ಕೇಂದ್ರ ಜಲಶಕ್ತಿ ಸಚಿವರಾದ ಶ್ರೀ ಸಿ.ಆರ್. ಪಾಟೀಲ್ ಮತ್ತು ರಾಜ್ಯ ಸಚಿವರಾದ ಶ್ರೀ ವಿ. ಸೋಮಣ್ಣ ಅವರ ನೇತೃತ್ವದಲ್ಲಿ ಜಲಶಕ್ತಿ ಸಚಿವಾಲಯವು 'ಸ್ವಚ್ಛತೆಯೇ ಸೇವೆ (SHS) 2026 - ನಿರಂತರ ಪ್ರಯಾಸ' ಅಡಿಯಲ್ಲಿ ರಾಷ್ಟ್ರವ್ಯಾಪಿ ಅಭಿಯಾನದ ಭಾಗವಾಗಿ ಇಂದು ಬೆಳಿಗ್ಗೆ 7:30 ಕ್ಕೆ ನವದೆಹಲಿಯ ಓಖ್ಲಾ ಬ್ಯಾರೇಜ್‌ನ ಕಾಳಿಂದಿ ಕುಂಜ್ ಘಾಟ್‌ನಲ್ಲಿ ಬೃಹತ್ ಶ್ರಮದಾನ ಕಾರ್ಯಕ್ರಮವನ್ನು ಆಯೋಜಿಸಿತ್ತು.

ಈ ಸಂದರ್ಭದಲ್ಲಿ ಮಾತನಾಡಿದ ಕೇಂದ್ರ ಜಲಶಕ್ತಿ ಸಚಿವರಾದ ಶ್ರೀ ಸಿ.ಆರ್. ಪಾಟೀಲ್ ಅವರು, ಮಹಾತ್ಮ ಗಾಂಧಿಯವರು "ಸ್ವಾತಂತ್ರ್ಯ" ದೊಂದಿಗೆ "ಸ್ವಚ್ಛತೆ"ಗೆ ನೀಡಿದ ಒತ್ತು, ರಾಷ್ಟ್ರಕ್ಕೆ ಮಾರ್ಗದರ್ಶನ ನೀಡುತ್ತಲೇ ಇದೆ ಎಂದು ಸ್ಮರಿಸಿದರು ಹಾಗೂ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಸ್ವಚ್ಛತಾ ಆಂದೋಲನವು ಹೊಸ ಎತ್ತರಕ್ಕೆ ಏರಿದೆ ಎಂದು ಅವರು ಹೇಳಿದರು. ತಮ್ಮ ಸಮರ್ಪಣಾಭಾವದ ಮೂಲಕ ದೇಶವನ್ನು ಸ್ವಚ್ಛವಾಗಿಡಲು ನೆರವಾಗುತ್ತಿರುವ ಸಫಾಯಿ-ಮಿತ್ರರ ಶ್ರಮಕ್ಕೆ ಅವರು ಕೃತಜ್ಞತೆ ವ್ಯಕ್ತಪಡಿಸಿದರು. ಪ್ರತಿಯೊಬ್ಬ ನಾಗರಿಕರು ತಮ್ಮ ಸುತ್ತಮುತ್ತಲಿನ ಪರಿಸರದಲ್ಲಿ ನೈರ್ಮಲ್ಯವನ್ನು ಕಾಯ್ದುಕೊಳ್ಳುವ ಮೂಲಕ ಸ್ವಚ್ಛತೆಯನ್ನು ಸಾಮುದಾಯಿಕ ಜವಾಬ್ದಾರಿಯನ್ನಾಗಿ ಮಾಡಿಕೊಳ್ಳಬೇಕೆಂದು ಸಚಿವರು ಮನವಿ ಮಾಡಿದರು. ಸ್ವಚ್ಛತೆ ಎಂಬುದು ಕೇವಲ ಕಾಲಕಾಲಕ್ಕೆ ಮಾಡುವ ಕಾರ್ಯಕ್ರಮವಲ್ಲ, ಬದಲಿಗೆ ಸ್ವಚ್ಛ ಪರಿಸರ ಮತ್ತು ನದಿ ಸಂರಕ್ಷಣೆಯನ್ನು ಕಾಯ್ದುಕೊಳ್ಳುವ ನಿರಂತರ ಬದ್ಧತೆಯಾಗಿದೆ ಎಂದು ಅವರು ಒತ್ತಿಹೇಳಿದರು.

ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆಯ ಕಾರ್ಯದರ್ಶಿ ಶ್ರೀ ಅಶೋಕ್ ಕೆ.ಕೆ. ಮೀನಾ ಅವರು ತಮ್ಮ ಸ್ವಾಗತ ಭಾಷಣದಲ್ಲಿ, ಈ ಶ್ರಮದಾನವು ಪ್ರಸ್ತುತ ನಡೆಯುತ್ತಿರುವ 'ಸ್ವಚ್ಛತೆಯೇ ಸೇವೆ 2026' ಅಭಿಯಾನದ ಒಂದು ಭಾಗವಾಗಿದೆ ಎಂದು ತಿಳಿಸಿದರು. 'ಜನ ಭಾಗಿದಾರಿ' (ಜನರ ಪಾಲ್ಗೊಳ್ಳುವಿಕೆ) ಸ್ವಚ್ಛತಾ ಆಂದೋಲನದ ಪ್ರಮುಖ ತತ್ವವಾಗಿದೆ, ಆದ್ದರಿಂದ ಇಂದಿನ ಶ್ರಮದಾನವು ಸ್ವಚ್ಛತೆಯ ಕಡೆಗೆ ನಮ್ಮ ಬದ್ಧತೆಯನ್ನು ಪುನರುಚ್ಚರಿಸಲು ಸಮುದಾಯವನ್ನು ಒಂದೆಡೆ ತರುವ ಮತ್ತೊಂದು ಹೆಜ್ಜೆಯಾಗಿದೆ ಎಂದು ಅವರು ಪುನರುಚ್ಚರಿಸಿದರು.

ಜಲಸಂಪನ್ಮೂಲ, ನದಿ ಅಭಿವೃದ್ಧಿ ಮತ್ತು ಗಂಗಾ ಪುನರುಜ್ಜೀವನ ಇಲಾಖೆಯ ಕಾರ್ಯದರ್ಶಿ ಶ್ರೀಮತಿ ಅರ್ಚನಾ ವರ್ಮಾ ಅವರು ಇಲಾಖೆಯ ಇತರ ಹಿರಿಯ ಅಧಿಕಾರಿಗಳು ಮತ್ತು ಸಿಬ್ಬಂದಿಯೊಂದಿಗೆ ಸ್ವಚ್ಛತಾ ಅಭಿಯಾನದ ನೇತೃತ್ವ ವಹಿಸಿದ್ದರು.

ಈ ಶ್ರಮದಾನದಲ್ಲಿ ಸಿಡಬ್ಲ್ಯೂಸಿ, ಎನ್‌ಎಮ್‌ಸಿಜಿ, ಎನ್‌ಡಬ್ಲ್ಯೂಡಿಎ, ಸಿಎಸ್‌ಎಮ್‌ಆರ್‌ಎಸ್, ಎನ್‌ಡಿಎಸ್‌ಎ, ಎನ್‌ಆರ್‌ಸಿಡಿ, ಎನ್‌ಡಬ್ಲ್ಯೂಐಸಿ, ಎನ್‌ಡಬ್ಲ್ಯೂಎಮ್, ಯು ವೈಆರ್‌‌ಬಿ, ಜಿಎಫ್‌ಸಿಸಿ, ಸಿಡಬ್ಲ್ಯೂಎಮ್‌ಎ ಮತ್ತು ವ್ಯಾಪ್ಕೋಸ್ ಸೇರಿದಂತೆ ಇಲಾಖೆಯ 16 ಸಂಸ್ಥೆಗಳ ಹಿರಿಯ ಅಧಿಕಾರಿಗಳು ಮತ್ತು ಸಿಬ್ಬಂದಿ ಸಕ್ರಿಯವಾಗಿ ಭಾಗವಹಿಸಿದ್ದರು. ಜಲಶಕ್ತಿ ಸಚಿವಾಲಯದ ಅಡಿಯಲ್ಲಿ 1,100 ಕ್ಕೂ ಹೆಚ್ಚು ಅಧಿಕಾರಿಗಳು ಮತ್ತು ಸ್ವಯಂಸೇವಕರು ಸ್ವಚ್ಛತಾ ಅಭಿಯಾನದಲ್ಲಿ ಸಕ್ರಿಯವಾಗಿ ಪಾಲ್ಗೊಂಡರು ಮತ್ತು ಕಾಳಿಂದಿ ಕುಂಜ್ ಘಾಟ್ ಪ್ರದೇಶದಾದ್ಯಂತ ಪ್ಲಾಸ್ಟಿಕ್ ತ್ಯಾಜ್ಯ, ಅವಶೇಷಗಳು ಮತ್ತು ನದಿತೀರದ ಕಸವನ್ನು ತೆಗೆದುಹಾಕಲು ಸಹಾಯ ಮಾಡಿದರು. ಈ ಸ್ವಚ್ಛತಾ ಅಭಿಯಾನವು 'ಸ್ವಚ್ಛ ಭಾರತ - ವಿಕಸಿತ ಭಾರತ'ಕ್ಕೆ ಕಾರಣವಾಗುವ ನಿರಂತರ ಶ್ರಮವಾಗಲಿದೆ.

 

*****

(ಪ್ರಕಟಣೆ ಐ.ಡಿ.: 2317783) ವಿಸಿಟರ್ ಕೌಂಟರ್ : 14