خصوصی مہم 6 کے تحت وزارت پٹرولیم و قدرتی گیس کی نمایاں پیش رفت؛ 3.42 لاکھ مربع فٹ سے زائد جگہ خالی کرائی اور کچرے کو ٹھکانے لگانے سے 49.46 کروڑ روپے حاصل کیے۔

وزارت پٹرولیم و قدرتی گیس (ایم او پی این جی) اپنے مرکزی سرکاری شعبے کے اداروں (سی پی ایس ایز) اور دیگر تنظیموں کے ساتھ خصوصی مہم 6 کو فعال طور پر نافذ کر رہی ہے، جس میں صفائی ستھرائی، ریکارڈ کے مؤثر انتظام، کچرے اور ای کچرے کی تلفی اور دفتری جگہ کے زیادہ سے زیادہ استعمال پر توجہ مرکوز کی جا رہی ہے۔

خصوصی مہم 6 کے تحت وزارت پٹرولیم و قدرتی گیس اور اس کے آئل اینڈ گیس سی پی ایس ایز نے صفائی ستھرائی اور دفتری جگہ کے زیادہ سے زیادہ استعمال کو فروغ دینے میں نمایاں پیش رفت کی ہے۔ مہم کے لیے مرتب کردہ سی پی ایس ای کے لحاظ سے پیش رفت کے اعداد و شمار کے مطابق، 3.42 لاکھ مربع فٹ جگہ خالی کرائی گئی ہے، جو گزشتہ سال کی 3.03 لاکھ مربع فٹ کی کامیابی کے مقابلے میں 13.20 فیصد زیادہ ہے۔

مہم کے دوران کچرے اور ای ویسٹ کی تلفی سے 49.46 کروڑ روپے حاصل ہوئے، جبکہ ہدف 41 کروڑ روپے تھا۔ اس طرح مقررہ ہدف کا 120.63 فیصد حاصل کیا گیا۔ یہ کامیابیاں تیل اور گیس شعبے میں صفائی ستھرائی کو ادارہ جاتی شکل دینے، کچرے اور ای ویسٹ کی سائنسی طریقے سے تلفی یقینی بنانے اور انتظامی کارکردگی بہتر بنانے کے لیے وزارت کے عزم کو ظاہر کرتی ہیں۔

وزارت مہم کی پیش رفت کی مسلسل نگرانی کر رہی ہے اور اس نے اپنی تمام تنظیموں کو تفویض کردہ اہداف کے حصول کے لیے کوششیں تیز کرنے کی ترغیب دی ہے، تاکہ ای ویسٹ کی ذمہ دارانہ تلفی اور دفاتر و تنصیبات میں صفائی ستھرائی برقرار رکھنے کو یقینی بنایا جا سکے۔

خصوصی مہم 6 تیل اور گیس شعبے میں سوچھتا، ماحولیاتی ذمہ داری، مؤثر ریکارڈ مینجمنٹ اور بہتر انتظامی امور کے لیے وزارت کے عزم کو مزید مضبوط کرتی ہے۔

************

ش ح ۔   م  د ۔  م  ص

(U : 6861 )