ਭਾਰਤੀ ਖੇਤੀਬਾੜੀ ਖੋਜ ਪ੍ਰੀਸ਼ਦ- ਆਈਸੀਏਆਰ ਨੇ ਅੱਜ ਹਰਿਆਣਾ ਦੇ ਕਰਨਾਲ ਵਿਖੇ ਆਈਸੀਏਆਰ- ਸੈਂਟਰਲ ਸੋਇਲ ਸੈਲਿਨਿਟੀ ਰਿਸਰਚ ਇੰਸਟੀਟਿਊਟ (CSSRI) ਵਿਖੇ ਉਭਰਦੇ ਵਿਗਿਆਨ, ਤਕਨਾਲੋਜੀ ਅਤੇ ਨਵੀਨਤਾ ਕਾਨਫਰੰਸ- ESTIC 2026 ਦੀ ਪੂਰਵ-ਝਲਕ ਸਬੰਧੀ ਪ੍ਰੈੱਸ  ਕਾਨਫਰੰਸ ਦੌਰਾਨ ਇੰਡੀਅਨ ਕੌਂਸਲ ਆਫ਼ ਐਗਰੀਕਲਚਰਲ ਰਿਸਰਚ (ICAR) ਦੀਆਂ ਖੋਜ ਤਰਜੀਹਾਂ, ਤਕਨੀਕੀ ਨਵੀਨਤਾਵਾਂ ਅਤੇ ਟਿਕਾਊ ਖੇਤੀਬਾੜੀ ਵਿੱਚ ਯੋਗਦਾਨ ਦਾ ਜ਼ਿਕਰ ਕੀਤਾ। ਖੇਤੀਬਾੜੀ ਖੋਜ ਅਤੇ ਸਿੱਖਿਆ ਵਿਭਾਗ (DARE) ਦੇ ਸਕੱਤਰ ਅਤੇ ICAR ਦੇ ਡਾਇਰੈਕਟਰ ਜਨਰਲ, ਡਾ. ਐੱਮ ਐੱਲ ਜਾਟ ਨੇ 27 ਤੋਂ 29 ਅਕਤੂਬਰ, 2026 ਤੱਕ ਨਵੀਂ ਦਿੱਲੀ ਦੇ ਭਾਰਤ ਮੰਡਪਮ ਵਿਖੇ ਆਯੋਜਿਤ ਹੋਣ ਵਾਲੀ ਨੈਸ਼ਨਲ ਕਾਨਫਰੰਸ ਵਿੱਚ ਖੇਤੀਬਾੜੀ ਤਕਨਾਲੋਜੀ, ਖੁਰਾਕ ਪ੍ਰਣਾਲੀਆਂ ਅਤੇ ਪੋਸ਼ਣ ਦੇ ਖੇਤਰਾਂ ਵਿੱਚ ਕੌਂਸਲ ਦੀ ਭੂਮਿਕਾ ਬਾਰੇ ਦੱਸਿਆ।

ESTIC 2026 ਵਿੱਚ ਵਿਗਿਆਨ ਨਾਲ ਸਬੰਧਿਤ ਮੰਤਰਾਲਿਆਂ ਅਤੇ ਵਿਭਾਗਾਂ, ਖੋਜ ਸੰਸਥਾਵਾਂ, ਸਟਾਰਟਅੱਪਸ ਅਤੇ ਹੋਰ ਹਿਤਧਾਰਕ ਸ਼ਿਰਕਤ ਕਰਨਗੇ ਅਤੇ 12 ਵਿਸ਼ਾ-ਅਧਾਰਿਤ ਖੇਤਰਾਂ ਵਿੱਚ ਹੋਈ ਪ੍ਰਗਤੀ ਨੂੰ ਪ੍ਰਦਰਸ਼ਿਤ ਕੀਤਾ ਜਾਵੇਗਾ। ਇਸ ਵਿਸ਼ਾ-ਅਧਾਰਿਤ ਪ੍ਰਦਰਸ਼ਨੀ ਵਿੱਚ 13 ਵਿਭਾਗੀ ਸਟਾਲਾਂ, 50 ਡੀਪ-ਟੈੱਕ ਸਟਾਰਟਅੱਪਸ ਅਤੇ 10 ਵਿਭਾਗੀ ਤਕਨਾਲੋਜੀਆਂ ਸਾਮਲ ਹੋਣਗੀਆਂ। ਇਹ ਕਾਨਫਰੰਸ ਖੋਜ ਨਤੀਜਿਆਂ ਨੂੰ ਪੇਸ਼ ਕਰਨ, ਵਿਗਿਆਨਕ ਸਹਿਯੋਗ ਨੂੰ ਉਤਸ਼ਾਹਿਤ ਕਰਨ ਅਤੇ ਖੋਜ ਦੇ ਨਤੀਜਿਆਂ ਨੂੰ ਵਿਵਹਾਰਕ ਉਪਯੋਗਾਂ ਨਾਲ ਜੋੜਨ ਦਾ ਮੰਚ ਪ੍ਰਦਾਨ ਕਰੇਗੀ।

ਡਾ: ਜਾਟ ਨੇ ਆਈਸੀਏਆਰ ਦੀਆਂ ਖੋਜ ਤਰਜੀਹਾਂ 'ਤੇ ਚਰਚਾ ਕਰਦੇ ਹੋਏ, ਸੰਪੂਰਨ ਸਰਕਾਰੀ ਦ੍ਰਿਸ਼ਟੀਕੋਣ ਅਤੇ ਵੱਖ-ਵੱਖ ਮੰਤਰਾਲਿਆਂ ਵਿਚਕਾਰ ਤਾਲਮੇਲ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ ਜੀਨੋਮ ਐਡੀਟਿੰਗ, ਜੈਵ-ਸੁਰੱਖਿਅਤ ਫਸਲਾਂ ਦੀਆਂ ਕਿਸਮਾਂ, ਜਲਵਾਯੂ ਅਨੁਕੂਲ ਖੇਤੀਬਾੜੀ, ਏਕੀਕ੍ਰਿਤ ਕੀਟ ਪ੍ਰਬੰਧਨ, ਬਾਗਬਾਨੀ ਵਿਭਿੰਨਤਾ, ਪਸ਼ੂਆਂ ਦੀ ਸਿਹਤ, ਮੱਛੀ ਪਾਲਣ, ਕੁਦਰਤੀ ਸਰੋਤ ਪ੍ਰਬੰਧਨ ਅਤੇ ਖੇਤੀ ਮਸ਼ੀਨੀਕਰਣ ਸਮੇਤ ਮੁੱਖ ਖੇਤਰਾਂ ਦਾ ਜ਼ਿਕਰ ਕੀਤਾ। ਉਨ੍ਹਾਂ ਕਿਹਾ ਕਿ ਵਿਗਿਆਨਕ ਕਾਢਾਂ ਨੂੰ ਖੋਜ ਪ੍ਰਯੋਗਸ਼ਾਲਾਵਾਂ ਤੋਂ ਅੱਗੇ ਵਧ ਕੇ ਪ੍ਰਭਾਵਸ਼ਾਲੀ ਬੀਜ ਪ੍ਰਣਾਲੀਆਂ, ਤਕਨਾਲੋਜੀ ਦੇ ਪ੍ਰਸਾਰ ਅਤੇ ਜ਼ਮੀਨੀ ਪੱਧਰ 'ਤੇ ਅਪਣਾ ਕੇ ਕਿਸਾਨਾਂ ਤੱਕ ਪਹੁੰਚਣਾ ਚਾਹੀਦਾ ਹੈ।

ਪ੍ਰਦਰਸ਼ਿਤ ਕੀਤੀਆਂ ਗਈਆਂ ਵਿਗਿਆਨਕ ਪ੍ਰਾਪਤੀਆਂ ਵਿੱਚ ਵਿਸ਼ਵ ਦੀਆਂ ਪਹਿਲੀ ਦੋ ਜੀਨੋਮ-ਸੰਪਾਦਿਤ ਚੌਲਾਂ ਦੀਆਂ ਕਿਸਮਾਂ ਅਤੇ ਭਾਰਤ ਦੀ ਪਹਿਲੀ ਟੈਲੋਮੇਅਰ-ਟੂ-ਟੈਲੋਮੇਅਰ (T2T) ਅਰਹਰ ਦੇ ਜੀਨੋਮ ਸ਼ਾਮਲ ਹਨ। ਫਸਲਾਂ ਦੇ ਜੈਨੇਟਿਕਸ ਅਤੇ ਸਟੀਕ ਪ੍ਰਜਨਨ ਵਿੱਚ ਇਹ ਪ੍ਰਗਤੀ ਬਿਹਤਰ ਫਸਲੀ ਗੁਣਾਂ ਅਤੇ ਖੇਤੀਬਾੜੀ ਉਤਪਾਦਕਤਾ ‘ਤੇ ਅੱਗੇ ਖੋਜ ਕਰਨ ਵਿੱਚ ਸਹਾਇਕ ਸਾਬਤ ਹੋ ਸਕਦੀ ਹੈ।

ਪ੍ਰਦਰਸ਼ਨੀ ਵਿੱਚ ਜਾਨਵਰਾਂ ਦੀ ਸਿਹਤ ਅਤੇ ਖੁਰਾਕ ਸੁਰੱਖਿਆ ‘ਤੇ ਵੀ ਪ੍ਰਮੁੱਖਤਾ ਨਾਲ ਧਿਆਨ ਕੇਂਦ੍ਰਿਤ ਹੋਵੇਗਾ। ਇਸ ਵਿੱਚ  ਅਫਰੀਕਨ ਸਵਾਇਨ ਫੀਵਰ ਵੈਕਸੀਨ ਸਮੇਤ ਦੇਸੀ ਵੈਕਸੀਨ ਖੋਜ ਨੂੰ ਦਰਸਾਇਆ ਜਾਵੇਗਾ। ਪੇਸ਼ਕਾਰੀ ਵਿੱਚ MA-104 ਸੈੱਲਾਂ ਦੀ ਵਰਤੋਂ ਕਰਕੇ ਵਿਕਸਿਤ ਕੀਤੇ ਗਏ ਸੈੱਲ-ਅਨੁਕੂਲਿਤ ਭਾਰਤੀ ASF ਵਾਇਰਸ ਦਾ ਵਰਣਨ ਕੀਤਾ ਗਿਆ ਹੈ ਅਤੇ ਟੀਚਾਬੱਧ ਜਾਨਵਰਾਂ ਦੀ ਆਬਾਦੀ ਵਿੱਚ ਇਸਦੇ ਸੁਰੱਖਿਆ ਪ੍ਰਭਾਵਾਂ ਦੀ ਜਾਣਕਾਰੀ ਦਿੱਤੀ ਗਈ ਹੈ। ਪ੍ਰਕਾਸ਼ਨ ਤੋਂ ਪਹਿਲਾਂ ਸਟੀਕ ਤਕਨੀਕੀ ਵੇਰਵੇ ਅਤੇ ਸੁਰੱਖਿਆ ਸਬੰਧੀ ਦਾਅਵਿਆਂ ਦੀ ਪੁਸ਼ਟੀ ICAR ਦੀ ਅਧਿਕਾਰਤ ਪੇਸ਼ਕਾਰੀ ਵਿੱਚ ਦਿੱਤੇ ਜਾਣ ਦੀ ਉਮੀਦ ਹੈ। ICAR ਦੀ ਵਿਆਪਕ ਪਸ਼ੂ ਸਿਹਤ ਖੋਜ ਵਿੱਚ ਲੰਪੀ ਸਕਿੱਨ ਰੋਗ ਲਈ ਵੈਕਸੀਨ ਵਿਕਸਿਤ ਕਰਨ, ਪਸ਼ੂਆਂ ਦੇ ਜੀਨੋਮਿਕਸ ਅਤੇ ਸਵਦੇਸ਼ੀ ਨਸਲਾਂ ਦੀ ਸੰਭਾਲ ਕਰਨਾ ਵੀ ਸ਼ਾਮਲ ਹੈ।

ਪ੍ਰਦਰਸ਼ਨੀ ਵਿੱਚ ਸੌਇਲ ਇੰਟੈਲੀਜੈਂਸ: ਏਆਈ ਅਤੇ ਮਿੱਟੀ ਵਿਗਿਆਨ ਪ੍ਰਦਰਸ਼ਨੀ ਵੀ ਸ਼ਾਮਲ ਹੋਵੇਗੀ, ਜਿਸ ਵਿੱਚ ਡਿਜੀਟਲ ਖੇਤੀਬਾੜੀ ਅਤੇ ਮਿੱਟੀ ਸਰੋਤ ਮੁਲਾਂਕਣ ਵਿੱਚ ਏਆਈ ਅਤੇ ਮਿੱਟੀ ਵਿਗਿਆਨ ਦੇ ਉਪਯੋਗ ਦੀ ਜਾਣਕਾਰੀ ਦਿੱਤੀ ਜਾਵੇਗੀ। ਅਜਿਹੇ ਦ੍ਰਿਸ਼ਟੀਕੋਣ ਡੇਟਾ-ਅਧਾਰਿਤ ਮਿੱਟੀ ਪ੍ਰਬੰਧਨ ਅਤੇ ਖੇਤੀਬਾੜੀ ਉਤਪਾਦਨ ਅਤੇ ਵਿਆਪਕ ਬੁਨਿਆਦੀ ਢਾਂਚੇ ਦੇ ਵਿਕਾਸ ਦੀ ਯੋਜਨਾ ਬਣਾਉਣ ਵਿੱਚ ਮਦਦਗਾਰ ਹੋ ਸਕਦੇ ਹਨ। ਇਸ ਖੇਤਰ ਵਿੱਚ ICAR ਦੀ ਖੋਜ ਮਿੱਟੀ ਦੀਆਂ ਵਿਸ਼ੇਸ਼ਤਾਵਾਂ ਨੂੰ ਸਮਝਣ, ਸਰੋਤਾਂ ਦੀ ਵਰਤੋਂ-ਕੁਸ਼ਲਤਾ ਵਿੱਚ ਸੁਧਾਰ ਕਰਨ ਅਤੇ ਸਥਿਤੀ ਸਬੰਧੀ ਖੇਤੀਬਾੜੀ ਪ੍ਰਣਾਲੀਆਂ ਨੂੰ ਵਿਕਸਿਤ ਕਰਨ ਦੀ ਮਹੱਤਤਾ 'ਤੇ ਜ਼ੋਰ ਦਿੰਦੀ ਹੈ।

ਡਾ. ਜਾਟ ਨੇ ਫਸਲ ਵਿਗਿਆਨ ਅਤੇ ਬਾਗਬਾਨੀ ਬਾਰੇ ਚਰਚਾ ਕਰਦੇ ਹੋਏ, ਉੱਨਤ ਫਸਲ ਕਿਸਮਾਂ, ਜਲਵਾਯੂ ਅਨੁਕੂਲ ਸਮਰੱਥਾ, ਪੌਸ਼ਟਿਕ ਗੁਣਵੱਤਾ ਅਤੇ ਉੱਨਤ ਪ੍ਰਜਨਨ ਦੀਆਂ ਆਧੁਨਿਕ ਤਕਨੀਕਾਂ 'ਤੇ ਚਾਨਣਾ ਪਾਇਆ। ਉਨ੍ਹਾਂ ਨੇ ਦੱਸਿਆ ਕਿ ICAR ਨੇ ਪਿਛਲੇ ਇੱਕ ਸਾਲ ਦੌਰਾਨ ਬਾਗਬਾਨੀ ਫਸਲਾਂ ਦੀਆਂ 117 ਕਿਸਮਾਂ ਵਿਕਸਿਤ ਕੀਤੀਆਂ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਬਾਇਓ-ਫੋਰਟੀਫਾਈਡ ਫਸਲਾਂ ਅਤੇ ਵਿਭਿੰਨ ਖੇਤੀ ਪ੍ਰਣਾਲੀਆਂ 'ਤੇ ਕੀਤੀ ਜਾ ਰਹੀ ਖੋਜ ਦਾ ਉਦੇਸ਼ ਬਿਹਤਰ ਪੋਸ਼ਣ ਅਤੇ ਟਿਕਾਊ ਖੇਤੀਬਾੜੀ ਉਤਪਾਦਨ ਨੂੰ ਉਤਸ਼ਾਹਿਤ ਕਰਨਾ ਹੈ।

 

ਡਾ. ਜਾਟ ਨੇ ਦੱਸਿਆ ਕਿ ਕੁਦਰਤੀ ਸਰੋਤ ਪ੍ਰਬੰਧਨ ਦੇ ਖੇਤਰ ਵਿੱਚ, ICAR ਸੌਇਲ ਹੈਲਥ, ਜਲ ਪ੍ਰਬੰਧਨ, ਜਲਵਾਯੂ ਅਨੁਕੂਲਤਾ ਅਤੇ ਟਿਕਾਊ ਖੇਤੀਬਾੜੀ ਅਭਿਆਸਾਂ 'ਤੇ ਕੰਮ ਕਰ ਰਿਹਾ ਹੈ। ਸੰਸਥਾਨ ਦੁਆਰਾ 'ਗ੍ਰੀਨ ਅਮੋਨੀਆ' (green ammonia) 'ਤੇ ਕੀਤੀ ਜਾ ਰਹੀ ਖੋਜ, ਸੂਰਜੀ ਊਰਜਾ ਤੋਂ ਪ੍ਰਾਪਤ ਹਾਈਡ੍ਰੋਜਨ ਦੀ ਵਰਤੋਂ ਕਰਕੇ ਅਮੋਨੀਆ ਨਿਰਮਾਣ ਦੀਆਂ ਸੰਭਾਵਨਾਵਾਂ ਦਾ ਪਤਾ ਲਗਾਉਂਦਾ ਹੈ—ਜੋ ਕਿ ਖਾਦ ਉਤਪਾਦਨ ਲਈ ਸੰਭਾਵੀ ਵਿਕਲਪਿਕ ਉਪਾਅ ਹੋ ਸਕਦਾ ਹੈ। ਚਰਚਾ ਦੌਰਾਨ, ਆਈਸੀਏਆਰ, ਨਵੀਂ ਅਤੇ ਨਵਿਆਉਣਯੋਗ ਊਰਜਾ ਮੰਤਰਾਲੇ ਅਤੇ ਹੋਰ ਹਿਤਧਾਰਕਾਂ ਦੇ ਸਹਿਯੋਗ ਨਾਲ ਛੇ ਰਾਜਾਂ ਵਿੱਚ ਮੌਜੂਦ 10,000 ਏਕੜ ਰਕਬੇ ਵਿੱਚ ਕੀਤੇ ਗਏ ਖੇਤਰੀ ਪ੍ਰਦਰਸ਼ਨਾਂ ਦਾ ਜ਼ਿਕਰ ਕੀਤਾ ਗਿਆ।

ICAR ਦੇ ਖੋਜ ਪੋਰਟਫੋਲੀਓ ਵਿੱਚ ਮੱਛੀ ਪਾਲਣ ਅਤੇ ਜਲ-ਖੇਤੀ (aquaculture), ਪਸ਼ੂਆਂ ਦੀ ਸਿਹਤ, ਏਕੀਕ੍ਰਿਤ ਕੀਟ ਪ੍ਰਬੰਧਨ ਅਤੇ ਖੇਤੀਬਾੜੀ ਮਸ਼ੀਨੀਕਰਣ ਵੀ ਸ਼ਾਮਲ ਹਨ। ਖਾਰੇ ਖੇਤਰਾਂ ਵਿੱਚ ਝੀਂਗਾ ਪਾਲਣ ‘ਤੇ ਕੀਤੇ ਜਾ ਰਹੇ ਕਾਰਜ ਘੱਟ ਵਰਤੋਂ ਵਾਲੀ ਜ਼ਮੀਨ ਅਤੇ ਜਲ ਸਰੋਤਾਂ ਦੀ ਉਤਪਾਦਕ ਵਰਤੋਂ ਨੂੰ ਵਧਾਉਣ ਦਾ ਯਤਨ ਹੈ, ਜਦਕਿ ਕਪਾਹ ਦੀ ਵਾਢੀ ਮਸ਼ੀਨਰੀ ਸਮੇਤ ਖੇਤੀਬਾੜੀ ਇੰਜੀਨੀਅਰਿੰਗ ਪਹਿਲਕਦਮੀ ਦਾ ਉਦੇਸ਼ ਖੇਤੀਬਾੜੀ ਕਾਰਜਾਂ ਦੀ ਕੁਸ਼ਲਤਾ ਵਿੱਚ ਸੁਧਾਰ ਲਿਆਉਣਾ ਅਤੇ ਕਿਰਤ ਸਬੰਧੀ ਰੁਕਾਵਟਾਂ ਨੂੰ ਦੂਰ ਕਰਨਾ ਹੈ।

ਪ੍ਰੈੱਸ ਕਾਨਫਰੰਸ ਵਿੱਚ ICAR ਅਤੇ ਇੰਡੀਅਨ ਕੌਂਸਲ ਆਫ਼ ਮੈਡੀਕਲ ਰਿਸਰਚ (ICMR) ਦੁਆਰਾ ਸਾਂਝੇ ਤੌਰ 'ਤੇ ਵਿਕਸਿਤ ਖੇਤੀਬਾੜੀ ਤਬਦੀਲੀ ਰਾਹੀਂ ਸਿਹਤ ਦੇ ਖੇਤਰ ਵਿੱਚ ਵਿਗਿਆਨਕ ਉੱਤਮਤਾ-'SEHAT'  ਪਹਿਲਕਦਮੀ ਦਾ ਵੀ ਜ਼ਿਕਰ ਕੀਤਾ ਗਿਆ। ਇਹ ਪਹਿਲਕਦਮੀ ਜੈਵ-ਪੁਸ਼ਟੀਕ੍ਰਿਤ (bio-fortified) ਫਸਲਾਂ ਅਤੇ ਏਕੀਕ੍ਰਿਤ ਖੇਤੀਬਾੜੀ ਪ੍ਰਣਾਲੀਆਂ ਰਾਹੀਂ ਵੱਖ-ਵੱਖ ਦ੍ਰਿਸ਼ਟੀਕੋਣਾਂ ਦੁਆਰਾ ਖੇਤੀਬਾੜੀ, ਖੁਰਾਕ ਅਤੇ ਮਨੁੱਖੀ ਸਿਹਤ ਨੂੰ ਆਪਸ ਵਿੱਚ ਜੋੜਦੀ ਹੈ। ICAR-ਨੈਸ਼ਨਲ ਡੇਅਰੀ ਰਿਸਰਚ ਇੰਸਟੀਟਿਊਟ (NDRI) ਨੇ ਦੁੱਧ ਵਿੱਚ ਮਿਲਾਵਟ ਦਾ ਪਤਾ ਲਗਾਉਣ ਲਈ ਇੱਕ ਅਜਿਹੀ ਕਿੱਟ ਵੀ ਵਿਕਸਿਤ ਕੀਤੀ ਹੈ, ਜੋ ਤੇਜ਼ੀ ਨਾਲ ਔਨ-ਸਾਈਟ ਨਤੀਜੇ ਦੇ ਸਕਦੀ ਹੈ।

ਖੇਤੀਬਾੜੀ ਤਕਨਾਲੋਜੀ, ਖੁਰਾਕ ਪ੍ਰਣਾਲੀ ਅਤੇ ਪੋਸ਼ਣ ਵਿਸ਼ਾ-ਅਧਾਰਿਤ ਤਕਨੀਕੀ ਸੈਸ਼ਨ ਵਿੱਚ ਖੇਤੀਬਾੜੀ ਨਵੀਨਤਾ, ਖੁਰਾਕ ਪ੍ਰਣਾਲੀ ਅਤੇ ਪੋਸ਼ਣ ਸੁਰੱਖਿਆ ਬਾਰੇ ਵਿਸ਼ੇਸ਼ ਚਰਚਾ ਹੋਵੇਗੀ। ਪ੍ਰੋਗਰਾਮ ਵਿੱਚ ਮੋਰੱਕੋ ਦੀ ਪ੍ਰਸਿੱਧ ਖੇਤੀਬਾੜੀ ਵਿਗਿਆਨਕ ਅਤੇ ਅੰਤਰਰਾਸ਼ਟਰੀ ਖੇਤੀਬਾੜੀ ਖੋਜ ਬਾਰੇ ਸਲਾਹਕਾਰ ਸਮੂਹ ਦੀ ਕਾਰਜਕਾਰੀ ਮੈਨੇਜਿੰਗ ਡਾਇਰੈਕਟਰ ਡਾ. ਇਸਮਾਹਾਨੇ ਏਲੋਆਫੀ (Dr. Ismahane Elouafi) ਮੁੱਖ ਬੁਲਾਰੇ ਵਜੋਂ ਅਤੇ ਡਾ. ਅਸ਼ਵਨੀ ਪਾਰੇਖ ਅਤੇ ਪ੍ਰੋਫੈਸਰ ਪੀਯੂਸ਼ ਸੋਨੀ ਸੈਸ਼ਨ ਵਿੱਚ ਬੁਲਾਰਿਆਂ ਵਜੋਂ ਸ਼ਾਮਲ ਹਨ। ਪੈਨਲ ਚਰਚਾ ਵਿੱਚ ਡਾ. ਟੀ.ਆਰ. ਸ਼ਰਮਾ, ਸੁਸ਼੍ਰੀ ਨੀਮਾ, ਡਾ. ਰਬੀ ਐੱਨ. ਸਾਹੂ, ਡਾ. ਫਿਰੋਜ਼ ਹੁਸੈਨ, ਡਾ. ਭਾਗੀਰਥ ਚੌਧਰੀ ਅਤੇ ਡਾ. ਕੁਤੁਬੁੱਦੀਨ ਮੌੱਲਾ ਸ਼ਾਮਲ ਹੋਣਗੇ।

ਇਸ ਤੋਂ ਪਹਿਲਾਂ, ਭਾਗੀਦਾਰਾਂ ਦਾ ਸਵਾਗਤ ਕਰਦੇ ਹੋਏ, ICAR-CSSRI ਦੇ ਡਾਇਰੈਕਟਰ ਨੇ ਲੂਣ-ਪ੍ਰਭਾਵਿਤ ਮਿੱਟੀ ਦੀ ਪਛਾਣ ਅਤੇ ਸੁਧਾਰ, ਘੱਟ ਗੁਣਵੱਤਾ ਵਾਲੇ ਪਾਣੀ ਦਾ ਪ੍ਰਬੰਧਨ ਅਤੇ ਲੂਣ-ਸਹਿਣਸ਼ੀਲ ਕਿਸਮਾਂ ਦੇ ਵਿਕਾਸ ‘ਤੇ ਸੰਸਥਾ ਦੇ ਕੰਮਾਂ ਦਾ ਜ਼ਿਕਰ ਕੀਤਾ।

ਇਸ ਪੂਰਵ-ਝਲਕ ਸਮਾਗਮ ਅਤੇ ਮੀਡੀਆ ਗੱਲਬਾਤ ਦਾ ਉਦੇਸ਼ 'ESTIC 2026' ਬਾਰੇ ਜਾਗਰੂਕਤਾ ਵਧਾਉਣਾ, ਖੁਰਾਕ ਅਤੇ ਪੋਸ਼ਣ ਸੁਰੱਖਿਆ, ਕਿਸਾਨਾਂ ਦੀ ਖੁਸ਼ਹਾਲੀ ਵਧਾਉਣ ਅਤੇ ਟਿਕਾਊ ਖੇਤੀਬਾੜੀ ਵਿਕਾਸ ਨੂੰ ਉਤਸ਼ਾਹਿਤ ਕਰਨ ਵਿੱਚ ਖੇਤੀਬਾੜੀ ਵਿਗਿਆਨ ਅਤੇ ਤਕਨਾਲੋਜੀ ਦੀ ਭੂਮਿਕਾ ਨੂੰ ਉਜਾਗਰ ਕਰਨਾ ਸੀ।

**********

ਐੱਸਐੱਸ/ਐੱਮਐੱਸ/ਏਕੇ

(Release ID: 2324132) ਵਿਜ਼ੀਟਰ ਕਾਊਂਟਰ : 3