اروناچل پردیش کے بومڈیلا میں شاکیہ منی بدھ کی مقدس  باقیات سے عقیدت واحترام کے جذبےکوتقویت ملی

اروناچل پردیش کے بومڈیلا میں واقع تھبچوگ گاتسل لنگ (ٹی جی ایل) خانقاہ (لوئر گومپا) میں شاکیہ منی بدھ کے مقدس باقیات کی نمائش نے ہزاروں عقیدت مندوں کو بھگوان بدھ کےلئے عقیدت و احترام پیش کرنے کا ایک مبارک موقع فراہم کیا ہے۔ نمائش کے پہلے دو دنوں کے دوران مجموعی طور پر 11,969 عقیدت مندوں نے خانقاہ میں حاضری دی اور مقدس باقیات کی موجودگی میں پوجا کرکے آشیرواد حاصل کیا۔

عقیدت مندوں کی بڑی تعداد میں آمد مقدس باقیات سے وابستہ گہرے اعتماد اور روحانی عقیدت کی عکاسی کرتی ہے، جنہیں بدھ مت کے پیروکاروں کے نزدیک بے حد مذہبی اہمیت حاصل ہے۔

اس نمائش کا اہتمام حکومتِ ہند کی وزارتِ ثقافت نے نئی دہلی کے قومی عجائب گھر، حکومتِ اروناچل پردیش اور انٹرنیشنل بدھسٹ کنفیڈریشن (آئی بی سی)، نئی دہلی کے اشتراک سے کیا ہے۔ مقدس باقیات کے عوامی درشن 13 نومبر 2026 تک ٹی جی ایل خانقاہ میں جاری رہیں گے، جس سے مختلف حلقوں اور علاقوں سے تعلق رکھنے والے عقیدت مندوں کو پوجا کرنے اور اپنی عقیدت پیش کرنے کا موقع ملے گا۔

عقیدت مندوں کی منظم انداز میں شرکت کو یقینی بنانے کے لیے نمائش کے بقیہ دنوں کا حلقہ وار اور زمرہ وار پروگرام درج ذیل ہے:

• 11 نومبر 2026: اروناچل پردیش کے 5-کلکٹنگ اسمبلی حلقے کے عقیدت مند۔
• 12 نومبر 2026: اروناچل پردیش کے 6-بوراگاؤں-تھریزینو اسمبلی حلقے کے عقیدت مند۔
• 13 نومبر 2026: دیگر اضلاع کے عقیدت مند، ضلع میں تعینات مسلح افواج اور مرکزی مسلح پولیس فورسز (سی اے پی ایف) کے اہلکار، نیز وہ عقیدت مند جو اپنے لیے مقررہ دنوں میں حاضری نہیں دے سکے۔

تمام مقررہ دنوں میں درشن کا وقت صبح 8:30 بجے سے شام 6:00 بجے تک ہوگا۔

بومڈیلا میں عوامی نمائش کے اختتام کے بعد، مقدس باقیات کو 14 نومبر 2026 کو ایک رسمی تقریب کے ساتھ رخصت کیا جائے گا، جہاں سے وہ نمائش کے اگلے مقام، ضلع نامسائی کے لیے روانہ ہوں گی۔ مقدس  باقیات کو 14 سے 20 نومبر 2026 تک عوامی درشن کے لیے نامسائی کے گولڈن پگوڈا میں رکھا جائے گا۔ اس کے بعد مقدس باقیات 21 نومبر 2026 کو نئی دہلی کے قومی عجائب گھر واپس پہنچ جائیں گی۔

یہ نمائش حکومتِ ہند کے اس عزم کی عکاسی کرتی ہے کہ بھارت کے شاندار بدھ مت ورثے اور تہذیبی میراث کو محفوظ رکھنے، فروغ دینے اور دنیا کے سامنے پیش کرنے کا سلسلہ جاری رکھا جائے۔ اس طرح کی پہل کے ذریعے حکومتِ ہند مقدس بدھ مت ورثے تک عقیدت مندوں کی رسائی آسان بنانے، ثقافتی اور روحانی رشتوں کو مضبوط کرنے اور بدھ مت کی تعلیمات اور فلسفے کے فروغ میں بھارت کے دیرپا کردار کو اجاگر کرنے کی کوشش کرتی ہے۔

***

ش ح۔ع ح۔ ف ر

U-7440