قومی راجدھانی خطہ (این سی آر) اور ملحقہ علاقوں میں فضائی معیار کے انتظام سے متعلق کمیشن (سی اے کیو ایم) نے ایک حکم جاری کرتے ہوئے قومی راجدھانی خطے (این سی آر) میں صنعتی یونٹس پر پین-ٹلٹ-زوم ( پی ٹی زیڈ) کیمروں کی تنصیب میں توسیع لازمی قرار دی ہے، تاکہ ایندھن کے استعمال اور کمیشن کی ہدایات پر عمل درآمد کی جامع حقیقی وقت میں نگرانی کو یقینی بنایا جا سکے۔ اس اقدام کا مقصد صنعتوں کی نگرانی، نگرانی کے نظام اور تعمیل کو مزید مضبوط بنانا ہے، خصوصاً این سی آر اور ملحقہ علاقوں میں فضائی معیار پر صنعتی اخراج کے منفی اثرات کے پیش نظر، جس کی اہمیت موسم سرما کے مہینوں میں مزید بڑھ جاتی ہے۔

غیر منظور شدہ ایندھن کے مسلسل استعمال کے پیش نظر، کمیشن نے صنعتی یونٹس میں پی ٹی زیڈ کیمروں کے ذریعے احاطہ کیے جانے والے علاقوں میں توسیع کی ہے، تاکہ کوریج کو جامع بنایا جا سکے اور مؤثر نگرانی و تعمیل کو یقینی بنایا جا سکے۔ آلودگی کی روک تھام سے متعلق مرکزی بورڈ (سی پی سی بی) کی جانب سے پہلے سے مقرر کردہ پی ٹی زیڈ کیمروں کے مقامات کے علاوہ، کمیشن نے ہدایت دی ہے کہ صنعتیں اب درج ذیل معیاری عملی طریقۂ کار (ایس او  پی) کے مطابق31 اکتوبر2026  تک اضافی پی ٹی زیڈ  کیمرے بھی نصب کریں:

1. کیمروں کی تنصیب کے مقامات

• کیمرے اس طرح نصب کیے جائیں گے کہ ایندھن ذخیرہ کرنے کے تمام مقامات کی ویڈیو ریکارڈنگ ہو سکے۔
• کیمرے اس طرح نصب کیے جائیں گے کہ ایندھن ڈالنے کے تمام مقامات کی ویڈیو ریکارڈنگ ہو سکے۔
• گیس پر مبنی ایندھن استعمال کیے جانے کی صورت میں گیس کے گیج/میٹر کو بھی کیمرے کے ذریعے ریکارڈ کیا جائے گا۔

2. حقیقی وقت میں ویڈیو اسٹریمنگ

• ویڈیو فیڈ کی حقیقی وقت میں اسٹریمنگ آلودگی کی روک تھام سے متعلق مرکزی بورڈ (سی پی سی بی) اور متعلقہ ریاستی آلودگی کنٹرول بورڈز (ایس پی سی بیز )اور دہلی آلودگی کنٹرول کمیٹی (ڈی پی سی سی) کے سرورز پر دستیاب کرائی جائے گی۔

3. بجلی کا ذریعہ

• تمام صنعتیں اس بات کو یقینی بنائیں گی کہ ان کیمروں اور کنیکٹیوٹی کے نظام کے لیے مناسب متبادل بجلی کا انتظام موجود ہو۔

حکم میں سی پی سی بی اور متعلقہ ریاستی آلودگی کنٹرول بورڈز (ایس پی سی بیز )اور دہلی آلودگی کنٹرول کمیٹی (ڈی پی سی سی) کو ویڈیو فیڈ کی حقیقی وقت میں اسٹریمنگ حاصل کرنے کے لیے پورٹلز اور دیگر ضروری بنیادی ڈھانچہ تیار کرنے کا بھی پابند کیا گیا ہے۔ اس سے صنعتوں کی جانب سے ایندھن کے استعمال کے طریقۂ کار کی دور سے نگرانی میں سہولت ہوگی اور کمیشن کی قانونی ہدایات کی تعمیل یقینی بنانے میں مدد ملے گی۔ مذکورہ اقدامات پر عمل درآمد کی صورتِ حال متعلقہ ریاستی آلودگی کنٹرول بورڈز (ایس پی سی بیز )/ دہلی آلودگی کنٹرول کمیٹی (ڈی پی سی سی) کی جانب سے 1 نومبر 2026 تک کمیشن کو پیش کی جائے گی۔

صنعتی اخراج سے ہونے والی آلودگی کے پیش نظر کمیشن نے این سی آر میں مختلف مقاصد، بشمول صنعتی استعمال، کے لیے منظور شدہ ایندھن کی ایک معیاری فہرست بھی مقرر کی تھی۔ تاہم، کمیشن کے فلائنگ اسکواڈز نے این سی آر بھر میں صنعتوں کے خفیہ معائنے کے دوران متعدد مواقع پر غیر منظور شدہ ایندھن کے استعمال کی اطلاع دی ہے۔ غیر منظور شدہ ایندھن کے مسلسل استعمال کے پیش نظر کمیشن نے صنعتوں میں ایندھن کی کھپت کی حقیقی وقت میں نگرانی کو ضروری قرار دیا ہے۔

دہلی-این سی آر میں فضائی معیار کی خراب صورتِ حال کے پیش نظر اور خود ضابطگی کے ذریعے سخت نگرانی، مانیٹرنگ اور تعمیل کو یقینی بنانے کے مقصد سے مرکزی آلودگی کنٹرول بورڈ ( سی پی سی بی) نے اس سے قبل صنعتوں کو حقیقی وقت میں آن لائن مسلسل اخراج کی نگرانی کے نظام (او سی ای ایم ایس) کے ساتھ پین-ٹلٹ-زوم (پی ٹی زیڈ) کیمرے نصب کرنے کی ہدایت دی تھی۔ پی ٹی زیڈ کیمروں کی تنصیب کے لیے مقررہ مقامات میں او سی ای ایم ایس کے پورٹ ہول کے ساتھ ساتھ بوائلر رکھنے والے ٹیکسٹائل اور فوڈ پروسیسنگ یونٹس میں اسٹیک سے خارج ہونے والی فلو گیسوں کی ریکارڈنگ، جبکہ دھات سے متعلق یونٹس میں دھوئیں کے اخراج کے نظام کے علاقوں اور بھٹی میں مواد ڈالنے کے مقامات کی ریکارڈنگ شامل ہے۔

 

*******

 

) ش ح – ض ر-ت ا)

U.NO.4715

 

 

(ریلیز آئی ڈی: 2319730) وزیٹر کاؤنٹر : 7