حقیقت نما ٹیکنالوجیز

حقیقت نما ٹیکنالوجیز بھارت کے تعلیمی، صنعتی اور تخلیقی شعبوں میں تیزی سے وسعت اختیار کر رہی ہیں۔ اطلاعات و نشریات کی وزارت، ممبئی میں انڈین انسٹی ٹیوٹ آف کری ایٹو ٹیکنالوجیز (آئی آئی سی ٹی) جیسے اقدامات کے ذریعے حرکت پذیر تصاویر(اینیمیشن)، بصری اثرات(ویژول ایفیکٹس)، کھیلوں(گیمنگ)، کامکس اور ایکسٹینڈڈ ریئلٹی (اے وی جی سی-ایکس آر) کے شعبوں کو فروغ دے رہی ہے۔ نیشنل سینٹر آف ایکسی لینس کے طور پر قائم آئی آئی سی ٹی، تخلیقی تعلیم، ہنرمندی اور اختراع کو مستحکم بنانے کے لیے گوگل، میٹا، ایڈوب اور نیٹ فلکس سمیت عالمی ٹیکنالوجی کمپنیوں کے ساتھ اشتراک کر رہا ہے۔ اس شعبے کے فروغ کے لیے مزید اقدامات کرتے ہوئے، مرکزی بجٹ 2026-27 میں ملک بھر کے 15,000 ثانوی اسکولوں اور 500 کالجوں میں اے وی جی سی مواد تخلیق کرنے کی تجربہ گاہیں قائم کرنے کے لیے 250 کروڑ روپے مختص کیے گئے ہیں۔

تخلیقی اذہان، سائنس کو فروغ، ٹیکنالوجی کو تقویت

بھارت میں ابھرتی ہوئی سائنس، ٹیکنالوجی اور اختراع سے متعلق کانکلیو ایسٹک-2026  کا دوسرا ایڈیشن 27 سے 29 اکتوبر 2026 تک نئی دہلی کے بھارت منڈپم میں منعقد ہوگا۔۔ اس تقریب کا انعقاد‘‘ اذہان، سائنس کو فروغ، ٹیکنالوجی کو تقویت’’ کے موضوع کے تحت کیا جائے گا۔ سائنسی و صنعتی تحقیق کی کونسل (سی ایس آئی آر) کے زیراہتمام منعقد ہونے والے ای ایس ٹی آئی سی-2026 میں مختلف وزارتیں، محققین، اختراع کار، صنعت کے قائدین، جدید ٹیکنالوجی پر کام کرنے والے نئے کاروباری ادارے اور عالمی ماہرین شرکت کریں گے تاکہ سائنس اور ٹیکنالوجی کے ابھرتے ہوئے شعبوں کو آگے بڑھایا جا سکے۔ اس کانکلیو میں 12 موضوعاتی شعبے شامل ہوں گے، جن میں حقیقت نما ٹیکنالوجیز: جنریٹیو ایکس آر اور مکانی کمپیوٹنگ بھی شامل ہیں۔ اس تقریب میں عمومی اجلاس، تکنیکی مباحثے اور نمائشیں منعقد کی جائیں گی۔ ایجنڈے کی مزید تفصیلات کے لیے: ESTIC 2026 پر کلک کریں ۔

توسیعی حقیقت (ایکس آر)

توسیعی حقیقت سے مراد ایسی ٹیکنالوجیز ہیں جو کمپیوٹر نظاموں اور پہننے کے قابل آلات کے ذریعے حقیقی اور ڈیجیٹل ماحول کو یکجا کرتی ہیں۔ یہ ٹیکنالوجیز انسانوں اور ڈیجیٹل مواد کے درمیان مختلف سطحوں پر باہمی تعامل ممکن بناتی ہیں۔ توسیعی حقیقت میں مجازی حقیقت (وی آر)، افزوده حقیقت (اے آر) اور مخلوط حقیقت (ایم آر) شامل ہیں۔

• مجازی حقیقت (وی آر): یہ ایک مکمل طور پر ڈیجیٹل ماحول تخلیق کرتی ہے، جو صارف کو اپنے احاطے میں لے لیتا ہے۔ اس میں بنیادی طور پر دیکھنے اور سننے کی حِس کو بروئے کار لا کر ماحول میں حقیقی طور پر موجود ہونے کا گہرا احساس پیدا کیا جاتا ہے۔ صارف خصوصی آلات کی مدد سے اس مصنوعی ماحول کی سیر کر سکتے ہیں اور اس کے ساتھ تعامل بھی کر سکتے ہیں۔
• افزوده حقیقت (اے آر): یہ صارف کے موجودہ حقیقی ماحول میں ڈیجیٹل معلومات کا اضافہ کرتی ہے۔ اس میں حقیقی دنیا کا ماحول نظر آتا رہتا ہے، جبکہ دیکھنے اور سننے کی حِس کے ذریعے ڈیجیٹل معلومات بھی فراہم کی جا سکتی ہیں۔ مثال کے طور پر، افزوده حقیقت حقیقی دنیا کے منظر پر راستوں کی نشان دہی، معلومات یا ڈیجیٹل اشیا دکھا سکتی ہے۔
• مخلوط حقیقت (ایم آر): یہ ایک ایسے باہمی تعامل پر مبنی ماحول میں حقیقی اور ڈیجیٹل دنیا کو یکجا کرتی ہے، جہاں ڈیجیٹل اشیا حقیقی ماحول کے ساتھ تعامل کر سکتی ہیں۔ اس میں دیکھنے اور سننے کی حِس کو بروئے کار لاتے ہوئے صارفین ڈیجیٹل اشیا کو اس طرح دیکھ اور ان کے ساتھ تعامل کر سکتے ہیں، گویا وہ حقیقی ماحول ہی کا حصہ ہوں۔

ڈیجیٹل ٹوئن کیا ہے؟

ڈیجیٹل ٹوئن کسی حقیقی شے، نظام یا مقام کا مجازی نمونہ ہوتا ہے۔ اس میں حقیقی دنیا سے حاصل کردہ معلومات استعمال کرکے حالات اور طرزعمل کی عکاسی کی جاتی ہے، جس سے صارفین صورتحال کی نگرانی کر سکتے ہیں اور ممکنہ تبدیلیوں کو ڈیجیٹل طور پر آزما سکتے ہیں۔ مثال کے طور پر، کسی مشین کا ڈیجیٹل نمونہ ممکنہ خرابیوں کی نشان دہی کرنے میں مدد دے سکتا ہے، جبکہ کسی شہر کا ڈیجیٹل نمونہ منصوبہ سازوں کو بنیادی ڈھانچے کے منصوبوں پر عمل درآمد سے پہلے ان کے ممکنہ اثرات کا جائزہ لینے میں معاون ثابت ہو سکتا ہے۔اس کی ایک مثال محکمۂ مواصلات (ڈی او ٹی) کی جانب سے انڈیا موبائل کانگریس 2025 میں پیش کیا گیا موبیلٹی ڈیجیٹل ٹوئن ہے۔ اس میں ٹیلی مواصلات سے حاصل کردہ نقل و حرکت کے اعداد و شمار استعمال کرکے یہ تجزیہ کیا جاتا ہے کہ لوگ مختلف علاقوں میں کس طرح سفر کرتے اور نقل و حرکت کرتے ہیں۔ دہلی کے وسنت کنج اور سینٹرل وسٹا میں کیے گئے عملی مظاہروں کے دوران آمدورفت کے معمولات کا جائزہ لیا گیا اور میٹرو اسٹیشنوں کے زیر رسائی علاقوں کا تعین کرنے میں مدد ملی۔ ایودھیا میں نقل و حرکت سے متعلق اعداد و شمار کے ذریعے سیاحوں کی آمدورفت، سفر کے ذرائع اور قیام کے معمولات کا مطالعہ کیا گیا۔ ان معلومات سے متعلقہ حکام کو آمدورفت کے رابطوں کی منصوبہ بندی، سیاحتی بنیادی ڈھانچے میں بہتری اور منصوبوں کو حتمی شکل دینے سے پہلے زیادہ باخبر فیصلے کرنے میں مدد مل سکتی ہے۔

جینیسیس (جنریشن-نیکسٹ سپورٹ فار انوویٹیو اسٹارٹ اپس)

درجہ دوم اور درجہ سوم کے شہروں میں نئے کاروباری اداروں کے ماحول کو فروغ دینے کے لیے الیکٹرانکس اور اطلاعاتی ٹیکنالوجی کی وزارت نے جینیسیس اسکیم کو منظوری دی۔ 2022 میں شروع کی گئی اس اسکیم کا مقصد پانچ سال کے دوران تقریباً 1,600 ٹیکنالوجی پر مبنی نئے کاروباری اداروں کی مدد کرنا ہے۔ اس میں حقیقت نماٹیکنالوجیز، مثلاً افزوده حقیقت (اے آر)، مجازی حقیقت (وی آر) اور مکانی کمپیوٹنگ پر کام کرنے والے نئے کاروباری ادارے بھی شامل ہیں۔ وزارت کے اسٹارٹ اپ ہب کے ذریعے یہ اسکیم فی الحال اے آر/وی آر کے 84 نئے کاروباری اداروں کی مدد کر رہی ہے۔ اس کے علاوہ، ملک بھر میں 106 کاروباری اداروں کی معاونت کرنے والے مراکز(انکیوبیٹر) کو بھی مدد فراہم کر رہی ہے۔

اے وی جی سی-ایکس آر کی ترقی میں بھارت کی سرکردہ ریاستیں

• کرناٹک کی اے وی جی سی-ایکس آر پالیسی 3.0 کے تحت ہنرمندی کی ترقی، بنیادی ڈھانچے، فلم و مواد کی تیاری کے لیے مالی امداد اور اے وی جی سی-ایکس آر کمپنیوں کو مالی مراعات فراہم کی جاتی ہیں۔ ریاست میں کٹوین اے وی جی سی فنڈ بھی کام کر رہا ہے، جس کا مجموعی سرمایہ 20 کروڑ روپے ہے۔ اس فنڈ کے ذریعے اے وی جی سی اور اس سے متعلقہ شعبوں میں کام کرنے والی کمپنیوں میں سرمایہ کاری کی جاتی ہے۔
• مہاراشٹر کی اے وی جی سی-ایکس آر پالیسی 2025 کے لیے 3,268 کروڑ روپے کا مالی منصوبہ تیار کیا گیا ہے، جب کہ اس کا طویل مدتی وژن 2050 تک محیط ہے۔ اس پالیسی کے تحت حکومتی تعاون اور بنیادی ڈھانچے کی فراہمی کے ذریعے ریاست میں اے وی جی سی-ایکس آر کے نظام کو وسعت دینے کے لیے ایک مخصوص لائحۂ عمل فراہم کیا گیا ہے۔
• تلنگانہ کی 2016 کی امیج (آی ایم اے جی ای) پالیسی کے تحت حرکت پذیر تصاویر، بصری اثرات(وی ایف ایکس )، گیمنگ  اور مزاحیہ کہانیوں کے شعبوں کے لیے ایک مخصوص لائحۂ عمل تیار کیا گیا، جس کا مرکز حیدرآباد کا امیج ٹاور ہے۔ اس شعبے میں 150 سے زائد اے وی جی سی/بصری اثرات کی کمپنیاں، کھیلوں اور حرکت پذیر تصاویر کی 140 سے زائد کمپنیاں اور 30,000 براہ راست روزگار کے مواقع شامل ہیں۔ اس کے علاوہ، سافٹ ویئر ٹیکنالوجی پارکس آف انڈیا (ایس ٹی پی آئی)-امیج کے ذریعے 100 نئے کاروباری اداروں کو اس نظام سے منسلک کیا گیا ہے۔ اس شعبے کو مواد کی تیاری کے بنیادی ڈھانچے، تربیت اور عالمی سطح پر کلاؤڈ سہولتوں تک رسائی کے ذریعے تعاون فراہم کیا جاتا ہے۔
• تمل ناڈو کی اے وی جی سی-ایکس آر پالیسی 2026 کا ہدف ہے کہ 2030 تک 200 سے زائد نئے کاروباری ادارے قائم ہوں، تقریباً 2 لاکھ روزگار کے مواقع پیدا ہوں اور بھارت کی اے وی جی سی-ایکس آر مارکیٹ میں ریاست کا حصہ 20 فیصد تک پہنچ جائے۔ اس پالیسی کے تحت چنئی میں ‘‘ایلکاٹ ویان اے وی جی سی-ایکس آرسینٹر آف ایکسی لینس’’ کے قیام اور اسے مرکزی مرکز کے طور قائم کرنےاورکوئمبٹور،مدورئی،تروچیراپلی،سیلم اورترو نیل ویلی کےعلاقوں میں اس سےمنسلک ذیلی مراکز قائم کرنےکےلیےبھی مدد فراہم کی جائے گی۔
• کیرالہ کی اے وی جی سی-ایکس آر پالیسی 2024 میں خصوصی مہارت رکھنے والی افرادی قوت تیار کرنے پر خاص توجہ دی گئی ہے۔ اس میں صنعت کی ضروریات کے مطابق ملازمتوں کے کردار متعین کرنے، اساتذہ کی تربیت اور اسکولوں سے لے کر اعلیٰ تعلیم تک مجازی حقیقت (وی آر)، افزوده حقیقت (اے آر)، کھیلوں، بصری اثرات اور ڈیجیٹل آرٹ سے متعلق کورس شروع کرنے کی تجویز پیش کی گئی ہے۔ اس مشن کا مقصد 2029 تک اے وی جی سی-ایکس آر صنعت میں 50,000 نئے روزگار کے مواقع پیدا کرنا ہے، جو علم پر مبنی خوش حال معیشت کو فروغ دینے کے لیے کیرالہ کے عزم کو مستحکم کرتا ہے۔
• مدھیہ پردیش کی اے وی جی سی-ایکس آر پالیسی 2025 میں سینٹر آف ایکسی لینس، اے وی جی سی-ایکس آر تجربہ گاہوں اور مخصوص ہنرمندی کی تربیت کو سرمایہ کاری کی مراعات کے ساتھ مربوط کیا گیا ہے۔ اس پالیسی کے تحت سرمایہ جاتی سرمایہ کاری، روزگار کی فراہمی، مواد کی تیاری کے اخراجات، معیار کی تصدیق اور تخلیقی و اختراعی حقوق کی تخلیق کے لیے بھی معاونت فراہم کی جاتی ہے۔
• اتر پردیش، نوئیڈا بین الاقوامی ہوائی اڈے اور مجوزہ بین الاقوامی فلم سٹی کے قریب جیور میں اے وی جی سی-ایکس آر پارک تیار کر رہا ہے۔ اس پارک میں اینیمیشن، بصری اثرات (وی ایف ایکس)، گیمنگ، موشن کیپچر، مجازی پروڈکشن اور توسیعی حقیقت (ایکس آر) سے متعلق سہولتیں یکجا کی جائیں گی۔ اس کا مقصد سرمایہ کاری کو راغب کرنا، نئے کاروباری اداروں کی معاونت کرنا، ہنرمند افراد کے لیے روزگار کے مواقع پیدا کرنا اور ریاست کی ڈیجیٹل تخلیقی معیشت کو مستحکم بنانا ہے۔
• راجستھان نے ریاستی بجٹ 2024-25 میں اپنی اے وی جی سی-ایکس آر پالیسی 2024 کا اعلان کیا، جس کا مقصد حرکت پذیر تصاویر، بصری اثرات، گیمنگ، مزاحیہ کہانیوں اور حقیقت نماٹیکنالوجیز کے نظام کو مستحکم بنانا ہے۔ اس پالیسی کے تحت اہل حرکت پذیر تصاویر، بصری اثرات، اے آر اور وی آر منصوبوں کے لیے 50 لاکھ روپے تک اور اہل کھیلوں کی تیاری کے منصوبوں کے لیے 1 کروڑ روپے تک کی مالی مراعات فراہم کی جاتی ہیں۔
• گجرات حکومت کی مخصوص پہل کے ذریعے خود کو اے وی جی سی-ایکس آر کے ایک اہم مرکز کے طور پر ابھارنے کی سمت میں سرگرم عمل ہے۔ ریاست ایک جامع اے وی جی سی-ایکس آر پالیسی تیار کرنے کے آخری مراحل میں ہے، جس میں بنیادی ڈھانچے، ہنرمندی کی تربیت اور نئے کاروباری اداروں کی مدد پر توجہ دی جائے گی۔ اس کے علاوہ، ریاست میں پہلے ہی ایک مضبوط تعلیمی بنیاد موجود ہے، جہاں 16 اداروں میں حرکت پذیر تصاویر، بصری اثرات (وی ایف ایکس )اور کھیلوں سے متعلق کورس پڑھائے جاتے ہیں۔ اس طرح اس شعبے کے لیے تربیت یافتہ افرادی قوت کی فراہمی کا ایک مستحکم نظام موجود ہے۔