ನವೆಂಬರ್ 03 ರಿಂದ 07, 2026 ರವರೆಗೆ ಬಿಜಾಪುರದ ಸೈನಿಕ ಶಾಲೆಯಲ್ಲಿ ಅಖಿಲ ಭಾರತ ಸೈನಿಕ ಶಾಲೆಗಳ ರಾಷ್ಟ್ರೀಯ ಕ್ರೀಡಾಕೂಟ ನಡೆಯುತ್ತಿದೆ

‘ಎ.ಐ.ಎಸ್.ಎಸ್.ಎನ್.ಜಿ-2026’ರ ಸಮಾರೋಪ ಸಮಾರಂಭದಲ್ಲಿ ಯುವ ಕೆಡೆಟ್‌ಗಳನ್ನು ಪ್ರೇರೇಪಿಸಲಿರುವ ರಕ್ಷಣಾ ಸಹಾಯಕ ಸಚಿವರು

‘ಅಖಿಲ ಭಾರತ ಸೈನಿಕ ಶಾಲೆಗಳ ರಾಷ್ಟ್ರೀಯ ಕ್ರೀಡಾಕೂಟ’ (ಎಐಎಸ್ಎಸ್ಎನ್‌ಜಿ)-2026ರ ನಾಲ್ಕನೇ ಆವೃತ್ತಿಯು ಕರ್ನಾಟಕದ ವಿಜಯಪುರದ ಬಿಜಾಪುರ ಸೈನಿಕ ಶಾಲೆಯಲ್ಲಿ ನವೆಂಬರ್ 03 ರಿಂದ 07, 2026 ರವರೆಗೆ ನಡೆಯುತ್ತಿದೆ. ರಕ್ಷಣಾ ಸಚಿವಾಲಯದ ‘ಸೈನಿಕ ಸ್ಕೂಲ್ಸ್ ಸೊಸೈಟಿ’ಯ ಆಶ್ರಯದಲ್ಲಿ ಆಯೋಜಿಸಲಾದ ಐದು ದಿನಗಳ ರಾಷ್ಟ್ರೀಯ ಕ್ರೀಡಾ ಕಾರ್ಯಕ್ರಮವು ದೇಶಾದ್ಯಂತದ ಕೆಡೆಟ್‌ಗಳನ್ನು ತಮ್ಮ ಕ್ರೀಡಾ ಪ್ರತಿಭೆ, ಸ್ಪರ್ಧಾತ್ಮಕ ಮನೋಭಾವ ಮತ್ತು ಸೌಹಾರ್ದತೆಯನ್ನು ಪ್ರದರ್ಶಿಸಲು ಒಟ್ಟುಗೂಡಿಸುತ್ತದೆ. 30 ಹಳೆಯ ಮತ್ತು 13 ಹೊಸ ಸೈನಿಕ ಶಾಲೆಗಳನ್ನು ಪ್ರತಿನಿಧಿಸುವ 296 ಪುರುಷರು ಮತ್ತು 248 ಮಹಿಳಾ ಕೆಡೆಟ್‌ಗಳನ್ನು ಒಳಗೊಂಡಂತೆ ಒಟ್ಟು 544 ಸ್ಪರ್ಧಿಗಳು ಈ ಸ್ಪರ್ಧೆಯಲ್ಲಿ ಭಾಗವಹಿಸುತ್ತಿದ್ದಾರೆ. ವಲಯ ಮಟ್ಟದ ಸ್ಪರ್ಧೆಗಳಲ್ಲಿ ಭಾಗವಹಿಸಿದ ಎಲ್ಲಾ ಎಂಟು ವಲಯಗಳ ವಿಜೇತರು ಈ ತಂಡಗಳಲ್ಲಿದ್ದಾರೆ.

ಈ ಕ್ರೀಡಾಕೂಟವು ಬ್ಯಾಸ್ಕೆಟ್‌ಬಾಲ್ (ಕಿರಿಯ ಬಾಲಕರು ಮತ್ತು ಬಾಲಕಿಯರು), ವಾಲಿಬಾಲ್ (ಕಿರಿಯ ಬಾಲಕರು), ಬಾಲಕ ಮತ್ತು ಬಾಲಕಿಯರ ಸಬ್-ಜೂನಿಯರ್ ಮತ್ತು ಜೂನಿಯರ್ ವಿಭಾಗಗಳಿಗೆ ಟ್ರ್ಯಾಕ್ ಮತ್ತು ಫೀಲ್ಡ್ ಸ್ಪರ್ಧೆಗಳು, ಜೊತೆಗೆ ಚರ್ಚಾ ಸ್ಪರ್ಧೆ ಹಾಗೂ ರಸಪ್ರಶ್ನೆ ಸ್ಪರ್ಧೆಗಳನ್ನು ಒಳಗೊಂಡಿದೆ. ಟ್ರ್ಯಾಕ್ ಸ್ಪರ್ಧೆಗಳಲ್ಲಿ 100 ಮೀ, 200 ಮೀ. ಮತ್ತು 400 ಮೀ. ಓಟ, 1500 ಮೀ. ಓಟ ಹಾಗೂ 4x100 ಮೀ. ರಿಲೇ ಸೇರಿವೆ. ಸಬ್-ಜೂನಿಯರ್ ಮತ್ತು ಜೂನಿಯರ್ ವಿಭಾಗಗಳಲ್ಲಿ ಬಾಲಕ ಮತ್ತು ಬಾಲಕಿಯರಿಗಾಗಿ ಉದ್ದ ಜಿಗಿತದ ಸ್ಪರ್ಧೆಗಳನ್ನು ನಡೆಸಲಾಯಿತು.

ಐದು ದಿನಗಳ ಕ್ರೀಡಾ ಉತ್ಸವವು ನವೆಂಬರ್ 07, 2026 ರಂದು ಸಮಾರೋಪ ಸಮಾರಂಭದೊಂದಿಗೆ ಮುಕ್ತಾಯಗೊಳ್ಳಲಿದ್ದು, ರಕ್ಷಣಾ ಸಹಾಯಕ ಸಚಿವ ಶ್ರೀ ಸಂಜಯ್ ಸೇಠ್ ಅವರು ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದಾರೆ. ನೌಕಾಪಡೆಯ ಮುಖ್ಯಸ್ಥ ಅಡ್ಮಿರಲ್ ಕೃಷ್ಣ ಸ್ವಾಮಿನಾಥನ್ ಮತ್ತು ಬಿಜಾಪುರದ ಸೈನಿಕ ಶಾಲೆಯ ಹಳೆಯ ವಿದ್ಯಾರ್ಥಿಯೂ ಆಗಿರುವ ಕರ್ನಾಟಕದ ಬೃಹತ್ ಮತ್ತು ಮಧ್ಯಮ ಕೈಗಾರಿಕೆಗಳು ಹಾಗೂ  ಮೂಲಸೌಕರ್ಯ ಅಭಿವೃದ್ಧಿ ಸಚಿವರಾದ ಶ್ರೀ ಎಂ.ಬಿ. ಪಾಟೀಲ್, ಇತರ ಗಣ್ಯರು, ಹಿರಿಯ ಅಧಿಕಾರಿಗಳು ಮತ್ತು ಪ್ರಮುಖ ಹಳೆಯ ವಿದ್ಯಾರ್ಥಿಗಳು ಉಪಸ್ಥಿತರಿರುತ್ತಾರೆ.

"ಅಜೀತ್ ಹೈ ಅಭೀತ್ ಹೈ" ಎಂಬ ಧ್ಯೇಯವಾಕ್ಯದೊಂದಿಗೆ, ಬಿಜಾಪುರ ಸೈನಿಕ್ ಶಾಲೆಯು ಗುಣಮಟ್ಟದ ಶಿಕ್ಷಣವನ್ನು ನೀಡುವಲ್ಲಿ ಮತ್ತು ರಾಷ್ಟ್ರದ ಭವಿಷ್ಯದ ನಾಯಕರನ್ನು ಪೋಷಿಸುವಲ್ಲಿ ತನ್ನ ವಿಶಿಷ್ಟ ಸೇವೆಯ 63 ಅದ್ಭುತ ವರ್ಷಗಳನ್ನು ಪೂರೈಸಿದೆ. ಅಖಿಲ ಭಾರತ ಸೈನಿಕ ಶಾಲೆಗಳ ರಾಷ್ಟ್ರೀಯ ಕ್ರೀಡಾಕೂಟವನ್ನು ಆಯೋಜಿಸುವ ಮೂಲಕ, ಈ ಸಂಸ್ಥೆಯು ಶಿಸ್ತು, ಸಹೋದರತೆ, ಕ್ರೀಡಾ ಮನೋಭಾವ ಮತ್ತು ಶ್ರೇಷ್ಠತೆಯನ್ನು ಆಚರಿಸುತ್ತಾ ಸೈನಿಕ ಶಾಲೆಗಳ ಅತ್ಯುನ್ನತ ಸಂಪ್ರದಾಯಗಳು ಮತ್ತು ಮೌಲ್ಯಗಳನ್ನು ಎತ್ತಿಹಿಡಿಯುವ ಪ್ರಯತ್ನ ಮಾಡುತ್ತಿದೆ.

*****