مرکزی وزیر ڈاکٹر وریندر کمار نے نسلوں کے درمیان باہمی روابط کو مضبوط بنانے کے لیے 'وایو سمان راشٹریہ ابھیان' کا آغاز کیا

مرکزی وزیر برائے سماجی انصاف اور تفویضِ اختیارات ڈاکٹر وریندر کمار نے آج شام قومی دارالحکومت میں 'اٹل وایو ابھیودے یوجنا' (اے وی وائی اے وائی) کے تحت ایک قومی بین النسلی روابط مہم 'وایو سمان راشٹریہ ابھیان' کا آغاز کیا۔

یہ پہل قدمی نسلوں کے درمیان یکجہتی کو مضبوط بنانے اور ایک ایسے معاشرے کو فروغ دینے کی طرف ایک اہم قدم ہے جو بزرگ شہریوں کے تجربے، دانشمندی اور خدمات کا اعتراف کرتا ہے اور انہیں قدر کی نگاہ سے دیکھتی ہے۔

وزیر موصوف نے 'وایو سمان راشٹریہ ابھیان' پر رہنما کتابچہ بھی جاری کیا اور بزرگ شہریوں کی مدد کے لیے شہریوں کو متحرک کرنے کی خاطر 'وایو ساتھی' رضا کارانہ پہل قدمی کا آغاز کیا۔

اس موقع پر، محترم مرکزی وزیر، سیکرٹری (وزارتِ سماجی انصاف اور تفویضِ اختیارات) اور وزارت کے دیگر اعلیٰ حکام کی موجودگی میں دو رضا کارانہ تنظیموں یعنی شری رام چندر مشن (ایس آر سی ایم) اور ادھیاتما وگیان ستسنگ کیندر (اے وی ایس کے)، جودھپور کے ساتھ مفاہمتی عرضداشتوں پر دستخط اور رسمی طور پر تبادلہ کیا گیا۔

ان شراکت داریوں کا مقصد مراقبہ، یوگا اور صحت و تندرستی کے پروگراموں کے ذریعے بزرگ شہریوں کی ہمہ جہت فلاح و بہبود کو فروغ دینا ہے، اس کے ساتھ ساتھ عہد مہم ، واکاتھون اور دیگر کمیونٹی پر مبنی سرگرمیوں کے ذریعے نسلوں کے درمیان میل جول کو بڑھانا ہے۔

اس موقع پر سیکرٹری محکمہ سماجی انصاف اور تفویضِ اختیارات جناب سدھانش پنت، ایڈیشنل سیکرٹریز محترمہ مونا کے کھنڈار، محترمہ دیبولینا ٹھاکر، جوائنٹ سیکرٹریز جناب سجییش کمار این، ڈاکٹر سندیپ آر راٹھور، جناب شیلیندر کمار، محترمہ مونا لی پی ڈھاکتے، جناب رئیس ایم، اکنامک ایڈوائزر، ڈائریکٹرز جناب آستک کمار پانڈے، محترمہ کاجل سنگھ اور وزارت کے دیگر اعلیٰ حکام موجود تھے۔

اجتماع سے خطاب کرتے ہوئے، ڈاکٹر وریندر کمار نے اس ابھیان کو 'انو بھو اور اُورجا کا سنگم' قرار دیا، جو بزرگ شہریوں کے تجرِبے اور نوجوان نسل کی توانائی کو ایک ساتھ لاتا ہے۔

انہوں نے اس بات پر روشنی ڈالی کہ بھارت میں 60 سال اور اس سے زائد عمر کے افراد کی آبادی 2011 میں تقریباً 10 کروڑ سے بڑھ کر 2036 تک 23 کروڑ ہونے کا امکان ہے۔

وزیر موصوف نے اس بات کا مشاہدہ کیا کہ شہر کاری، ہجرت اور خاندانی ڈھانچوں میں تبدیلی نے نسلوں کے درمیان باقاعدہ میل جول کو کم کر دیا ہے، جس کے نتیجے میں بزرگ شہریوں کو تنہائی، فلاحی اسکیموں کے بارے میں محدود آگاہی اور سائبر فراڈ کا شکار ہونے جیسے چیلنجز کا سامنا ہے۔

باہمی طور پر سیکھنے اور نسلوں کے درمیان تعلقات کی اہمیت پر زور دیتے ہوئے، وزیر موصوف نے کہا، ’’نوجوان ہمارے بزرگوں کو ڈیجیٹل دنیا سے جوڑیں گے اور ہمارے بزرگ نوجوانوں کو زندگی کی اقدار دیں گے۔‘‘

دیپاولی کی ماقبل شام ایک خصوصی پیغام دیتے ہوئے، انہوں نے شہریوں پر زور دیا کہ وہ اس بات کو یقینی بنائیں کہ ان کے گھروں یا پڑوس میں کوئی بھی بزرگ تنہا نہ رہے اور ایک دیا ان کے احترام میں روشن کیا جائے۔

وزیر موصوف نے واضح کیا کہ یہ ابھیان پنچایتوں، مقامی اداروں اور تعلیمی اداروں کے ذریعے ہر گاؤں اور محلے تک پہنچے گا۔ انہوں نے اس بات پر زور دیا کہ دیکھ بھال کے معمولی اقدامات، جیسے کسی بزرگ کے ساتھ آدھا گھنٹہ گزارنا یا انہیں ڈاکٹر کے پاس لے جانا بھی، ان کی فلاح و بہبود کے لیے ایک بامعنی شراکت داری ہے۔

ڈاکٹر کمار نے کہا کہ یہ ابھیان اس پیغام کو تقویت دیتا ہے کہ بزرگ شہریوں کی فلاح و بہبود، وقار اور ان کی شمولیت محض حکومتی ذمہ داریاں نہیں ہیں بلکہ ایک مشترکہ سماجی عہد ہے۔

پروگرام کے دوران، محترم وفاقی وزیر نے وہاں موجود تمام افراد کو 'وایو سمان' کا عہد دلایا، جس کا مقصد بزرگ شہریوں کے وقار، دیکھ بھال، احترام اور سماجی شمولیت کو یقینی بنانے کے لیے اجتماعی عزم کی حوصلہ افزائی کرنا تھا۔

حاضرین کا استقبال کرتے ہوئے، سماجی انصاف اور تفویض اختیارات کی وزارت سیکرٹری جناب سدھانش پنت نے کہا کہ یہ پہل قدمی بزرگ شہریوں کو محض فلاحی پروگراموں کے مستفید کنندگان کے طور پر نہیں دیکھتی، بلکہ انہیں فعال شراکت داروں، سرپرستوں اور علم، ثقافت اور سماجی تجربے کے قیمتی ذخیرے کے طور پر تسلیم کرتا ہے۔ انہوں نے ریاستوں اور اضلاع کی حوصلہ افزائی کی کہ وہ اس مہم کے مؤثر نفاذ کو یقینی بنانے کے لیے ہینڈ بک کے مطابق سرگرمیاں انجام دیں۔

وزارت کے ایک سینیئر افسر نے کہا کہ اس مہم کی بنیاد پانچ سی فارمولے پر ہے، یعنی رابطہ قائم کرنا، تبادلہ خیال کرنا، مل کر کچھ نیا بنانا، اپنا حصہ ڈالنا اور تسلسل برقرار رکھنا۔ یہ ماڈل نئی اور پرانی نسل کے درمیان پائیدار روابط کو فروغ دیتا ہے۔

انہوں نے کہا کہ یہ ابھیان سماجی پلیٹ فارمز اور تعلیمی اداروں کے ذریعے نئی اور پرانی نسلوں کو جوڑنے، بات چیت اور قصہ گوئی کی حوصلہ افزائی کرنے، مشترکہ سرگرمیاں انجام دینے، سماجی بہبود کے لیے علم اور ہنر کا تبادلہ کرنے، اور اس قسم کے میل جول کو محض ایک بار کی سرگرمی کے بجائے ایک مستقل اور کمیونٹی کی قیادت میں چلنے والے معمول کے طور پر جاری رکھنے کو فروغ دیتا ہے۔

عہدیدار نے بتایا کہ یہ مہم بارہ موضوعاتی شعبوں پر محیط ہے، جن میں '30 منٹ ایک ساتھ'، 'مجھے سکھاؤ – میں تمہیں سکھاؤں گا'، 'میری کہانی، میرا ہندوستان'، 'ڈیجیٹل دادا دادی / ڈیجیٹل ساتھی'، 'جنریشن ہیلتھ اینڈ ویلنس' اور 'سلور اسکلز – بزرگ بحیثیت رہنما' شامل ہیں۔

انہوں نے کہا کہ ان موضوعات کا مقصد باہمی رفاقت کو فروغ دینا، زبانی تاریخوں کو محفوظ بنانا، ڈیجیٹل خواندگی کو بڑھانا، سائبر فراڈ کے بارے میں آگاہی پیدا کرنا، صحت و تندرستی کی حوصلہ افزائی کرنا، اور بزرگ شہریوں کو رہنما اور علم کے شراکت داروں کے طور پر تسلیم کرنا ہے۔

انہوں نے کہا کہ اس پہل قدمی کا ایک اور بڑا حصہ 'وایو ساتھی' (تعاون، آگاہی، امداد، تربیت، صحت اور شمولیت) ہے، جو کہ ایک ڈیجیٹل طور پر فعال رضا کارانہ پروگرام ہے اور اس میں طلبہ، نوجوان پیشہ ور افراد اور اداروں سمیت 18 سال اور اس سے زیادہ عمر کے تمام شہری شامل ہو سکتے ہیں۔

عہدیدار نے مزید بتایا کہ رضا کار بزرگ شہریوں کے لیے دوستوں، سہولت کاروں اور رابطے کا ذریعہ بن کر کام کریں گے، اور معاشرے میں ان کی شمولیت اور فلاح و بہبود میں مدد کریں گے۔ انہوں نے یہ بھی کہا کہ دلچسپی رکھنے والے شہری ’ایس سی ڈبلیو سماویش‘ پورٹل یا ’جیون‘ ایپ کے ذریعے رجسٹریشن کروا سکتے ہیں اور 'وایو ساتھی' کا سرٹیفکیٹ حاصل کر سکتے ہیں۔

عہدیدار نے مطلع کیا کہ پروگرام کے دوران جاری کی جانے والی ہینڈ بک ایک جامع رہنما فریم ورک فراہم کرتی ہے، جو اس ابھیان کو آگے بڑھانے میں مقاصد، نفاذ کی حکمت عملی، موضوعاتی سرگرمیوں، اور ریاستوں، اضلاع اور سماجی اداروں کے کردار کا احاطہ کرتی ہے۔

انہوں نے مزید کہا کہ جناب رام چندر مشن اور ادھیاتم وگیان ستسنگ کیندرا، جودھپور کے ساتھ دستخط کیے گئے معاہدے مراقبہ، یوگا، صحت و تندرستی کے پروگراموں اور نسلوں کے درمیان میل جول کی سرگرمیوں کے ذریعے بزرگ شہریوں کی ہمہ جہت فلاح و بہبود کی کوششوں کو مزید مضبوط کریں گے۔

وایو سمان راشٹریہ ابھیان کے ذریعے، وزارت کا مقصد نسلوں کے درمیان احترام، دیکھ بھال، رفاقت اور یکجہتی کی ایک مضبوط ثقافت قائم کرنا ہے۔ محکمہ شہریوں، تعلیمی اداروں، یونیورسٹیوں، نوجوانوں کی تنظیموں، غیر سرکاری تنظیموں، ریزیڈنٹ ویلفیئر ایسوسی ایشنز اور کارپوریٹ سوشل ریسپانسبلٹی کے شراکت داروں کو اس پہل قدمی میں حصہ لینے اور بطور 'وایو ساتھی' رضا کار اندراج کروانے کی دعوت دیتا ہے۔

**********

 (ش ح –ا ب ن)

U.No:7245