پوسٹ کرنے کی تاریخ:
29 OCT 2026 1:28PM by PIB Delhi
مزدوروں کی فلاح و بہبود اور خوش گوار صنعتی تعلقات کے فروغ کی جانب ایک اہم کامیابی کے طور پر، الٹراٹیک، بھٹنڈہ کی انتظامیہ اور مزدور یونینوں کے درمیان 14 اکتوبر 2026 کو تصفیے کی دو یادداشتوں پر دستخط کیے گئے۔ یہ پیش رفت حکومتِ ہند کی وزارتِ محنت و روزگار کے تحت چیف لیبر کمشنر (مرکزی) کے دفتر کی جانب سے جالندھر کے اسسٹنٹ لیبر کمشنر (مرکزی) کی مؤثر مصالحتی کوششوں کے نتیجے میں ممکن ہوئی۔
سینٹر آف انڈین ٹریڈ یونینز (سی آئی ٹی یو) اور آل انڈیا ٹریڈ یونین کانگریس (اے آئی ٹی یو سی) کے ساتھ طے پانے والے ان تصفیوں کے تحت آئندہ پانچ برسوں کے دوران 217 کارکنوں کو تقریباً 3.36 کروڑ روپے کے مالی فوائد ملنے کی توقع ہے۔
ان تصفیوں کی ایک اہم خصوصیت یہ ہے کہ متعلقہ معاہدوں کی شرائط و ضوابط کے مطابق طے شدہ فوائد سال کی دوسری سہ ماہی سے سابقہ تاریخ سے نافذ کیے جائیں گے۔ یہ تصفیے تعمیری مذاکرات اور انتظامیہ و مزدوروں کے نمائندوں کے تعاون سے ممکن ہوئے، جن میں جالندھر میں چیف لیبر کمشنر (مرکزی) کے نظام نے فعال کردار ادا کیا۔ اس کامیاب پیش رفت سے ظاہر ہوتا ہے کہ باہمی طور پر قابلِ قبول حل تلاش کرنے اور اجتماعی سودے بازی کو فروغ دینے میں مؤثر مصالحت کتنی اہم ہے۔
یہ کامیابی حکومتِ ہند کی وزارتِ محنت و روزگار کے اس مسلسل عزم کی عکاسی کرتی ہے کہ مزدوروں کے مفادات کا تحفظ کیا جائے، صنعتی تنازعات کو خوش اسلوبی سے حل کرنے میں مدد دی جائے، محنت کے منصفانہ طور طریقوں کو فروغ دیا جائے اور تعمیری مذاکرات و مؤثر مصالحت کے ذریعے خوش گوار صنعتی تعلقات کو مضبوط بنایا جائے۔
***
(ش ح ۔رک)
U. No.6897