ڈاکٹر ویریندر کمار نے آج شام قومی راجدھانی میں دلّی ہاٹ کے مقام پر شلپ سماگم میلے 2026 کا افتتاح کیا

15 روزہ شلپ سماگم میلہ 2026 کا افتتاح آج شام قومی راجدھانی میں دلّی ہاٹ، آئی این اے کے مقام پر مرکزی وزیر برائے سماجی انصاف اور تفویض اختیارات ڈاکٹر ویریندر کمار نے کیا۔ یہ میلہ 15 نومبر 2026 تک نئی دہلی کے دلّی ہاٹ، آئی این اے میں عوام کے لیے کھلا رہے گا۔

حکومتِ ہند کی وزارتِ سماجی انصاف اور تفویض اختیارات کے زیر اہتمام منعقد ہونے والا یہ میلہ درج فہرست ذاتوں، دیگر پسماندہ طبقات، صفائی کرمچاریوں اور معذور افراد سے تعلق رکھنے والے دستکاروں اور مستفیدین کو ایک مخصوص مارکیٹنگ پلیٹ فارم فراہم کرے گا، جہاں وہ اپنی مصنوعات کی نمائش کر سکیں گے اور انہیں وسیع تر عوام تک پہنچا کر فروخت کر سکیں گے۔

وزیر موصوف نے اسٹالوں کا دورہ کیا اور اسٹال منتظمین نیز میلے میں آنے والے لوگوں سے بات چیت کی۔

افتتاحی تقریب میں قومی درج فہرست ذاتوں کے مالیاتی و ترقیاتی کارپوریشن (این ایس ایف ڈی سی) کے چیئرمین اور منیجنگ ڈائریکٹر جناب پربھات تیاگی، نیشنل دویانگ جن فائنانس اینڈ ڈیولپمنٹ کارپوریشن (این ڈی ایف ڈی سی) کے چیئرمین اور منیجنگ ڈائریکٹر جناب آشو توش جین، وزارتِ سماجی انصاف اور تفویض اختیارات کی جوائنٹ سکریٹری محترمہ مونالی پی دھاکٹے، معذور افراد کو بااختیار بنانے کے محکمے کی ڈپٹی ڈائریکٹر جنرل محترمہ رچا شنکر، متعدد غیر ملکی مہمانوں کے علاوہ وزارت کے دیگر سینئر افسران اور اہلکاروں نے شرکت کی۔

اجتماع سے خطاب کرتے ہوئے، ڈاکٹر وریندر کمار نے کہا کہ اس سال کا میلہ ’پرکاش اور پرمپرا – جیوتی سے جیوتی جلائیں‘ کے موضوع پر منعقد کیا جا رہا ہے، جس میں ہندوستان کی روایتی دستکاریوں، تہواروں کی روشنیوں اور بھرپور ثقافتی ورثے کا جشن منایا جا رہا ہے۔

انہوں نے کہا کہ یہ تقریب روایتی دستکاری، ہینڈ لوم مصنوعات، براہ راست دستکاری کے مظاہروں اور ثقافتی پروگراموں کو ایک ساتھ لاتی ہے، ساتھ ہی ساتھ کاروبار کو فروغ دینے، ذریعہ معاش پیدا کرنے اور جامع شرکت کو فروغ دیتی ہے۔

وزیر موصوف نے بتایا کہ ایک اہم اقدام کے تحت، محکمہ سماجی انصاف و تفویض اختیارات اور معذور افراد کی بااختیاری کا محکمہ پہلی بار مشترکہ طور پر ’شلپ اُتسو‘ کا انعقاد کر رہے ہیں۔

ڈاکٹر کمار نے کہا کہ بھارت ٹیولپ اور پرپل فیسٹ کے تحت حصہ لینے والے مرد اور خواتین دستکاروں کے لیے تقریباً 150 اسٹال قائم کیے گئے ہیں، جہاں وہ اپنی دستکاری اور ہینڈلوم مصنوعات کی نمائش کر رہے ہیں۔ یہ اقدام روایتی دستکاروں، تخلیقی صلاحیتوں کے حامل افراد اور معذور افراد کو ایک مشترکہ پلیٹ فارم پر یکجا کرتا ہے، جس سے انہیں وسیع تر بازار تک رسائی اور شرکت کے یکساں مواقع فراہم کرنے کی حوصلہ افزائی ہوتی ہے۔

انہوں نے کہا کہ میلے میں شرکت کو آسان بنانے کے لیے مستفیدین کو مفت اسٹال فراہم کیے جا رہے ہیں۔ اس کے علاوہ انہیں سفری اخراجات، یومیہ الاؤنس اور سامان کی نقل و حمل جیسی سہولتیں بھی فراہم کی جا رہی ہیں۔

مرکزی وزیر نے کہا کہ یہ میلہ وزارت کے تحت کام کرنے والے تین قومی کارپوریشنوں، یعنی قومی درج فہرست ذاتوں کے مالیاتی و ترقیاتی کارپوریشن (این ایس ایف ڈی سی)، قومی صفائی کرمچاری مالیاتی و ترقیاتی کارپوریشن (این ایس کے ایف ڈی سی) اور قومی پسماندہ طبقات کے مالیاتی و ترقیاتی کارپوریشن (این بی سی ایف ڈی سی) کے تعاون سے مستفید ہونے والے افراد کو ایک مشترکہ پلیٹ فارم پر یکجا کرتا ہے۔

انہوں نے مزید کہا کہ اس میلے میں معذور افراد کو بااختیار بنانے کے محکمے کے تحت کام کرنے والے نیشنل دویانگ جن فائنانس اینڈ ڈیولپمنٹ کارپوریشن (این ڈی ایف ڈی سی) کے مستفیدین بھی شرکت کر رہے ہیں۔

وزیر موصوف نے کہا کہ وزارت 2022 سے شلپ سماگم میلوں کا انعقاد کر رہی ہے اور اب تک ایسے 15 میلوں کے ذریعے درج فہرست ذاتوں، دیگر پسماندہ طبقات اور صفائی کرمچاریوں سے تعلق رکھنے والے 1,000 سے زائد دستکار اپنی مصنوعات کی نمائش اور فروخت کے مواقع سے مستفید ہو چکے ہیں۔

وزیر موصوف نے کہا کہ اس اقدام کا مقصد دستکاروں کو صارفین سے جوڑ کر اور ان کی روایتی مہارتوں اور دستکاری کو زیادہ نمایاں مقام فراہم کرکے ان کے ذریعۂ معاش کو مستحکم بنانا ہے۔

اس میلے کو سات موضوعاتی زون میں ترتیب دیا گیا ہے، جن میں سے ہر ایک ہندوستان کے دستکاری کے فنون، روایات، کھانوں اور ثقافتی رنگا رنگی کا ایک منفرد تجربہ پیش کرے گا۔ کلا آنگن میں دستکاری کے فنون کے عملی مظاہرے ہوں گے؛ پرکاش چوک میں چراغوں اور روشنیوں کی نمائش کی جائے گی؛ پوجا پتھ میں مذہبی عقیدت سے متعلق مصنوعات پیش کی جائیں گی؛ سجاوٹ بازار میں گھریلو آرائش کی اشیا پر توجہ مرکوز کی جائے گی؛ گھرانہ میں کپڑوں اور فیشن کی مصنوعات پیش کی جائیں گی؛ سواد چوک میں کھانے پینے کی اشیا دستیاب ہوں گی؛ جبکہ منچ میں ثقافتی سرگرمیوں اور فنونِ لطیفہ کے مظاہروں کا اہتمام کیا جائے گا۔

اس تقریب کی ایک اہم کشش بھارت ٹیولپ (روایتی دستکاروں کے ذریعۂ معاش کو فروغ دینے کا پروگرام) ہے۔ اس اقدام کا مقصد ای کامرس پلیٹ فارمز کے ذریعے دستکاروں اور دیگر ہدفی گروپوں کی تیار کردہ مصنوعات کو ہندوستان اور بیرونِ ملک صارفین تک پہنچانا اور ان کی مارکیٹنگ کو فروغ دینا ہے۔

بھارت ٹیولپ برانڈ دستکاروں کو اپنی مصنوعات فروخت کرنے، اپنی منڈی تک رسائی کو وسعت دینے اور معاشی طور پر بااختیار بننے کے لیے ایک آن لائن مارکیٹ پلیس فراہم کرتا ہے۔ اس کے ساتھ ساتھ یہ ہندوستان کے روایتی فنون اور دستکاری کے تحفظ میں بھی اپنا کردار ادا کرتا ہے۔

اس میلے میں پرپل فیسٹ کو بھی نمایاں کیا گیا ہے، جو معذوری، تخلیقی صلاحیتوں، ہنرمندی اور یکساں شرکت کا ایک کثیر جہتی جشن ہے۔ یہ معذور افراد، تنظیموں، اداروں، کاروباری شعبوں، فنکاروں، پیشہ ور افراد اور دیگر متعلقہ فریقوں کو ایک پلیٹ فارم پر یکجا کرتا ہے، تاکہ کامیابیوں کا جشن منایا جا سکے، شرکت کی حوصلہ افزائی ہو اور معاشرے میں شمولیت کے تصور کے بارے میں زیادہ سے زیادہ بیداری پیدا کی جا سکے۔

یہ تقریب وزارت اور اس کے چار قومی کارپوریشنوں، یعنی این ایس ایف ڈی سی، این بی سی ایف ڈی سی، این ایس کے ایف ڈی سی اور این ڈی ایف ڈی سی کی فلاحی اسکیموں اور اقدامات کے بارے میں بیداری پیدا کرنے کا ایک پلیٹ فارم بھی ثابت ہوگی۔ اس کے ساتھ ساتھ ہدفی برادریوں کے درمیان صنعت کاری، ذریعۂ معاش پیدا کرنے اور معاشی خود مختاری کے مواقع کو بھی اجاگر کیا جائے گا۔

شلپ سماگم میلہ 2026 کے ذریعے وزارتِ سماجی انصاف اور تفویض اختیارات روایتی دستکاروں اور ان کی مصنوعات کو زیادہ نمایاں مقام فراہم کرنے، ذریعۂ معاش کے پائیدار مواقع کو فروغ دینے، روایتی دستکاری کی حوصلہ افزائی کرنے اور جامع معاشی ترقی کو تقویت دینے کی اپنی کوششیں جاری رکھے ہوئے ہے۔

***

ش ح۔ ف ش ع

U: 7119