നികുതികൾ ഉൾപ്പെടെ 1,789.52 കോടി രൂപാ ചെലവിൽ ഡൽഹി പോലീസ് നടപ്പിലാക്കുന്ന ITMS പദ്ധതിക്ക് പ്രധാനമന്ത്രി ശ്രീ നരേന്ദ്ര മോദിയുടെ അധ്യക്ഷതയിൽ ചേർന്ന സാമ്പത്തിക കാര്യ മന്ത്രിസഭാ സമിതി (CCEA) അംഗീകാരം നൽകി. തിരഞ്ഞെടുത്ത 42 ട്രാഫിക് ഇടനാഴികൾ ഉൾക്കൊള്ളുന്ന പദ്ധതി 24 മാസത്തിനുള്ളിൽ മൂന്ന് ഘട്ടങ്ങളായാണ് നടപ്പിലാക്കുക. ഇതിനുപിന്നാലെ അഞ്ച് വർഷത്തെ പ്രവർത്തനവും പരിപാലനവും ഉണ്ടാകും.

ദേശീയ തലസ്ഥാനത്തെ ട്രാഫിക് മാനേജ്‌മെന്റ്, ഗതാഗത അടിസ്ഥാന സൗകര്യങ്ങൾ, യാത്രാ സൗകര്യം എന്നിവ മെച്ചപ്പെടുത്തുന്നതിനായി കേന്ദ്ര ഗവൺമെന്റും ഡൽഹി എൻ.സി.ടി ഗവൺമെന്റും നടത്തുന്ന വിപുലമായ ശ്രമങ്ങളുടെ ഭാഗമായുള്ള സുപ്രധാന സാങ്കേതികാധിഷ്ഠിത പദ്ധതി ഇനി ഇന്റലിജന്റ് ട്രാഫിക് മാനേജ്‌മെന്റ് സംവിധാനത്തിലൂടെ (ITMS) നടപ്പിലാക്കും. തത്സമയ ട്രാഫിക് വിവരങ്ങൾ, അഡാപ്റ്റീവ് ട്രാഫിക് സിഗ്നലുകൾ, ഓട്ടോമേറ്റഡ് ട്രാഫിക് നിയന്ത്രണ സംവിധാനം, സംയോജിത കമാൻഡ്-ആൻഡ്-കൺട്രോൾ സംവിധാനങ്ങൾ എന്നിവയിലൂടെ ഡൽഹിയിലെ നിലവിലുള്ള റോഡ് ശൃംഖലയെ കൂടുതൽ വിവേകപൂർവ്വം കൈകാര്യം ചെയ്യാൻ ഈ പദ്ധതി പ്രാപ്തമാക്കും.

ഏതാണ്ട് 71 ലക്ഷത്തോളം സജീവ രജിസ്റ്റർ ചെയ്ത വാഹനങ്ങളാണ് ഡൽഹിയിലുള്ളത്. വാഹനാധിഷ്ഠിത വളർച്ച റോഡ് അടിസ്ഥാന സൗകര്യ വികസനത്തേക്കാൾ ഗണ്യമായി വർധിച്ചു; അതേസമയം ട്രാഫിക് നിയന്ത്രണം ഇപ്പോഴും നിശ്ചിത സിഗ്നൽ സമയങ്ങളെയും മനുഷ്യ ഇടപെടലുകളെയും കാര്യമായി ആശ്രയിച്ചാണ് മുന്നോട്ടുപോകുന്നത്. റോഡിലെ തത്സമയ സാഹചര്യങ്ങളോട് സന്ദർഭാനുസൃതമായി പ്രതികരിക്കാൻ ട്രാഫിക് മാനേജ്‌മെന്റിനെ പ്രാപ്തമാക്കുന്നതിലൂടെ ലഭ്യമായ റോഡ് ശേഷി പരമാവധി പ്രയോജനപ്പെടുത്താനാണ് ITMS ലക്ഷ്യമിടുന്നത്.

നേട്ടങ്ങൾ:

* കാര്യക്ഷമമായ ട്രാഫിക് സിഗ്നലുകളും സുഗമമായ ഗതാഗതവും: അഡാപ്റ്റീവ് ട്രാഫിക് കൺട്രോൾ സിസ്റ്റങ്ങൾ നിലവിലുള്ള ട്രാഫിക് സാഹചര്യങ്ങൾക്ക് അനുസൃതമായി സിഗ്നൽ സമയങ്ങൾ സന്ദർഭാനുസൃതമായി ക്രമീകരിക്കുകയും നിർദ്ദിഷ്ട ഇടനാഴികളിലുടനീളം സിഗ്നലുകൾ ഏകോപിപ്പിക്കുകയും ചെയ്യും. ഇത് ഒഴിവാക്കാവുന്ന പ്രതിബന്ധങ്ങളും കാലതാമസങ്ങളും കുറയ്ക്കാൻ സഹായിക്കുന്നു.

* ആംബുലൻസുകൾക്കും അടിയന്തര വാഹനങ്ങൾക്കും മുൻഗണന: ഈ സംവിധാനം അടിയന്തര വാഹനങ്ങൾക്ക് ഗ്രീൻ കോറിഡോറുകളും മുൻഗണനാ ഗതാഗത സൗകര്യവും സുഗമമാക്കും. ഇത് തിരക്കേറിയ പാതകളിലൂടെ വേഗത്തിൽ കടന്നുപോകാൻ അവയെ പ്രാപ്തമാക്കുന്നു.

* ഗതാഗതക്കുരുക്കുകൾക്കും അപകടങ്ങൾക്കും അതിവേഗ പ്രതികരണം: ഗതാഗതക്കുരുക്ക്, മന്ദഗതിയിലുള്ള ഗതാഗതം, റോഡപകടങ്ങൾ എന്നിവ തത്സമയം കണ്ടെത്തുന്നത് ഡൽഹി പോലീസിന്റെ വേഗത്തിലുള്ള വഴിതിരിച്ചുവിടലുകൾക്കും പ്രവർത്തനപരമായ പ്രതികരണങ്ങൾക്കും വഴിയൊരുക്കും.

* യാത്രക്കാർക്ക് സമയബന്ധിതമായ വിവരങ്ങൾ: വേരിയബിൾ മെസ്സേജ് സൈൻ ബോർഡുകളും ഡിജിറ്റൽ പ്ലാറ്റ്‌ഫോമുകളും ഗതാഗതക്കുരുക്ക്, വഴിതിരിച്ചുവിടലുകൾ, പാർക്കിംഗ് ലഭ്യത, ട്രാഫിക് സാഹചര്യങ്ങൾ എന്നിവയെക്കുറിച്ചുള്ള വിവരങ്ങൾ നൽകും. വിവരങ്ങൾ നാവിഗേഷൻ സേവന ദാതാക്കളുമായും പങ്കുവെച്ചേക്കാം. ഇത് മെച്ചപ്പെട്ട യാത്രാ തീരുമാനങ്ങളെടുക്കാൻ യാത്രക്കാരെ സഹായിക്കുന്നു.

* സാങ്കേതികവിദ്യാധിഷ്ഠിതവും കൂടുതൽ സ്ഥിരതയുള്ളതുമായ നിയന്ത്രണ സംവിധാനം: റെഡ് ലൈറ്റ്, സ്റ്റോപ്പ് ലൈൻ ലംഘനങ്ങൾ, അമിതവേഗം, തെറ്റായ ദിശയിലുള്ള ഡ്രൈവിംഗ്, ഹെൽമെറ്റും സീറ്റ് ബെൽറ്റും ധരിക്കാതിരിക്കൽ, അനധികൃത പാർക്കിംഗ്, ഡ്രൈവിംഗിനിടയിലെ മൊബൈൽ ഫോൺ ഉപയോഗം തുടങ്ങിയ നിയമലംഘനങ്ങൾ ഓട്ടോമേറ്റഡായി കണ്ടെത്തുന്നതിനെ ഈ സംവിധാനം ശക്തിപ്പെടുത്തും. മോഷ്ടിക്കപ്പെട്ടവയും ഹോട്ട്-ലിസ്റ്റ് ചെയ്തവയും ബ്ലാക്ക് ലിസ്റ്റ് ചെയ്തതുമായ വാഹനങ്ങൾ, ആവർത്തിച്ച് നിയമലംഘനം നടത്തുന്നവർ, ഹിറ്റ് ആൻഡ് റൺ സംഭവങ്ങളുമായി ബന്ധപ്പെട്ട വാഹനങ്ങൾ എന്നിവ തിരിച്ചറിയാൻ AI അധിഷ്ഠിത വിശകലനങ്ങൾ സഹായിക്കും.

നഗരത്തിലുടനീളം സംയോജിത ട്രാഫിക് മാനേജ്‌മെന്റ്:

ട്രാഫിക് നിയന്ത്രണം, നിയമപാലനം, വിവര കൈമാറ്റം എന്നിവ സുരക്ഷിതമായ ഡാറ്റാ സെന്ററിന്റെയും ഡിസാസ്റ്റർ റിക്കവറി അടിസ്ഥാന സൗകര്യങ്ങളുടെയും പിൻബലത്തോടെ ട്രാഫിക് കമാൻഡ് ആൻഡ് കൺട്രോൾ സെന്ററുകൾ വഴി ഒരു പൊതു പ്ലാറ്റ്‌ഫോമിലേക്ക് കൊണ്ടുവരും. ഭാവിയിലെ സംയോജനവും വിപുലപ്പെടുത്തലും സാധ്യമാക്കുന്നതിന് ഈ സംവിധാനം ഓപ്പൺ സ്റ്റാൻഡേർഡുകളും എ.പി.ഐകളും (API) പിന്തുടരും.

ഈ പദ്ധതി 1,092 അഡാപ്റ്റീവ് ട്രാഫിക് കൺട്രോൾ സിസ്റ്റങ്ങളെയും 1,029 നിയമപാലന കേന്ദ്രങ്ങളെയും ഉൾക്കൊള്ളും. നിശ്ചിത പരിശോധന, കമ്മീഷനിംഗ്, സ്വീകാര്യത, പ്രവർത്തനക്ഷമതാ മാനദണ്ഡങ്ങൾ എന്നിവയ്‌ക്കെതിരെ മുമ്പത്തെ ഘട്ടം വിലയിരുത്തിയ ശേഷമായിരിക്കും തുടർന്നുള്ള ഓരോ ഘട്ടവും ഏറ്റെടുക്കുന്നത് എന്നതിനാൽ, പദ്ധതി നടപ്പാക്കൽ പ്രവർത്തനക്ഷമതാധിഷ്ഠിതമായിരിക്കും.

മത്സരാധിഷ്ഠിത ടെൻഡർ വഴി തിരഞ്ഞെടുക്കുന്ന മാസ്റ്റർ സിസ്റ്റം ഇന്റഗ്രേറ്റർ വഴിയായിരിക്കും ഡൽഹി പോലീസ് ഈ പദ്ധതി നടപ്പിലാക്കുക. പദ്ധതി നടത്തിപ്പിലും പ്രവർത്തന-പരിപാലന ഘട്ടങ്ങളിലുമുള്ള സാങ്കേതിക പരിശോധന, മേൽനോട്ടം, വാലിഡേഷൻ, അംഗീകാരം എന്നിവ ഉൾപ്പെടെയുള്ള സാങ്കേതിക സഹായങ്ങൾ പ്രോജക്റ്റ് മാനേജ്‌മെന്റ് കൺസൾട്ടന്റ് എന്ന നിലയിൽ സി-ഡാക് (C-DAC) നൽകും.

നിലവിലുള്ള റോഡ് ശൃംഖല കൂടുതൽ കാര്യക്ഷമമായി ഉപയോഗിക്കുന്നതിന് ആവശ്യമായ സാങ്കേതികവിദ്യയും തത്സമയ വിവരങ്ങളും നൽകിക്കൊണ്ട് ഡൽഹിയിലെ റോഡ്-ഗതാഗത അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുള്ള നിലവിലെ ശ്രമങ്ങൾക്ക് ITMS ഒരു പൂരകമായിരിക്കും. കൂടുതൽ സുഗമമായ ഗതാഗതം, കൂടുതൽ സുരക്ഷിതമായ റോഡുകൾ, വേഗത്തിലുള്ള അപകട പ്രതികരണം, കൂടുതൽ ഫലപ്രദമായ നിയമപാലനം, പൗരന്മാർക്ക് കൂടുതൽ നിശ്ചയദാർഢ്യമുള്ള യാത്രാനുഭവം എന്നിവയ്ക്ക് ഈ പദ്ധതി സംഭാവന നൽകുമെന്നാണ് പ്രതീക്ഷിക്കുന്നത്.

***

NK

( റിലീസ് ഐ.ഡി: 2317105) സന്ദര്‍ശക കൗണ്ടര്‍ : 3