નવી અને પુનઃપ્રાપ્ય ઊર્જા, ઉપભોક્તા બાબતો, ખાદ્ય અને સાર્વજનિક વિતરણ કેન્દ્રીય મંત્રી શ્રી પ્રહ્લાદ જોશી 8મી ઓક્ટોબર, 2026ના રોજ ચેન્નઈ ટ્રેડ સેન્ટર ખાતે 'વિન્ડરજી ઈન્ડિયા'ની 8મી આવૃત્તિનું સત્તાવાર ઉદ્ઘાટન કરશે, જે ભારતના અગ્રણી પવન ઊર્જા પ્રદર્શનનો પ્રારંભ કરાવશે.

ત્રણ દિવસીય કાર્યક્રમ માટે ઉચ્ચ સ્તરીય વ્યૂહાત્મક વાતાવરણ નિર્માણ કરતા, આ ભવ્ય ઉદ્ઘાટન સમારોહમાં નવી અને પુનઃપ્રાપ્ય ઊર્જા અને ઊર્જા રાજ્ય મંત્રી શ્રી શ્રીપદ યેસ્સો નાઈક અને તમિલનાડુ સરકારના ઊર્જા સંસાધનો અને કાયદા મંત્રી થિરૂ સી.ટી.આર. નિર્મલ કુમાર વિશેષ ઉપસ્થિત રહેશે. આ કાર્યક્રમમાં કેન્દ્ર અને રાજ્ય સરકારોના વરિષ્ઠ અધિકારીઓ, પવન ઊર્જા સંગઠનો અને ઉદ્યોગ જગતના અગ્રણીઓ પણ હાજરી આપશે.

ઉદ્ઘાટન સમારોહ દરમિયાન વૈશ્વિક એમઓયુ (MoU) ની જાહેરાતો અને ક્ષેત્રીય મહત્વના અહેવાલો લોન્ચ કરવામાં આવશે, સાથે જ પવન ઊર્જા ક્ષેત્રે ઉત્કૃષ્ટ નેતૃત્વ દર્શાવનારા રાજ્યોનું સન્માન પણ કરવામાં આવશે.

ભારતે નાણાકીય વર્ષ 2025-26માં રેકોર્ડબ્રેક 6.05 GW પવન ઊર્જા ક્ષમતા ઉમેરી છે, જેથી ઓગસ્ટ 2026 સુધીમાં દેશની કુલ સંચિત ક્ષમતા 58.52 GW સુધી પહોંચી ગઈ છે. વર્ષ 2030 સુધીમાં 100 GW ના લક્ષ્યાંકને પ્રાપ્ત કરવા માટે હાલમાં 28 GW ક્ષમતાના પ્રોજેક્ટો અમલીકરણ હેઠળ છે.

7મી થી 9મી ઓક્ટોબર, 2026 દરમિયાન યોજાનાર 'વિન્ડરજી ઈન્ડિયા 2026' માં 3-દિવસીય ટ્રેડ ફેર, 2-દિવસીય કોન્ફરન્સ, ટેકનિકલ સત્રો, રાઉન્ડ ટેબલ બેઠકો, લાઈવ ડેમોન્સ્ટ્રેશન, B2B અને B2G બેઠકો તેમજ એકેડેમિયા કનેક્ટનો સમાવેશ થશે. આ સીમાચિહ્નરૂપ આવૃત્તિ પવન ઊર્જા ક્ષેત્ર માટે વૈશ્વિક કેન્દ્ર તરીકે કાર્ય કરશે, જેમાં 20 થી વધુ દેશોના આશરે 400 વૈશ્વિક પ્રદર્શનકર્તાઓ અને 500 ડેલિગેટ્સ ભાગ લેશે, જેમાં ડેનમાર્ક, જર્મની અને સ્પેનના સમર્પિત કન્ટ્રી પેવેલિયન પણ આકર્ષણનું કેન્દ્ર બનશે.

આ કાર્યક્રમમાં સ્થાનિક મૂલ્ય વર્ધન (ડોમેસ્ટિક વેલ્યુ એડિશન), અદ્યતન નેક્સ્ટ-જનરેશન ટર્બાઇન પ્લેટફોર્મ્સ, હેવી-ડ્યુટી ગિયરબોક્સ, AI-સંચાલિત O&M અને ઓફશોર વિન્ડ ક્ષમતાઓનું પ્રદર્શન કરવામાં આવશે. કોન્ફરન્સ દરમિયાન નીતિગત માળખાં, ઉત્પાદન સ્પર્ધાત્મકતા, રિપાવરિંગ વ્યૂહરચનાઓ અને ઓફશોર વિન્ડ ક્ષેત્રના નવોન્મેષો પર સમાંતર ઉચ્ચ સ્તરીય ચર્ચા-વિચારણાઓ હાથ ધરવામાં આવશે.

આ કાર્યક્રમનું આયોજન ઈન્ડિયન વિન્ડ ટર્બાઈન મેન્યુફેક્ચરર્સ એસોસિએશન (IWTMA) અને PDA વેન્ચર્સ પ્રાઈવેટ લિમિટેડ દ્વારા નવી અને પુનઃપ્રાપ્ય ઊર્જા મંત્રાલય (MNRE) અને ઊર્જા મંત્રાલય (MoP) ના સહયોગથી કરવામાં આવી રહ્યું છે. આ ઉદ્ઘાટન ભારતની પુનઃપ્રાપ્ય ઊર્જા ક્ષમતાઓને વિસ્તૃત કરવા માટે એકીકૃત રાષ્ટ્રીય અને આંતરરાષ્ટ્રીય પ્રતિબદ્ધતાને પુનઃઅંકિત કરશે.

SM/JD

(રીલીઝ આઈડી: 2319347) મુલાકાતી સંખ્યા : 9