شلپ سماگم میلہ 2026، کرناٹک کے میسورو میں واقع میسورو دسہرہ نمائش گراؤنڈ میں 11 اکتوبر سے جاری ہے۔ اس میلے کا انعقاد حکومت ہند کی وزارت سماجی انصاف و تفویض اختیارات کی جانب سے کیا جا رہا ہے۔

19 اکتوبر تک جاری رہنے والے اس 9 روزہ میلے کا مقصد درج فہرست ذاتوں، دیگر پسماندہ طبقات اور صفائی ملازمین سے تعلق رکھنے والے مستفیدین کی تیار کردہ مصنوعات کی فروخت کے لیے مارکیٹنگ پلیٹ فارم فراہم کرنا ہے۔ ان میں وزارت کے تحت کام کرنے والی تین قومی کارپوریشنوں، یعنی نیشنل شیڈیولڈ کاسٹس فنانس اینڈ ڈیولپمنٹ کارپوریشن (این ایس ایف ڈی سی)، نیشنل بیک ورڈ کلاسز فنانس اینڈ ڈیولپمنٹ کارپوریشن (این بی سی ایف ڈی سی) اور نیشنل صفائی کرمچاری فنانس اینڈ ڈیولپمنٹ کارپوریشن (این ایس کے ایف ڈی سی) کی معاونت سے کام کرنے والے دستکار بھی شامل ہیں۔

وزارت کے ایک سینیئر عہدیدار نے بتایا کہ اس اقدام کا مقصد دستکاروں کے لیے منڈیوں سے روابط کو مضبوط بنانا، روایتی دستکاری کو فروغ دینا اور ہدفی گروپوں کے لیے ذریعۂ معاش کے پائیدار مواقع پیدا کرنا ہے۔

انہوں نے کہا کہ وزارت 2022 سے شلپ سماگم میلوں کا انعقاد کر رہی ہے اور اب تک منعقد کیے گئے ایسے 13 میلوں کے ذریعے 975 دستکار مستفید ہو چکے ہیں۔

میسورو میں منعقد ہونے والا یہ میلہ مالی سال 2026-27 کا پہلا شلپ سماگم میلہ ہے۔

عہدیدار نے بتایا کہ میلے میں مجموعی طور پر 83 اسٹال لگائے گئے ہیں، جن میں سے 80 اسٹال دستکاروں کو الاٹ کیے گئے ہیں۔ ان دستکاروں میں 37 خواتین بھی شامل ہیں۔ زائرین کے لیے روایتی پکوان پیش کرنے والے فوڈ اسٹال بھی قائم کیے گئے ہیں۔

انہوں نے مزید بتایا کہ اس میلے میں 12 ریاستوں اور مرکز کے زیر انتظام علاقوں کے دستکار شرکت کر رہے ہیں، جن میں آندھرا پردیش، بہار، کرناٹک، کیرالہ، راجستھان، پڈوچیری، گجرات، مدھیہ پردیش، مہاراشٹر، تلنگانہ، تمل ناڈو اور اتر پردیش شامل ہیں۔

عہدیدار نے بتایا کہ اس نمائش میں روایتی مصنوعات کی وسیع اقسام پیش کی جا رہی ہیں۔ ان میں دستکاری کی اشیا، ہینڈلوم ساڑیاں، مصالحے، اچار، اگربتیاں، شہد سے تیار کردہ مصنوعات، بلاک پرنٹ والی اشیا، کانجی ورم ساڑیاں، چمڑے کی مصنوعات، لکڑی کے کھلونے، بیگ اور پرس، ٹیراکوٹا مصنوعات، مصنوعی زیورات، گلاب کی لکڑی سے تیار کردہ دیواری آرائش کی اشیا اور بیڈ کور و کشن کور شامل ہیں۔ یہ پلیٹ فارم دستکاروں کو اپنی مصنوعات وسیع تر سامعین کے سامنے پیش کرنے اور ممکنہ خریداروں سے رابطہ قائم کرنے کا موقع فراہم کرتا ہے، ساتھ ہی ہندوستان کے متنوع ثقافتی ورثے اور روایتی ہنر کو بھی فروغ دیتا ہے۔

عہدیدار نے مزید بتایا کہ شلپ سماگم میلہ، وزارت سماجی انصاف و تفویض اختیارات اور اس کی تین قومی کارپوریشنوں، یعنی این ایس ایف ڈی سی، این بی سی ایف ڈی سی اور این ایس کے ایف ڈی سی کی اسکیموں اور پروگراموں کے بارے میں معلومات عام کرنے کے لیے بھی ایک پلیٹ فارم کا کام کرتا ہے۔ اس اقدام کا مقصد اہل مستفیدین کے لیے دستیاب امداد اور ترقی کے مواقع کے بارے میں بیداری بڑھانا، نیز کاروباری سرگرمیوں اور معاشی خود مختاری کی حوصلہ افزائی کرنا ہے۔

وزارت نے ہدفی گروپوں کی تیار کردہ مصنوعات کو ہندوستان اور بیرونِ ملک مختلف ڈیجیٹل پلیٹ فارموں کے ذریعے وسیع تر منڈیوں تک پہنچانے کے لیے بھارت ٹولپ (روایتی دستکاروں کی ترقی اور ذریعۂ معاش کا پروگرام) بھی متعارف کرایا ہے۔ اس اقدام کے تحت مصنوعات کو بھارت ٹولپ کے برانڈ نام سے پیش کیا جاتا ہے، تاکہ ان کی شناخت اور مقبولیت میں اضافہ ہو اور آن لائن فروخت میں سہولت فراہم کی جا سکے۔ اس پروگرام کا مقصد روایتی فنون کو محفوظ رکھتے ہوئے دستکاروں کے ذریعۂ معاش کو مستحکم کرنا اور ہندوستان کی مالامال دستکاری کو وسیع تر سامعین تک پہنچانا ہے۔

عہدیدار نے بتایا کہ وزارت دستکاروں کو مفت اسٹال فراہم کرنے کے ساتھ ان کے سفری اخراجات، یومیہ الاؤنس، سامان کی نقل و حمل اور کھانے پینے، بشمول دوپہر اور رات کے کھانے کے اخراجات میں معاونت فراہم کرکے ان کی شرکت کو آسان بناتی ہے۔ اس امداد سے دستکاروں کو اسٹال کے کرائے اور شرکت سے متعلق مقررہ اخراجات برداشت کیے بغیر میلے میں حصہ لینے اور اپنی مصنوعات کی نمائش کرنے میں مدد ملتی ہے۔

یہ بات قابل ذکر ہے کہ مالی سال 2026-27 کے دوران وزارت گوہاٹی، نئی دہلی کے دلی ہاٹ، جودھ پور اور لکھنؤ میں مزید شلپ سماگم میلوں کے انعقاد کی تجویز رکھتی ہے۔

وزارت اور اس کی تینوں قومی کارپوریشنیں اہم نمائشوں میں بھی شرکت کریں گی۔ ان میں نئی دہلی کے بھارت منڈپم میں 14 سے 27 نومبر 2026 تک منعقد ہونے والا انڈیا انٹرنیشنل ٹریڈ فیئر (آئی آئی ٹی ایف) 2026 اور فروری 2027 میں فریدآباد میں منعقد ہونے والا سورج کنڈ میلہ شامل ہیں۔

                                         *****

ش ح۔ ف ش ع

                                                                                                                                       U: 5055

(ریلیز آئی ڈی: 2322582) وزیٹر کاؤنٹر : 7