صفائی ستھرائی کے نظام کو ادارہ جاتی شکل دینے اور الیکٹرانک کچرے کے ماحول دوست اور ذمہ دارانہ انتظام کو یقینی بنانے کے اپنے عزم کے تحت، سرمایہ کاری اور عوامی اثاثہ جات کے انتظام کے محکمے (ڈی آئی پی اے ایم) نے محکمہ میں پیدا ہونے والے ای-کچرے کی سائنسی طریقے سے جمع آوری، علیحدگی اور تلفی کے لیے ایم ایس ٹی سی لمیٹڈ کے ساتھ شراکت داری کی ہے۔ ایم ایس ٹی سی لمیٹڈ،فولاد کی وزارت کے تحت کام کرنے والا منی رتن زمرہ-1 کا مرکزی سرکاری شعبے کا ادارہ ہے۔

یہ اقدام خصوصی مہم 6 (2 سے 31 اکتوبر 2026) کے تحت کیا جا رہا ہے، جس میں ماحولیات، جنگلات اور موسمیاتی تبدیلی کی وزارت کی جانب سے جاری کردہ ای-کچرا (مینجمنٹ) قواعد، 2022 کے مطابق ’’ای-کچرے کی مؤثر جمع آوری، علیحدگی اور تلفی‘‘ پر خصوصی توجہ مرکوز کی گئی ہے۔

ایم ایس ٹی سی کا خصوصی ای-نیلامی پلیٹ فارم کمپیوٹر، پرنٹر، سرور اور دیگر پرانے آئی ٹی اثاثوں جیسے ناکارہ الیکٹرانک آلات کی شفاف اور ضوابط کے مطابق تلفی میں سہولت فراہم کرے گا۔ اس شراکت داری سے نہ صرف دفاتر میں قیمتی جگہ خالی ہوگی بلکہ یہ بھی یقینی بنایا جائے گا کہ ای-کچرے کو مجاز ری سائیکلرز کے ذریعے مناسب طریقے سے ری سائیکل کیا جائے۔ اس طرح کچرے کو وسائل میں تبدیل کرنے کے ساتھ ساتھ حکومت کے لیے آمدنی بھی حاصل ہوگی۔

ڈی آئی پی اے ایم خصوصی مہم 6 کے وسیع تر اہداف کے حصول کے لیے پُرعزم ہے، جن میں سرکاری دفاتر میں صفائی ستھرائی کو مکمل طور پر یقینی بنانا، زیرِ التوا معاملات میں کمی لانا اور اپنے دفاتر میں پائیدار طریقۂ کار کو فروغ دینا شامل ہے۔

***********

ش ح۔ رک

U No. 4364

(ریلیز آئی ڈی: 2317046) وزیٹر کاؤنٹر : 11