سماجی انصاف اور تفویضِ اختیارات کی وزارت، قومی پسماندہ طبقات مالیات و ترقیاتی کارپوریشن (این بی سی ایف ڈی سی) کے ذریعے بھارت ٹیولپ (روایتی دست کاروں کی ترقی اور ذریعۂ معاش کا پروگرام) نافذ کر رہی ہے۔ اس پروگرام کا مقصد روایتی دست کاروں کے لیے منڈیوں تک رسائی بڑھا کر، ان کی مصنوعات کو زیادہ نمایاں بنا کر اور ہندوستان و بیرونِ ملک صارفین سے رابطے کے مواقع فراہم کرکے ان کے روزگار اور ذریعۂ معاش کو مستحکم کرنا ہے۔

بھارت ٹیولپ کا آغاز 5 نومبر 2024 کو کیا گیا تھا۔ اس پروگرام کو روایتی دست کاروں کو وسیع تر منڈیوں سے جوڑنے اور ڈیجیٹل سمیت دیگر تشہیری ذرائع کے ذریعے اپنی مصنوعات کی نمائش اور فروخت کے مواقع فراہم کرنے کے لیے متعارف کرایا گیا۔ اس پہل کا مقصد اہل مستفید گروپوں سے تعلق رکھنے والے دست کاروں کو معاشی طور پر بااختیار بنانے کے ساتھ ساتھ ہندوستان کے مالا مال ثقافتی ورثے اور روایتی دست کاری کو محفوظ رکھنا بھی ہے۔

اس پروگرام کے تحت روایتی مصنوعات کو بھارت ٹیولپ کے نام سے برانڈ کیا جاتا ہے، تاکہ انہیں زیادہ نمایاں بنایا جا سکے اور ان کی آن لائن فروخت کو آسان بنایا جا سکے۔ اس پہل کا مقصد دست کاروں کو منڈی تک رسائی میں درپیش مشکلات کو دور کرنا اور ان کی مصنوعات کو مقامی منڈیوں سے آگے وسیع تر صارفین تک پہنچانے میں مدد دینا ہے۔ ایک مشترکہ برانڈ کے تحت مصنوعات کو فروغ دے کر روایتی دست کاری کی شناخت بہتر بنانے اور دست کاروں کے لیے پائیدار ذریعۂ معاش کے مواقع پیدا کرنے کی کوشش کی جا رہی ہے۔

وزارت کے ایک سینئر افسر نے بتایا کہ قومی پسماندہ طبقات مالیات و ترقیاتی کارپوریشن (این بی سی ایف ڈی سی) ڈیجیٹل پلیٹ فارموں اور برقی تجارت کے ذرائع سے دست کاروں کو منڈیوں سے جوڑنے میں مدد فراہم کر رہی ہے، تاکہ وہ زیادہ سے زیادہ صارفین تک اپنی مصنوعات پہنچا سکیں۔ انہوں نے کہا کہ اس پروگرام کے تحت مصنوعات کی تشہیر، ڈیجیٹل مارکیٹنگ، معیار کو یقینی بنانے، ہنر کی ترقی اور سامان کی نقل و حمل و ترسیل سے متعلق معاونت بھی فراہم کی جاتی ہے، جس سے دست کاروں کو منڈی کی بدلتی ہوئی ضروریات کے مطابق اپنی مصنوعات پیش کرنے میں مدد ملتی ہے۔

افسر نے بتایا کہ اس پہل کا مقصد دست کاروں کی نمائشوں، تجارتی میلوں اور خریداروں و فروخت کنندگان کے درمیان ملاقاتوں میں شرکت کو بھی آسان بنانا ہے، تاکہ وہ اپنی مصنوعات کی نمائش کر سکیں، ممکنہ خریداروں سے رابطہ قائم کر سکیں اور کاروبار کے نئے مواقع تلاش کر سکیں۔ ایسے پلیٹ فارم روایتی دست کاروں کو منڈی سے روابط استوار کرنے اور اپنی مصنوعات کو وسیع تر حلقۂ صارفین تک پہنچانے میں مدد دے سکتے ہیں۔

بھارت ٹیولپ کے تحت روایتی اور دست کاری سے تیار کردہ مختلف مصنوعات پیش کی جاتی ہیں، جن میں گھروں کی آرائش اور روزمرہ استعمال کی اشیا، ہاتھ سے تیار کردہ زیورات، ہاتھ سے بُنے ہوئے کپڑے اور ملبوسات کے لیے استعمال ہونے والا کپڑا، نیز چمڑے کی روایتی مصنوعات شامل ہیں۔ اس پہل کے ذریعے روایتی ہنر اور دست کاری کو عصرِ حاضر کی منڈیوں سے جوڑا جا رہا ہے، جبکہ ہندوستان کے متنوع فنون اور ثقافتی ورثے کے تئیں وسیع تر قدردانی کو بھی فروغ دیا جا رہا ہے۔

دست کار اور اس پہل میں دلچسپی رکھنے والے دیگر متعلقہ افراد، اس کے بارے میں مزید معلومات حاصل کرنے اور مصنوعات و تشہیری سرگرمیوں کا جائزہ لینے کے لیے قومی پسماندہ طبقات مالیات و ترقیاتی کارپوریشن (این بی سی ایف ڈی سی) کی ٹیولپ کی سرکاری ویب سائٹ ملاحظہ کر سکتے ہیں۔ خوردہ فروش، ادارہ جاتی خریدار اور صارفین بھی اس پروگرام کے آن لائن اور تشہیری ذرائع کے ذریعے روایتی مصنوعات دیکھ سکتے ہیں، جس سے دست کاروں کے روزگار اور روایتی ہنر کے تسلسل کو فروغ ملتا ہے۔

بھارت ٹیولپ کے ذریعے سماجی انصاف اور تفویضِ اختیارات کی وزارت اور این بی سی ایف ڈی سی روایتی دست کاروں کے لیے منڈیوں تک رسائی کو بہتر بنا کر، کاروباری سرگرمیوں کی حوصلہ افزائی کرکے اور ہندوستان کے مالا مال دست کاری کے ورثے کے تحفظ اور اس کی وسیع تر شناخت کو فروغ دے کر جامع معاشی خودانحصاری کے اپنے عزم کو آگے بڑھا رہے ہیں۔

مزید معلومات کے لیے https://nbcfdc.gov.in/nbcfdc/web/tulip ملاحظہ کریں۔

*****

ش ح۔ ع و۔ ص ج

U. No-6074

(ریلیز آئی ڈی: 2323406) وزیٹر کاؤنٹر : 12