پوسٹ کرنے کی تاریخ:
26 OCT 2026 8:06PM by PIB Delhi
حکومتِ ہند کی وزارتِ محنت و روزگار کے تحت ’چیف لیبر کمشنر (سینٹرل)‘ کے نظام کی بروقت مداخلت سے ایک صنعتی تنازعہ کامیابی کے ساتھ حل ہو گیا ہے۔ اس کے نتیجے میں کرناٹک کے ’ایمپلائز اسٹیٹ انشورنس کارپوریشن‘ ماڈل ہسپتال میں 37 کنٹریکٹ ورکرز کی دوبارہ تعیناتی ممکن ہوئی ہے، اور تقریباً 7.40 لاکھ روپے کی بقایا اجرت کی ادائیگی بھی یقینی بنائی گئی ہے۔
یہ تنازعہ ’کرناٹک اسٹیٹ ای ایس آئی سی ماڈل ہسپتال کنٹریکٹ ورکرز یونین‘ کی جانب سے اٹھایا گیا تھا، جس کا تعلق نرسنگ آرڈلیز اور معاون عملے کو ان کے معاہدے کی مدت ختم ہونے سے قبل ہی کام سے ہٹا دینے سے تھا۔ اس معاملے پر فوری طور پر مصالحت کا عمل شروع کیا گیا، اور ’ای ایس آئی سی‘ (بطور بنیادی آجر) اور متعلقہ ٹھیکیدار کو مصالحتی کارروائی میں شرکت کے لیے طلب کیا گیا۔
ڈپٹی چیف لیبر کمشنر (سینٹرل)، بنگلورو کی رہنمائی میں، اسسٹنٹ لیبر کمشنر (سینٹرل)، بنگلورو کی مؤثر اور بروقت مداخلت کے ذریعے، تمام 37 متاثرہ کنٹریکٹ ورکرز کو 23 اکتوبر 2026 سے دوبارہ کام پر تعینات کر دیا گیا۔ مزید برآں، ستمبر 2026 کے مہینے کی ان کی واجب الادا اجرت، جو تقریباً 7.40 لاکھ روپے بنتی تھی، بھی ادا کر دی گئی۔
تنازعے کے اس بروقت حل نے متاثرہ ورکرز کے روزگار کو تحفظ فراہم کیا اور ان کی بقایا اجرتوں کی ادائیگی کو یقینی بنایا، جس سے منصفانہ لیبر طریقوں اور صنعتی تعلقات میں ہم آہنگی کو فروغ ملا۔
یہ کامیاب مصالحت، چیف لیبر کمشنر (سینٹرل) آرگنائزیشن کے اس عزم کی عکاسی کرتی ہے کہ وہ ورکرز کے مفادات کا تحفظ کرے، صنعتی تنازعات کے خوش اسلوبی سے حل میں سہولت فراہم کرے، اور ورکرز، آجروں اور دیگر متعلقہ فریقین کے درمیان تعمیری بات چیت کو فروغ دے۔
*****
ش ح ۔ ال ۔ ع ر
UR-6738