شرم سمواد: اندور اور دھار خطے میں محنت سے متعلق ضابطوں پر صلاحیت سازی اور بیداری کا پروگرام

محنت اور روزگار کی وزارت، حکومتِ ہند اور مدھیہ پردیش حکومت کے محنت کے محکمے نے ایسوسی ایشن آف انڈسٹریز مدھیہ پردیش اور پیتھم پور ادیوگک سنگٹھن کے اشتراک سے 3 نومبر 2026 کو مدھیہ پردیش کے اندور میں محنت سے متعلق ضابطوں، مزدوروں کی فلاح و بہبود اور سماجی تحفظ کے موضوع پر ضلعی سطح کا صلاحیت سازی اور بیداری پروگرام ’’شرم سمواد‘‘ مشترکہ طور پر منعقد کیا۔

اس پروگرام کا مقصد آجروں، انسانی وسائل، قانونی امور اور مالیات کے شعبوں سے وابستہ پیشہ ور افراد میں محنت سے متعلق ضابطوں اور ان کے تحت وضع کردہ قواعد کے بارے میں بیداری پیدا کرنا تھا۔ اس میں محنت کی اصلاحات، مزدوروں کی فلاح و بہبود اور سماجی تحفظ کے حوالے سے بیداری اور ادارہ جاتی صلاحیت کو مضبوط بنانے کے ساتھ ساتھ مرکز اور ریاست کے درمیان تال میل اور متعلقہ فریقوں کی شمولیت کو فروغ دینے پر بھی توجہ مرکوز کی گئی۔ اس پروگرام کی صدارت مدھیہ پردیش کی محنت کمشنر محترمہ شیتلا پاٹلے، آئی اے ایس نے کی۔ اس میں محنت اور روزگار کی وزارت، مدھیہ پردیش حکومت کے محنت کے محکمے، ملازمین کے پروویڈنٹ فنڈ ادارے (ای پی ایف او)، ملازمین کی ریاستی بیمہ کارپوریشن (ای ایس آئی سی)، چیف لیبر کمشنر (مرکزی) اور ڈائریکٹوریٹ جنرل آف لیبر ویلفیئر کے سینئر عہدیداروں کے علاوہ آجروں، صنعتی نمائندوں اور قانونی امور، انسانی وسائل اور مالیات کے شعبوں سے وابستہ 150 سے زائد افراد نے شرکت کی۔

اس پروگرام میں متعدد تکنیکی اجلاس منعقد کیے گئے، جن کا مقصد شرکاء کو محنت سے متعلق ضابطوں، آجروں کی ذمہ داریوں اور حکومتِ ہند کے اہم سماجی تحفظ کے اقدامات کے بارے میں عملی معلومات فراہم کرنا تھا۔

محنت اور روزگار کی وزارت کے ڈائریکٹر جناب ایس آر دتہ نے کلیدی خطبہ پیش کیا، جس میں انہوں نے محنت سے متعلق ضابطوں کی اہم خصوصیات کو اجاگر کیا۔ محنت اور روزگار کی وزارت کے عہدیداروں نے مختلف اجلاسوں کا انعقاد کیا، جن میں محنت سے متعلق چاروں ضابطوں اور ان کے تحت مطلع کردہ مرکزی ضابطوں کے مطابق آجروں کے لیے لازمی تعمیلی تقاضوں پر توجہ مرکوز کی گئی۔ ان اجلاسوں میں قانونی ذمہ داریوں اور ضابطوں کی تعمیل سے متعلق امور کے بارے میں عملی رہنمائی فراہم کی گئی، جس سے شرکاء کو محنت سے متعلق نئے ضابطوں کے عملی پہلوؤں کو بہتر طور پر سمجھنے میں مدد ملی۔

ملازمین کے پروویڈنٹ فنڈ ادارے (ای پی ایف او) اور ڈائریکٹوریٹ جنرل آف لیبر ویلفیئر (ڈی جی ایل ڈبلیو) کے نمائندوں نے بالترتیب پردھان منتری وکست بھارت روزگار یوجنا (پی ایم وی بی آر وائی) اور پردھان منتری شرم یوگی مان دھن (پی ایم-ایس وائی ایم) اسکیم کے موضوع پر اجلاسوں کی قیادت بھی کی۔

محنت سے متعلق ضابطوں اور ان کے مؤثر نفاذ میں آجروں اور ان کی تعمیل سے وابستہ پیشہ ور افراد کی سہولت کے لیے محنت اور روزگار کی وزارت کی جانب سے تیار کردہ ’’آجروں کے لیے تعمیل سے متعلق رہنما کتاب‘‘ اور ’’اکثر پوچھے جانے والے سوالات کا مجموعہ‘‘ بھی شرکاء میں تقسیم کیا گیا۔

اس موقع پر سوال و جواب کا ایک دلچسپ اجلاس بھی منعقد ہوا، جس میں شرکاء کو اپنے سوالات پیش کرنے اور محنت سے متعلق ضابطوں، ان پر عمل درآمد کے تقاضوں اور سماجی تحفظ کی دفعات کے بارے میں مزید وضاحت حاصل کرنے کا موقع ملا۔ مرکزی اور ریاستی حکومتوں کے عہدیداروں اور صنعتی نمائندوں کو ایک مشترکہ پلیٹ فارم پر جمع کرکے اس پروگرام نے بیداری میں اضافے، بہتر تفہیم اور متعلقہ فریقوں کے درمیان مضبوط روابط کے فروغ میں اہم کردار ادا کیا، جس سے محنت سے متعلق نئے ضابطوں کو مؤثر طور پر اپنانے اور ان کے نفاذ میں مدد ملے گی۔

******

( ش ح ۔ ا ع خ ۔ م ا )

UR No-7226