থাগৎখিবা:
05 NOV 2026 6:22PM by PIB Imphal
কেন্দ্রগী মন্ত্রীমন্দলগী ঐহাক্কী মরুপশিং, শ্রী মনসুখ মন্দাবিয়াজি অমসুং শ্রীমতি এম. রক্ষা খাদসেজি, ভারতকি পেরালিম্পিক কমিতি অমসুং নেস্নেল স্পোর্তস ফেদরেসনশিংগী মিহুৎ পুম্নমক, অতৈ শক্নাইরবা মিথুংলেন পুম্নমক, মেদল ফংলবা শান্নরোয় পুম্নমক, ইচিল-ইনাও অমসুং ইচল-ইচেশিং।
ঐহাক অদোম ময়াম্বু উন্ননবা খৌরাংনা ঙাইদুনা লৈরম্মিবনি। নুমিৎ খরনিগী মমাঙদা ঐহাক্না এসিয়ান গেমসতা শরুক য়াখিবা শান্নরোয়শিংগা উনখি, অমসুং হৌজিক ঐহাক্না পেরা এসিয়ান গেমসতা শরুক য়াখিবা অদোম ইনর্জি লৈবা মরুপশিং পুম্নমক্কা উনবগী খুদোংচাবা ফংলে। অদোমগী থোইদোক হেন্দোকপা পরফোমেন্স অদুনা ভারত অসি শান্ন-খোৎনবগী মালেমদা অচৌবা শক্তি অমা ওইনা য়াম্না থুনা থোরকলি হায়বা উৎলি। অসিগুম্বা অচৌবা প্লেৎফোর্ম অসিদা অদোম্না মেদল ফংবতা নত্তনা ভারত মচা ক্রোর কয়াগী থম্মোয়বু থোইখ্রে। অমুক হন্না অদোম পেরা-এথলেৎ পূম্নমক্না খ্বাইদগী ৱাঙবা পন্দোনশিং অসি অচুম্বা ৱারেপ অমসুং থৌনাগী থোংদা ফংবা ঙম্মী হায়বা উৎলে। লৈবাক মচা কোতি ১৪০গী মায়কৈদগী অদোম পুম্নমকপু থম্মোয় শেঙনা নুংঙাইবা ফোঙদোকচরি ।
মসিগী মায়পাকপা অসিদা অদোমগী ইমুং মনুং, ত্রেনরশিং, কোচশিংনসু মরুওইবা থৌদাং লৌরি। ঐহাক্না মখোয়দসু নুংঙাইবা ফোঙদোকচরি। অমসুং ঐহাক্না মমাঙদা হায়খিবগুম্না, শান্নরোয় অমগীদমক কোচ অমনা হোত্নগদবা চাং অসি য়াম্না চাওই, অদুবু পেরালিম্পিক শান্নরোয় অমগীদমক্তদি শরুক কয়া হেন্না হোৎনবা মথৌ তাই। মদুগী মতুংদা খক্তদা অসিগুম্বা শিংথানিংঙাই ওইবা ফলশিং থোরকই। মরম অদুনা ঐহাক্না মখোয়দা অখন্নবা নুংঙাইবা ফোঙদোকচরি অমসুং থাগত্পা ফোঙদোকচরি।
মরুপশিং,
অয়াম্বা শান্ন-খোৎনবশিংদা ভারতনা শরুক য়াবা অসি সুপ্নগী ফোরমেলিতি অমখক্তমক ওইনা লৌনরম্বা মতম অমা লৈরম্মি। পেরা-স্পোর্তসদসু লৈবাক অসি য়াম্না তুংদা লৈখি। ২০১০গী এসিয়ান পেরা গেমসতা ভারতনা শনাগী তকমান অমখক্তমক ফংখি। পুন্না ঐখোয়না তুরনামেন্ত অদুদা মেদল তরামরি খক্তমক লৌবা ঙমখি। তরামরি৷ অদুবু হন্দক্কী মতম অসিদা ঐখোয়গী শান্নরোয়শিংনা মেদল চামগা তরামরি লৌদুনা পুরক্লে। তরামরিদগী চামগা তরামরি ফাওবগী খোঙচৎ অসি খন্দুনা য়েঙবিয়ু। মসি অদোমগী খ্বাইদগী ৱাঙবা থাক্তা কন্না হোৎনবগী মহৈনি। মসি শান্ন-খোৎনবা অমসুং মসিগী অকোয়বদা চাওখৎলক্লিবা ইকোসিস্তেমদা অদোমগী কত্থোকপগী মহৈনি। হন্দক্কী মতম অসিদা শনা কুন্থ্রা, সিলভর কুন্থ্রামঙা, ব্রোঞ্জ নিফুমাপল, অনৌবা ৱর্ল্দ রেকোর্দ মঙা, অমসুং এসিয়াগী রেকোর্দ মাপলগা লোয়ননা অদোম্না জাতি পুম্ববু চাওথোকচবা পোকহল্লে। নুপি শান্নরোয় য়াঙ্খৈতরুক্কি মনুংদা ইচানুপি কুন্থ্রামরিনা মেদল ফংবা ঙমখি। অমসুং ইভেন্ত মরিদা পোদিয়মগী পোজিসন অহুমক লোইনা ভারতকি ওইখি। ভারতনা শনাগী তকমান লৌখি, অদুগা চপ মান্নবা থৌরমদা ভারতনা লুপা অমসুং ব্রোঞ্জসু লৌখি। চাংদম্নবা অসিগী অরোয়বা নুমিত্তা ফাওবা অদোম্না শনাগী তকমান অনি লৌদুনা অঙকপা থবকশিং পাংথোকখি। গেম অসি মখা চত্থরিবমখৈ মেদল ফংবগী থৌওং অসি লেপখিরোয় হায়না অদোম্না ৱারেপ লৌখিবা অদুগুম্না ফাওখি।
মরুপশিং,
হন্দক্কী মতম অসিদা ঐখোয়গী শান্নরোয়শিংনা মমাঙদা ভারতনা অসিগুম্বা মায় পাকপা অসি কৈদৌঙৈদা ফংলমদবা দিসিপ্লিনশিংদা শনাগী তকমান লৌখি। মোনা অগরৱালনা পেরা সুতিংদা মালেমগী রেকোর্দ অমা শেমখি। হনিনা মহাক্কী মশাগী মমাঙগী মালেমগী রেকোর্দ থুগাইখি। হিমান্সু, রবি, অমসুং জেহান্না মখোয়গী পরফোমেন্সকি খুত্থাংদা মালেমদা ফিজিকেল চেলেঞ্জশিং অসি করম্না মায়থিবা পিবগে হায়বদু উৎখি।
মরুপশিং,
এথলেৎ অমগী পর্সোনেল এচিবমেন্ত নত্রগা জাতি অমগী অপুনবা মায় পাকপা ওইরবসু মালেম অসিনা মায় পাকপগী অরংবা মঙাল খক্তমক উবা ফঙই। অদুবু মিকুপ অদুগী মতুংদা চহি কয়া কন্না হোত্নখিবা, অহিং-নুংথিলগী খাক্তনা হুমাং তাখিবা অমসুং মফম অদুদা য়ৌবা ঙম্নবা মথৌ তাবা লেপ্পা লৈতবা কত্থোকপা অমসুং লেপ্পা লৈতনা হোৎনবা অসিনা মায় পাকপগী অৱাঙবা থাক্কী স্ত্রকচর অসিনা লেপ্লিবা য়ুম্ফম ওইরি। খুদম ওইনা, রিঙ্কুজিনা এসিয়ান পেরা গেম্সকি থা অনি খক্তগী মমাঙদা মহাক্কী মমা তাইবংপাল থাদোকখিরম্মী। অসিগুম্বা য়াম্না অৱাবা অসিগী মরক্তা ফাওবা মহাক্না মহাক্কী থৌনা অদু লেংহন্দনা থমখি। অদুগা মহাক্না শনাগী তকমান ফংলবা মতমদা মহাক্কী মমাগী ফোতো অদু ৱাংনা থাঙ্গৎখি অমসুং মেদল অদু মহাক্কী মফমদা কত্থোকখি। মিকুপ অদুনা ভারত মচা পুম্নমক্কী থম্মোয়দা নুংঙাইতবা ফাওহনখি।
মরুপশিং,
অদোমগী লানফমশিং অমসুং মায় পাকপশিং অসি ভারত মচা খুদিংমক্কী ইন্সপিরেসন অমনি। অমসুং খোঙচৎ অসিদা অদোমগী লম্বি অমসুং জাতিগী লমবি অসি য়াম্না মান্নরে। মরম অসিনা ঙসি অদোমগী হোত্নজমল অমসুং জাতিনা হোত্নরিবশিং অসি পুনশিন্নদুনা হেন্না অচৌবা শাফু অমা পুন্না শেমগত্লি।
মরুপশিং,
২০১৪গী মতুংদা লৈবাক অসিনা অচৌবা পান্দমশিংগী মায়কৈরোমদা চৎপা খোঙচৎ অসি হৌরকপা মতমদা ফীভম অসি য়াম্না তোঙাল্লমখি। অয়াম্বা মমা-মপাশিংনা মখোয়গী অঙাংশিংবু শান্ন-খোৎনবশিংদা থাবদা কিনরম্মী অমসুং অঙাংশিং মশামক অয়াম্বনা ৱাখলদা হঙ্গোইবা ফাওনরম্মী। সিস্তেম অসিদা দিসওরদর লৈখি, রিসোর্সশিংগী অৱাত্পা লৈখি, সপোর্ত ৱাত্খি, অমসুং ত্রান্সপরেন্সি লৈখিদে। মীয়াম্না হায়নরম্মী মদুদি অসিগুম্বা সিস্তেম অসিদা করিগুম্বা অমত্তা হোঙদোকপা ঙম্লোই। মখোয়না মসিবু ৱাফম অমা ওইনা লৌনরম্মি। অদুবু অদোম্না কৈদৌঙৈদসু শিংনবা অমত্তগী মমাঙদা মায়থিবা পিবা ঙমখিদবা অদুগুম্না লৈবাক অসিনসু মখোয়গী পান্দম অদু খক্তদা মিত্য়েং থমখি। ঐখোয়গী নহারোলশিংগী তেলেন্ত অদু মাংহন তাকহনবা য়ারোয় হায়না ঐখোয়না ৱারেপ লৌখি। মরম অদুনা অদোমগুম্বা নহারোলশিংবু মাংলোমদা চঙশিনবদা অথিঙবা থম্লিবা সিস্তেম অদুমক হোংদোক্নবা ঐখোয়না ৱারেপ লৌখি। মসিগী মহৈ ওইনা শান্ন-খোৎনবগী মায়কৈদা অনৌবা এপ্রোচ অমা থোরকখি। ঙসিদি নহা ওইরিবা শান্নরোয় অমনা মহাক্কী তেলেন্ততা থাজবা থম্লবদি, অদুগুম্বা শান্নরোয় অদুনা লৈবাক অসিনা মখোয়গা লোয়ননা লেপলি হায়বসু থাজৈ। ঐখোয়গী পেরা-স্পোর্তস ইকোসিস্তেম অসি মশামক মসিগী খ্বাইদগী চাওবা খুদম অমনি। মতম অমদা ভারতকি রিপ্রজেন্তেসন য়াম্না লিক্না লৈরম্বা শান্ন-খোৎনবশিংদা হৌজিক ঐখোয়গী লৈরিবা অসি হেন্না মপাঙ্গল কনখৎলক্লি। আর্চরি, এথলেতিক্স, সুতিং, স্বীম্মিং, তেবল তেনিশ, বেদমিন্তন, জুদো, পাৱরলিফতিং, অমসুং অতৈ শান্ন-খোৎনব কয়াদা অনৌবা নহা ওইরিবা শান্নরোয়শিং থোরক্লি। ঐখোয়না অনৌবা চেম্পিয়নশিং থিদোক্লি। হন্দক্কিসিদা ঐখোয়গী শান্নরোয় হুম্ফুমাথোইনা অহানবা ওইনা এসিয়ান পেরা গেমসতা শরুক য়াখি। শান্নরোয় হুম্ফুমাথোই অসি পুম্নৌ নৌবনি৷। অদুগা অহানবা ওইনা শরুক য়াখিবশিং অদুগী মনুংদা মেদল কুন্থ্রাতরুক লৌদুনা ময়ুমদা হল্লকখি। সন্দিপনা মশামক্না দিব্যুত তৌদুনা ৱর্ল্দ রেকোর্দ অমা থমখি। নহা ওইরিবা শান্নরোয়শিংগী শরুক য়াবা অসিনা ঙসিগী ভারতকি মমি তারি অমসুং তুংলমচৎকি ভারতকি মমি অদু উবা ফংহল্লি।
মরুপশিং,
ঐখোয়না শান্ন-খোৎনবশিং অসি সুপ্নতগী নেস্নেল অমসুং ইন্তরনেস্নেল ইভেন্তশিংগী খোমজিনবা অমা ওইনা লৌদে। ঐখোয়গীদমক্তদি শান্ন-খোৎনব অসি লমচৎ-শাজৎ শেমগত্পা অমসুং জাতি শেমগৎপগী শক্তি লৈবা মেদিয়ম অমাসু ওইরি। মায়থিবা পিরবা মতুংদা নহারোলশিংদা মতৌ করম্না মায় পাকপা য়াবগে হায়বদু তাকপিরিবা শান্ন-খোৎনবশিংনি। শান্ন-খোৎনবশিংনা দিসিপ্লিন অমসুং তিম স্পিরিৎকি অর্থ তম্বি।
মরুপশিং,
মসিগী মিত্য়েং অসিগা লোয়ননা ঐখোয়না লৈবাক অসিগীদমক মোদর্ন স্পোর্তস ইকোসিস্তেম অমা শেমগত্লি। স্কুলশিংদা অমসুং গ্রাশরুৎকি থাক্তা কেম্পেনশিং চত্থরি। মশিং য়াম্লবা খেলো ইন্দিয়া সেন্তরশিং লিংখত্লে। ঐখোয়না তি.ও.পি.এস.কি স্কিম অসিসু হৌদোকখি মদুনা শান্নরোয়শিংনা ওলেম্পিক্সকি থাক্তা ত্রেনিং ফংহনবা ঙমগনি। ওলেম্পিক্স অসি ৱাখলদা থমদুনা ঐহাক্না হন্দক্কী মতম অসিদা রেদ ফোরতকি নহাশিংদা তেলেন্ত হন্ত কেম্পেনগী খুত্থাংদা মাংলোমদা চঙশিন্নবা হায়খি।
মরুপশিং,
হোত্নরিবা পুম্নমক অসিদা পেরা-স্পোর্তসপু চপ মান্ননা মরুওইবা পিরি। মসিগী মহৈ ওইনা অদোমগুম্বা শান্নরোয়শিং অসি অফবা মওংদা থোরক্লি অমসুং অচৌবা থৌরমশিংদা জাতিগী মশক তাকলি। মসি ঐখোয়না হন্দক্তা লোয়শিনখিবা পেরা গেমশিংদা অমুক হন্না উবা ফংখি। কম্পিতিসন অসিদা তি.ও.পি.এস.কি মখাদা সপোর্ত ফংলবা শান্নরোয়শিংনা মেদল নিফুমাথোই ফংখি, অদুগা খেলো ইন্দিয়াগী শান্নরোয়শিংনা মেদল তরামাপল ফংখি। মসিনা তাক্লি মদুদি ঐখোয়গী হোত্নরিবশিং অসি অচুম্বা মায়কৈদা চংশিল্লি ।
মরুপশিং,
ঙসিদি ভারততা মোদর্ন স্পোর্তস পোলিশিশিংনা শান্নবগী লমগী মপানদা ফাওবা নহাশিংগীদমক অনৌবা খুদোংচাবা কয়া অমা শেমগত্লি। শান্ন-খোৎনবগী ইনফ্রাস্ত্রকচর শেমগত্পা, শান্ন-খোৎনবগী খুৎলায়শিং পুথোকপা, অমসুং শান্ন-খোৎনবগী ব্রোদকাস্তিং ইকোনোমি পুম্নমক অসি য়াম্না থুনা চাওখৎলক্লি।
মরুপশিং,
নুমিৎ খরনিগী মমাঙদা শরকারনা লুপা ক্রোর ১৮০০ হেনবগী খেলো ইন্দিয়া স্পোর্তস গুদ্স মেনুফেকচরিং স্কিম অসি অয়াবা পিখি। হৌজিক ঐখোয়গী স্পোর্তস গুদ্স মেনুফেকচরিং ইন্দস্ত্রিনা অনৌবা মায়লস্তোনশিং ফংবগী মতম ওইরে। ভারতকি নত্রগা মপান লৈবাক্কি শান্নরোয় অমনা মালেমগী মফম অমদা ফিল্দ অমদা খোঙদারকপা মতমদা মখোয়গী শান্ন-খোৎনবগী পোত্লমশিংসু মেদ ইন ইন্দিয়া ওইগদবনি। মখোয়গী পোত্চৈ অমসুং খোঙউপশিংসু মেদ ইন ইন্দিয়া ওইগদবনি। ঐখোয়না ভারতনা মালেমগী থাক্কী শান্নরোয়শিং খক্তা নত্তনা মালেমগী থাক্কী শান্ন-খোৎনবশিংসু পুথোকপা পাম্মী। ভারতকি শান্ন-খোৎনবগী প্রদকশিং মালেম শিনবা থুংনা কৈথেলশিংদা য়ৌহনবা ঐখোয়না পাম্মী। মসিনা ভারতকি এম.এস.এম.ই.গী সেক্তর মপাঙ্গল কনখৎহনগনি অমসুং অপিকপা শহরশিং অমসুং খুঙ্গংশিংদা অনৌবা খুদোংচাবশিং শেমগত্লগনি।
মরুপশিং,
ঙসিগী থৌরম অসিগী মতুংদা অদোম পুম্নমকপু স্কুলশিং, কোলেজশিং, অমসুং তোঙান তোঙানবা ইন্সতিত্যুসনশিংদসু কৌরগনি, মফম অদুদা নহাশিংনা অদোমগী ৱাফম তাবা পামগনি অমসুং অদোমদগী তমজবা পাম্লগনি। মখোয়গা ৱারি শানরকপা মতমদা ফিল্দদা মায় পাকপগী থোইদোকপা ৱাফমশিং তাকপিয়ু, অদুবু ফিল্দগী মপান্দা শান্ন-খোৎনবগা মরি লৈনবা খুদোংচাবশিংগী মতাঙদসু তাকপিয়ু। অদুগা নখোয়না মখোয়দা ঐখোয়গী তোপ তোপ্পা হৈশিংবা ইচিল-ইনাওশিংগী পুন্সিদা লাইথোকহন্নবা লৈবাক অসিনা পায়খৎলিবা পাক চাওরবা হোত্নরিবশিং অদুসু খঙহনগদবনি। নুমিৎ খরনিগী মমাঙদা মন্ত্রীমন্দলনা দিব্যাংজনশিংগী পেন্সনগী মতাঙদা মরুওইবা ৱারেপ অমা লৌখি। ঐখোয়না পেন্সনগী সেনফম হেনগৎহনখি। মমাঙদা চাদা ৮০ ওইরম্বা দিসএবিলিতি বেঞ্চমারক অদু চাদা ৪০দা হন্থহল্লে। মমাঙদা মিওই অমনা পেন্সনগী ইলিজিবল ওইনবগীদমক চহি তরানিপাল সুগদবনি। হৌজিক্তি পোকপদগী হৌনা দিসএবিলিতি ওইবা ইলিজিবল ওইবা অঙাংশিংগীদমক্তসু পেন্সনগী লম্বি হাংদোক্লে। মতৌ অসুম্না ইন্দিয়ন সাইন লেংগ্বেজ প্রমোত তৌনবা মশক থোকপা থবক কয়া পায়খৎলে। ৱাহৈ লিশিং তরা হেন্না য়াওবা সাইন লেংগ্বেজ দিক্সনরি অমা শেমগত্লে। স্কুলগী লায়রিকশিংসু সাইন লেংগ্বেজদা ফংহল্লি। এক্সেসিবল ইন্দিয়া কেম্পেনগী খুত্থাংদা দিব্যাংজনশিংনা মিয়ামগী মফমশিং হেন্না চৎনবা য়াহনবগী থবক পায়খৎলি। ঐখোয়গী হোত্নজমল অসি লৈবাক অসিগী তোঙান-তোঙানবা থৌনা লৈবা মিওই খুদিংমক্না ইকায় খুম্নবা অমসুং চপ মান্নবা খুদোংচাবা অনিমক ফংহনবা, অমসুং মখোয় মশাগী তৌবা ঙম্বশিংগী মপাঙ্গলদা পুন্সিদা মাংলোমদা চঙশিনবা ঙম্নবা হোৎনবনি।
মরুপশিং,
ঐচি-নাগোয়াদা লৈবা পোদিয়ম অসি অদোমগী খোঙচৎকি অরোয়বা মফম নত্তে। মদু ৱাখলদা থম্বিয়ু। মসিগী মায় পাকপা অসি অদোম্না হেন্না চাওবা পান্দমশিংগীদমক লোনচ পেদ অমা ওইনা শিজিন্নগদবনি। ভারতকি ওইনা, অমসুং অদোম শান্নরোয় অয়াম্বাগী মথংগী পান্দম অসি এল.এ.২০২৮নি, অৱনি অমসুং মনিশনা হান্ননা লোশ এঞ্জেল্সকিদমক মখোয়গী কোতাগী মফমশিং অসি মাংজৌননা ফংহনখ্রে। ঐখোয়গী পান্দমদি য়ারিবমখৈ ভারতকি শান্নরোয় কয়ানা এল.এ.২০২৮দা শরুক য়াবা অমসুং য়ারিবমখৈ মেদল কয়া ময়ুমদা পুরকপা অসি ওইগদবনি। মরম অদুনা মিকুপ অসি থম্মোয় শেঙনা নিংশিংবিয়ু, অদুবু মথংগী শিংনবা অদুগীদমক্তসু হৌজিক হৌজিক শেম শাবা হৌবিয়ু। লৈবাক অসিনা অদোমগা লোয়ননা লেপ্লি, ঐসু অদুমক লৈরি, জাতি পুম্বনা অদোমগী মথংগী মায় পাকপা অদু ঙাইদুনা লৈরি। অমুক্কা হন্না ময়াম পুম্নমকপু নুংঙাইবা ফোঙদোকচরি অমসুং য়াইফ-পাওজেল কয়া পিজরি।
দিৱালিগী অচৌবা কুম্মৈ অসি হান্নদগী হৌখ্রে। হন্দক্কী মতম অসিদা দিৱালি অসি য়াম্না চাওথোকচবা, থৱায় য়াওবা, অমসুং মশক থোকপা থৌনাগা লোয়ননা পাংথোকপিয়ু। অদুবু দিৱালি পাঙথোকপগা লোয়ননা নহাক্কী ৱাখলদা নহাক্কী মথংগী পান্দম অদুসু থম্মু অমসুং অনৌবা ৱারেপ অমাগা লোয়ননা মাংলোমদা চংশিল্লু। ময়াম পুম্নমকপু ঐহাক্কী য়াম্না য়াইফ-পাওজেল পিজরি।
অদোম পুম্নমকপু হন্না-হন্না থাগৎচরি৷
***