’نمستے‘ فریم ورک کے تحت 'سوچھتا اُدیمی یوجنا' (ایس یو وائی) کا مقصد ہدف شدہ مالی امداد اور صفائی ستھرائی سے متعلق آلات کے لیے تعاون کے ذریعے آمدنی کے ذرائع اور خود کفیلی کے مواقع پیدا کرنا ہے۔ اس طرح روزگار کے پائیدار مواقع صفائی ملازمین کے معاشی تحفظ اور وقار کو بہتر بنانے میں ایک اہم کردار ادا کر سکتے ہیں۔

جناب تڈی کونڈا رام بابو، جن کی عمر 40 سال ہے، درج فہرست ذات سے تعلق رکھنے والے ایک صفائی ملازم ہیں۔ وہ 2016 سے وجئے واڑہ میونسپل کارپوریشن کے ساتھ آؤٹ سورسنگ کی بنیاد پر کام کر رہے ہیں۔

سیکنڈری اسکول سرٹیفکیٹ (ایس ایس سی) مکمل کرنے کے بعد، وہ مالی مشکلات کی وجہ سے اعلیٰ تعلیم حاصل کرنے سے قاصر رہے۔ ان کا خاندان بنیادی طور پر ان کی تقریباً 19,000 روپے کی ماہانہ آمدنی پر ہی انحصار کرتا تھا، جبکہ گھر کے اخراجات پورے کرنا اور اپنے دو بیٹوں کی تعلیم کے اخراجات اٹھانا ایک مسلسل چیلنج بنا ہوا تھا۔

جناب رام بابو کی اہلیہ ایک گھریلو خاتون ہیں۔ ان کا بڑا بیٹا دسویں جماعت میں پڑھ رہا ہے اور چھوٹا بیٹا انٹرامیڈیٹ سیکنڈ ایئر میں ہے۔ محدود مالی وسائل اور سماجی بھید بھاؤ کے تجربات کے باوجود، وہ اپنے خاندان کے معیارِ زندگی کو بہتر بنانے اور اپنے بچوں کو تعلیم کے بہتر مواقع فراہم کرنے کے خواہشمند تھے۔

21  اگست 2025 کو، جناب رام بابو نے چار دیگر ارکان کے ساتھ مل کر، نمستے فریم ورک کے تحت حکومتِ ہند کی وزارت برائے سماجی انصاف اور تفویضِ اختیارات کی 'سوچھتا اودیمی یوجنا' (ایس یو وائی) کے تحت امداد حاصل کی۔ اس گروپ کو 'گلفر 8 کے ایل' نامی کیچڑ صاف کرنے والی گاڑی خریدنے کے پروجیکٹ کے لیے پیشگی سرمایہ کاری سبسڈی فراہم کی گئی، جس نے انہیں صفائی ستھرائی سے متعلق خدمات انجام دینے اور اپنے موجودہ کام کے ساتھ ساتھ آمدنی کا ایک اضافی ذریعہ قائم کرنے کے قابل بنایا۔

اس پروجیکٹ کی کل لاگت 50 لاکھ روپے تھی، جس کے لیے 31.25 لاکھ روپے کا قرض اور 18.75 لاکھ روپے کی پونجی سبسڈی فراہم کی گئی۔ اس پروجیکٹ کے ذریعے، شری رام بابو اب ہر ماہ تقریباً 10,000 روپے کی اضافی آمدنی حاصل کر رہے ہیں۔ ان کی کل ماہانہ آمدنی تقریباً 19,000 روپے سے بڑھ کر اب تقریباً 29,000 روپے ہو گئی ہے، جس سے انہیں گھریلو اخراجات اور اپنے بچوں کی تعلیمی ضروریات کو زیادہ مؤثر طریقے سے پورا کرنے میں مدد مل رہی ہے۔

اس اضافی آمدنی نے خاندان کے مالی تحفظ کو مضبوط کیا ہے اور روزمرہ کے اخراجات کو پورا کرنے کے دباؤ کو کم کیا ہے۔ اس پروجیکٹ نے جناب رام بابو اور ان کے گروپ کے دیگر ارکان کو صفائی ستھرائی سے متعلق کاروباری سرگرمیوں کے ذریعے ایک زیادہ پائیدار روزگار قائم کرنے کا موقع بھی فراہم کیا ہے۔

جناب تڈی کونڈا رام بابو کا یہ سفر صفائی ملازمین کے درمیان روزگار کی فراہمی اور سماجی و معاشی تفویضِ اختیارات کو فروغ دینے میں 'نمستے' فریم ورک کے تحت 'سوچھتا اُدیمی یوجنا' کے اہم کردار کو اجاگر کرتا ہے۔ صفائی کے آلات کے لیے پونجی سبسڈی تک رسائی کو آسان بنا کر، اس اسکیم نے ان کی آمدنی بڑھانے، ان کے بچوں کی تعلیم میں مدد کرنے اور ان کے خاندان کے لیے ایک زیادہ مستحکم اور باوقار مستقبل کی سمت میں آگے بڑھنے میں مدد فراہم کی ہے۔

***

 (ش ح –ا ب ن)

U.No:6033

(ریلیز آئی ڈی: 2323024) وزیٹر کاؤنٹر : 7