ, મંત્રીઓ અને બિઝનેસ લીડર્સ એકત્ર થયા છે, જેમાં નોંધપાત્ર રોકાણ પ્રતિબદ્ધતાઓ નિર્ધારિત કરવામાં આવી છે.

SM/DK/JD