آئی این ایس سہیا دری نے بوسان میں بھارت اور جمہوریہ کوریا کی بحری افواج کی دوطرفہ مشق مکمل کر لی

بھارتی بحری جہاز سہیا دری نے 29 اکتوبر 2026 کو جمہوریہ کوریا کے شہر بوسان میں بھارتی بحریہ اور جمہوریہ کوریا کی بحریہ کے درمیان منعقدہ دوطرفہ مشق میں اپنی شرکت کامیابی کے ساتھ مکمل کی۔ اس سرگرمی سے بحری تعاون کو تقویت ملی اور دونوں بحری افواج کے درمیان باہمی تعاون کی صلاحیت اور ایک دوسرے کے بارے میں افہام و تفہیم میں اضافہ ہوا۔

بندرگاہ کے مرحلے کے دوران بھارتی بحریہ اور جمہوریہ کوریا کی بحریہ کے اہلکاروں کے درمیان پیشہ ورانہ تبادلۂ خیال، ایک دوسرے کے بحری جہازوں کے دوروں، آپریشنل بریفنگ اور متعلقہ شعبوں کے ماہرین کے درمیان تبادلۂ خیالات کے ذریعے بامعنی روابط استوار ہوئے۔ ان سرگرمیوں سے آپریشنل نقطۂ نظر اور بہترین طریقۂ کار کے تبادلے میں مدد ملی، جبکہ ثقافتی سرگرمیوں اور کھیلوں کے مقابلوں نے باہمی رفاقت کو فروغ دیا اور اہلکاروں کے درمیان دوستانہ تعلقات کو مزید مضبوط کیا۔

سمندری مرحلے کے دوران ان پیشہ ورانہ روابط کو عملی بحری سرگرمیوں میں تبدیل کیا گیا، جس میں آئی این ایس سہیا دری اور جمہوریہ کوریا کے بحری جہاز ’منمو دی گریٹ‘ نے باہمی تال میل کے ساتھ جہاز رانی، ہیلی کاپٹر سے متعلق کارروائیوں اور مشترکہ بحری مشقوں میں حصہ لیا۔ اس مشق کے ذریعے سمندر میں باہمی تال میل کی مشق کرنے، ایک دوسرے کے عملی طریقۂ کار کو بہتر طور پر سمجھنے اور دونوں بحری افواج کے درمیان باہمی تعاون کی صلاحیت کو مزید بہتر بنانے کا موقع ملا۔

اس مشق کی کامیاب تکمیل بھارت اور جمہوریہ کوریا کے اس مشترکہ عزم کی عکاسی کرتی ہے کہ مسلسل روابط اور باہمی تعاون کے ذریعے بحری اشتراک کو مزید گہرا کیا جائے۔ اس طرح کی سرگرمیاں باہمی اعتماد کو فروغ دیتی ہیں اور بحرِ ہند و بحرالکاہل کے خطے میں امن، استحکام اور سلامتی برقرار رکھنے کی مشترکہ کوششوں کو تقویت پہنچاتی ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔رک)

U. No.7150