ৰায়পুৰত আজি ছত্তীশগড় ৰাজ্যোৎসৱৰ সামৰণী অনুষ্ঠানত ভাষণ কেন্দ্ৰীয় গৃহ আৰু সমবায় মন্ত্ৰী শ্ৰীঅমিত শ্বাহৰ

কেন্দ্ৰীয় গৃহ আৰু সমবায় মন্ত্ৰী শ্ৰীঅমিত শ্বাহে আজি ৰায়পুৰত ছত্তীশগড় ৰাজ্যোৎসৱৰ সামৰণী অনুষ্ঠানত ভাষণ প্ৰদান কৰে। অনুষ্ঠানত ছত্তীশগড়ৰ মুখ্যমন্ত্ৰী শ্ৰী বিষ্ণু দেৱ সাই আৰু উপ-মুখ্যমন্ত্ৰী শ্ৰী বিজয় শৰ্মাৰ লগতে বহু গণ্য-মান্য ব্যক্তি উপস্থিত থাকে।

অনুষ্ঠানত ভাষণ প্ৰদান কৰি কেন্দ্ৰীয় গৃহ মন্ত্ৰী শ্ৰীঅমিত শ্বাহে কয় যে ছত্তীশগড়ৰ সমগ্ৰ ৰাইজৰ হৈ তেওঁ পূৰ্বৰ প্ৰধানমন্ত্ৰী অটল বিহাৰী বাজপেয়ীলৈ ধন্যবাদ আৰু শ্ৰদ্ধাঞ্জলি জ্ঞাপন কৰে, কাৰণ অটলজীয়েই ২০০০ চনত ছত্তীশগড় ৰাজ্য গঠন কৰিছিল। তেওঁ কয় যে আমি জানিছিলোঁ ৰাজ্যখন গঠন হোৱাৰ লগে লগে বিৰোধী দলৰ নেতা মুখ্যমন্ত্ৰী হ’ব পাৰে, তথাপি আমি সেই বিষয়ে চিন্তা কৰা নাছিলোঁ। শ্ৰী শ্বাহে কয় যে ছত্তীশগড়ৰ প্ৰতি অন্যায় কৰা হৈছিল আৰু এই অঞ্চলৰ উন্নয়ন স্তব্ধ হৈ পৰিছিল। তেওঁ কয় যে অটলজীয়ে ছত্তীশগড় সৃষ্টি কৰিলে আৰু প্ৰধানমন্ত্ৰী শ্ৰী নৰেন্দ্ৰ মোদীজীয়ে ইয়াক প্ৰতিপালন কৰিছে।

শ্ৰীঅমিত শ্বাহে ছত্তীশগড়ৰ ৰাইজ, বিশেষকৈ জনজাতীয় সম্প্ৰদায়ক শুভেচ্ছা জ্ঞাপন কৰি কয় যে আজি ছত্তীশগড় নক্সালমুক্ত হৈ উন্নয়নৰ পথেৰে আগুৱাই গৈছে। এই সফলতাৰ বাবে তেওঁ কেন্দ্ৰীয় সশস্ত্ৰ আৰক্ষী বাহিনী (চিএপিএফ) আৰু ছত্তীশগড় আৰক্ষীকো অভিনন্দন জনায়। তেওঁ কয় যে আজিৰ দিনটো গৌৰৱ, সাফল্য আৰু সংকল্পৰ দিন। আমি অটলজীৰ উত্তৰাধিকাৰক লৈ গৌৰৱ কৰোঁ, যিয়ে ছত্তীশগড়ক এখন পৃথক ৰাজ্যৰ পৰিচয় দিছিল। বহু বছৰ ধৰি লোৱা সংকল্পসমূহ পূৰণ হৈছে, নক্সালমুক্ত ছত্তীশগড় আৰু নক্সালমুক্ত ভাৰত গঢ়াৰ সংকল্প বাস্তৱায়িত হৈছে। আৰু ইয়াৰ সমান্তৰালভাৱে মোদীজী আৰু বিষ্ণু দেৱজীৰ নেতৃত্বত  উন্নত ছত্তীশগড় গঢ়াৰ সংকল্পও কৰা হৈছে।

কেন্দ্ৰীয় গৃহ মন্ত্ৰী শ্ৰীঅমিত শ্বাহে কয় যে আজি ছত্তীশগড়ৰ উন্নয়নত উল্লেখযোগ্য অৱদান আগবঢ়োৱা বিভিন্ন ক্ষেত্ৰৰ লোকসকলক সন্মানিত কৰা হৈছে। তেওঁ কয় যে গুৰু ঘাছীদাসৰ বাৰ্তা আৰু গুৰু নানক দেৱজীৰ সেৱা, সমতা আৰু সত্যৰ বাৰ্তাই হৈছে ছত্তীশগড়ৰ মূল্যবোধ। শ্ৰী শ্বাহে কয় যে ছত্তীশগড়ৰ লোকসংস্কৃতিক জীৱন্ত কৰি ৰাখিবলৈ আমাৰ চৰকাৰে ছত্তীশগড় পণ্ডুম আৰু বাস্তাৰ অলিম্পিক অনুষ্ঠিত কৰে। বিষ্ণু দেৱ সাই চৰকাৰে পন্থী, পাণ্ডৱানী, ৰাউত, নাচা, কমা আৰু ছৈলা নৃত্য, ঢোকৰা শিল্প, কাঁহ, কাঠৰ শিল্প আৰু কোচাৰ দৰে সাংস্কৃতিক ঐতিহ্য আৰু বাস্তাৰ দশেৰাৰ অনন্য ৭৫ দিনীয়া পৰম্পৰাক নতুন পৰিচয় দিছে। বাস্তাৰ পণ্ডুম আৰু বাস্তাৰ অলিম্পিকৰ জৰিয়তে লাখ লাখ যুৱকে জনজাতীয় খেল-ধেমালিত অংশগ্ৰহণ কৰি নিজৰ সংস্কৃতি পুনৰুজ্জীৱিত কৰিছে। বাস্তাৰ পণ্ডুমে পুনৰবাৰ এই অঞ্চলৰ সাজ-পোছাক, খাদ্য, গীত আৰু নৃত্যক জীৱন্ত কৰি তুলিছে। ইয়াৰ সমান্তৰালভাৱে জনজাতীয় অঞ্চলৰ বিকাশৰ দীৰ্ঘদিনীয়া দৃষ্টিভংগী পূৰণৰ কাম এতিয়া চলি আছে।

শ্ৰীঅমিত শ্বাহে কয় যে ছত্তীশগড়ৰ ৰাইজে বিৰোধী দলক আঁতৰাই আমাৰ দলক জনাদেশ দিলে আৰু তাৰ মাত্ৰ দুমাহৰ ভিতৰতে আমি নক্সালবাদ নিৰ্মূল কৰাৰ সংকল্প ল’লোঁ। তেওঁ কয় যে য’ত সাংস্কৃতিক কৰিডৰ থাকিব লাগিছিল, তাত ৰেড কৰিডৰ সৃষ্টি কৰা হৈছিল। যিবোৰ হাবি-বনত মহুৱা, টেণ্ডু পাত আৰু লোকগীত থাকিব লাগিছিল, তাত লেণ্ডমাইন সংস্থাপন কৰা হৈছিল। যিটো শিশুৱে হাতত কলম ল’ব লাগিছিল, তাক স্কুলৰ পৰা অপহৰণ কৰি হাতত বন্দুক তুলি দিয়া হৈছিল। য’ত স্কুলৰ ঘণ্টা বাজিব লাগিছিল, তাত স্কুলৰ ভৱনটোকে বোমাৰে উৰুৱাই দিয়া হৈছিল আৰু উন্নয়ন আনিবলগীয়া পথ নিৰ্মাণ কৰা মানুহজনক পৰিয়ালৰ সন্মুখতে জীৱন্তে দাহ কৰা হৈছিল। তেওঁ মানৱ অধিকাৰৰ নামত নক্সালবাদক সমৰ্থন কৰাসকলক প্ৰশ্ন কৰে: মানৱ অধিকাৰ কেৱল বন্দুক তুলি লৈ উন্নয়ন স্তব্ধ কৰাসকলৰ বাবেহে নেকি? দুখীয়া আদিবাসীসকলৰ মানৱ অধিকাৰ নাই নেকি? শ্ৰী শ্বাহে কয় যে মোদী চৰকাৰে প্ৰমাণ কৰি দিলে যে দুখীয়া আদিবাসীসকলৰো মানৱ অধিকাৰ আছে। তেওঁ কয় যে যোৱা ৩০ বছৰত বোমা বিস্ফোৰণত হাত-ভৰি হেৰুওৱা লোকসকলৰ জীৱন সহজ কৰি তোলাৰ প্ৰয়াসত কৃত্রিম অংগ প্ৰদান কৰা হৈছে। গৃহ মন্ত্ৰীগৰাকীয়ে কয় যে দূৰত বহি দীঘলীয়া প্ৰবন্ধ লিখি উপদেশ দিয়া লোকসকলৰ ইয়ালৈ আহি এদিনো থকাৰ সাহস নাছিল। তেওঁ কয় যে তেওঁ এনে লোকসকলক ভয় নকৰিবলৈ আহ্বান জনাইছে, ইয়াত এতিয়া তেওঁলোকক কোনেও হত্যা নকৰে। আহক আৰু উন্নয়নৰ সমীৰণ অনুভৱ কৰক। যদি আপোনাৰ হৃদয়ত শ্ৰীৰাম জাগি উঠে, তেন্তে তেওঁলোকৰ যন্ত্ৰণাৰ বিষয়ে দুটামান প্ৰবন্ধ লিখক।

কেন্দ্ৰীয় গৃহ মন্ত্ৰী শ্ৰীঅমিত শ্বাহে কয় যে বিৰোধী দলে সদায় নক্সালবাদক সমৰ্থন কৰি আহিছিল। তেওঁ উল্লেখ কৰে যে ২০১০ চনত বিৰোধী দলৰ কেন্দ্ৰীয় চৰকাৰৰ এজন জ্যেষ্ঠ মন্ত্ৰীয়ে কৈছিল যে নক্সালপন্থীসকলে অস্ত্ৰ সম্বৰণ কৰাৰ প্ৰয়োজন নাই; তেওঁলোকে কেৱল বিশৃঙ্খল পৰিস্থিতি সৃষ্টি কৰাটো বন্ধ কৰা উচিত। শ্ৰী শ্বাহে কয় যে এনেদৰে হিংসা বন্ধ কৰিব নোৱাৰি। কেন্দ্ৰীয় গৃহ মন্ত্ৰীগৰাকীয়ে সংসদত স্পষ্টভাৱে ঘোষণা কৰা বুলি কয় যে যিয়েই আত্মসমৰ্পণ কৰিবলৈ বিচাৰে তেওঁ অস্ত্ৰ সম্বৰণ কৰি আত্মসমৰ্পণ কৰক আৰু চৰকাৰে তেওঁলোকক মূলসুঁতিলৈ আনিব। অন্যথা নিৰাপত্তা কৰ্মীসকলে তেওঁলোকৰ বিৰুদ্ধে কঠোৰ পদক্ষেপ ল’ব। তেওঁ কয় যে সশস্ত্ৰ নক্সালপন্থীক আত্মসমৰ্পণৰ বাবে জনোৱা আহ্বানে ইতিবাচক ফলাফল দিছে: মাত্ৰ ১০ শতাংশ নক্সালপন্থী নিহত হৈছে, আনহাতে ৯০ শতাংশই আত্মসমৰ্পণ কৰিছে। আজি সমগ্ৰ দেশ নক্সালমুক্ত হৈ পৰিছে। এয়া শ্ৰী নৰেন্দ্ৰ মোদীৰ নেতৃত্বাধীন চৰকাৰৰ নীতি। তেওঁ লগতে কয় যে যিসকলে আইন মানি চলিব তেওঁলোকক সাধাৰণ নাগৰিক হিচাপে গ্ৰহণ কৰা হ’ব। কিন্তু বাস্তাৰেই হওক, উত্তৰ-পূৰ্বাঞ্চলেই হওক বা কাশ্মীৰেই হওক, আইন উলংঘা কৰা যিকোনো লোকৰ বিৰুদ্ধে নাগৰিকৰ সুৰক্ষাৰ বাবে নিৰাপত্তা বাহিনীয়ে কঠোৰ ব্যৱস্থা গ্ৰহণ কৰিব।

শ্ৰীঅমিত শ্বাহে কয় যে বিৰোধী দলে সদায় অসাংবিধানিক প্ৰতিষ্ঠান আৰু ভুৱা সংসদক সমৰ্থন কৰি আহিছে। তেওঁ কয় যে নক্সালপন্থীয়ে ছত্তীশগড়ত ‘জনতানা চৰকাৰ’ নামৰ এখন সমান্তৰাল চৰকাৰ প্ৰতিষ্ঠা কৰিছিল। তেওঁলোকৰ নিজা গৃহ মন্ত্ৰী, মুখ্যমন্ত্ৰী, বিত্ত মন্ত্ৰী আৰু অন্যান্য বিষয়া আছিল। শ্ৰী শ্বাহে প্ৰশ্ন কৰে যে কি সংবিধানে জনতানা চৰকাৰৰ দৰে সমান্তৰাল চৰকাৰৰ অনুমতি দিছিল আৰু তেওঁলোকক ন্যায় প্ৰদানৰ অধিকাৰ কোনে দিছিল? তেওঁ কয় যে নক্সালপন্থীয়ে বহু নিৰ্দোষ সাংবাদিক, সমাজকৰ্মী আৰু ছাত্ৰ-ছাত্ৰীক গছত ওলোমাই হত্যা কৰিছিল। তেওঁ অভিযোগ কৰে যে বিৰোধী নেতাসকলে সংসদত এনে কাৰ্যকলাপক সমৰ্থন কৰি গৈছিল। তেওঁ কয় যে পূৰ্বে বিৰোধীয়ে ভুৱা জনতানা চৰকাৰ আৰু অন্যান্য অসাংবিধানিক চৰকাৰক সমৰ্থন কৰিছিল আৰু এতিয়া তেওঁলোকে এখোজ আগুৱাই গৈ ভুৱা সংসদ গঠন কৰি সংসদকে উপহাস কৰিছে। তেওঁ বিৰোধীৰ বিৰুদ্ধে কেৱল দেখুৱাবলৈ ভুৱা সংসদ আৰু বিতৰ্কৰ নাটক ৰচনা কৰাৰ অভিযোগ উত্থাপন কৰে। গৃহ মন্ত্ৰীগৰাকীয়ে বিৰোধী দলৰ নেতাক উদ্দেশি কয় যে মোদী চৰকাৰ প্ৰতিটো বিষয়তে আলোচনা কৰিবলৈ সাজু। তেওঁ কয় যে চৰকাৰে এছআইআৰ সম্পৰ্কে আলোচনা কৰিবলৈ সংসদৰ বিশেষ অধিৱেশন আহ্বান কৰিবলৈ ইচ্ছুক আৰু বিৰোধীক দেশবাসীৰ সন্মুখত এই বিষয়ত বিতৰ্ক কৰি নিজৰ সাহস প্ৰদৰ্শন কৰিবলৈ প্ৰত্যাহ্বান জনায়। তেওঁ লগতে কয় যে হাতত সংবিধানৰ কপী লৈ ঘূৰিলেই সংবিধানক সন্মান কৰা নুবুজায়; ব্যক্তিজনৰ আচৰণত সাংবিধানিক মূল্যবোধ প্ৰতিফলিত হ’ব লাগিব। তেওঁ বিৰোধীৰ বিৰুদ্ধে বাৰে বাৰে সংসদৰ কাম-কাজত বাধাৰ সৃষ্টি কৰা আৰু ইয়াৰ কাৰ্যসূচী স্তব্ধ কৰাৰ অভিযোগ উত্থাপন কৰে। তেওঁ বিৰোধীক সংসদ চলিবলৈ আৰু প্ৰত্যক্ষ বিতৰ্কত অৱতীৰ্ণ হ’বলৈ আহ্বান জনায়। তেওঁ কয় যে তেতিয়া দেশৰ ৰাইজে বিচাৰ কৰিব পাৰিব কোনে সত্য কৈছিল আৰু কোনে মিছা প্ৰচাৰ কৰিছিল।

কেন্দ্ৰীয় গৃহ মন্ত্ৰীগৰাকীয়ে কয় যে ছত্তীশগড়ৰ মুখ্যমন্ত্ৰী আৰু দুয়োগৰাকী উপ-মুখ্য মন্ত্ৰীক লৈ গঠিত নেতৃত্বৰ ত্ৰিপক্ষীয় দলে অতি কম সময়ৰ ভিতৰতে মোদী চৰকাৰে দিয়া গেৰাণ্টিৰ ৭০ শতাংশতকৈও অধিক পূৰণ কৰিছে। তেওঁ জনায় যে মহতাৰী বন্দন যোজনাৰ ৩৩সংখ্যক কিস্তি ছত্তীশগড়ৰ মাতৃ-ভনীসকললৈ প্ৰেৰণ কৰা হৈছে। ধান ক্ৰয় প্ৰক্ৰিয়া চলি থকাৰ বিপৰীতে কৃষি, বনজ সামগ্ৰী, পশুপালন আৰু এমএছএমইৰ দৰে খণ্ডসমূহে নিজৰ লক্ষ্যত উপনীত হৈছে। তেওঁ কয় যে ছত্তীশগড় এতিয়া নক্সালমুক্ত আৰু অহা দিনবোৰত ৰাজ্যখনে পৰ্যটন খণ্ডৰ শীৰ্ষ তিনিখন ৰাজ্যৰ ভিতৰত স্থান লাভ কৰিব বুলি দৃঢ় বিশ্বাস প্ৰকাশ কৰে। চিত্ৰকূট জলপ্ৰপাত, তীৰথগড় জলপ্ৰপাত, কাংগেৰ উপত্যকা ৰাষ্ট্ৰীয় উদ্যান, মা বামলেশ্বৰী মন্দিৰ, দান্তেৱাড়াৰ মা দান্তেশ্বৰী মন্দিৰ আৰু বাস্তাৰ দশেৰা উৎসৱৰ কথা উল্লেখ কৰি তেওঁ ছত্তীশগড়ৰ পৰ্যটন সম্ভাৱনাৰ কথা অৱগত কৰে। তেওঁ কয় যে এই সকলো গন্তব্যস্থান আৰু সাংস্কৃতিক আকৰ্ষণৰ সমগ্ৰ বিশ্বৰ পৰ্যটকক ছত্তীশগড়লৈ আকৰ্ষণ কৰাৰ পূর্ণ সম্ভাৱনা আছে।

শ্ৰীঅমিত শ্বাহে কয় যে আগতে প্ৰায়েই কোৱা হৈছিল যে মাটি উৰ্বৰ আছিল, কিন্তু ইয়াৰ মানুহবোৰ দুখীয়া আছিল। কিন্তু অহা ১০ বছৰৰ ভিতৰত মাটি আৰু মানুহ দুয়োটাই সমৃদ্ধিশালী হৈ পৰিব। এয়া মোদী জীৰ গেৰাণ্টি। তেওঁ কয় যে এখন সমৃদ্ধিশালী আৰু সুখী সমাজ গঢ়ি তোলাৰ লগতে উন্নত অঞ্চল গঢ়ি তোলাই হৈছে চৰকাৰৰ লক্ষ্য। তেওঁ উল্লেখ কৰে যে ৰাজ্যখনৰ বাৰ্ষিক বাজেট ৩০ গুণ বৃদ্ধি পাইছে, আনহাতে জনমূৰি আয় ১৭ গুণ বৃদ্ধি পাইছে। ছত্তীশগড়ৰ দৰে ৰাজ্যখনৰ মুঠ ৰাজ্যিক ঘৰুৱা উৎপাদন ২৫ গুণ বৃদ্ধি পাইছে। তেওঁ শৈক্ষিক আন্তঃগাঁথনিৰ সম্প্ৰসাৰণৰ বিষয়েও উল্লেখ কৰি কয় যে আইটিআই প্ৰতিষ্ঠানৰ সংখ্যা দুগুণ, অভিযান্ত্ৰিক মহাবিদ্যালয় তিনিগুণ, পলিটেকনিক মহাবিদ্যালয় ছগুণ আৰু সাধাৰণ মহাবিদ্যালয় তথা বিশ্ববিদ্যালয়ৰ সংখ্যাও ছগুণ বৃদ্ধি পাইছে। তেওঁ কয় যে আমাৰ চৰকাৰে ৰাজ্যখনৰ সক্ষৰতাৰ হাৰ ৬৫ শতাংশৰ পৰা ৭৯ শতাংশলৈ বৃদ্ধি কৰিছে। তেওঁ কয় যে ৰাজ্যখনত আমাৰ চৰকাৰৰ চতুৰ্থটো কাৰ্যকালত ছত্তীশগড়ৰ ৰাইজক ভয়ৰ পৰা বিশ্বাসলৈ আৰু সম্পদৰ পৰা সমৃদ্ধিলৈ লৈ যোৱা হ’ব। সম্ভাৱনাক সাফল্যলৈ ৰূপান্তৰিত কৰি চৰকাৰে সমৃদ্ধিশালী আৰু সুখী ছত্তীশগড় গঢ়াৰ দিশত কাম কৰিব।

****

RK/RR/PR/PS/DB