بھارت اور میانمار کی مسلح افواج کی تینوں شاخوں کی پہلی مشترکہ انسانی امداد اور آفات سے نمٹنے کی مشق ’راحت متر ‘ چنئی میں اختتام پذیر

بھارت اور میانمار کی دفاعی افواج کے درمیان 5 اور 6 نومبر 2026 کو چنئی میں منعقدہ پہلی دوطرفہ سہ فریقی افواج کی انسانی امداد اور آفات سے نمٹنے کی مشق ’راحت متر ‘ اختتام پذیر ہوگئی۔ دو روزہ اس مشق میں بھارتی بحریہ، بھارتی بری فوج اور بھارتی فضائیہ کے اہلکاروں کے ساتھ میانمار کی دفاعی افواج کے ایک وفد نے بھی شرکت کی۔ اس مشق کا مقصد عملی تال میل کو بہتر بنانا، باہمی تعاون کو مضبوط کرنا اور آفات سے نمٹنے کی کارروائیوں میں بہترین طور طریقوں کا تبادلہ کرنا تھا۔

اس مشق کا آغاز مشترکہ منصوبہ بندی اور انسانی امداد و آفات سے نمٹنے کی صلاحیتوں سے واقفیت حاصل کرنے پر توجہ مرکوز کرتے ہوئے کیا گیا۔ شدید سمندری طوفان کے منظرنامے پر مبنی ایک ٹیبل ٹاپ مشق (ٹی ٹی ایکس) کے ذریعے مربوط ردِعمل کے طریقۂ کار اور آفات کے مشترکہ انتظام سے متعلق ضابطوں پر تبادلۂ خیال کیا گیا۔ اس کے علاوہ، شریک دستوں نے بھارتی بری فوج کی جانب سے رکاوٹیں دور کرنے اور پل بچھانے کی صلاحیتوں کا مظاہرہ دیکھا اور بھارتی بحریہ کی بحری جہازوں کے ذریعے انسانی امداد اور آفات سے نمٹنے کی صلاحیتوں سے واقفیت حاصل کرنے کے لیے آئی این ایس سوکنیہ کا دورہ کیا۔ (https://www.pib.gov.in/PressReleasePage.aspx?PRID=2333709\&utm_source=chatgpt.com)

دوسرے روز مشق میں شامل  دستوں نے بھارتی دفاعی افواج کی جانب سے انسانی امداد اور آفات سے نمٹنے کی مختلف شعبوں پر مشتمل صلاحیتوں کا مظاہرہ دیکھا، جس میں سمندری، زمینی اور فضائی شعبوں میں مربوط ردِعمل کے طریقۂ کار کو اجاگر کیا گیا۔ آئی این ایس آدیار اور چنئی کے مواصلاتی نیٹ ورک مرکز نے ساحلی علاقوں میں آفات سے نمٹنے کے انتظامات اور ہنگامی حالات کے دوران کمان اور کنٹرول میں معاون مواصلاتی بنیادی ڈھانچے کا مظاہرہ کیا۔ ملٹری اسپتال، چنئی نے محاذ پر طبی  امداد   اور آفات سے متاثرہ افراد کے امدادی کیمپوں کے مربوط انتظام کا مظاہرہ کیا۔

بھارتی بحریہ کی سیلاب سے متعلق  راحت رسانی کی ٹیموں (ایف آر ٹی) نے سیلاب سے نمٹنے کی کارروائیوں کے لیے مخصوص آلات اور اپنی صلاحیتوں کا مظاہرہ کیا۔ سمندر میں تلاش اور بچاؤ (ایس اے آر) کی صلاحیتوں کا مظاہرہ بھی چیتک ہیلی کاپٹر اور آئی این ایس بترا کی مشترکہ نقل و حرکت کے ذریعے کیا گیا۔ بھارتی فضائیہ نے زخمیوں اور متاثرین کو محفوظ مقام تک پہنچانے کی صلاحیتوں کا مظاہرہ کیا۔ فضائی کارروائیوں کے دوران میانمار کے وفد کے کموڈور آنگ نیانگ ون اور دو افسران بھارتی فضائیہ کے اے ایل ایچ ہیلی کاپٹر میں سوار تھے۔

مشق ’راحت متر نے دونوں ملکوں کی دفاعی افواج کو عملی تجربات کے تبادلے، بہترین طور طریقوں کو ایک دوسرے کے ساتھ مشترک کرنے اور انسانی امداد و آفات سے نمٹنے کی کارروائیوں کی منصوبہ بندی اور ان پر عمل درآمد کے سلسلے میں باہمی مفاہمت کو فروغ دینے کے لیے ایک اہم پلیٹ فارم فراہم کیا۔ اس مشق کے ذریعے دونوں ملکوں کی افواج کو ایک دوسرے کی صلاحیتوں اور طریقۂ کار سے واقفیت حاصل کرنے کا موقع بھی ملا، جس سے آفات سے نمٹنے کی کارروائیوں کے دوران باہمی تال میل بہتر بنانے میں مدد ملے گی۔

اس پہلی مشق کا کامیاب اختتام بھارت اور میانمار کے اس عزم کو مزید مستحکم کرتا ہے کہ وہ دوطرفہ دفاعی تعاون کو آگے بڑھائیں گے اور آفات سے نمٹنے کے لیے اجتماعی تیاریوں کو بہتر بنائیں گے۔ یہ علاقائی استحکام، بحری تعاون اور انسانی امداد و آفات سے نمٹنے کے مؤثر انتظامات میں اپنا کردار ادا کرنے کے دونوں ملکوں کے مشترکہ عزم کو بھی اجاگر کرتا ہے۔

**

ش ح۔ ع و ۔رض

 :7411:U-No