শুকনাত ত্ৰিশক্তি ক’ৰ্প পৰিদৰ্শনৰ সময়ত এল এ চি-ৰ সমীপৰ আন্তঃগাঁথনি উন্নয়ন আৰু উন্নত সামৰিক সঁজুলি মোতায়েনৰ পৰ্যালোচনা প্ৰতিৰক্ষা মন্ত্ৰীৰ

২০২৬ চনৰ ৭ নৱেম্বৰত প্ৰতিৰক্ষা মন্ত্ৰী শ্ৰী ৰাজনাথ সিঙে পশ্চিমবংগৰ শুকনাত ত্ৰিশক্তি ক’ৰ্পৰ কাৰ্যকৰী প্ৰস্তুতিৰ পৰ্যালোচনা কৰে। তেওঁক প্ৰকৃত নিয়ন্ত্ৰণ ৰেখা (এল এ চি)ৰ সমীপৰ আন্তঃগাঁথনি উন্নয়ন আৰু কাৰ্যকৰী সামৰ্থ্য তথা যুদ্ধৰ ফলপ্ৰসূতা বৃদ্ধি কৰিবলৈ উন্নত সামৰিক সঁজুলিৰ লগতে শেহতীয়া প্ৰযুক্তি মোতায়েন কৰাৰ ব্যৱস্থা সন্দৰ্ভত অৱগত কৰা হয়। প্ৰতিৰক্ষা মন্ত্ৰীয়ে ক’ৰ্পৰ কাৰ্যকৰী প্ৰস্তুতিত সন্তুষ্টি প্ৰকাশ কৰাৰ লগতে সীমান্ত অঞ্চলত আন্তঃগাঁথনি উন্নয়ন তথা স্থানীয় সমাজৰ সৈতে সম্পৰ্ক শক্তিশালী কৰাৰ লক্ষ্যৰে সমাজ কল্যাণমূলক পদক্ষেপৰ জৰিয়তে ৰাষ্ট্ৰ নিৰ্মাণত ইয়াৰ অৱদানৰ প্ৰশংসা কৰে । এই অনুষ্ঠানত সেনা প্ৰধান জেনেৰেল ধীৰাজ শেঠ, পূব কমাণ্ডৰ জেনেৰেল অফিচাৰ কমাণ্ডিং-ইন-চীফ লেফটেনেণ্ট জেনেৰেল ভি এম বি কৃষ্ণণ আৰু ৩৩ ক’ৰ্পৰ জেনেৰেল অফিচাৰ কমাণ্ডিং লেফটেনেণ্ট জেনেৰেল মান ৰাজ সিং মান, অন্যান্য জ্যেষ্ঠ সেনা বিষয়াসকলৰ সৈতে উপস্থিত থাকে।

পিছত দীপাৱলীৰ প্ৰাকক্ষণত বাৰাখানা অনুষ্ঠানৰ সময়ত সৈনিকসকলক সম্বোধন কৰি প্ৰতিৰক্ষা মন্ত্ৰীয়ে প্ৰত্যাহ্বানমূলক কাৰ্যকৰী পৰিস্থিতিত দেশৰ সীমান্ত ৰক্ষাৰ বাবে তেওঁলোকৰ সাহস, পেছাদাৰিত্ব আৰু অটল নিষ্ঠাৰ প্ৰশংসা কৰে। ৰাষ্ট্ৰীয় সুৰক্ষাত ৰছদ পাতি সৰবৰাহৰ গুৰুত্বৰ ওপৰত আলোকপাত কৰি তেওঁ শুকনা আৰু ইয়াৰ সমীপৰ অঞ্চলক অন্যান্য স্থানসমূহলৈ যোগান, অস্ত্ৰ-শস্ত্ৰ, খাদ্য, চিকিৎসা সামগ্ৰী আৰু জোৱান প্ৰেৰণৰ বাবে এক গুৰুত্বপূৰ্ণ কেন্দ্ৰ আখ্যা দিয়ে। তেওঁ কয় যে শুকনা পূব ভাৰতৰ সুৰক্ষা স্থাপত্যৰ এক অতি গুৰুত্বপূৰ্ণ সংযোগস্থল আৰু  ভৌগোলিক সংবেদনশীলতাৰ বাবে ইয়াত চৌবিশ ঘণ্টাই কাৰ্যকৰী প্ৰস্তুতিৰ প্ৰয়োজন। তেওঁ লগতে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত চৰকাৰে যোগান শৃংখল শক্তিশালী কৰাৰ লগতে পৰৱৰ্তী স্থানত নিয়োজিত সৈনিকসকলে সকলো আৱশ্যকীয় সামগ্ৰী তথা সেৱা লাভ কৰাটো নিশ্চিত কৰিবলৈ নিৰন্তৰ কাম কৰি আছে৷

শ্ৰী ৰাজনাথ সিঙে উল্লেখ কৰে যে পথ, সুৰংগ, সীমান্ত আন্তঃগাঁথনি আৰু আধুনিক সঁজুলিৰ বাবে বাজেট আবণ্টন বৃদ্ধি কৰা হৈছে আৰু দেশে 'আত্মনিৰ্ভৰ ভাৰত'ৰ দিশত স্থিৰভাৱে আগবাঢ়িছে। তেওঁ কয়, “আমাৰ ষ্টাৰ্ট-আপ আৰু উদ্যোগসমূহে এতিয়া সৈনিকসকলৰ বাবে ড্ৰোন, ড্ৰোন-প্ৰতিৰোধী ব্যৱস্থা আৰু অন্যান্য অত্যাধুনিক সঁজুলি নিৰ্মাণ কৰিছে। আমাৰ প্ৰতিৰক্ষা বাহিনীয়ে সক্ৰিয়ভাৱে শেহতীয়া প্ৰযুক্তি গ্ৰহণ কৰাৰ লগতে ড্ৰোন পৰিচালনা শিকাৰ উপৰি চাইবাৰ সুৰক্ষাৰ বিষয়ে বুজাবুজি বৃদ্ধি কৰাৰ সমান্তৰালকৈ নতুন পদ্ধতিৰ প্ৰশিক্ষণ লোৱাটো গৌৰৱৰ বিষয়। এই ৰূপান্তৰে আমাক ভৱিষ্যতৰ বাবে সাজু কৰিব।”

আধুনিক যুদ্ধৰ পৰিৱৰ্তিত স্বৰূপৰ ওপৰত আলোকপাত কৰি প্ৰতিৰক্ষা মন্ত্ৰীয়ে গুৰুত্ব দি কয় যে সুৰক্ষা প্ৰত্যাহ্বানসমূহ এতিয়া আৰু সীমান্তৰ কাষত প্ৰচলিত গুলীচালনা বা কামানৰ বিনিময়তে সীমাবদ্ধ নহয়। বৰং এতিয়া উচ্চখাপৰ প্ৰত্যক্ষ বা পৰোক্ষ যুদ্ধ, চাইবাৰ আক্ৰমণ, ড্ৰোন অনুপ্ৰৱেশ আৰু তথ্য যুদ্ধকো সামৰি লোৱা হৈছে। তেওঁ কয় যে শত্ৰুৱে ক্ৰমে ছ'চিয়েল মিডিয়াৰ জৰিয়তে উৰাবাতৰি বিয়পোৱা, ড্ৰোন ব্যৱহাৰ কৰি সংবেদনশীল স্থান নিৰীক্ষণ কৰা আৰু চাইবাৰ আক্ৰমণৰ জৰিয়তে সামৰিক ব্যৱস্থাৰ সৈতে আপোচ কৰাৰ চেষ্টা কৰে। তেওঁ জোৱানসকলক সকলো ক্ষেত্ৰতে ৰাষ্ট্ৰীয় সুৰক্ষা ৰক্ষা কৰিবলৈ সতৰ্কতা অৱলম্বন কৰাৰ লগতে সাজু হৈ থাকিবলৈ আহ্বান জনায়।

শ্ৰী ৰাজনাথ সিঙে সৈনিকসকলৰ মনোবল বৃদ্ধি কৰিবলৈ সম্ভাৱ্য সকলো পদক্ষেপ লোৱাৰ বাবে চৰকাৰৰ প্ৰতিশ্ৰুতি দোহাৰি বিষয়াসকলক  যথাসম্ভৱ সৈনিকসকলৰ সৈতে গুণগত সময় কটাবলৈ আহ্বান জনায়। তেওঁ কয় যে এনে মত বিনিময়ে জোৱানসকলৰ মাজত আত্মীয়তাৰ শক্তিশালী অনুভূতি গঢ়ি তোলাৰ লগতে চৰকাৰ আৰু সমগ্ৰ দেশে তেওঁলোকৰ সৈতে দৃঢ়ভাৱে থিয় দি আছে বুলি তেওঁলোকৰ আত্মবিশ্বাস শক্তিশালী কৰিব।

প্ৰতিৰক্ষা মন্ত্ৰীয়ে প্ৰতিৰক্ষা বাহিনীৰ জোৱানসকলৰ মানসিক স্বাস্থ্য আৰু আৱেগিক সুস্থতাৰ গুৰুত্বৰ ওপৰতো আলোকপাত কৰে। পৰিয়ালৰ পৰা বিচ্ছিন্ন হোৱা আৰু দায়িত্বৰ চাপৰ বাবে সৈনিকসকলে মানসিক চাপ অনুভৱ কৰিব পাৰে বুলি স্বীকাৰ কৰি তেওঁ জোৱানসকলৰ অনুভৱ দমন কৰাৰ পৰিৱৰ্তে সহযোদ্ধাসকলৰ সৈতে মুকলিকৈ কথা পাতিবলৈ তথা পৰস্পৰৰ সহায় বিচাৰিবলৈ উৎসাহিত কৰে।

উত্তৰ-পূৰ্বাঞ্চলক ভাৰতৰ 'শেষ প্ৰান্ত' নহয়, বৰং 'প্ৰথম প্ৰান্ত' বুলি বৰ্ণনা কৰি শ্ৰী ৰাজনাথ সিঙে কয় যে এই অঞ্চলে দেশৰ ভৌগোলিক আৰু সাংস্কৃতিক পৰিদৃশ্যৰ আৰম্ভণিকে প্ৰতিনিধিত্ব কৰে, কিয়নো ইয়ালৈ পুৱাৰ সূৰ্যৰ প্ৰথম ৰশ্মি আহে। তেওঁ উত্তৰ-পূবৰ চহকী জৈৱ বৈচিত্ৰ্য, প্ৰাকৃতিক সৌন্দৰ্য, সাংস্কৃতিক বৈচিত্ৰ্য আৰু অনন্য পৰম্পৰাৰ কথা উল্লেখ কৰি উত্তৰ- পূবক ভাৰতৰ পৰিচয়ৰ অবিচ্ছেদ্য অংশ বুলি বৰ্ণনা কৰে।

প্ৰতিৰক্ষা মন্ত্ৰীয়ে জোৱানসকল আৰু তেওঁলোকৰ পৰিয়ালক দীপাৱলীৰ শুভেচ্ছা জনোৱাৰ লগতে  তেওঁলোকৰ সুৰক্ষা, মৰ্যাদা আৰু কল্যাণৰ বাবে চৰকাৰ প্ৰতিশ্ৰুতিবদ্ধ হৈ আছে বুলি আশ্বাস দিয়ে। তেওঁ বাৰাখানা অনুষ্ঠানক একত্ব আৰু সমতাৰ মনোভাৱৰ প্ৰতিফলন আখ্যা দিয়াৰ লগতে  কয় যে এনে সমাৱেশে পদমৰ্যাদা আৰু স্তৰৰ পৰিধি অতিক্ৰম কৰি বিভিন্ন অঞ্চল, সংস্কৃতি আৰু ভাষিক পটভূমিৰ পৰা অহা জোৱানসকলক এক পৰিয়াল হিচাপে একত্ৰিত কৰে।

*****

SR/Savvy/DD