অখিল বিশ্ব গায়ত্ৰী পৰিয়ালৰ শতবাৰ্ষিকী সমাৰোহত নিচামুক্ত ভাৰতৰ বাবে সমূহীয়া সংকল্প

কেন্দ্ৰীয় সামাজিক ন্যায় আৰু সবলীকৰণ মন্ত্ৰী ড° বীৰেন্দ্ৰ কুমাৰে দিল্লীৰ ইন্দিৰা গান্ধী ইনড'ৰ ষ্টেডিয়ামত অখিল বিশ্ব গায়ত্ৰী পৰিয়ালে আয়োজন কৰা শতবাৰ্ষিকী উদযাপনত অংশগ্ৰহণ কৰে।এই অনুষ্ঠানত তিনিটা উল্লেখযোগ্য মাইলৰ খুঁটি স্মৰণ কৰা হয়। পৰম বন্দনীয়া মাতা ভগৱতী দেৱী শৰ্মা জীৰ ১০০ সংখ্যক জন্ম জয়ন্তী, অখণ্ড দীপকৰ প্ৰজ্বলনৰ ১০০ বছৰ, আৰু পৰম পূজ্য গুৰুদেৱ পণ্ডিত শ্ৰীৰাম শৰ্মা আচাৰ্য জীৰ তপস্যা আৰু আধ্যাত্মিক সাধনাৰ ১০০ বছৰ।এই অনুষ্ঠানত ভাৰত আৰু বিদেশৰ পৰা গায়ত্ৰী পৰিয়ালৰ প্ৰতিনিধি, বিষয়ববীয়া আৰু ভক্তসকলে অংশ লয়।সমবেত লোকসকলে প্ৰতিষ্ঠাপকসকলৰ অসাধাৰণ আধ্যাত্মিক সমৰ্পণ আৰু তেওঁলোকৰ যুগ নিৰ্মাণৰ দৃষ্টিভংগীক স্মৰণ কৰে, লগতে সাংস্কৃতিক ঐতিহ্য, সামাজিক সম্প্ৰীতি, জনকল্যাণৰ প্ৰতি দায়বদ্ধতা আৰু সমাজ সেৱাৰ মূল্যবোধ পুনৰ নিশ্চিত কৰে।

ড° বীৰেন্দ্ৰ কুমাৰে সামাজিক ন্যায় আৰু সবলীকৰণ মন্ত্ৰালয়ৰ সহযোগত ৰূপায়ণ হৈ থকা নিচামুক্ত ভাৰত অভিযানত অখিল বিশ্ব গায়ত্ৰী পৰিয়ালৰ উল্লেখযোগ্য অৱদানৰ ওপৰত আলোকপাত কৰে। আধ্যাত্মিক সজাগতা, শিক্ষা আৰু নিচাযুক্ত দ্ৰব্যৰ ব্যৱহাৰৰ ক্ষতিকাৰক প্ৰভাৱৰ বিষয়ে সজাগতা সৃষ্টিৰ ক্ষেত্ৰত সংগঠনটোৰ প্ৰচেষ্টাই মাদক দ্ৰব্যৰ অপব্যৱহাৰৰ বিৰুদ্ধে ৰাষ্ট্ৰীয় আন্দোলন শক্তিশালী কৰাত সহায় কৰিছে।

মন্ত্ৰীগৰাকীয়ে কয় যে এই প্ৰচেষ্টাই প্ৰধানমন্ত্ৰী শ্ৰী নৰেন্দ্ৰ মোদীৰ “ব্যসনমুক্ত ভাৰত, সংস্কাৰযুক্ত ভাৰত” (শক্তিশালী মূল্যবোধৰ ওপৰত ভিত্তি কৰি নিচামুক্ত ভাৰত) গঢ়াৰ দৃষ্টিভংগীক শক্তিশালী কৰে। সামূহিক সম্পৰ্ক আৰু নিৰন্তৰ সজাগতা পদক্ষেপৰ জৰিয়তে গায়ত্ৰী পৰিয়ালে নাগৰিকসকলক, বিশেষকৈ যুৱক-যুৱতীসকলক সুস্থ আৰু দায়িত্বশীল জীৱনশৈলী গ্ৰহণ কৰিবলৈ উৎসাহিত কৰিছে।শতবাৰ্ষিকী উদযাপনত হাজাৰ হাজাৰ অংশগ্ৰহণকাৰীৰ উপস্থিতিয়ে অখিল বিশ্ব গায়ত্ৰী পৰিয়ালৰ শতাব্দীজোৰা সমৰ্পণ আৰু সেৱাক প্ৰশংসা কৰে।

মন্ত্ৰীগৰাকীয়ে দেৱ সংস্কৃতি বিশ্ববিদ্যালয়ৰ উপাচাৰ্য ড° চিন্ময় পাণ্ডিয়া আৰু তেওঁৰ নিষ্ঠাবান দলৰ সংগঠনটোৰ সমাজ সেৱা আৰু ৰাষ্ট্ৰ নিৰ্মাণৰ অভিযান আগবঢ়াই নিয়াৰ প্ৰচেষ্টাকো স্বীকৃতি দিয়ে।ইয়াৰ প্ৰতিষ্ঠাপক পণ্ডিত শ্ৰীৰাম শৰ্মা আচাৰ্য জীৰ শিক্ষাৰ দ্বাৰা অনুপ্ৰাণিত হৈ অখিল বিশ্ব গায়ত্ৰী পৰিয়ালে “বসুধৈৱ কুটুম্বকম” (বিশ্ব এক পৰিয়াল) দৰ্শনক প্ৰচাৰ কৰি আহিছে আৰু স্বাস্থ্যকৰ, অধিক সুষম সমাজ গঢ়াৰ লক্ষ্যৰে পদক্ষেপসমূহত অৰিহণা যোগাই আহিছে।

নিচামুক্তিৰ ক্ষেত্ৰত ইয়াৰ কামে সজাগতা, সামূহিক অংশগ্ৰহণ আৰু সামূহিক দায়িত্বৰ জৰিয়তে নিচাযুক্ত দ্ৰব্যৰ অপব্যৱহাৰৰ সমস্যা সমাধানত আধ্যাত্মিক আৰু সামাজিক সংগঠনসমূহে পালন কৰিব পৰা ভূমিকাক প্ৰতিফলিত কৰে।মন্ত্ৰীগৰাকীয়ে কয় যে মাতা ভগৱতী দেৱী শৰ্মা জীৰ শতবাৰ্ষিকী স্মৃতিচাৰণৰ সময়ত অংশগ্ৰহণকাৰীসকলে নিচাযুক্ত দ্ৰব্যৰআসক্তি দূৰ কৰিবলৈ লোৱা সামূহিক সংকল্প নিচা মুক্ত ভাৰত অভিযানলৈ  উল্লেখযোগ্য অৱদান আছিল।মন্ত্ৰীগৰাকীয়ে লগতে আলোকপাত কৰে যে ২০২০ চনত প্ৰধানমন্ত্ৰী শ্ৰী নৰেন্দ্ৰ মোদীয়ে জনঅংশগ্ৰহণৰ বাবে দেশজুৰি জনোৱা আহ্বানৰ পিছত সমগ্ৰ দেশতে কোটি কোটি লোকে নিচামুক্ত ভাৰত অভিযানত যোগদান কৰিছে। তেওঁ নিচাযুক্ত দ্ৰব্যৰ অপব্যৱহাৰৰ বিৰুদ্ধে সম্প্ৰদায়সমূহক একত্ৰিত কৰা আৰু সজাগতা শক্তিশালী কৰাৰ ক্ষেত্ৰত অখিল বিশ্ব গায়ত্ৰী পৰিয়ালৰ স্বকীয় আৰু অনুকৰণীয় ভূমিকাক প্ৰশংসা কৰে।মন্ত্ৰালয়ে পুনৰ দৃঢ়তাৰে কয় যে নিচামুক্ত ভাৰতৰ লক্ষ্য অৰ্জনৰ বাবে আধ্যাত্মিক সংগঠন, শিক্ষা প্ৰতিষ্ঠান, নাগৰিক সমাজ আৰু নাগৰিকৰ সক্ৰিয় অংশগ্ৰহণ অপৰিহাৰ্য। শতবাৰ্ষিকী উদযাপনে মাদক দ্ৰব্যৰ ব্যৱহাৰ প্ৰতিৰোধ, সামাজিক দায়িত্ব আৰু জনকল্যাণৰ প্ৰতি সামূহিক প্ৰতিশ্ৰুতি নৱীকৰণৰ বাবে এখন গুৰুত্বপূৰ্ণ মঞ্চ প্ৰদান কৰে।

PR-207-TAR/KV/GA/RK