قومی شہری کانکلیو 2026 آج بھونیشور میں اختتام پذیر ہوا۔ اس میں ترقی یافتہ ہندوستان 2047 کے ہدف کے حصول کے لیے شہری نظم و نسق، منصوبہ بندی اور خدمات کی فراہمی کو مضبوط بنانے سے متعلق قابلِ عمل سفارشات پیش کی گئیں۔

اختتامی کلمات پیش کرتے ہوئے مرکزی وزیر برائے ہاؤسنگ و شہری امور جناب منوہر لال نے ہندوستان میں شہری ترقی کے تاریخی سفر اور شہری بنیادی ڈھانچے و خدمات کو مضبوط بنانے کے لیے حکومتِ ہند کی مسلسل کوششوں کا جائزہ لیا۔ انہوں نے کہا کہ ’’اس کانکلیو کا مقصد ہمارے شہروں کو درپیش مستقبل کے چیلنجوں پر غور و خوض کرنا ہے۔‘‘ انہوں نے امرت، سوچھ بھارت مشن—شہری اور پی ایم سواندھی سمیت قومی مشنوں کے ذریعے حاصل ہونے والی پیش رفت کو اجاگر کیا، جن کے تحت پانی اور صفائی ستھرائی کی خدمات کو وسعت دی گئی، کچرے کے انتظام کو بہتر بنایا گیا، شہری نقل و حرکت کے نظام کو مضبوط کیا گیا اور مالی شمولیت کو فروغ دیا گیا۔

انہوں نے روزگار کے مراکز اور عوامی نقل و حمل کی سہولیات کے قریب سستے مکانات کی اہمیت، تعمیراتی سرگرمیوں میں وسائل کے دوبارہ استعمال اور چکر وار معیشت کے اصولوں کو اپنانے، نیز پرانے کچرے کو سائنسی طریقوں سے ٹھکانے لگانے پر زور دیا۔ اس بات کا ذکر کرتے ہوئے کہ ملک کے نصف سے زیادہ پرانے کچرے کو سائنسی طریقے سے ٹھکانے لگایا جا چکا ہے، انہوں نے ان کوششوں کو جاری رکھنے اور نئے کچرے کے جمع ہونے کو روکنے کی ضرورت پر زور دیا، تاکہ ہندوستان کی شہری تبدیلی شمولیتی، پائیدار اور مستقبل کی ضروریات سے ہم آہنگ رہے۔

قومی شہری کانکلیو 2026 کے اختتامی اجلاس میں استقبالیہ خطاب کرتے ہوئے وزارتِ ہاؤسنگ و شہری امور کے محکمۂ شہری ترقی کے سکریٹری جناب ستندر سنگھ نے سات تکنیکی اجلاسوں کے اہم نتائج کا جائزہ لیا اور پالیسی سے متعلق غور و خوض کو عملی جامہ پہنانے کے قابل شہری حل میں تبدیل کرنے کی ضرورت پر زور دیا۔ انہوں نے کہا کہ ’’کامیابی کا پیمانہ محض منصوبوں کی تکمیل نہیں، بلکہ خدمات کا معیار ہونا چاہیے۔‘‘ یہ بات خدمات کی فراہمی کو بہتر بنانے کے لیے ادارہ جاتی صلاحیت، مختلف اداروں کے درمیان تال میل، بلدیاتی مالیات اور جواب دہی کو مضبوط بنانے کی اہمیت کو ظاہر کرتی ہے۔

تعاون پر مبنی وفاقیت کے جذبے کو اجاگر کرتے ہوئے انہوں نے اس عزم کا اعادہ کیا کہ وزارت، کانکلیو کی سفارشات کو آگے بڑھانے اور ترقی یافتہ ہندوستان 2047 کے تصور کو حقیقت میں بدلنے کے لیے ریاستوں، شہروں اور شراکت دار اداروں کے ساتھ مل کر کام کرتی رہے گی۔

خصوصی خطاب کرتے ہوئے نیتی آیوگ کے رکن جناب راجیو گوبا نے ہندوستان میں تیز رفتار شہری تبدیلی کے انتظام کے لیے شہری نظم و نسق، منصوبہ بندی اور بلدیاتی مالیات کے شعبوں میں جامع اصلاحات کی ضرورت پر زور دیا۔ انہوں نے کہا کہ ’’ہم ریاستی دارالحکومتوں سے شہروں کا انتظام نہیں چلا سکتے۔ ہمیں اپنے چھوٹے شہروں کو بااختیار بنانے کی ضرورت ہے۔‘‘ انہوں نے شہری بلدیاتی اداروں کو مزید اختیارات اور مالی وسائل منتقل کرنے، شہری قیادت کو بااختیار بنانے اور بلدیاتی جواب دہی کو مضبوط کرنے کا مطالبہ کیا۔

انہوں نے اپنی آمدنی کے ذرائع کو مضبوط بنانے، زمین کے استعمال کی روایتی منصوبہ بندی میں اصلاحات اور رہائش کو سستا بنانے اور اقتصادی پیداواریت بہتر کرنے کے لیے زیادہ کثافت والی آبادی، مخلوط استعمال پر مبنی ترقی اور نقل و حمل کے مراکز پر مبنی ترقی کو فروغ دینے کی اہمیت پر زور دیا۔ شہری چیلنج فنڈ اور شہری اقتصادی خطوں جیسے اقدامات کو اجاگر کرتے ہوئے انہوں نے ریاستوں پر زور دیا کہ وہ بنیادی نوعیت کی اصلاحات کریں۔ انہوں نے قومی شہری مشنوں کے تحت مالی امداد کو ان اصلاحات کے نفاذ سے منسلک کرنے کی بھی اپیل کی، تاکہ شہر ترقی یافتہ ہندوستان 2047 کے ہدف کے حصول کی جانب ترقی کے محرکات کے طور پر اپنی صلاحیتوں کو بروئے کار لا سکیں۔

قومی شہری کانکلیو 2026 کے دوسرے اور اختتامی دن کی توجہ پالیسی سے متعلق غور و خوض کو شہری نظم و نسق، منصوبہ بندی، بنیادی ڈھانچے اور خدمات کی فراہمی کو مضبوط بنانے کے لیے قابلِ عمل سفارشات میں تبدیل کرنے پر مرکوز رہی۔ سات تکنیکی اجلاسوں میں ہونے والی بات چیت کو آگے بڑھاتے ہوئے اس کانکلیو میں مرکزی اور ریاستی حکومتوں، شہری بلدیاتی اداروں، صنعت، علمی حلقوں اور تحقیقی اداروں کے نمائندوں نے شرکت کی۔ اس کا مقصد ہندوستان کو درپیش بدلتے ہوئے شہری چیلنجوں کے عملی حل تلاش کرنا اور ترقی یافتہ ہندوستان 2047 کے تصور کو آگے بڑھانا تھا۔

تکنیکی غور و خوض کے اہم نکات

’’پیدل چلنے کا حق‘‘  کے موضوع پر منعقدہ اجلاس میں پیدل چلنے والوں کے لیے جگہوں کے درمیان عدم ربط، رسائی کی ناقص سہولیات، منصوبہ بندی میں مناسب ہم آہنگی کی کمی، اداروں کی ذمہ داریوں کا غیر واضح ہونا اور مالی وسائل کی قلت جیسے مسائل پر غور کیا گیا۔ اجلاس میں سفارش کی گئی کہ ’’پیدل چلنے کے حق‘‘ کو قانونی منصوبوں کا لازمی حصہ بنایا جائے، پیدل چلنے والوں کے لیے راستے کا حق محفوظ کیا جائے، شہری بلدیاتی اداروں کی صلاحیت اور جواب دہی کو مضبوط کیا جائے، بنیادی ڈھانچے کے معیار اور دیکھ بھال کو ترجیح دی جائے، شمولیتی اور مقامی برادری کی قیادت میں ڈیزائن کے طریقے اپنائے جائیں، سڑکوں کے تمام منصوبوں میں پیدل چلنے والوں کی سہولیات کو شامل کیا جائے اور اس مقصد کے لیے مالی وسائل کی فراہمی کے مخصوص نظام قائم کیے جائیں۔

’’پانی، فضلے اور وسائل کے مؤثر استعمال‘‘ کے موضوع پر منعقدہ اجلاس میں پانی، گندے پانی اور ٹھوس کچرے کی منصوبہ بندی کو یکجا کرنے، نتائج پر مبنی خدمات کی فراہمی کی جانب پیش رفت، کارکردگی کی نگرانی اور بنیادی ڈھانچے کی پوری مدتِ استعمال کے دوران دیکھ بھال کو مضبوط بنانے، پانی کے دوبارہ استعمال اور وسائل کی بازیافت پر مبنی چکر وار معیشت کو فروغ دینے، بازیافت شدہ وسائل کے لیے منڈیاں تیار کرنے، ادارہ جاتی جواب دہی بہتر بنانے اور سرکاری و نجی شراکت داری (پی پی پی)، بلدیاتی بانڈز اور ماحولیاتی مالیات کے ذریعے پائیدار مالی وسائل کی فراہمی یقینی بنانے کی سفارش کی گئی۔

’’سستی رہائش—طلب اور رسد کی حرکیات‘‘  کے موضوع پر اجلاس میں سستے مکانات کے لیے زمین مختص کرنے، رہائش کو نقل و حمل اور روزگار کے مراکز سے مربوط کرنے، کرایے کی رہائش اور آمد و رفت کی ضروریات کے مطابق رہائشی ماڈل تیار کرنے، منظوریوں کے لیے یک دریچہ نظام متعارف کرانے، باہمی اعانت کے ذریعے اخراجات پورے کرنے کے لیے فلور ایریا ریشو (ایف اے آر) اور قابلِ منتقلی ترقیاتی حقوق (ٹی ڈی آر) سے متعلق مراعات سے فائدہ اٹھانے، ہاؤسنگ بورڈز اور سرکاری و نجی شراکت داری کے ذریعے حکومت کی شرکت مضبوط بنانے اور معیاری تعمیرات و دیکھ بھال کے ذریعے طویل مدتی سستی رہائش یقینی بنانے کی سفارش کی گئی۔

’’مربوط شہری ترقی اور بنیادی ڈھانچے کی فراہمی‘‘  کے موضوع پر اجلاس میں مشترکہ جغرافیائی اطلاعاتی نظام (جی آئی ایس) پر مبنی ڈیٹا بیس کے ذریعے مکانی منصوبہ بندی اور بنیادی ڈھانچے کی منصوبہ بندی کو مربوط کرنے، راہداریوں پر مبنی اور نقل و حمل کے مراکز سے مربوط ترقی کو فروغ دینے، مختلف شعبوں اور اداروں کی سرمایہ کاری میں ہم آہنگی پیدا کرنے، شہریوں کی رائے کی بنیاد پر ہدفی اقدامات نافذ کرنے، زمین پر مبنی مالیاتی طریقوں سے فائدہ اٹھانے، بلدیاتی اداروں کی قرض حاصل کرنے کی صلاحیت کو مضبوط بنانے اور اداروں کے درمیان تال میل بہتر کرنے کی سفارش کی گئی۔

’’شہری خدمات کی فراہمی کے نئے تصورات‘‘ کے موضوع پر اجلاس میں اثاثے بنانے کے بجائے نتائج پر مبنی خدمات کی فراہمی کی جانب پیش رفت، واضح طور پر متعین ذمہ داریوں کی بنیاد پر بلدیاتی اداروں کے درمیان ہم آہنگی، ڈیجیٹل نگرانی اور شہریوں کی آرا کے نظام کو مضبوط بنانے، کارکردگی پر مبنی معاہدوں کو ادارہ جاتی شکل دینے، بلدیاتی اداروں کے لیے خصوصی کیڈر تیار کرنے، اپنی آمدنی کے ذرائع سے وسائل جمع کرنے کے عمل کو بہتر بنانے اور جواب دہی پر مبنی، شہریوں کی ضروریات کو مرکزیت دینے والی شہری خدمات کے لیے قومی نظام قائم کرنے کی سفارش کی گئی۔

’’عمارتوں کی تعمیر کے نمونہ جاتی ضوابط‘‘ کے موضوع پر اجلاس میں مربوط ڈیجیٹل پلیٹ فارموں کے ذریعے تعمیراتی ضوابط اور منظوریوں کو آسان بنانے، خطرے کی بنیاد پر جانچ اور خود تصدیقی نظام متعارف کرانے، فلور ایریا ریشو (ایف اے آر)، آبادی کی کثافت اور پارکنگ کے ضوابط کو معقول بنانے، مخلوط استعمال اور نقل و حمل کے مراکز سے مربوط ترقی کو ممکن بنانے، موسمیاتی تبدیلیوں کے اثرات برداشت کرنے کی صلاحیت اور آفات سے تحفظ کے معیارات شامل کرنے، ماحول دوست تعمیرات کی حوصلہ افزائی کرنے اور ضابطہ جاتی شفافیت و کاروبار کرنے میں آسانی کو بہتر بنانے کی سفارش کی گئی۔

’’نمونہ جاتی بلدیاتی قانون‘‘ کے موضوع پر منعقدہ اجلاس میں میئروں کو پانچ سالہ مدت اور واضح انتظامی اختیارات کے ساتھ بااختیار بنانے، بلدیاتی امور کی منتقلی کو مضبوط کرنے، نیم خود مختار سرکاری اداروں کے ساتھ تال میل بہتر بنانے، مالی خود مختاری اور اپنی آمدنی کے ذرائع میں اضافہ کرنے، تکنیکی عملے کی مناسب تعداد یقینی بنانے، وارڈ اور زونل کمیٹیوں کو بااختیار بنانے اور ریاستی سطح پر مشاورت اور نفاذ کے طریقۂ کار کے ذریعے نمونہ جاتی بلدیاتی قانون 2003 پر نظرثانی کرنے کی سفارش کی گئی۔

آغاز اور اجرا

کانکلیو کے دوسرے دن کئی اقدامات اور مطبوعات کا آغاز اور اجرا کیا گیا۔

امرت 2.0 کے تحت استعمال شدہ پانی کی منڈی

یہ ایک ڈیجیٹل پلیٹ فارم ہے جو شہری بلدیاتی اداروں کو صاف کیے گئے استعمال شدہ پانی کے شعبے میں ممکنہ صارفین اور سرمایہ کاروں سے جوڑتا ہے۔ بلدیاتی ادارے فروخت کے لیے دستیاب صاف شدہ پانی کی مقدار اور معیار کی تفصیلات درج کر سکتے ہیں، جس سے صنعتوں، اداروں اور نجی تنظیموں کو پانی کی خریداری کے مواقع تلاش کرنے اور ان سے فائدہ اٹھانے میں مدد ملتی ہے۔

شہری چیلنج فنڈ (یو سی ایف) پورٹل

یہ پورٹل ایک اہم ڈیجیٹل اقدام ہے، جو شہری چیلنج فنڈ کے شفاف، مؤثر اور منظم نفاذ کو ممکن بناتا ہے۔ یہ ریاستوں، مرکز کے زیرِ انتظام علاقوں، شہری بلدیاتی اداروں اور نفاذ کرنے والی ایجنسیوں کے لیے ایک مشترکہ ڈیجیٹل پلیٹ فارم فراہم کرتا ہے، جس کے ذریعے منصوبے پیش کرنے، ان کی پیش رفت کا جائزہ لینے، جانچ پڑتال اور نگرانی کرنے کے ساتھ فیصلہ سازی میں بھی مدد ملتی ہے۔

بلدیاتی مالیات سے متعلق آن لائن انٹرایکٹو ڈیٹا ہب

یہ کثیرالمقاصد پورٹل بلدیاتی مالیات کے شعبے سے وابستہ ماہرین اور کارکنوں کو آن لائن تبادلۂ خیال کے فورمز کے ذریعے دوطرفہ رابطے کی سہولت فراہم کرے گا۔ اس کے علاوہ، یہ بلدیاتی اصلاحات، مثلاً بلدیاتی آمدنی میں اضافے اور شہری بلدیاتی اداروں کی آمدنی و اخراجات سے متعلق بروقت کے ڈیجیٹل اعداد و شمار کی دستیابی کو بھی ممکن بنائے گا۔

پی ایم سواندھی کے تحت اسٹریٹ فوڈ ہب

پی ایم سواندھی کے تحت منتخب کردہ 18 اسٹریٹ فوڈ ہب کی ترقی باضابطہ طور پر شروع کرنے کے لیے یہ اقدام کیا گیا۔ فنڈز کی پہلی قسط جاری کیے جانے سے منصوبوں پر عمل درآمد کا باضابطہ آغاز ہوا۔

سووچھتا کے سپر ہیروز

بچوں کے لیے تیار کردہ یہ کتاب کم عمر قارئین میں صفائی ستھرائی، کچرے کی علیحدہ علیحدہ درجہ بندی اور کچرے کے ذمہ دارانہ انتظام کی اقدار پیدا کرنے کے مقصد سے مرتب کی گئی ہے۔

سی پی ڈبلیو ڈی نرمان

یہ ویب اور موبائل ایپلی کیشن مرکزی محکمۂ تعمیراتِ عامہ (سی پی ڈبلیو ڈی) کے منصوبوں کی ابتدا سے تکمیل تک ڈیجیٹل نگرانی کے لیے تیار کی گئی ہے۔ یہ پلیٹ فارم بروقت میں پیش رفت کا جائزہ لینے، اہم مراحل کی نگرانی اور مختلف اداروں کے درمیان تال میل کو آسان بنائے گا، جس سے شفافیت، جواب دہی اور اعداد و شمار پر مبنی فیصلہ سازی کو فروغ ملے گا۔

سی پی ڈبلیو ڈی وے

یہ ڈیجیٹل پلیٹ فارم صلاحیت سازی کے لیے تیار کیا گیا ہے، جس پر سی پی ڈبلیو ڈی کے معیارات، تعمیراتی طریقوں، منصوبوں کے مطالعاتی جائزوں، عمارتوں کی خدمات اور تعمیراتی جدتوں سے متعلق مختصر تربیتی ویڈیوز دستیاب ہوں گی۔ اس میں شامل جانچ کے نظام سے سرکاری انجینئروں اور انجینئرنگ کے دیگر پیشہ ور افراد کو مسلسل سیکھنے اور عملی مہارتیں فروغ دینے میں مدد ملے گی۔

قومی انٹرن شپ پورٹل کے ذریعے انٹرن شپ اسکیم

اس اقدام کے تحت انجینئرنگ اور تعمیراتِ فن کے انڈرگریجویٹ طلبہ کو آل انڈیا کونسل فار ٹیکنیکل ایجوکیشن (اے آئی سی ٹی ای) کے قومی انٹرن شپ پورٹل کے ذریعے سی پی ڈبلیو ڈی میں انٹرن شپ کے مواقع فراہم کیے جائیں گے۔ اس اسکیم کے تحت طلبہ کو سرکاری بنیادی ڈھانچے کے منصوبوں، تعمیراتی ٹیکنالوجی، منصوبوں کے انتظام اور معیار کی یقین دہانی کے شعبوں میں عملی تجربہ حاصل ہوگا، جس سے صنعت اور تعلیمی اداروں کے درمیان اشتراک مضبوط ہوگا۔

جائیکا اور سی پی ایچ ای ای او کے درمیان تکنیکی تعاون

جاپان انٹرنیشنل کوآپریشن ایجنسی (جائیکا) اور سینٹرل پبلک ہیلتھ اینڈ انوائرنمنٹل انجینئرنگ آرگنائزیشن (سی پی ایچ ای ای او) کے درمیان ایک مفاہمت نامے پر دستخط کیے گئے، جس کا مقصد صاف کیے گئے استعمال شدہ پانی کے چکر وار استعمال کو فروغ دینے کے لیے تکنیکی تعاون کو مضبوط بنانا ہے۔

کانکلیو کا اختتام

دو روزہ قومی شہری کانکلیو 2026 سے سامنے آنے والی سفارشات شہری اصلاحات کے اگلے مرحلے کی رہنمائی کریں گی، جن میں ادارہ جاتی صلاحیت کو مضبوط بنانے، مربوط منصوبہ بندی، پائیدار مالی وسائل کی فراہمی اور جواب دہی پر مبنی خدمات کی فراہمی پر زور دیا جائے گا۔

***

ش ح۔ ش ا ر۔ ول

Uno-6660