آسیان-بھارت بحری مشق(اے آئی ایم ای - 2026) کا دوسرا ایڈیشن 28 ستمبر 2026 کو سبک بے، فلپائن میں شروع ہوا، جس میں بھارتی بحری جہازوں 'سہیادری' اور 'کولش' کے ساتھ آسیان کے رکن ممالک کی بحری افواج شرکت کر رہی ہیں۔ 'باہمی بھروسے میں پختگی، سمندر میں یکجہتی' کے موضوع کے تحت منعقد ہونے والی یہ مشق بھارت اور آسیان ممالک کی بحری افواج کو پیشہ ورانہ، آپریشنل اور سماجی سرگرمیوں کے لیے ایک ساتھ لاتی ہے، جس کا مقصد باہمی افہام و تفہیم، تعاون اور مل کر کام کرنے کی صلاحیت کو فروغ دینا ہے۔

مشق کا آغاز افتتاحی تقریب سے ہوا، جس میں فلپائن میں بھارت کے سفیر، عزت مآب جناب ہرش کمار جین نے مہمانِ خصوصی کے طور پر شرکت کی اور شریک بحری افواج سے خطاب کیا۔

بندرگاہ کے مرحلے میں پیشہ ورانہ، آپریشنل اور سماجی سرگرمیوں کا ایک سلسلہ شامل ہوگا، جس میں موضوع کے ماہرین کے درمیان تبادلۂ خیال، کھیلوں اور ثقافتی سرگرمیاں، کمیونٹی کی شمولیت اور آپریشنل ہم آہنگی شامل ہیں۔ اس کے بعد، سمندری مرحلے کے آغاز سے پہلے روانگی سے متعلق ایک بریفنگ ہوگی۔

اس کے بعد یہ مشق سمندری مرحلے میں داخل ہو جائے گی، جس کے دوران شریک بحری افواج باہم مربوط بحری مشقیں اور آپریشنل سلسلے انجام دیں گی۔ اس سمندری مرحلے کا مقصد سمندر میں عملی تربیت اور مربوط سرگرمیوں کے ذریعے پیشہ ورانہ افہام و تفہیم، آپریشنل ہم آہنگی اور مل کر کام کرنے کی صلاحیت کو مزید بہتر بنانا ہے۔

اے آئی ایم ای – 2026 میں آئی این ایس 'سہیادری' اور آئی این ایس 'کولش' کی شرکت بحری شراکت داریوں کو مضبوط کرنے اور آسیان کی بحری افواج کے ساتھ عملی تعاون کو فروغ دینے کے لیے بھارتی بحریہ کے مستقل عزم کو اجاگر کرتی ہے۔ یہ مشق بھارت کی 'ایکٹ ایسٹ پالیسی' اور 'مہاساگر' (خطوں میں سلامتی اور ترقی کے لیے باہمی اور ہمہ جہت پیش رفت) کے وژن کو آگے بڑھانے کے سلسلے میں منعقد کی جا رہی ہے۔

**********

 

 

 (ش ح –ا ب ن)

U.No:4383

(ریلیز آئی ڈی: 2317299) وزیٹر کاؤنٹر : 29