దేశవ్యాప్తంగా నిర్వహిస్తున్న ప్రత్యేక పరిశుభ్రతా ప్రచారం - 6లో మహానది కోల్‌ఫీల్డ్స్‌ లిమిటెడ్‌ (ఎంసీఎల్‌) చురుగ్గా పాల్గొంటోంది. సంస్థ ప్రధాన కార్యాలయంతో పాటు కార్యకలాపాలు నిర్వహిస్తున్న అన్ని ప్రాంతాల్లో ఎలక్ట్రానిక్‌ వ్యర్థాలను బాధ్యతాయుతంగా తొలగించేలా పలు కీలక చర్యలు చేపడుతోంది. 2026 అక్టోబర్‌ 31 వరకు కొనసాగనున్న ఈ ప్రత్యేక కార్యక్రమంలో భాగంగా, ఎంసీఎల్‌ పరిధిలోని అన్ని సంస్థల్లో వ్యర్థాలను క్రమపద్ధతిలో సేకరించడం, పర్యావరణ పరిరక్షణపై అవగాహన కల్పించడం, పరిశుభ్రతను ప్రోత్సహించడంపై దృష్టి సారిస్తున్నారు.

ఈ కార్యక్రమంలో భాగంగా, ఉపయోగించని ఎలక్ట్రానిక్‌ వస్తువులను సేకరించి, చట్టబద్ధమైన రీసైక్లింగ్‌ మార్గాల ద్వారా బాధ్యతాయుతంగా పారవేసేందుకు ఎంసీఎల్‌ పరిధిలోని వివిధ ప్రాంతాల్లో ఈ - వ్యర్థాల సేకరణ కేంద్రాలను ఏర్పాటు చేశారు. ప్రధాన కార్యాలయంతో పాటు కార్యకలాపాలు నిర్వహిస్తున్న ప్రాంతాల్లోని ఉద్యోగులు ఈ కార్యక్రమంలో ఉత్సాహంగా పాల్గొంటున్నారు. పరిశుభ్రత కార్యక్రమాలకు సహకరిస్తూ, పర్యావరణ పరిరక్షణకు దోహదపడే బాధ్యతాయుతమైన పద్ధతులను ప్రోత్సహిస్తున్నారు.

ఈ - వ్యర్థాలను సక్రమంగా పారవేయకపోవడం వల్ల నేల, నీరు కలుషితం కావడంతో పాటు, మానవ ఆరోగ్యానికి, పర్యావరణానికి కలిగే ప్రమాదాలపై ఉద్యోగులకు, పరిసర ప్రాంతాల ప్రజలకు అవగాహన కల్పించేందుకు ప్రత్యేక కార్యక్రమాలు కూడా నిర్వహిస్తున్నారు.

ఈ ప్రత్యేక కార్యక్రమం అమలు ప్రారంభమైన తొలి వారంలో, గుర్తించిన 240 ప్రదేశాల్లో ఎంసీఎల్‌ 73 ప్రదేశాలను శుభ్రం చేసింది. మొత్తం 10,00,000 చదరపు అడుగుల విస్తీర్ణాన్ని శుభ్రం చేయాలనే లక్ష్యంలో భాగంగా, ఇప్పటివరకు 3,06,663 చదరపు అడుగుల ప్రాంతాన్ని శుభ్రం చేశారు. ఈ కార్యక్రమం ద్వారా 600 మెట్రిక్‌ టన్నుల స్క్రాప్‌ను కూడా తొలగించాలని లక్ష్యంగా పెట్టుకున్నారు. ఇప్పటివరకు 350 హెచ్ఈఎంఎం (భారీ ఎర్త్‌ మూవింగ్‌ యంత్రాలు) బ్యాటరీలను పారవేశారు. స్క్రాప్‌ విక్రయం ద్వారా ఆదాయాన్ని కూడా సమకూర్చుకున్నారు.

ప్రత్యేక ప్రచారం - 6 ద్వారా, కార్యాలయాల పరిశుభ్రత, పర్యావరణ పరిరక్షణ, ఈ - వ్యర్థాల బాధ్యతాయుత నిర్వహణ పట్ల తన నిబద్ధతను ఎంసీఎల్‌ మరింత బలోపేతం చేస్తూ, పరిశుభ్రమైన, సుస్థిరమైన, వనరులను సమర్థంగా వినియోగించే భవిష్యత్తును నిర్మించాలనే జాతీయ లక్ష్యానికి తోడ్పడుతోంది.

 

***

(రిలీజ్ ఐడి: 2322836) సందర్శకుల సూచీ సంఖ్య : : 7