حکومت ہند کی وزارتِ کان کنی کے سکریٹری جناب کیشو چندر نے آج وزارتِ کان کنی کے جوائنٹ سکریٹری اور انتظامی اتھارٹی جناب کدم سندیپ وسنت اور دیگر اعلیٰ حکام کی موجودگی میں انڈمان سمندر میں موجود دو سمندری معدنیاتی بلاکس کو کمپوزٹ لائسنس دینے کے لیے ان کی نیلامی کا ورچوئل طور پر آغاز کیا۔ یہ آغاز بھارت کی سمندری معدنیاتی صلاحیت سے بھرپور فائدہ اٹھانے اور ملک کی طویل مدتی معدنیاتی سلامتی کو مضبوط بنانے کی سمت  میں ایک اہم قدم ہے۔

دونوں بلاکس، سیول رائز-01 اور ویسٹ سیول رج-01، تزویراتی اعتبار سے اہم سمندری علاقوں میں واقع ہیں اور مجموعی طور پر 1,632 مربع کلومیٹر سے زائد رقبے پر محیط ہیں۔ ان بلاکس میں کثیر دھاتی گٹھلیاں اور پرتیں موجود ہیں، جن میں کوبالٹ، نکل، مینگنیز، تانبا اور نایاب ارضی عناصر جیسی معدنیات پائی جاتی ہیں۔ یہ معدنیات جدید مینوفیکچرنگ، صاف توانائی کی ٹیکنالوجی، برقی نقل و حرکت، الیکٹرانکس اور دیگر تزویراتی شعبوں کے لیے اہم ہیں۔

نیلامی کے لیے پیش کیے گئے بلاکس کی تفصیلات:

شرکاء سے خطاب کرتے ہوئے جناب کیشو چندر نے بھارت کے معدنیاتی شعبے کے لیے سمندری معدنی وسائل کو ایک نئے میدان کے طور پر اہم قرار دیا اور کہا کہ ان وسائل کی منظم تلاش سے ملک میں معدنیات کی دستیابی بڑھانے کی کوششوں کو مزید تقویت ملے گی۔ انہوں نے سمندری معدنی وسائل کی سائنسی، تکنیکی اور ماحولیاتی طور پر ذمہ دارانہ ترقی کی ضرورت پر بھی زور دیا۔

سکریٹری نے ممکنہ بولی دہندگان، صنعت سے وابستہ فریقوں اور قابل اداروں سے نیلامی کے عمل میں فعال طور پر حصہ لینے اور اس پہل کو کامیاب بنانے میں اپنا کردار ادا کرنے کی اپیل کی۔ انہوں نے سمندری معدنی وسائل کی تلاش میں زیادہ سے زیادہ شرکت اور سرمایہ کاری کے ساتھ ساتھ وسائل کی ذمہ دارانہ ترقی کے لیے موزوں تکنیکی صلاحیتوں کو اپنانے کی حوصلہ افزائی کی۔

تقریب میں وزارتِ کان کنی کے اعلیٰ حکام، سائنسی اور تکنیکی اداروں کے نمائندگان، صنعت سے وابستہ فریقوں، سرکاری شعبے کے اداروں، ممکنہ بولی دہندگان اور میڈیا کے نمائندگان نے شرکت کی۔

ٹینڈر دستاویزات کی فروخت یکم اکتوبر 2026 سے شروع ہوگئی ہے۔ پری بِڈ کانفرنس 4 نومبر 2026 کو منعقد ہوگی، جبکہ استفسارات جمع کرانے کی آخری تاریخ 13 نومبر 2026 ہے۔ ٹینڈر دستاویزات خریدنے کی آخری تاریخ 21 دسمبر 2026 کو بھارتی  وقت کے مطابق شام 5 بجے تک ہے، جبکہ بولیاں 28 دسمبر 2026 کو بھارتی  وقت کے مطابق شام 5 بجے تک جمع کرائی جا سکتی ہیں۔

بلاکس، نیلامی کی شرائط، اہلیت کے معیار اور مختلف مراحل کی مدت سے متعلق تفصیلی معلومات ایم ایس ٹی سی کے نیلامی پلیٹ فارم پر دستیاب ہیں۔ نیلامی کا عمل آف شور ایریاز منرل (ڈیولپمنٹ اینڈ ریگولیشن) ایکٹ، 2002 اور آف شور ایریاز منرل (آکشن) رولز، 2024 کے تحت شفاف الیکٹرانک نیلامی کے ذریعے انجام دیا جائے گا، جن میں وقتاً فوقتاً ترمیم کی جاتی رہی ہے۔

دو سمندری معدنیاتی بلاکس کی نیلامی کا آغاز بھارت کے سمندری معدنی وسائل کی منظم تلاش اور ترقی کی جانب ایک اور اہم قدم ہے۔ اس کا مقصد معدنیاتی سلامتی کو مضبوط بنانا، سرمایہ کاری کی حوصلہ افزائی کرنا اور ان وسائل کی ذمہ دارانہ ترقی کے لیے ضروری صلاحیتیں پیدا کرنا ہے۔

***********

ش ح۔ رک۔

U No. 4682

(ریلیز آئی ڈی: 2319483) وزیٹر کاؤنٹر : 12