নতুন দিল্লীত আন্তঃৰাষ্ট্ৰীয় প্ৰস্থেটিষ্ট আৰু অৰ্থটিষ্ট দিৱস ২০২৬ উদযাপন; উদ্ভাৱন, সহজলভ্যতা আৰু বিশ্বব্যাপী সুযোগৰ ওপৰত গুৰুত্ব প্ৰদান

ভাৰতীয় অৰ্থটিক্স আৰু প্ৰস্থেটিক্স সন্থাই (OPAI) নতুন দিল্লীৰ চাণক্যপুৰীৰ ৰাষ্ট্ৰীয় ৰেল সংগ্ৰহালয়ত আন্তঃৰাষ্ট্ৰীয় প্ৰস্থেটিষ্ট আৰু অৰ্থটিষ্ট দিৱস (IPOD) ২০২৬ উদযাপন কৰে। এই অনুষ্ঠানত পুনৰ্সংস্থাপন, সহায়ক প্ৰযুক্তি আৰু দিব্যাংগ অন্তৰ্ভুক্তিৰ ভৱিষ্যতৰ বিষয়ে আলোচনা কৰিবলৈ জ্যেষ্ঠ চৰকাৰী বিষয়া, নীতি নিৰ্ধাৰক, স্বাস্থ্যসেৱা পেছাদাৰী, শিক্ষাবিদ, ষ্টাৰ্টআপ আৰু প্ৰতিষ্ঠিত সংস্থাসমূহ একত্ৰিত হয়।কাৰ্যসূচীত ALIMCO ৰ প্ৰাতিষ্ঠানিক ৰূপান্তৰ, বিভাগৰ পাৰ্পল ডট পদক্ষেপ, অভিযান্ত্ৰিক উদ্ভাৱনত IIT ৰ অৱদান, চৰকাৰী আঁচনি, পেছাদাৰী স্বীকৃতি আৰু ভাৰত আৰু বিদেশত নিয়োগৰ সুযোগৰ ওপৰত গুৰুত্ব দিয়া হয়। ALIMCO ৰ CMD শ্ৰী প্ৰবীণ কুমাৰে ভাৰতৰ পুনৰ্সংস্থাপন পৰিস্থিতিতন্ত্ৰ শক্তিশালী কৰিবলৈ চৰকাৰী পদক্ষেপৰ সহযোগিতা আৰু ফলপ্ৰসূ ৰূপায়ণৰ গুৰুত্বৰ ওপৰত আলোকপাত কৰে। তেওঁ থলুৱা উৎপাদন আৰু সুলভ সহায়ক প্ৰযুক্তিৰ ওপৰতো গুৰুত্ব আৰোপ কৰি কয়, “পুনৰ্সংস্থাপনৰ ভৱিষ্যত প্ৰযুক্তিগত উদ্ভাৱনক সুলভতা আৰু সহজলভ্যতাৰ সৈতে সংযুক্ত কৰাত নিহিত হৈ আছে,  যিয়ে উন্নত সহায়ক প্ৰযুক্তিসমূহ সেইসকলৰ ওচৰত উপনীত কৰায় যাৰ এইসমূহৰ আটাইতকৈ বেছি প্ৰয়োজন।” RCI ৰ সদস্য সচিব শ্ৰী আশিস ঠাকাৰে, IAS এ পাৰ্পল ডট পদক্ষেপ আৰু পুনৰ্সংস্থাপন সেৱাত পেছাদাৰী স্বীকৃতি, গুণগত শিক্ষা,  প্ৰশিক্ষণ আৰু মানৰ গুৰুত্বৰ ওপৰত আলোকপাত কৰে। OPAI ৰ ৰাষ্ট্ৰীয় সভাপতি ড° এম.চি. দাসে গুৰুত্ব আৰোপ কৰে যে দিব্যাংগসকলে বিভিন্ন চৰকাৰী আঁচনি আৰু কল্যাণমূলক কাৰ্যসূচীৰ পৰা লাভান্বিত হোৱাটো নিশ্চিত কৰিবলৈ অধিক সজাগতা আৰু প্ৰচাৰ অত্যাৱশ্যক। OPAI দিল্লী শাখাৰ সভাপতি শ্ৰী ৰাজেশ দাসে সহজলভ্য আৰু অন্তৰ্ভুক্তিমূলক গতিশীলতাত ৰেল খণ্ডৰ ভূমিকাৰ ওপৰত আলোকপাত কৰে আৰু যোগ্য প্ৰস্থেটিষ্ট আৰু অৰ্থটিষ্টসকলৰ বাবে কেৰিয়াৰৰ সুযোগ সম্প্ৰসাৰিত কৰিবলৈ শক্তিশালী ঘৰুৱা আৰু আন্তঃৰাষ্ট্ৰীয় নিয়োগ নীতিৰ প্ৰয়োজনীয়তাৰ ওপৰত গুৰুত্ব আৰোপ কৰে। OPAI দিল্লী শাখাৰ উপ-সভাপতি শ্ৰী শম্ভু কুমাৰ যাদৱে গুৰুত্ব আৰোপ কৰে যে নতুন প্ৰযুক্তিসমূহক কেৱল পৰীক্ষাগাৰৰ গণ্ডীত আবদ্ধ নাৰাখি সুলভ আৰু সহজলভ্য সমাধানৰ জৰিয়তে তৃণমূল পৰ্যায়ত দিব্যাংগসকলৰ ওচৰত উপনীত কৰাব লাগিব। IPOD ২০২৬ ৰ আয়োজক সচিব আৰু OPAI দিল্লী শাখাৰ সচিব ড° অগেন্দ্ৰ কুমাৰে পেছাদাৰী, চৰকাৰ, স্বাস্থ্যসেৱা প্ৰতিষ্ঠান আৰু হিতাধিকাৰীসকলৰ মাজত শক্তিশালী সমন্বয়ৰ আহ্বান জনাই কয়, “আমাৰ উদ্দেশ্য কেৱল কৃত্ৰিম অংগ আৰু সহায়ক যন্ত্ৰ প্ৰদানতেই সীমাবদ্ধ নহয়;  বৰং ইয়াৰ উদ্দেশ্য হোৱা উচিত চলাচলৰ সক্ষমতা ঘূৰাই আনা, আত্মবিশ্বাস পুনৰ গঢ়ি তোলা, স্বনিৰ্ভৰশীলতাক উত্‍সাহিত কৰা আৰু প্ৰতিজন ব্যক্তিক মৰ্যাদাৰে জীয়াই থাকিবলৈ সুযোগ প্ৰদান কৰা হ'ব লাগিব।”EXOBOT Dynamics Private Limited ৰ প্ৰতিষ্ঠাপক আৰু CEO শ্ৰী মুনীশ কুমাৰে ভাৰতীয় বায়নিক্সে কেনেদৰে বিশ্বমানৰ সহায়ক প্ৰযুক্তিতকৈও উন্নত প্ৰদৰ্শন কৰিছে তাৰ ওপৰত গুৰুত্ব আৰোপ কৰে। একে কোম্পানীয়ে পৃষ্ঠপোষকতা কাৰ্যসূচীৰ অধীনত ১০ গৰাকী হিতাধিকাৰীক gripX myo hands বিতৰণ কৰা হয়। Instalimb এ কাৰ্যসূচীৰ সময়ত এটা 3D স্কেনিং মোবাইল এপো মুকলি কৰে।অনুষ্ঠানত সহায়ক প্ৰযুক্তি আৰু পুনৰ্সংস্থাপনত উদ্ভাৱন প্ৰদৰ্শন কৰা কেইবাটাও ষ্টাৰ্ট-আপ আৰু প্ৰতিষ্ঠিত কোম্পানীয়েও অংশগ্ৰহণ কৰে। আলোচনাত চাকৰি মেলা আৰু লাইভ সাক্ষাৎকাৰ, উদ্যোগ আৰু ইনকিউবেচন, আন্তঃৰাষ্ট্ৰীয় কেৰিয়াৰৰ সুযোগ, চৰকাৰ-উদ্যোগ সহযোগিতা আৰু বায়নিক প্ৰস্থেটিক্স, মাইক্ৰ'প্ৰচেছৰ নিয়ন্ত্ৰিত ব্যৱস্থা, 3D প্ৰিণ্টিং, ৰবটিক্স, কৃত্ৰিম বুদ্ধিমত্তা আৰু স্মাৰ্ট পুনৰ্সংস্থাপন সমাধানকে ধৰি উন্নত প্ৰযুক্তি সামৰি লোৱা হয়। IPOD ২০২৬ এ ভাৰতৰ স্বাস্থ্যসেৱা আৰু পুনৰ্সংস্থাপন পৰিস্থিতি তন্ত্ৰৰ এক অবিচ্ছেদ্য উপাদান হিচাপে প্ৰস্থেটিক্স আৰু অৰ্থটিক্সক স্বীকৃতি দিয়াৰ গুৰুত্বক পুনৰ দৃঢ় কৰে। অনুষ্ঠানত উদ্ভাৱন, সামৰ্থ্য নিৰ্মাণ, পেছাদাৰী বিকাশ, সুলভ আৰু সহজলভ্য প্ৰযুক্তি আৰু অন্তৰ্ভুক্তিমূলক নিয়োগৰ বাবে সম্প্ৰসাৰিত সুযোগৰ জৰিয়তে খণ্ডটোক শক্তিশালী কৰাৰ প্ৰয়োজনীয়তাৰ ওপৰত আলোকপাত কৰা হয়। আলোচনাৰ মূল বাৰ্তাটো আছিল যে গতিশীলতা এক অধিকাৰ, পুনৰ্সংস্থাপন এক প্ৰয়োজনীয়তা, আৰু অন্তৰ্ভুক্তি এক সামূহিক দায়িত্ব।

KV/HK