કેન્દ્રીય ગૃહ અને સહકારિતા મંત્રી શ્રી અમિત શાહ આજે કેરળના કોલ્લમ ખાતે માતા અમૃતાનંદમયીજીના 73મા જન્મજયંતી મહોત્સવમાં મુખ્ય અતિથિ તરીકે ઉપસ્થિત રહ્યા હતા.

પોતાના સંબોધનમાં કેન્દ્રીય ગૃહ અને સહકારિતા મંત્રી શ્રી અમિત શાહે જણાવ્યું હતું કે અમ્માની ઉપસ્થિતિમાં હોવાથી વ્યક્તિ સાંસારિક તમામ જવાબદારીઓથી પર થઈને માનવ હોવાનો સાચો અર્થ સમજી શકે છે. તેમણે કહ્યું કે કોઈ સંવેદનહીન વ્યક્તિ પણ જ્યારે આ સ્થાનની મુલાકાત લે છે, ત્યારે અમ્મા દ્વારા કરવામાં આવેલી સેવા પ્રત્યે કૃતજ્ઞતાની લાગણીથી ભરાઈ જાય છે. આપણે અમ્માની જન્મજયંતી—જે 'વિશ્વ સેવા દિનમ' તરીકે ઉજવાય છે—તેને પૂરા દિલથી ઉજવી રહ્યા છીએ. જેણે પાંચ દાયકાથી પીડિતોના આંસુ લૂછવાને પોતાની સાધના અને ધર્મ બનાવ્યો છે તેની ઉજવણી ખરેખર સેવાના રૂપમાં હોવી જોઈએ.

શ્રી અમિત શાહે જણાવ્યું હતું કે વ્યવસ્થાઓ સમાજને ટકાવી રાખે છે, પરંતુ કરુણા—જે અમ્માનું સાક્ષાત સ્વરૂપ છે—તે તેને એકબીજા સાથે જોડી રાખે છે. અમ્મા જેવી મહાન વિભૂતિ જ માત્ર ભારતમાં જ નહીં પરંતુ સમગ્ર વિશ્વમાં લાખો લોકોને અન્યોના દુઃખોને સમજવાની બુદ્ધિ અને અનુભૂતિ આપે છે. અમ્માના સ્પર્શે વિશ્વભરના લાખો લોકોમાં એવો ઊંડો અહેસાસ જગાડ્યો છે કે તેઓ તેમના દુઃખમાં એકલા નથી; પરંતુ અમ્મા તેમની સાથે ઊભા છે.

કેન્દ્રીય ગૃહમંત્રીએ જણાવ્યું હતું કે તેમને 27 સપ્ટેમ્બર 2015, 3 એપ્રિલ 2016 અને 4 જૂન 2023 ના રોજ અમ્માને મળવાનું સૌભાગ્ય મળ્યું હતું. તેમણે કહ્યું કે 'વિશ્વ સેવા દિનમ' પર અમ્માના આશીર્વાદ મેળવવો એ તેમના જીવનની એક મોટી ઉપલબ્ધિ છે. તેમણે સૌથી પહેલા 2001 માં ગુજરાતમાં આવેલા વિનાશક ભૂકંપ દરમિયાન અમ્માની કરુણા જોઈ હતી, જ્યારે તેમણે 1,200 સુંદર મકાનો બનાવીને આખું ગામ વસાવ્યું હતું. તેમણે ટાઉન હોલ, શૈક્ષણિક સુવિધાઓ અને આરોગ્ય સેવાઓ માટે હોસ્પિટલ જેવી આવશ્યક સુવિધાઓ પૂરી પાડીને આ વસાહતનો વિકાસ કર્યો હતો. આજે આ ગામ 'અમ્માના ગામ' તરીકે ઓળખાય છે.

શ્રી અમિત શાહે જણાવ્યું હતું કે અમ્મા માટે 'સેવા દિવસ' ક્યારેય પૂરો થતો નથી, કારણ કે તેમની સેવા આખું વર્ષ—વર્ષના 365 દિવસ ચાલુ રહે છે. અમ્માનો જન્મ 27 સપ્ટેમ્બર 1953 ના રોજ કોલ્લમ જિલ્લાના પરયાકડવુ ગામમાં એક ગરીબ પરિવારમાં થયો હતો. ત્યારે કોઈ નહોતું જાણતું કે આ બાળક લાખો લોકોના જીવનમાંથી અભાવ, દુઃખ અને નિરાશા દૂર કરવાનું માધ્યમ બનશે અને અસંખ્ય જીવો માટે મુક્તિનો માર્ગ મોકળો કરશે.

કેન્દ્રીય ગૃહ અને સહકારિતા મંત્રીએ જણાવ્યું હતું કે જો કોઈ અમ્માના જીવનને નજીકથી જુએ, તો તેને ત્રણ પાસાઓમાં વહેંચી શકાય: ભાવ (ભક્તિ), કર્મ (કાર્ય) અને કરુણા. જન્મજાત કરુણા એ અમ્માના વ્યક્તિત્વનું મુખ્ય આકર્ષણ છે. અમ્માના આલિંગનનો આશીર્વાદ મેળવનાર કોઈપણ વ્યક્તિ જાણે છે કે તે માતા કરતાં પણ વધુ ઊંડા સ્નેહથી આત્માને ઝંકૃત કરે છે. જ્યારે દરેક વ્યક્તિ પોતાના જીવનમાં કોઈને કોઈ સમયે નિઃસ્વાર્થ સેવા કરે છે, પરંતુ બહુ ઓછા લોકો પોતાનું સમગ્ર અસ્તિત્વ તેને સમર્પિત કરે છે; અમ્માએ પોતાનું આખું જીવન નિઃસ્વાર્થ સેવામાં વિતાવ્યું છે. ઘણા લોકોમાં સેવાની ભાવના હોવા છતાં, બહુ ઓછા લોકો આ ભાવનાને સંસ્થાકીય રૂપ આપી શકે છે; પૂજનીય અમ્માએ ન માત્ર પોતાની સેવાભાવનાને સંસ્થાકીય રૂપ આપ્યું પરંતુ તેને એક વૈશ્વિક ચળવળમાં ફેરવી દીધી.

શ્રી અમિત શાહે જણાવ્યું હતું કે હાલમાં દેશભરમાં 86 અમૃતા વિદ્યાલયો છે. ગુજરાતનો ભૂકંપ હોય, સુનામી હોય, ઉત્તરાખંડની આપત્તિ હોય, વાયનાડનું ભૂસ્ખલન હોય કે કોવિડ-19 થી ઉદ્ભવેલા પડકારો હોય, અમ્મા અને તેમના અનુયાયીઓએ દરેક સંકટ સમયે સેવાનું એક અનુકરણીય ધોરણ સ્થાપિત કર્યું છે. અમ્માએ 10 લાખથી વધુ વૃક્ષો વાવવા અને આરોગ્ય, શિક્ષણ તથા આજીવિકાની પહેલોને પ્રોત્સાહન આપવાથી લઈને 101 ગામોને સંપૂર્ણ આત્મનિર્ભર બનાવવા સુધીના મહત્વપૂર્ણ કાર્યો કર્યા છે. શ્રી શાહે જણાવ્યું હતું કે અમ્માએ સંયુક્ત રાષ્ટ્ર મિલિનિયમ વર્લ્ડ પીસ સમિટ અને વિશ્વ ધર્મ સંસદ જેવા વિવિધ વૈશ્વિક મંચો પર હિન્દુત્વ અને સેવાનો સંદેશ આપ્યો છે.

કેન્દ્રીય ગૃહમંત્રીએ જણાવ્યું હતું કે જ્યારે ભારતે G-20 નું અધ્યક્ષપદ સંભાળ્યું ત્યારે અમ્માએ સિવિલ-20 ની અધ્યક્ષતા કરી હતી. અમ્માએ પ્રધાનમંત્રી શ્રી નરેન્દ્ર મોદીના 'નશા મુક્ત ભારત' અભિયાનને પણ પોતાના આશીર્વાદ આપ્યા છે; આ આશીર્વાદથી સમગ્ર દેશ નશા મુક્ત બનશે અને આપણે ચોક્કસપણે આ લક્ષ્ય પ્રાપ્ત કરીશું. "સર્વજન હિતાય, સર્વજન સુખાય" ના શાસ્ત્રોક્ત મંત્રને અપનાવીને અમ્માએ પોતાનું સમગ્ર જીવન તે જ માર્ગ પર ચાલવા માટે સમર્પિત કર્યું છે.

SM/IJ/JD