نوجوانوں کے امور اور کھیلوں کی مرکزی وزیر مملکت محترمہ رکشا کھڈسے نے آئزول کے دورے کے دوران میزورم میں کھیلوں کے نظام کا جائزہ لیا۔ اس دورے میں کھیلوں کے بنیادی ڈھانچے کو مضبوط بنانے، کھلاڑیوں کی معاونت اور شمال مشرقی خطے کے کھیلوں کے باصلاحیت نوجوانوں کے لیے مزید مواقع پیدا کرنے پر توجہ مرکوز کی گئی۔ یہ اقدامات وزیر اعظم جناب نریندر مودی کے مضبوط کھیل ثقافت کو فروغ دینے اور نوجوان ہندوستانیوں کے لیے کھیلوں کے مواقع کو وسعت دینے کے وژن کے مطابق ہیں۔

دورے کے دوران میزورم حکومت میں کھیل اور نوجوانوں کی خدمات کے وزیر مملکت پُو لالنگھنگلووا ہمر نے محترمہ رکشا کھڈسے کا استقبال کیا۔ انہوں نے ان سے ملاقات کی اور ریاست میں کھیلوں کے نظام کو مزید مضبوط بنانے کے اقدامات پر تبادلہ خیال کیا۔ بات چیت میں مرکز اور ریاست کے درمیان تال میل، کھیلوں کے بنیادی ڈھانچے کی ترقی، کھیلوں کے ٹیلنٹ کو پروان چڑھانے اور میزورم سمیت پورے شمال مشرقی خطے کے نوجوان کھلاڑیوں کے لیے مزید مواقع پیدا کرنے پر توجہ مرکوز کی گئی۔

محترمہ کھڈسے نے بعد ازاں آئزول میں اسپورٹس اتھارٹی آف انڈیا (ایس اے آئی) کے مرکز کا دورہ کیا، جہاں انہوں نے دستیاب کھیلوں کے بنیادی ڈھانچے کا جائزہ لیا اور کھلاڑیوں، کوچز اور معاون عملے سے ملاقات کی۔ دورے کے دوران ایس اے آئی کے اسسٹنٹ ڈائریکٹر جناب شیوَم یادو بھی موجود تھے۔

کھلاڑیوں سے بات چیت کے دوران محترمہ کھڈسے نے ان کی تربیت، مقابلوں کے تجربات اور مستقبل کی امنگوں کے بارے میں معلومات حاصل کیں اور کھیلوں میں بہترین کارکردگی کے لیے ان کی لگن کو سراہا۔ انہوں نے شمال مشرقی خطے کے نوجوان کھلاڑیوں کو معیاری کوچنگ، سائنسی معاونت، بحالی، غذائیت، مقابلوں میں شرکت کے مواقع اور قومی و بین الاقوامی سطح تک آگے بڑھنے کے مواقع فراہم کرنے کی اہمیت پر زور دیا۔

ایس اے آئی کی شمال مشرقی خطے میں نمایاں موجودگی ہے، جہاں یہ کھیلوں کے ٹیلنٹ کی ترقی اور کھیلوں کے فروغ سے متعلق پروگراموں کے نفاذ میں معاونت کر رہا ہے۔ محترمہ کھڈسے نے زور دیا کہ کھیلو انڈیا اسکیم کے تحت اقدامات کے ساتھ اس طرح کی ادارہ جاتی معاونت نوجوان کھلاڑیوں کے لیے کھیلوں میں وسیع تر مواقع پیدا کرنے میں مدد دے رہی ہے، تاکہ وہ نچلی سطح پر کھیلوں میں شرکت سے مسابقتی کھیلوں کی جانب آگے بڑھ سکیں۔

حکومت میزورم میں کھیلوں کے بنیادی ڈھانچے کو بھی مسلسل مضبوط بنا رہی ہے۔ آئزول کے ایس اے آئی تربیتی مرکز میں مصنوعی ہاکی ٹرف بچھانے اور روشنی کا انتظام کرنے کا کھیلو انڈیا بنیادی ڈھانچے کا منصوبہ ریاست میں ہاکی کی سہولتوں کو مضبوط بنانے کی سمت ایک اہم قدم ہے۔

محترمہ کھڈسے نے کہا کہ میزورم نے شمال مشرقی خطے میں کھیلوں کی بے پناہ صلاحیت کا مظاہرہ کیا ہے، خاص طور پر فٹ بال اور ہاکی میں۔ ریاست کے کھلاڑیوں کی کامیابیاں اس بات کی اہمیت کو اجاگر کرتی ہیں کہ مسلسل ادارہ جاتی معاونت کے ذریعے ٹیلنٹ کو مزید پروان چڑھایا جائے اور نوجوان کھلاڑیوں کو ان کے رہنے اور تربیت حاصل کرنے کی جگہوں کے قریب ہی کھیلوں کے مواقع فراہم کیے جائیں۔

لالریمیامی ہمرزوتے اس صلاحیت کی ایک نمایاں مثال ہیں۔ وہ میزورم کی پہلی خاتون اولمپین اور ایشین گیمز میں تمغہ جیتنے والی ریاست کی پہلی کھلاڑی بنیں۔ انہوں نے قومی سطح پر پہنچنے سے پہلے تھینزوال میں ایس اے آئی اکیڈمی میں تربیت حاصل کی۔ انہیں ارجن ایوارڈ 2025 کے لیے بھی منتخب کیا گیا ہے، جس کے ساتھ وہ یہ اعزاز حاصل کرنے والی میزورم کی پہلی کھلاڑی بن جائیں گی۔

محترمہ کھڈسے نے زور دیا کہ حکومت کا نقطہ نظر کھلاڑیوں کی ترقی کا ایک مکمل نظام تیار کرنا ہے، جس میں بنیادی ڈھانچے کے ساتھ ساتھ معیاری کوچنگ، کھیلوں کی سائنس، بحالی، غذائیت اور باقاعدہ مقابلوں میں شرکت کے مواقع بھی شامل ہوں۔ انہوں نے زمینی سطح سے کھیلوں کے مواقع کو وسعت دینے اور ٹیلنٹ کو پروان چڑھانے میں کھیلو انڈیا کے کردار کو اجاگر کیا۔

وزیر اعظم جناب نریندر مودی کے وژن کے تحت ملک بھر میں کھیلوں کی ثقافت کو فروغ دینے، زمینی سطح پر ٹیلنٹ کی شناخت کرنے اور نوجوان کھلاڑیوں کو بہترین کارکردگی تک پہنچنے کے لیے منظم مواقع فراہم کرنے پر زیادہ توجہ دی گئی ہے۔ محترمہ کھڈسے نے دہرایا کہ شمال مشرقی خطہ اپنی مضبوط کھیلوں کی ثقافت اور بے پناہ صلاحیتوں کے ساتھ ہندوستان کے کھیلوں کے سفر میں اہم کردار ادا کرتا ہے۔

انہوں نے کہا کہ کھلاڑیوں کے قریب کھیلوں کی سہولتوں کو مضبوط بنانا، نوجوان ٹیلنٹ کے لیے مواقع کو وسعت دینا اور مرکزی و ریاستی حکومتوں کے درمیان موثر تال میل یقینی بنانا اہم ہوگا، تاکہ میزورم اور وسیع تر شمال مشرقی خطے کے مزید کھلاڑی قومی اور بین الاقوامی سطح تک پہنچ سکیں۔

اس دورے سے محترمہ رکشا کھڈسے کی شمال مشرقی خطے کے نوجوانوں کے لیے کھیلوں کے مواقع کو مضبوط بنانے پر توجہ کی بھی توثیق ہوئی ہے۔ ساتھ ہی، نوجوانوں کے امور اور کھیلوں کی وزارت اور ایس اے آئی کی جانب سے خطے میں ایک مضبوط، زیادہ قابل رسائی اور کھلاڑیوں پر مرکوز کھیلوں کا نظام تیار کرنے کے لیے جاری کوششوں کو بھی اجاگر کیا گیا۔

 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔م م ع ۔ع ن)

U. No. 3899

(ریلیز آئی ڈی: 2313337) وزیٹر کاؤنٹر : 16