زراعت اور کاشتکاروں کی فلاح و بہبود کی وزارت
پوسٹ کرنے کی تاریخ:
30 SEP 2026 3:05PM by PIB Delhi
زراعت و کسان بہبود اور دیہی ترقی کے مرکزی وزیر جناب شیوراج سنگھ چوہان نے اتر پردیش، تلنگانہ اور کرناٹک میں خریف مارکیٹنگ سیزن 2026-27 کے لیے پرائس سپورٹ اسکیم (پی ایس ایس) کے تحت کم از کم امدادی قیمت (ایم ایس پی) پر 5,547.99 کروڑ روپے کی مالیت کی خریداری کی منظوری دی ہے۔ اس فیصلے کا مقصد خاص طور پر دالوں اور تلہن کی کاشت کرنے والے کسانوں کے لیے منڈی کی قیمتوں میں کمی سے تحفظ فراہم کرنا اور ان کی پیداوار کے لیے مناسب معاوضہ یقینی بنانا ہے۔
جناب چوہان نے کہا کہ وزیر اعظم جناب نریندر مودی کی قیادت میں کسانوں کی بہبود، ان کی آمدنی میں اضافہ اور زراعت میں خود انحصاری کو مضبوط بنانا حکومت کی اہم ترجیحات میں شامل ہے۔ انہوں نے کہا کہ حکومت اس بات کو یقینی بنانے کے لیے کام کر رہی ہے کہ کسانوں کو ان کی پیداوار کا مناسب معاوضہ ملے اور خریداری کے نظام کو زیادہ شفاف اور قابل رسائی بنایا جائے۔ منظور شدہ خریداری منصوبے کے تحت تینوں ریاستوں کے کسانوں کو اہم دالوں اور تلہن کی بڑے پیمانے پر ایم ایس پی پر خریداری سے فائدہ ہوگا۔
اتر پردیش میں منظور شدہ خریداری میں سب سے بڑا حصہ 3,992.57 کروڑ روپے کا ہے۔ اس میں ایم ایس پی پر 4,66,000 میٹرک ٹن ارہر کی 3,937.70 کروڑ روپے اور 6,250 میٹرک ٹن مونگ کی 54.87 کروڑ روپے مالیت کی خریداری شامل ہے۔
کرناٹک کے دال اور تلہن کے کسانوں کے لیے پی ایس ایس کے تحت 1,107 کروڑ روپے کی خریداری کی منظوری دی گئی ہے۔ اس میں 1,15,500 میٹرک ٹن سویابین کی 659.27 کروڑ روپے، 38,250 میٹرک ٹن مونگ کی 335.83 کروڑ روپے اور 13,413 میٹرک ٹن سورج مکھی کی 111.90 کروڑ روپے مالیت کی خریداری شامل ہے۔
تلنگانہ میں 448.42 کروڑ روپے کی خریداری کی منظوری دی گئی ہے۔ اس میں پرائس سپورٹ اسکیم کے تحت ایم ایس پی پر 62,000 میٹرک ٹن سویابین کی 353.90 کروڑ روپے اور 10,766 میٹرک ٹن مونگ کی 94.52 کروڑ روپے مالیت کی خریداری شامل ہے۔
جناب چوہان نے کہا کہ اس فیصلے سے کسانوں کو زیادہ معاشی تحفظ حاصل ہوگا، جبکہ دالوں اور تلہن کی گھریلو پیداوار کو فروغ ملے گا اور دالوں اور خوردنی تیل کے معاملے میں خود انحصاری کی جانب بھارت کی کوششوں میں بھی مدد ملے گی۔ انہوں نے یقین دلایا کہ تمام مقررہ مراکز پر خریداری کے انتظامات شفاف رہیں گے اور کسانوں کو ان کی پیداوار کی رقم بروقت براہ راست ان کے بینک کھاتوں میں ادا کی جائے گی۔
******
ش ح۔ک ح۔ت ع
U. No. 4362