سی سی پی اے نے گمراہ کن اشتہارات اور واکی ٹاکیز کی غیر ضابطہ فروخت کے خلاف کارروائی تیز کی

 صارفین کے تحفظ کی مرکزی اتھارٹی (سی سی پی اے) نے واکی ٹاکیز کے گمراہ کن اشتہارات اور مصنوعات کی فہرست میں ضروری ضابطہ جاتی معلومات، بشمول آپریٹنگ فریکوئنسی اور قابل اطلاق لائسنس کی ضروریات، واضح نہ کرنے پر میسرز ہگار ٹیکنالوجیز اینڈ انوویشنز ایل ایل پی پر ایک لاکھ روپے کا جرمانہ عائد کیا ہے۔ یہ حکم صارف تحفظ قانون، 2019 کے تحت سی سی پی اے کی چیف کمشنر محترمہ ندھی کھرے اور کمشنر جناب انوپم مشرا کی سربراہی میں جاری کیا گیا۔

یہ کارروائی آن لائن پلیٹ فارمز اور ویب سائٹس پر واکی ٹاکیز (پرسنل موبائل ریڈیوز) کی فہرست، اشتہارات اور فروخت سے متعلق گمراہ کن اشتہارات اور غیر منصفانہ تجارتی طریقوں کے خلاف سی سی پی اے کی جاری کارروائی کا حصہ ہے۔

سی سی پی اے نے ضابطہ جاتی تقاضوں کی ناکافی وضاحت کا نوٹس لیا

اپنے تازہ حکم میں سی سی پی اے نے میسرز ہگار ٹیکنالوجیز اینڈ انوویشنز ایل ایل پی کی ویب سائٹ پر موجود مختلف واکی ٹاکی ماڈلز کے اشتہارات اور مصنوعات کی فہرستوں کا جائزہ لیا۔ اتھارٹی نے پایا کہ ان فہرستوں میں آلات کی آپریٹنگ فریکوئنسی، قابل اطلاق لائسنس کی ضروریات اور ضابطہ جاتی منظوریوں کے بارے میں واضح معلومات فراہم نہیں کی گئی تھیں۔ اس طرح کی معلومات نہ ہونے سے صارفین کو یہ غلط تاثر مل سکتا ہے کہ متعلقہ ضابطہ جاتی اجازت حاصل کیے بغیر ان آلات کو قانونی طور پر استعمال کیا جا سکتا ہے۔

استعمال کم طاقت اور بہت کم طاقت والے مختصر فاصلے کے ریڈیو فریکوئنسی آلات (لائسنس کی شرط سے استثنیٰ) ضوابط، 2018 کے تحت مقررہ 446.0 سے 446.2 میگا ہرٹز فریکوئنسی رینج میں کام کرنے والے پرسنل موبائل ریڈیوز کو قابل اطلاق شرائط کے تحت لائسنس حاصل کرنے کی ضرورت سے استثنیٰ حاصل ہے۔ اس مستثنیٰ فریکوئنسی رینج سے باہر کام کرنے والے دیگر وائرلیس ریڈیو فریکوئنسی آلات متعلقہ ضابطہ جاتی تقاضوں کے تابع ہیں۔

کارروائی کے دوران کمپنی نے بتایا کہ اس کے پاس درست ڈیلر پاسسنگ لائسنس (ڈی پی ایل) موجود ہے اور آلات، متعلقہ آلات کی قسم کی منظوری (ای ٹی اے) سرٹیفکیٹس کے تحت آتے ہیں۔ کمپنی نے یہ بھی کہا کہ اس کی ویب سائٹ بنیادی طور پر معلومات فراہم کرنے اور ممکنہ صارفین سے رابطے کے لیے بنائی گئی ہے اور اس کے ذریعے براہ راست آن لائن لین دین کی سہولت فراہم نہیں کی جاتی۔

کمپنی کی وضاحت، تحقیقات کے نتائج اور ریکارڈ پر موجود مواد کا جائزہ لینے کے بعد سی سی پی اے نے مشاہدہ کیا کہ ضابطہ جاتی منظوریوں کا موجود ہونا مشتہر کو خریداری سے قبل صارفین کو درست، مکمل اور اہم معلومات فراہم کرنے کی ذمہ داری سے بری نہیں کرتا۔

ویب سائٹ کے ذریعے مصنوعات کی تشہیر بھی صارف تحفظ کے تقاضوں کے تابع

سی سی پی اے نے مزید کہا کہ آن لائن ادائیگی کے گیٹ وے یا شاپنگ کارٹ کی سہولت موجود نہ ہونے سے ویب سائٹ کے ذریعے کی جانے والی تشہیری نمائندگی صارف تحفظ قانون، 2019 کے تحت گمراہ کن اشتہارات کے دائرے سے باہر نہیں ہوجاتی۔ اشتہارات اور مصنوعات کی فہرستوں میں قابل اطلاق ضابطہ جاتی تقاضوں سے متعلق مناسب معلومات فراہم کرنا ضروری ہے، چاہے مصنوعات بالآخر کسی بھی طریقے سے فروخت کی جائیں۔

اتھارٹی نے کہا کہ آپریٹنگ فریکوئنسی اور لائسنس کی ضروریات سے متعلق اہم معلومات کو چھپانے سے صارفین کو ان شرائط کے بارے میں گمراہ کیے جانے کا امکان تھا جن کے تحت مشتہر آلات کو قانونی طور پر چلایا جا سکتا ہے۔ اس طرح کی معلومات کی عدم فراہمی صارفین کو ممکنہ قانونی اور مالی نتائج سے دوچار کر سکتی ہے اور باخبر خریداری کا فیصلہ کرنے کی ان کی صلاحیت کو متاثر کر سکتی ہے۔

اس کے مطابق سی سی پی اے نے میسرز ہگار ٹیکنالوجیز اینڈ انوویشنز ایل ایل پی کے طرز عمل کو صارف تحفظ قانون، 2019 کی گمراہ کن اشتہارات اور غیر منصفانہ تجارتی طریقوں سے متعلق متعلقہ دفعات کی خلاف ورزی قرار دیا۔

واکی ٹاکیز کی آن لائن فہرستوں کے خلاف سی سی پی اے کی کارروائی

سی سی پی اے نے اس سے قبل ای کامرس پلیٹ فارمز پر لازمی ضابطہ جاتی معلومات کے بغیر بڑے پیمانے پر واکی ٹاکیز کی فہرست اور فروخت کا از خود نوٹس لیا تھا۔ جانچ کے دوران مختلف پلیٹ فارمز پر ضوابط کی خلاف ورزی کرنے والی 16,970 سے زائد اندراج کی نشاندہی کی گئی اور ایمیزون، فلپ کارٹ، میشو، میٹا (فیس بک مارکیٹ پلیس)، جیو مارٹ، انڈیا مارٹ اور ٹریڈ انڈیا سمیت 13 ای کامرس اداروں کو نوٹس جاری کیے گئے۔

اتھارٹی اب تک 12 اداروں کے خلاف حتمی احکامات جاری کر چکی ہے، جن میں واکی ٹاکیز سے متعلق گمراہ کن اشتہارات اور غیر منصفانہ تجارتی طریقوں پر مجموعی طور پر 58 لاکھ روپے کے جرمانے عائد کیے گئے ہیں۔ ان میں ایمیزون سیلر سروسز پرائیویٹ لمیٹڈ، فلپ کارٹ انٹرنیٹ پرائیویٹ لمیٹڈ، میشو پرائیویٹ لمیٹڈ، میٹا پلیٹ فارمز اور ٹریڈ انڈیا (انفو کوم نیٹ ورک پرائیویٹ لمیٹڈ) پر 10،10 لاکھ روپے، جبکہ جیو مارٹ (ریلائنس ریٹیل لمیٹڈ)، چمیا، ماسک مین ٹوائز، ٹاک پرو (آئیکونیٹ سروسز پرائیویٹ لمیٹڈ)، سنچار وائرلیس کمیونیکیشنز لمیٹڈ، انترکش ٹیکنوسس پرائیویٹ لمیٹڈ اور ہگار ٹیکنالوجیز اینڈ انوویشنز ایل ایل پی پر ایک، ایک لاکھ روپے کا جرمانہ شامل ہے۔

کچھ اداروں نے سی سی پی اے کے احکامات اور کارروائیوں کو عدالتی فورمز پر چیلنج کیا ہے۔ ایمیزون سیلر سروسز پرائیویٹ لمیٹڈ اور فلپ کارٹ انٹرنیٹ پرائیویٹ لمیٹڈ نے اتھارٹی کے احکامات کے خلاف کرناٹک ہائی کورٹ سے رجوع کیا ہے۔ میٹا پلیٹ فارمز اور ٹریڈ انڈیا (انفو کوم نیٹ ورک پرائیویٹ لمیٹڈ) نے 10،10 لاکھ روپے کے جرمانے کے احکامات کے خلاف قومی صارف تنازعات ازالہ کمیشن (این سی ڈی آر سی) سے رجوع کیا ہے۔ ٹریڈ انڈیا کے معاملے میں این سی ڈی آر سی نے کمپنی کو جرمانے کی رقم جمع کرانے کی ہدایت دی ہے۔ انڈیا مارٹ انٹر میش لمیٹڈ نے بھی سی سی پی اے کی شروع کردہ کارروائی کو دہلی ہائی کورٹ میں چیلنج کیا ہے، جبکہ معاملہ اب بھی اتھارٹی کے زیر غور ہے۔

سی سی پی اے نے شفاف ضابطہ جاتی معلومات کی اہمیت پر زور دیا

سی سی پی اے نے ایک بار پھر واضح کیا کہ واکی ٹاکیز کے اشتہارات اور مصنوعات کی فہرستوں میں آپریٹنگ فریکوئنسی، قابل اطلاق لائسنس کی ضروریات اور دیگر اہم ضابطہ جاتی معلومات واضح طور پر فراہم کی جانی چاہئیں، تاکہ صارفین باخبر فیصلے کر سکیں۔ ایسی مصنوعات کے معاملے میں یہ معلومات خاص طور پر اہم ہیں جن کا قانونی استعمال مخصوص ضابطہ جاتی شرائط سے مشروط ہے۔

اتھارٹی نے صارفین کے مفادات کے تحفظ، گمراہ کن اشتہارات کی روک تھام اور غیر منصفانہ تجارتی طریقوں کے خلاف کارروائی کے اپنے عزم کا اعادہ کیا، خاص طور پر ان مصنوعات کے حوالے سے جن میں ضابطہ جاتی پابندیوں اور عوامی تحفظ سے متعلق امور شامل ہوں۔

حتمی حکم سی سی پی اے کی ویب سائٹ  https://ccpa.doca.gov.in/ پر دستیاب ہے۔

***

ش ح ۔   م  د ۔  م  ص

U :  6663