مرکزی وزیر ڈاکٹر ویریندر کمار نے سی آر سی جموں میں مستقل عمارت کے جاری تعمیراتی کام کا جائزہ لیا

مرکزی وزیر برائے سماجی انصاف و تفویضِ اختیارات، ڈاکٹر ویریندر کمار نے جموں و کشمیر کے  جموں  میں واقع سانبہ کے وجے پور میں واقع گاؤں چک جوالا میں معذور افراد (دیویانگ جن) کی ہنر مندی کی ترقی، بازآبادکاری اور بااختیاری کے لیے قائم جامع علاقائی مرکز (سی آر سی)، جموں کی مستقل عمارت کے تعمیراتی مقام کا دورہ کیا اور وہاں جاری تعمیراتی کام کی پیش رفت کا جائزہ لیا۔

تقریباً 24 کروڑ روپے کی تخمینہ لاگت سے تعمیر ہونے والی اس مستقل عمارت سے خطے میں بازآبادکاری اور معاون خدمات کی دستیابی میں نمایاں اضافہ متوقع ہے، جس سے معذور افراد کو زیادہ خودمختار اور باوقار زندگی گزارنے میں مدد ملے گی۔

اس موقع پر ڈاکٹر ویریندر کمار نے کہا کہ مستقل عمارت سے سی آر سی جموں کی ادارہ جاتی صلاحیت مستحکم ہوگی اور پورے خطے میں معذور افراد کے لیے بازآبادکاری، تعلیم اور معاون خدمات تک رسائی میں توسیع ہوگی۔ انہوں نے بتایا کہ فی الحال یہ مرکز جموں شہر میں محدود پیمانے پر کام کر رہا ہے اور نئی عمارت کی دستیابی سے اسے اپنی خدمات کا دائرہ وسیع کرنے میں مدد ملے گی۔

مرکزی وزیر کے ہمراہ وزارتِ سماجی انصاف و تفویضِ اختیارات کے سینئر افسران بھی موجود تھے، جن میں محکمۂ بااختیاری برائے معذور افراد کے جوائنٹ سکریٹری جناب راجیو شرما شامل تھے۔

دورے کے دوران سی آر سی جموں کی ڈائریکٹر ڈاکٹر رونیکا شرما نے مرکزی وزیر کو تعمیراتی کام کی پیش رفت، اب تک مکمل کیے گئے کاموں کی صورتِ حال اور باقی ماندہ کاموں کے بارے میں تفصیلی معلومات فراہم کیں۔ انہوں نے مستقل عمارت کی تعمیر بروقت مکمل کرنے اور اسے فعال بنانے کے سلسلے میں بنیادی ڈھانچے سے متعلق ضروریات اور اہم امور سے بھی وزیر موصوف کو آگاہ کیا۔

ڈاکٹر شرما نے مرکزی وزیر کو منصوبے کی بروقت تکمیل سے متعلق بنیادی ڈھانچے کی ضروریات اور دیگر اہم پہلوؤں سے بھی واقف کرایا۔ فعال ہونے کے بعد اس مرکز سے معذور افراد (دیویانگ جن) کے لیے بازآبادکاری، خصوصی تعلیم، ابتدائی مرحلے میں اقدامات ، ہنر مندی کی ترقی اور بااختیاری سے متعلق اقدامات کو فروغ دینے میں مدد ملنے کی توقع ہے۔

اس دورے کے دوران جاری تعمیراتی کام کا جائزہ لینے اور باقی ماندہ کاموں کو تیز رفتاری سے مکمل کرنے کے لیے ضروری اقدامات پر غور کرنے کا موقع ملا۔

مرکزی وزیر نے منصوبے کی بروقت تکمیل اور معذور افراد (دیویانگ جن) کو مؤثر خدمات فراہم کرنے کے لیے مناسب بنیادی ڈھانچے کی دستیابی کی اہمیت پر زور دیا۔

انہوں نے مزید کہا کہ سی آر سی جموں کی مستقل عمارت کا قیام جموں خطے میں معذور افراد کے لیے بازآبادکاری کی خدمات، خصوصی تعلیم، ابتدائی مرحلے میں اقدامات ، ہنر مندی کی ترقی اور بااختیاری کے اقدامات کو مستحکم کرنے کی سمت ایک اہم قدم ہے۔

وزیر موصوف نے مزید کہا کہ اس مرکز کا مقصد بازآبادکاری سے متعلق خدمات کی فراہمی میں معاونت کرنا اور معذور افراد کے لیے مناسب علاج واقدامات کی سہولتوں اور ہنر مندی کی ترقی کے مواقع تک رسائی کو آسان بنانا ہے۔

ڈاکٹر کمار نے کہا کہ اس مرکز میں معذور بچوں کو خود کفیل بنانے میں مدد دینے کے لیے فزیوتھراپی اور خصوصی تربیت کی سہولت فراہم کی جائے گی۔ اس کے علاوہ، والدین اور دیکھ بھال کرنے والوں کی تربیت کا بھی انتظام کیا جائے گا، تاکہ وہ معذور بچوں کی بہتر طور پر معاونت کر سکیں۔

انہوں نے مزید بتایا کہ معاون آلات تک رسائی کو آسان بنانے کے لیے مرکز میں پردھان منتری دیویہ شا کیندر قائم کیا جائے گا۔ معذوری سے متعلق مختلف نصاب بھی شروع کرنے کا منصوبہ ہے، جن میں بی ایڈ اور ایم ایڈ کے پروگرام شامل ہیں۔ ان سے تعلیمی مواقع پیدا ہوں گے اور معذور افراد کی بازآبادکاری اور بااختیاری کے شعبے میں تربیت حاصل کرنے والے نوجوانوں کے لیے روزگار کے امکانات بھی بہتر ہوں گے۔

وزیر موصوف نے کہا کہ اس مرکز میں حسبِ ضرورت مصنوعی اعضا اور دیگر معاون آلات کی پیمائش، تیاری اور نصب کرنے کے لیے تجربہ گاہیں قائم کی جائیں گی۔ انہوں نے مزید کہا کہ ان سہولتوں سے مستفید ہونے والے افراد کو روزمرہ کے کام زیادہ آسانی اور خودمختاری کے ساتھ انجام دینے میں مدد ملنے کی توقع ہے۔

جامع ترقی کی اہمیت پر زور دیتے ہوئے ڈاکٹر کمار نے کہا کہ معذور افراد کو بااختیار بنانا ’سب کا ساتھ، سب کا وکاس، سب کا وشواس‘ اور آتم نربھر بھارت کے تصور کا ایک لازمی حصہ ہے۔ انہوں نے کہا کہ سی آر سی جموں کے قیام سے جموں خطے میں ایک جامع بازآبادکاری مرکز کی دیرینہ ضرورت پوری ہوگی اور بچوں سے لے کر بزرگوں تک، معذور افراد کو ان سے متعلق خدمات ان کے قریب دستیاب ہوں گی۔

وزیر موصوف نے مزید کہا کہ معذور افراد کی معاونت سے ان کے کنبے بھی مستحکم ہوں گے اور وہ معاشرے اور ملک کی ترقی میں زیادہ فعال کردار ادا کر سکیں گے۔

اس جائزے سے جموں و کشمیر میں معذور افراد کو بازآبادکاری اور بااختیاری کی خدمات فراہم کرنے کے لیے ادارہ جاتی صلاحیت کو مستحکم بنانے کی غرض سے بنیادی ڈھانچے کے منصوبے کو بروقت مکمل کرنے کی اہمیت کی توثیق ہوئی۔

قابلِ ذکر ہے کہ سی آر سی جموں، وزارتِ سماجی انصاف و تفویضِ اختیارات کے محکمۂ بااختیاری برائے معذور افراد کے تحت، نئی دلی میں واقع پنڈت دین دیال اپادھیائے قومی ادارہ برائے جسمانی معذوری کے ذریعے کام کرتا ہے۔

****

ش ح۔ ا ع خ۔ خ م

U.NO.6783