این ایم ڈی سی لمیٹڈ نے چھتیس گڑھ کے ناگارنار میں سالانہ 20 لاکھ ٹن (ایم ٹی پی اے) پیداواری صلاحیت والے پیلیٹ پلانٹ کو شروع کردیا ہے۔ یہ 5427 کروڑ روپے کی لاگت والے مربوط منصوبے کا حصہ ہے، جس میں لوہے کی دھات کی پروسیسنگ، پائپ لائن اور پیلیٹ سازی شامل ہے۔ یہ منصوبہ بچیلی میں این ایم ڈی سی کے لوہے کی خام دھات کے کام کو کمپنی کے ناگارنار میں واقع اسٹیل پلانٹ سے جوڑتا ہے۔

اس منصوبے میں بچیلی میں لوہے کی دھات کی ایک نئی پروسیسنگ تنصیب، سالانہ 1.5 کروڑ ٹن صلاحیت والی سلری پائپ لائن اور ناگارنار میں 20 لاکھ ٹن سالانہ صلاحیت والا پیلیٹ پلانٹ شامل ہے۔ 135 کلومیٹر طویل سلری پائپ لائن پروسیس شدہ لوہے کے کنسنٹریٹ کو بچیلی سے ناگارنار تک پہنچاتی ہے، جس سے اس مواد کو سڑک کے ذریعے منتقل کرنے کا متبادل فراہم ہوتا ہے۔

پیلیٹ پلانٹ سے پہلی پیداوار کا براہ راست مشاہدہ این ایم ڈی سی کے صدر دفتر سے چیئرمین اور منیجنگ ڈائریکٹر امیتوا مکھرجی اور کمپنی کی اعلی قیادت نے کیا۔ خراب موسمی حالات کے باعث وہ منصوبے کی جگہ کا دورہ نہیں کر سکے۔

یہ تنصیبات این ایم ڈی سی کو بیلادیلا کی کانوں سے حاصل ہونے والی لوہے کی باریک ذرات اور سلائم کو پروسیس کرکے کنسنٹریٹ میں تبدیل کرنے اور اس کے بعد کنسنٹریٹ سے پیلیٹ تیار کرنے کے قابل بنائیں گی۔ پیلیٹ پلانٹ میں اسٹیل سازی میں استعمال کے لیے پیلیٹ تیار کرنے کی غرض سے اسٹریٹ گریٹ انڈیوریشن ٹیکنالوجی استعمال کی جاتی ہے۔

این ایم ڈی سی لمیٹڈ کے چیئرمین اور منیجنگ ڈائریکٹر امیتوا مکھرجی نے کہا کہ’’آج این ایم ڈی سی سے وابستہ ہر فرد کے لیے بے حد فخر کا دن ہے۔ اس منصوبے کو مکمل کرنا آسان نہیں تھا۔ اس میں پروسیسنگ تنصیبات، اصل سلری پائپ لائن اور پیلیٹ پلانٹ شامل تھے۔ لیکن آج ایک تاریخی دن ہے، جس کا ہم طویل عرصے سے انتظار کر رہے تھے۔ آج ہمارا اجتماعی خواب حقیقت بن رہا ہے۔‘‘

اس منصوبے کے شروع ہونے سے این ایم ڈی سی کی خام  لوہے کی دھات کی پوری ویلیو چین میں موجودگی مزید مضبوط ہوئی ہے، جس میں کان کنی اور دھات کی بہتری سے لے کر سلری کی منتقلی اور پیلیٹ کی پیداوار تک کے مراحل شامل ہیں۔ اس سے کمپنی کی مصنوعات میں ایک نئی ویلیو ایڈڈ مصنوعات کا اضافہ ہوا ہے اور بیلاڈیلا میں اس کے کام سے پیدا ہونے والے لوہے کے باریک ذرات اور سلائم کا زیادہ سے زیادہ استعمال بھی ممکن ہوگا۔

یہ منصوبہ این ایم ڈی سی کی وسیع تر توسیع اور کاروباری تنوع کی حکمت عملی کا حصہ ہے۔ کمپنی طویل مدت میں اپنی لوہے کی دھات کی پیداواری صلاحیت بڑھا کر 10 کروڑ ٹن کرنے کی سمت میں کام کر رہی ہے۔

سلری پائپ لائن بستر اور دنتے واڑہ اضلاع کے 61 دیہات سے ہوکر گزرتی ہے۔ اسے اس طرح تیار کیا گیا ہے کہ پروسیس شدہ لوہے کی دھات کی سڑک کے ذریعے نقل و حمل کو کم کیا جاسکے، دھات کی منتقلی کے لیے متبادل ذریعہ فراہم ہو، ریلوے پر انحصار کم کیا جاسکے اور این ایم ڈی سی کے بچیلی میں واقع کاموں اور ناگارنار کے درمیان مخصوص رابطہ قائم رہے۔

۔۔۔۔۔۔۔۔۔۔۔

ش ح۔ ش ت۔ن م۔

U- 4206

(ریلیز آئی ڈی: 2315863) وزیٹر کاؤنٹر : 8