PIB Backgrounder

പിഎം ഇ-ഡ്രൈവ് പദ്ധതി

പോസ്റ്റഡ് ഓണ്‍: 01 OCT 2026 7:17PM by PIB Thiruvananthpuram

സുസ്ഥിരമായ ഭാവിയിലേക്കുള്ള ചുവടുവയ്പ്പ്

ലക്ഷ്യവേധിയായ നയങ്ങൾ, സാമ്പത്തിക പ്രോത്സാഹനങ്ങൾ, പിന്തുണാ നടപടികൾ എന്നിവയുടെ പിൻബലത്തിൽ ഇന്ത്യയിലെ വൈദ്യുത ഗതാഗത മേഖല അതിവേഗം വളർന്നുകൊണ്ടിരിക്കുകയാണ്. ഈ പരിവർത്തനത്തിന് നിർണായക പിന്തുണ നൽകുന്ന പദ്ധതികളിലൊന്നാണ് 2024 സെപ്റ്റംബറിൽ ആരംഭിച്ച പിഎം ഇ-ഡ്രൈവ് (PM E-DRIVE) പദ്ധതി. വൈദ്യുത വാഹനങ്ങളുടെ (EV) വ്യാപകമായ ഉപയോഗം പ്രോത്സാഹിപ്പിക്കുക, രാജ്യത്തെ ചാർജിംഗ് അടിസ്ഥാന സൗകര്യങ്ങൾ ശക്തിപ്പെടുത്തുക, ആഭ്യന്തര വൈദ്യുത വാഹന നിർമാണ മേഖലയെ കൂടുതൽ ശക്തിപ്പെടുത്തുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ. 11,900 കോടി രൂപ ബജറ്റ് വിഹിതത്തോടെ 2028 മാർച്ച് വരെയുള്ള കാലയളവിൽ നടപ്പിലാക്കുന്ന പദ്ധതി, വിവിധ വിഭാഗങ്ങളിലുള്ള വൈദ്യുത വാഹനങ്ങൾക്കും അവയുമായി ബന്ധപ്പെട്ട അടിസ്ഥാന സൗകര്യങ്ങൾക്കും സാമ്പത്തിക പിന്തുണ നൽകുന്നു. പദ്ധതിയുടെ ഭാഗമായി ഏകദേശം 28.30 ലക്ഷം വൈദ്യുത വാഹനങ്ങൾക്ക് ആനുകൂല്യങ്ങൾ ലഭ്യമാക്കാനാണ് ലക്ഷ്യമിടുന്നത്. 2026 ജൂൺ വരെയുള്ള കണക്കുകൾ പ്രകാരം 26.59 ലക്ഷം വൈദ്യുത വാഹനങ്ങളുടെ വിൽപ്പനയ്ക്ക് പദ്ധതി പിന്തുണ നൽകിയിട്ടുണ്ട്. ഇതോടൊപ്പം ഇലക്ട്രിക് ബസുകൾ, പൊതു ചാർജിംഗ് സ്റ്റേഷനുകൾ, പരിശോധനാ കേന്ദ്രങ്ങൾ എന്നിവയുടെ വികസനത്തിനും പദ്ധതി സഹായം നൽകുന്നു.

വൈദ്യുത വാഹന ഗതാഗതത്തിലേക്കുള്ള ഇന്ത്യയുടെ ചുവടുമാറ്റം

വൈദ്യുത വാഹനങ്ങളുടെ (EV) സ്വീകാര്യത അതിവേഗം വർധിച്ചുവരുന്ന സാഹചര്യത്തിൽ, വൈദ്യുത വാഹന ഗതാഗതത്തിലേക്കുള്ള നിർണായകമായ പരിവർത്തനത്തിന്റ ഘട്ടത്തിലാണ് ഇന്ത്യ. ലക്ഷ്യവേധിയായ നയങ്ങൾ, സാമ്പത്തിക പ്രോത്സാഹനങ്ങൾ, ദൗത്യാധിഷ്ഠിത പദ്ധതികൾ എന്നിവയിലൂടെ ഈ പരിവർത്തനത്തിന് കൂടുതൽ ശക്തമായ പിന്തുണ ലഭിക്കുന്നു.

'പിഎം ഇലക്ട്രിക് ഡ്രൈവ് റെവല്യൂഷൻ ഇൻ ഇന്നൊവേറ്റീവ് വെഹിക്കിൾ എൻഹാൻസ്‌മെന്റ് സ്കീം' (PM E-DRIVE Scheme) ആണ് മേൽപ്പറഞ്ഞ ഉദ്യമങ്ങളുടെ കേന്ദ്രബിന്ദു. 2024 ഒക്ടോബർ മുതൽ നടപ്പിലാക്കി വരുന്ന ഈ പദ്ധതി, വാഹനങ്ങൾ വാങ്ങുമ്പോഴുള്ള നേരിട്ടുള്ള ആനുകൂല്യങ്ങളിലൂടെയും ചാർജിംഗ് സൗകര്യങ്ങൾ വികസിപ്പിക്കുന്നതിലൂടെയും വൈദ്യുത വാഹനങ്ങളുടെ (EV) ഉപയോഗം വർദ്ധിപ്പിക്കാൻ സഹായിക്കുന്നു. സുസ്ഥിരത പ്രോത്സാഹിപ്പിക്കുന്നതിലൂടെ, ഗതാഗതം മൂലമുണ്ടാകുന്ന പാരിസ്ഥിതിക ആഘാതങ്ങൾ കുറയ്ക്കാനും വായുവിന്റെ ഗുണനിലവാരം മെച്ചപ്പെടുത്താനും ഈ പദ്ധതി ലക്ഷ്യമിടുന്നു.

PM E-DRIVE പദ്ധതിയുടെ സവിശേഷതകൾ

രാജ്യവ്യാപകമായാണ് PM E-DRIVE പദ്ധതി നടപ്പിലാക്കുന്നത്. തുടക്കത്തിൽ രണ്ട് വർഷത്തേക്കാണ് ഈ പദ്ധതി പ്രഖ്യാപിച്ചിരുന്നതെങ്കിലും, ഇപ്പോൾ കാലാവധി 2028 മാർച്ച് 31 വരെ നീട്ടിയിട്ടുണ്ട്.

ഈ പദ്ധതിക്ക് ആകെ 11,900 കോടി രൂപയുടെ വിഹിതമാണുള്ളത്.

വിവിധ തരം വാഹനങ്ങൾക്കും അവയുമായി ബന്ധപ്പെട്ട ഘടകഭാഗങ്ങൾക്കും ആവശ്യകത അടിസ്ഥാനമാക്കിയുള്ള ആനുകൂല്യങ്ങളും അടിസ്ഥാന സൗകര്യ വികസനത്തിനുള്ള പിന്തുണയും പദ്ധതി ഉറപ്പാക്കുന്നു.

ഇരുചക്ര വൈദ്യുത വാഹനങ്ങൾ (e-2Ws), രജിസ്റ്റർ ചെയ്ത ഇ-റിക്ഷകളും ഇ-കാർട്ടുകളും ഉൾപ്പെടെയുള്ള മുച്ചക്ര വൈദ്യുത വാഹനങ്ങൾ (e-3Ws - L5 വിഭാഗം), ഇ-ആംബുലൻസുകൾ, ഇ-ട്രക്കുകൾ, ഇ-ബസുകൾ, ചാർജിംഗ് സൗകര്യങ്ങൾ, പരിശോധനാ ഏജൻസികളുടെ നവീകരണം എന്നിവയെല്ലാം ഈ പദ്ധതിയുടെ പരിധിയിൽ വരുന്നു.

രജിസ്റ്റർ ചെയ്ത ഇ-ഇരുചക്ര വാഹനങ്ങൾക്ക് കിലോവാട്ട്-അവറിന് (kWh) 2,500 രൂപ എന്ന നിരക്കിൽ (ഒരു വാഹനത്തിന് പരമാവധി 5,000 രൂപ വരെ) ആനുകൂല്യം ലഭിക്കും. ഉത്‌പാദക കേന്ദ്രത്തിലെ വില 1.5 ലക്ഷം രൂപ വരെയായ വാഹനങ്ങൾക്കാണ് ഇത് ബാധകമാകുക; ഇതിനായി 2,767 കോടി രൂപയാണ് വകയിരുത്തിയിരിക്കുന്നത്. സഹായത്തിലൂടെ 45.79 ലക്ഷത്തിലധികം ഇ-ഇരുചക്ര വാഹനങ്ങൾ രജിസ്റ്റർ ചെയ്യുകയാണ് പദ്ധതിയുടെ ലക്ഷ്യം.

ഇ-മുച്ചക്ര വാഹനങ്ങളുടെ (L5 വിഭാഗം) വിൽപ്പന ലക്ഷ്യം കൈവരിച്ചതിനെത്തുടർന്ന്, ആ വിഭാഗത്തിനായുള്ള പദ്ധതി 2025 ഡിസംബർ 26-ന് അവസാനിപ്പിച്ചു.

എന്നാൽ, മറ്റ് ഇ-മുച്ചക്ര വാഹനങ്ങൾക്കുള്ള (ഇ-റിക്ഷകൾ, ഇ-കാർട്ടുകൾ) പിന്തുണ 2028 മാർച്ച് വരെ തുടരും.

PM E-DRIVE പദ്ധതിയുടെ പ്രധാന നേട്ടങ്ങൾ

ഏകദേശം 28.30 ലക്ഷം വൈദ്യുത വാഹനങ്ങൾക്ക് (EVs) ആനുകൂല്യങ്ങൾ ലഭ്യമാക്കുന്നതിനെ PM E-DRIVE പദ്ധതി പിന്തുണയ്ക്കുന്നു.

26.59 ലക്ഷം വൈദ്യുത വാഹനങ്ങൾ വിറ്റഴിക്കപ്പെട്ടു (2026 ജൂൺ വരെയുള്ള കണക്ക്).

PM E-DRIVE പദ്ധതിക്ക് കീഴിൽ 14,028 ഇ-ബസുകൾ നിരത്തിലിറക്കുന്നതിനായി 4,391 കോടി രൂപ വകയിരുത്തിയിട്ടുണ്ട്. ഇതിൽ 14,000 ഇ-ബസുകൾ അനുവദിച്ചുകഴിഞ്ഞു (2026 ഓഗസ്റ്റ് വരെയുള്ള കണക്ക്).

ഡൽഹി, ബെംഗളൂരു, ഹൈദരാബാദ്, മുംബൈ, അഹമ്മദാബാദ്, പൂനെ, സൂറത്ത് എന്നീ ഏഴ് നഗരങ്ങൾക്കായി 13,800 ഇ-ബസുകൾ അനുവദിച്ചു.

വൈദ്യുത വാഹനങ്ങൾക്കായുള്ള പൊതു ചാർജിംഗ് സ്റ്റേഷനുകൾ (EV PCS) സ്ഥാപിക്കുന്നതിനും പരിശോധനാ ഏജൻസികളുടെ സൗകര്യങ്ങൾ മെച്ചപ്പെടുത്തുന്നതിനും ധനസഹായം ലഭ്യമാണ്.

രാജ്യത്തുടനീളം വൈദ്യുത വാഹനങ്ങൾക്കായുള്ള പൊതു ചാർജിംഗ് സ്റ്റേഷനുകൾ (EV PCS) സ്ഥാപിക്കുന്നതിനായി 2,000 കോടി രൂപ നീക്കിവെച്ചിട്ടുണ്ട്.

മൂന്ന് എണ്ണ വിപണന കമ്പനികൾക്കും 10 സംസ്ഥാനങ്ങൾക്കുമായി 8,147 ചാർജറുകൾ സ്ഥാപിക്കുന്നതിന് 851 കോടി രൂപയുടെ പദ്ധതികൾക്ക് അംഗീകാരം നൽകി (2026 സെപ്റ്റംബർ 28 വരെയുള്ള കണക്ക്).

വാഹന പരിശോധനാ ഏജൻസികളുടെ ആധുനികവത്ക്കരണത്തിനും നിലവാരമുയർത്തുന്നതിനുമായി 780 കോടി രൂപ വകയിരുത്തിയിട്ടുണ്ട്.

വൈദ്യുത വാഹന ആവാസവ്യവസ്ഥയിലുടനീളം ചെലുത്തുന്ന സ്വാധീനം

PM E-DRIVE പദ്ധതി പ്രകാരമുള്ള ഗവണ്മെന്റ് പിന്തുണ വിപുലമായ വൈദ്യുത വാഹന സ്വീകാര്യത, ശുദ്ധമായ ഗതാഗതം, ഇന്ത്യയുടെ വൈദ്യുത വാഹന നിർമ്മാണ ആവാസവ്യവസ്ഥയുടെ വികസനം എന്നിവയെ പിന്തുണയ്ക്കുന്നു.

വാങ്ങുന്നവർക്കുള്ള ഗുണങ്ങൾ

ഒരു വൈദ്യുത വാഹനം വാങ്ങുമ്പോൾ കിഴിവോ സാമ്പത്തിക ആനുകൂല്യമോ ഗവണ്മെന്റ് നൽകുന്നു; ഇത് വാഹനം വാങ്ങുമ്പോഴുള്ള പ്രാരംഭ ചെലവ് കുറയ്ക്കാൻ സഹായിക്കുന്നു.

വൈദ്യുത വാഹനം വാങ്ങുമ്പോൾ അർഹരായ ഉപഭോക്താക്കൾക്ക് കിഴിവ് നേടാൻ ഉപയോഗിക്കാവുന്ന ഡിജിറ്റൽ കൂപ്പണുകളായ ഇ-വൗച്ചറുകൾ മുഖേന ഉപഭോക്താവ് നൽകേണ്ട തുക കുറയുന്നു. പിന്നീട്, കിഴിവ് നൽകിയ തുക വാഹന നിർമ്മാതാവിന് (OEM) ഘന വ്യവസായ മന്ത്രാലയം തിരികെ നൽകുന്നു.

നഗരപ്രദേശങ്ങൾക്കുള്ള ഗുണങ്ങൾ

വൈദ്യുത ബസുകളിലൂടെയും മറ്റ് ഇ.വി വിഭാഗങ്ങളിലൂടെയും ശുദ്ധവും സുസ്ഥിരവുമായ ഗതാഗതത്തിലേക്കുള്ള പരിവർത്തനത്തെ ഈ പദ്ധതി പിന്തുണയ്ക്കുന്നു.

വ്യവസായങ്ങൾക്കുള്ള ഗുണങ്ങൾ

പിഎം ഇ-ഡ്രൈവ് ഇന്ത്യയുടെ ആഭ്യന്തര ഇ.വി നിർമ്മാണ ആവാസവ്യവസ്ഥയുടെ വികസനത്തെ പിന്തുണയ്ക്കുകയും ഇ.വി മോഡലുകളുടെ സ്വദേശിവത്ക്കരണത്തെ പ്രോത്സാഹിപ്പിക്കുകയും ചെയ്യുന്നു.

പദ്ധതി പ്രകാരം രജിസ്റ്റർ ചെയ്ത OEM കൾ അവയുടെ ഇ.വി മോഡലുകൾ സ്വദേശിവത്ക്കരിക്കുകയും MHI ടെസ്റ്റിംഗ് ഏജൻസികളിൽ നിന്ന് ഫേസ്ഡ് മാനുഫാക്ചറിംഗ് പ്രോഗ്രാമിന്റെ (PMP) അനുവർത്തന സർട്ടിഫിക്കറ്റുകൾ നേടുകയും ചെയ്തിട്ടുണ്ട്.

വാഹന പരിശോധന ഏജൻസികളുടെ നവീകരണത്തിനും നിലവാരമുയർത്തുന്നതിനും നൂതനവും ആധുനികവുമായ സാങ്കേതികവിദ്യകൾ ഉപയോഗിച്ച് അവയെ സജ്ജമാക്കുന്നതിനായി ഈ പദ്ധതി 780 കോടി രൂപ വകയിരുത്തുന്നു.

കൂടുതൽ ശുദ്ധമായ ഭാവിഗതാഗതം ലക്ഷ്യമിട്ടുള്ള മുന്നേറ്റം

സുസ്ഥിരമായ ഗതാഗതം ത്വരിതപ്പെടുത്തുന്നതിനൊപ്പം പാരിസ്ഥിതിക, ഊർജ്ജ സുരക്ഷാ വെല്ലുവിളികളെ നേരിടാനും PM E-DRIVE സഹായിക്കുന്നു. EV സ്വീകാര്യതയെയും ചാർജിംഗ് അടിസ്ഥാന സൗകര്യങ്ങളെയും പിന്തുണയ്ക്കുന്നതിലൂടെ, ശുദ്ധവും കൂടുതൽ സുസ്ഥിരവുമായ ഗതാഗതത്തിലേക്കുള്ള ഇന്ത്യയുടെ പരിവർത്തനത്തെ പദ്ധതി ശക്തിപ്പെടുത്തുന്നു.

സൂചനകൾ